ПРВО ПИСМО ЏИ КО КОРИНЌАЊА

1 Ме о Павле, кова со сиум сине викимо те служинав сар е Христос Исусескоро апостоли спрема е Девлескири волја, а акате манцар тано хем амаро пхрал о Состенес, 2 пишинава акава писмо џи ко е Девлескоро собрание сој ко Коринт хем џи са околенде сој ко разна тхана, кола со верујнена ко Господари,* о Исус Христос, кова сој ленгоро хем амаро Господари. О Девел биринѓа тумен сар следбеникија е Христос Исусескере хем викинѓа тумен те овен света:*

3 Нека овел тумен о шукарипе со на заслужинаја ле хем о мир таро Девел, кова сој амаро Дад, хем таро Господари о Исус Христос.

4 Секогаш благодаринава ман е Девлеске башо адава со ов сикавѓа туменге пло шукарипе со на заслужинаја ле, сар следбеникија е Христос Исусескере. 5 Адалеске со сиен ко јекхипе е Христосеа, тумен добинѓен са - хем тумари способност шукар те проповединен е Девлескоро лафи, хем шукар те пенџарен е Девлескоро лафи. 6 Аѓаар тумен цврсто уверинѓен тумен ко хабери башо Христос. 7 Туменге на фалинела нијекх поклон таро Девел, џикоте едвај аџикерена те авел о време кеда амаро Господари о Исус Христос ка сикавел пли моќ. 8 О Девел ка поможинел туменге те ачховен цврста џи ко крајо, те шај ко диве кеда ка авел амаро Господари о Исус Христос, никој те на кривинел тумен кај керена нешто погрешно. 9 О Девел тано верно хем ов тано адава кова со викинѓа тумен те овен ко јекхипе лескере Чхавеа е Исус Христосеа, амаре Господареа.

10 Пхраљален, ко анав амаре Господарескоро е Исус Христосескоро, поттикнинава тумен сарине те овен сложна ко адава со вакерена хем машкар туменде те на овен поделбе, него те овен целосно ко јекхипе, иста мисленцар хем те размислинен ко исто начин. 11 Соске, е Хлоескере кхерутне јавинѓе манге, пхраљален, кај машкар туменде иси расправие. 12 Акава вакерава, соске секова јекх тумендар вакерела: „Ме сиум е Павлескоро“, „Ме сиум е Аполоскоро“, „Ме сиум е Кифаскоро“,* „А ме сиум е Христосескоро“. 13 Дали адава значинела кај о Христос тано поделимо? Те на сине о Павле ковимо ко стубо баши туменде? Или, е Павлеске ли ко анав крстинѓен тумен? 14 Благодарно сиум е Девлеске со на крстинѓум нијекхе тумендар, освен е Криспе хем е Гаје. 15 Адалеске, нијекх тумендар нашти те вакерел кај тано крстимо ко мло анав. 16 Оја, исто аѓаар крстинѓум е Стефанасе хем лескере кхерутнен, ама на џанава дали панда некас јавере крстинѓум. 17 Соске, о Христос на бичхалѓа ман те крстинав, него те вакерав о шукар хабери, хем адава на сар со керена лафи о учиме мануша, те шај те на керав е Христосескоро стубо мучибаске* те на врединел.

18 О хабери башо е Христосескоро мерибе ко стубо мучибаске тано глупаво околенге со ка овен уништиме. А аменге, кола со добинаја спасение, адава хабери сикавела е Девлескири сила. 19 Соске, ко Списија пишинела: „Ка уништинав и мудрост е мудра манушенгири, хем ка отфрлинав о размислибе е паметна манушенгоро“. 20 Кај тане акале светоскере* мудра мануша, учителија е законескере хем окола со мангена те распрајнен пе? На керѓа ли о Девел е светоскири мудрост те овел глупост? 21 Соске, о мануша таро акава свето, адалеске со иси лен доверба ки пли мудрост, на пенџарена е Девле. Адава со амен проповединаја е јаверенге дикхјола сар нешто глупаво, ама о Девел преку адава хабери одлучинѓа те спасинел околен со верујнена. Ко асавко начин о Девел сикавѓа пли мудрост.

