Буќа со керѓе о апостолија
21 Сине аменге бут пхаро кеда одвојнѓем амен лендар. Пало адава уклилем ко броди хем гелем право ко Кос, а о тајсутно диве ко Родос, хем адатхар гелем ки Патара. 2 Откеда аракхлем броди со џала сине ки Феникија, уклилем ки лесте хем цидинѓем те џа. 3 Дикхлем о остров Кипар тари лево страна, ама само накхлем лестар хем продолжинѓем е бродеа те џа спрема и Сирија. Ачхилем ко Тир, соске адатхе ваљани сине те растоваринел пе о броди. 4 Родинѓем е ученикон хем откеда аракхлем лен ачхилем адатхе ефта диве. А о ученикија повише пути вакерена сине е Павлеске ма те џал ко Ерусалим, соске е Девлескири сила* откринѓа ленге со ка случинел пе леске адари. 5 А кеда ало време те џа аменге, амен цидинѓем адатхар хем сарине ола, заедно пумаре ромњенцар хем пумаре чхавенцар, испратинѓе амен са џикоте на иклилем тари диз. Кеда реслем ко брего коте со сине о броди, пелем ко кочака, молинѓем амен 6 хем поздравинѓем амен ленцар. Тегани амен уклилем ко броди, а ола иранѓе пе ко пумаре кхера.
7 Пало адава амен бродеа гелем аменге таро Тир хем реслем ки Птолемаида. Адатхе поздравинѓем е пхрален хем ачхилем ленцар јекх диве. 8 О тајсутно диве цидинѓем адатхар хем реслем ки Цезареја. Адатхе гелем е Филипеске ко кхер, о проповеднико е шукар хаберескоро, кова со сине јекх таро ефта мурша колен со о апостолија биринѓе ко Ерусалим, хем ачхилем ки лесте. 9 Ле сине ле штар чхаја со на сине жениме* хем ола пророкујнена сине. 10 Адатхе ачхилем повише диве. Џикоте сием сине адатхе, тари Јудеја ало јекх пророко со викинела пе сине Агав. 11 Кеда ало ки аменде, леља е Павлескоро појас, пханља леа пле васта хем пле пре хем вакерѓа: „Аѓаар вакерела о Девел преку пли сила:* ’Аѓаар о Евреија ко Ерусалим ка пханден е мануше каскоро сој акава појас хем ка предајнен ле ко васта е манушенгере таро јавера народија‘“. 12 Кеда шунѓем адава, амен хем о јавера со сине адатхе, почминѓем те молина е Павле те на џал ко Ерусалим. 13 Ама о Павле вакерѓа: „Соске ровена хем мангена те керен те перав пишмани? Верујнен ман, спремно сиум на само те пханден ман, него хем те мерав ко Ерусалим башо анав е Господарескоро е Исусескоро“. 14 Кеда халилем кај нане те менинел пли одлука, амен смиринѓем амен хем вакерѓем: „Нека овел е Јеховаскири* волја“.
15 Откеда уло акава, амен спреминѓем амен друмоске хем цидинѓем те џа ко Ерусалим. 16 Несаве ученикија тари Цезареја але аменцар хем ингарѓе амен ко кхер е Мнасонескоро таро Кипар, кова со сине јекх таро прва ученикија, соске ваљани сине лесте те ова гостија. 17 Кеда реслем ко Ерусалим, о пхраља радосно доџакерѓе амен. 18 О тајсутно диве гелем е Павлеа ко Јаков. Адатхе сине са о старешине. 19 О Павле поздравинѓа лен хем пало адава детално вакерѓа ленге со керѓа о Девел машкар о мануша таро јавера нацие преку лескоро проповедибе.