22 Соске, о Евреија родена чудесна знакија хем о Гркија родена мудрост, 23 а амен проповединаја кај о Христос сине мудардо ко стубо, хем адава е Евреенге уло бар сопкибаске, а е јавере народонге, глупост. 24 Ама околенге сој викиме таро Девел - е Евреенге хем е Грконге - о Христос тано е Девлескири сила хем е Девлескири мудрост. 25 Соске, е Девлескири „глупост“ тани помудро таро мануша хем е Девлескири „слабост“ тани посилно таро мануша.

26 Пхраљален, тумен дикхена саве манушен викинѓа о Девел. Бут лендар англо мануша нане мудра, нане моќна хем на авена таро важна фамилие. 27 Ама адава со о свето дикхела ле сар глупаво, о Девел биринѓа ле те шај те лаџакерел адален сој мудра хем адава со о свето дикхела ле сар слабо, о Девел биринѓа ле те шај те лаџакерел адален сој зорале. 28 О Девел биринѓа адава со о свето дикхела ле сар нешто со нане важно - адава со о мануша дикхена ле сар потеле пестар хем со англи ленде нане ле нисави вредност - те шај те уништинел адава со о свето дикхела сар вредно. 29 О Девел керѓа адава те шај нијекх мануш те на фалинел пе англи лесте. 30 О Девел тано адава со керѓа те ова ко јекхипе е Христос Исусеа. О Христос откринѓа аменге е Девлескири мудрост хем е Девлескири праведност. Исто аѓаар, преку лесте о мануша шај те овен света хем преку и откупнина* шај те овен ослободиме, 31 те шај те овел баш аѓаар сар со пишинела ко Списија: „Окова со фалинела пе, нека фалинел пе е Јеховаја“.*

2 Адалеске пхраљален, кеда аљум ки туменде те вакерав туменге е Девлескири тајна,* на трудинѓум ман те воодушевинав тумен лафенцар или те сикавав туменге мли мудрост. 2 Наместо адава, кеда сиум сине туменцар, одлучинѓум те на керав лафи башо ништо јавер освен башо Исус Христос хем башо адава кај сине ковимо ко стубо. 3 Кеда аљум ки туменде, ме осетинава ман сине слабо хем тресинава сине тари дар. 4 Кеда керава сине лафи хем кеда проповединава сине, на керава сине адава уверлива лафенцар саве со користинена о мудра мануша, него мле лафија сикавена сине кобор тани моќно е Девлескири сила.* 5 Ме керѓум адава те шај те овел тумен вера ки е Девлескири сила, а на ки манушикани мудрост.

6 Амен машкар о духовно зрела мануша кераја лафи баши мудрост, ама на баши мудрост акале светоскири,* ни баши мудрост е владетеленгири таро акава свето,* кола со ка џан ки пропаст. 7 Него кераја лафи баши е Девлескири тајна,* која сој тани лескири гаравди мудрост. О Девел панда англедер те постојнел акава лошно свето* одрединѓа те постапинел спрема адаја мудрост, те шај амен те добина лестар слава. 8 Нијекх таро владетелија акале светоскере* на пенџарѓе адаја мудрост, соске те пенџарен ла сине, нане сине те мударен амаре баре Господаре. 9 Него, сар со пишинела ко Списија: „И јакх со на дикхља хем о кан со на шунѓа, хем адава со на ало е манушеске ко вило, адава о Девел спреминѓа околенге со мангена ле“. 10 Ама о Девел откринѓа аменге адала буќа преку пли сила,* соске е Девлескири сила* истражинела са, чак е Девлескере хор буќа.

11 Кова мануш џанела о мисле е јавере манушескере? Секова мануш џанела само адава со иси ле ко пло вило.* Аѓаар, ни јекх мануш на џанела е Девлескере мисле. Само е Девлескири сила* џанела лен. 12 Амен на приминѓем е светоскоро начин сар размислинела,* него приминѓем е Девлескири сила,* те шај те пенџара адава со о Девел мангипаја денѓа амен. 13 Амен исто аѓаар кераја лафи башо акала буќа, ама на користинаја лафија со сиклилем тари манушикани мудрост, него користинаја лафија кола со сиклилем тари е Девлескири сила,* те шај асавке лафенцар те објаснина о чачипа таро Девел.

14 Ама окова сој водимо таро манушикано размислибе, на прифатинела о буќа сој откриме преку е Девлескири сила.* Ов мислинела кај адала буќа тане глупост. Ов нашти те хаљовел лен, соске мануш ваљани те испитинел адала буќа аѓаар со ка поможинел ле е Девлескири сила.* 15 Тари јавер страна, окова мануш сој водимо тари е Девлескири сила* хаљовела са, ама ле нашти никој те хаљовел ле. 16 Сар со пишинела ко Списија: „Кој пенџарѓа е Јеховаскири* годи, па те шај те сикавел ле башо нешто?“ А амен иси амен е Христосескири годи.

3 Адалеске, пхраљален, ме нашти сине те керав туменцар лафи сар манушенцар сој тане водиме тари е Девлескири сила.* Ме ваљани сине те керав туменцар лафи сар манушенцар сој тане водиме таро манушикано размислибе, сар тикне чхавенцар со џана ко е Христосескоро друмо. 2 Денѓум тумен тхуд, а на зорали храна, соске панда на сиен сине спремна те хан зорали храна. Хем акана да на сиен спремна. 3 Тумен панда иси тумен о манушикано размислибе. Адава со иси љубомора хем акошибе машкар туменде, сикавела кај понашинена тумен сар о мануша таро акава свето. 4 Соске, кеда јекх вакерела: „Ме сиум е Павлескоро“, а о јавер: „Ме сиум е Аполоскоро“, зарем на понашинена тумен сар о мануша таро акава свето?

5 А кој тано о Аполо? Хем кој тано о Павле? Амен сием само слуге со поможинѓе туменге те овен верникија. Амен само керѓем адава со о Господари вакерѓа аменге те кера. 6 Ме садинѓум, о Аполо чхивѓа пани, ама о Девел керѓа те бајрол. 7 Адалеске, нане важно окова со садинела, а ни окова со чхивела пани, него о Девел, кова со керела те бајрол. 8 А окова со садинела хем окова со чхивела пани, керена заедно бути,* ама секој ка добинел награда спрема пло трудо. 9 Соске, амен сием е Девлескере соработникија, а тумен сиен е Девлескири нива, јекх градба сој керди таро Девел.

10 Адалеске со о Девел сикавѓа манге пло шукарипе со на заслужинаја ле, ме сиум сар јекх шукар главно градители. Ме чхивѓум о темели, ама некој јавер градинела упри лесте. Ама секој ваљани те пазинел сар градинела упро адава темели. 11 О Девел чхивѓа е Исус Христосе сар темели. Адалеске никој нашти те чхивел јавер темели. 12 Некој шај ка градинел упро темели хем ка користинел злато, сребро, скапоцена бара, а некој јавер шај ка користинел каш или пус. 13 Ама кеда ка авел о диве те овен испитиме, секоле манушескири бути ка дикхел пе сави тани. Адава ка овел откримо е јагаја, соске и јаг ка сикавел сар секова јекх градинѓа. 14 Ако ачховела адава со сине градимо упро адава темели, тегани окова со градинѓа ка добинел награда. 15 Ама ако тхабљола адава со о мануш градинѓа, адава мануш ка нашавел бут. Ов ка спасинел пе, ама ка овел сар мануш со едвај нашља тари јаг.

16 На џанена ли кај тумен сиен е Девлескоро храми хем кај е Девлескири сила* тани ки туменде? 17 Ако некој уништинела е Девлескоро храми, о Девел ка уништинел ле, соске е Девлескоро храми тано свето, хем тумен сиен адава храми.

18 Никој ма те ховавел коркори пес: кој мислинела кај тано мудро ко акава свето,* нека овел глупаво, соске аѓаар ка овел мудро. 19 Соске, и мудрост акале светоскири тани глупост англо Девел. Сар сој пишимо ко Списија: „О Девел дозволинела о мудра мануша коркори те перен ко пумаре лукава стапице“. 20 Хем акава да пишинела: „О Јехова* џанела кај о мисле е мудра манушенгере на врединена“. 21 Адалеске никој на ваљани те фалинел пе манушенцар, соске са тано тумаро: 22 о Павле, о Аполо, о Кифа,* о свето, о живото, о мерибе, адава сој акана, или адава со ка авел - са тано тумаро. 23 А тумен сиен е Христосескере, хем о Христос тано е Девлескоро.

4 О мануша ваљани те дикхен амен сар слуге е Христосескере, сар управителија* кола сој одговорна башо е Девлескере тајне.* 2 Хем о господарија таро управителија очекујнена те овен верна. 3 А манге ни хари нане важно сар би судинена манге тумен или несаво манушикано судо. 4 Уствари, ни ме на судинава коркори манге, соске мли совест вакерела манге кај на сиум криво башо ништо. Ама адава на сикавела кај сиум праведно. О Јехова* тано адава со судинела манге. 5 Адалеске, никаске ма судинен англедер те авел о време башо адава, уствари џикоте на авела о Господари. Ов ка керел те дикхјон о тајне сој гаравде ки темница хем ка сикавел со иси е манушен ко вило. Хем тегани секова мануш ка овел фалимо таро Девел башо буќа со керѓа.

6 Пхраљален, ме вакерѓум туменге акала буќа аѓаар со користинѓум мло пример хем е Аполоскоро, те шај те поможинав туменге те сикљовен акава правило: „Ма керен ништо јавер, освен адава сој пишимо“. Ако икерена тумен ко акава, нане те вазден тумен хем нане те дикхен јекхе мануше сар пошукар таро јавер. 7 Соске, со керела тут пошукар таро јавера, хем сој адава со иси тут, а на добинѓан ле? А ако добинѓан ле, соске фалинеа тут сар те пхене на добинѓан ле?

8 Дали иси тумен више са со ваљани туменге? Дали сиен више барвале? Дали бизо аменде почминѓен те владинен сар царија? Ка овел сине манге мило тумен те почминен сине те владинен сар царија, соске тегани амен да ка владина сине заедно туменцар. 9 Соске, манге дикхјола кај улем сар претстава ко театар е светоске, хем о мануша хем о ангелија дикхена амен. О Девел чхивѓа ман хем е јавере апостолен те икљова последна ки сцена сар мануша сој осудиме те мерен. 10 Амен дикхена амен сар делине е Христосескоро себепи, а тумен мислинена кај сиен мудра е Христосескоро себепи.* Амен дикхјоваја сар слаба, а тумен дикхјовена сар силна. Туменге о мануша сикавена чест, а амен дикхена амен сар потеле пестар. 11 Амен џи акана, а хем понадари да, сием бокхале, жедна, на сием доволно уравде,* сием марде хем нане амен кхер. 12 Амен мучно кераја бути амаре вастенцар. Кеда о мануша вреџинена амен, амен благословинаја лен.* Кеда прогонинена амен, амен стрпливо трпинаја. 13 Кеда о мануша каљарена амаро анав, амен ко кротко начин кераја ленцар лафи. Са џи акана, о мануша таро свето дикхена амен сар ѓубре, сар нешто со фрдела пе.

14 На пишинава акала буќа те шај те лаџакерав тумен, него те шај те дав тумен совет сар мле мангле чхаве. 15 Те овен да тумен 10.000 воспитувачија* со ка сикавен тумен сар те џан пало Христос, нане тумен бут дада. Соске, преку о Христос Исус, ме уљум туменге дад аѓаар со сикавѓум тумен о шукар хабери. 16 Адалеске молинава тумен, џан пало мло пример. 17 Адава себепи бичхалава е Тимотее ки туменде. Ов тано мло мангло хем верно чхаво ко служибе е Господареске. Ов ка сетинкерел тумен ко начинија сар ме керава ми служба е Христос Исусеске хем ка сетинкерел тумен ко буќа со сикавава сегде, ко секова собрание.

18 Несаве тумендар мислинена кај ме нане те авав ки туменде, хем адалеске ваздена пе. 19 Ама, ако тани е Јеховаскири* волја, панда хари ка авав ки туменде хем мангава те дикхав околен со ваздена пе, ама на мангава те џанав башо со ола керена лафи, него мангава те дикхав дали иси лен е Девлескири сила, или на. 20 Соске, амаре лафија на сикавена дали сием подложна е Девлескере Царствоске, него амаре постапке кола сој тане доказ кај иси амен е Девлескири сила. 21 Со мангена повише, те авав ки туменде каштеа, или мангипаја хем те овав туменцар кротко?

5 Шунѓум кај машкар туменде иси јекх мануш со живинела пле дадескере ромњаја. Асавко неморал* тано бут полошно таро адава со керена о мануша кола со нане верникија. 2 Зарем дичинена тумен адалеа? Наместо адава, на ваљани ли те овен тажна хем те циден асавке мануше тумендар? 3 Иако на сиум лично присутно туменцар, ме сиум туменцар ко мле мисле.* Ме више осудинѓум е мануше со керѓа акава, сар те пхене сиум адатхе туменцар. 4 Кеда кхедена тумен заедно ко анав амаре Господарескоро е Исусескоро, џанен кај ме ко мле мисле сиум туменцар. Хем исто аѓаар туменцар тани и сила амаре Господарескири е Исусескири. 5 Тумен мора те предајнен акале мануше е Сатанаске, те шај те цидел пе адава лошно влијание,* хем о собрание понадари да те овел ле исправно стави спрема о грево ко диве е Господарескоро.

6 Нане шукар со дичинена тумен акале буќаја. На џанена ли кај хари квасацо ушљарела цело хумер? 7 Циден о пурано квасацо те шај те овен нево хумер, адалеске со ваљани те овен бизо квасацо. Соске, о Христос денѓа пло живото сар жртва хем аѓаар уло амаро бакхро* баши Пасха.* 8 Адалеске ваљани те славина о празнико, на е мареа со иси ле о пурано квасацо хем на е квасацоја со претставинела о грево хем о лошнипе, него е мареа бизо квасацо со претставинела адава сој искрено хем чаче.

9 Ко мло писмо пишинѓум туменге те чхинавен те дружинен тумен е неморална* манушенцар, 10 ама на мислинава сине ко адава целосно те циден тумен е манушендар таро акава свето сој тане неморална, алчна, чора или со обожавинена идолен. Иначе ка ваљани те икљовен таро свето. 11 Ама акана пишинава туменге те чхинавен те дружинен тумен јекхе пхралеа ако тано неморално,* алчно, обожавинела идолен, вреџинела е јаверен, тано пијаница или чор. На ваљани чак ни те хан асавке манушеа. 12 Ме на сиум одговорно те судинав е манушенге сој тане авријал таро собрание. Тумен мора те судинен околенге сој ко собрание, 13 а о Девел ка судинел околенге сој авријал таро собрание. „Циден е лошно мануше сој машкар туменде!“

6 Ако некој тумендар акошља пе јекхе јавере пхралеа, ваљани ли те џал ко судо англо неправедна мануша, или ваљани те икљол англо света мануша* ко собрание? 2 На џанена ли кај о света мануша ка судинен е светоске? Ако тумен сиен адала со ка ваљани те судинен е светоске, на сиен ли способна те решинен потикне проблемија? 3 На џанена ли кај амен ка судина е ангеленге? Тегани, соске нашти те решина о секојдневна проблемија со појавинена пе акана? 4 Значи, ако ваљани те решина асавке проблемија со појавинена пе акана, тегани соске џана те судинен туменге о мануша со нане дело таро собрание? 5 Акава вакерава ле туменге те шај те лаџан. Нане ли машкар туменде ни јекх мудро мануш кова со шај те судинел машкар пле пхраља? 6 Наместо адава, пхрал пхрале икалела англо судо, хем адава англо мануша со нане верникија!

7 Ако тужинена тумен јекх јекхеа, тумен више нашавѓен. Соске на трпинена кеда тумаре пхраља керена туменге нешто лошно или керена туменге штета? 8 Наместо адава, тумен керена тумаре пхраленге лошнипе хем штета.

9 На џанена ли кај о неправедна мануша нане те наслединен е Девлескоро Царство? Ма ховавѓовен! Ни о неморална* мануша, ни окола со обожавинена идолија, ни окола со керена прељуба, ни о мурша со иси лен односија е муршенцар,* 10 ни о чора, ни о алчна, ни о пијанице, ни окола со вреџинена е јаверен, ни окола со силаја лена јаверенгере буќа, нане те наслединен е Девлескоро Царство. 11 А несаве тумендар сине асавке, ама акана о Девел пле силаја* тховѓа тумен, керѓа те овен света хем ко анав амаре Господарескоро е Исус Христосескоро вакерѓа кај сиен праведна.

12 Са тано манге дозволимо, ама са о буќа нане корисна. Са тано манге дозволимо, ама нане те мукхав ништо те контролиринел ман. 13 И храна тани е воѓеске хем о воги тано е хранаке, ама о Девел ка уништинел солдуј буќа. А о тело нане башо неморал,* него башо Господари хем о Господари тано башо тело. 14 Ама о Девел пле силаја воскреснинѓа е Господаре хем ка воскреснинел амен да.

15 На џанена ли кај тумаро тело припадинела е Христосеске? Тегани, исправно ли тано те лав адава со припадинела е Христосеске* хем те спојнав ле неморално џувљаја?* Ме никогаш нане те керав адава! 16 На џанена ли кај окова со спојнела пе е неморално џувљаја* тано јекх тело лаја? Соске, о Девел вакерела: „Ола о дуј ка овен јекх тело“. 17 А кој тано спојмо е Господареа, исто размислинела сар лесте.* 18 Нашен таро неморал!* Секова грево со керела ле о мануш тано аври таро лескоро тело, ама кој керела неморал грешинела против пло тело. 19 На џанена ли кај тумаро тело тано храми коте со живинела е Девлескири сила?* Хем адаја сила* добинѓен ла таро Девел те шај те овел ки туменде. Исто аѓаар, тумаро тело на припадинела туменге, него припадинела е Девлеске, 20 соске ов платинѓа бари цена туменге. Адалеске керен са те шај тумаре телоја те славинен е Девле!

7 Акана одговоринава туменге башо пучиба со пишинѓен манге. Пошукар ка овел јекхе муршеске те на женинел пе хем те на совел џувљаја. 2 Ама адалеске со о неморал* бут ширинѓа пе, секоле мурше нека овел ле пли ромни хем секоле џувља нека овел ла пло ром. 3 О ром ваљани те задоволинел о потребе пле ромњакере, а и ромни да ваљани те керел о исто пле ромеске. 4 Е ромња нане ла целосно право упро пло тело, него лакере роме иси ле. Исто аѓаар, е роме да нане ле целосно право упро пло тело, него лескере ромња иси ла. 5 Ма чхинавен јекх јекхестар акава право, освен ако договоринѓен тумен те овел аѓаар несаво време, те шај те посветинен адава време баши молитва. Ама пало адава палем овен заедно, соске ако на керена аѓаар шај ка нашти те контролиринен тумен, хем о Сатана шај те искушинел тумен. 6 Ме вакерава туменге акава те шај те џанен кај тано дозволимо те керен аѓаар, ама адава нане заповед. 7 А би мангава са о мануша те овен бижениме сар манде. Ама секас иси ле пло поклон таро Девел, јекх служинела леске ко акава начин, а јавер ко окова начин.

8 А околенге со нане ко брако хем е удовиценге вакерава кај тано пошукар те ачховен бижениме сар со сиум ме. 9 Ама ако нашти те контролиринен пе, нека женинен пе, соске пошукар тано те женинен пе него те тхабљовен тари силно желба.

10 Околенге сој ко брако вакерава акаја заповед која со на авела мандар, него таро Господари: и ромни ма те одвојнел пе таро пло ром. 11 Ама ако одвојнела пе, нека ачховел биженими или нека смиринел пе палем пле ромеа. Хем о ром ма те мукхел пле ромња.

12 Ама е јаверенге вакерава ме, а на о Господари: ако несаве пхрале иси ле ромни со нане вернико, хем ој согласинела пе те ачховел леа, ма те мукхел ла, 13 а исто аѓаар, ако јекхе ромња иси ла ром со нане вернико, хем ов согласинела пе те ачховел лаја, ма те мукхел пле роме. 14 Соске, о брако е ромескоро со нане вернико тано свето себепи лескири ромни која сој вернико, хем о брако е ромњакоро со нане вернико тано свето себепи лакоро ром кова сој вернико. Те на овел сине акава аѓаар, тумаре чхаве нане те овен сине чиста, ама акана ола тане света. 15 Ама, ако о ром или и ромни со нане вернико мангела те џал песке,* нека џал песке. Ки асавки ситуација о пхрал или и пхен на ваљани те ачховел пле брачно партнереа, соске о Девел викинѓа тумен те живинен ко мир. 16 Соске, котар ту сар ромни џанеа кај нане те спасине тле роме? Или, котар ту сар ром џанеа кај нане те спасине тле ромња?

17 Било сар те овел, секова јекх тумендар понадари да нека живинел аѓаар сар со денѓа ле о Јехова,* спрема о околностија со сине ле кеда о