20 Кеда шунѓе адава, почминѓе те славинен е Девле, а леске вакерѓе: „Пхрала, ту дикхеа кобор милја Евреија уле верникија хем кобор сарине ола верно икерена пе ко Закони. 21 Ама шундило кај ту сикавеа е Евреен, со живинена машкар о мануша таро јавера народија, те отфрлинен е Мојсеескоро закони. Вакерѓан ленге ма те керен пумаре чхавен сунети хем ма те икерен о еврејска обичаија. 22 А со те кера акана? Ола сигурно ка шунен кај ту аљан. 23 Адалеске, кер адава со вакераја туке: машкар аменде иси штар мурша кола со денѓе завет е Девлеске. 24 Ле акале манушен туја, хем кер са со ваљани спрема о Закони те шај ту хем ола те овен чиста хем платин баши ленде те шај кратко те шишинен пе. Аѓаар сарине ка џанен кај адава со шундило баши туте нане чаче, него кај ту живинеа спрема о Закони. 25 А е манушенге таро јавера народија, со уле верникија, бичхалѓем јекх писмо коте со пишинѓем амари одлука, кај ваљани те циден пе подур таро адава со сине дендо сар жртва е идоленге, таро рат, таро мас е животненгоро со сине тасавде хем таро неморал“.*
26 Аѓаар о Павле о тајсутно диве леља акале манушен пеа хем керѓа са те шај ов хем ола те овен чиста спрема о Закони. Тегани ов кхувѓа ко храми те шај те вакерел кеда ка завршинен о диве те шај те овен чиста спрема о Закони хем кеда ка ваљани те ден пе жртве секоле јекхеске лендар.
27 Кеда панда хари ваљани сине те завршинен адала ефта диве, о Евреија тари Азија кеда дикхле е Павле ко храми, керѓе цело народо те овел против лесте хем тегани ола астарѓе ле, 28 хем викинена сине: „Манушален таро Израел, поможинен аменге! Акава тано о мануш со сегде сикавела е манушен те овен против амаро народо, против о Закони хем против акава тхан. Чак е Гркон анѓа лен ко храми хем аѓаар мељарѓа акава свето тхан“. 29 Ола вакерѓе акава, соске англедер дикхле е Трофиме, кова со сине Ефешјани, сар пхирела е Павлеа ки диз хем ола мислинѓе кај о Павле анѓа ле ко храми. 30 Ки цело диз ули бари буна хем о народо прастандило ко храми. Тегани ола астарѓе е Павле, влечинѓе ле авријал таро храми, хем одма пханле о порте таро храми. 31 Ола мангле те мударен ле хем адалеске почминѓе те марен ле. Ама тегани е војскакере командантеске* јавинѓе кај ко цело Ерусалим ули бари буна. 32 Ов одма леља пеа војникон хем е командире* хем прастандило ки ленде. Кеда о мануша дикхле е војскакере команданте* хем е војникон, чхинавѓе те марен е Павле.
33 Тегани о команданти е војскакоро ало паше узи лесте, астарѓа ле хем заповединѓа те пханден ле дује синџиренцар. Пало адава почминѓа те пучел е манушен кој тано ов хем со керѓа. 34 А о мануша бут викинена сине хем несаве вакерена сине јекх бути, а о јавера, јавер бути. Тари бари галама ов на халило со точно уло, адалеске заповединѓа те ингарен е Павле ки касарна.* 35 Ама кеда о Павле ресља џи ко басамакија, о војникија мора сине те вазден ле хем те ингарен ле те шај те заштитинен ле таро насилна мануша со мангена сине те поврединен ле, 36 соске о мануша џана сине пали лесте хем викинена сине: „Мудар ле!“
37 Англедер те кхувен ки касарна, о Павле вакерѓа е војскакере командантеске: „Смејнава ли те вакерав туке нешто?“ Ов вакерѓа леске: „Значи џанеа те кере лафи ки грчко чхиб? 38 На сиан ли ту адава Египќанцо со англедер несаво време керѓа о мануша те бунинен пе против и влада хем леља пеа ки пустина 4.000 манушен со сине лен оружје?“ 39 Тегани о Павле вакерѓа леске: „Ме сиум Евреи, државјани таро Тарс, пенџарди диз тари Киликија. Молинава тут, дозволин манге те керав лафи е народоја“. 40 Кеда о команданти е војскакоро дозволинѓа е Павлеске те керел адава, о Павле денѓа знако пле вастеа те овел тишина. Кеда о народо чутинѓа, ов почминѓа те керел ленцар лафи ки хебрејско чхиб хем вакерѓа: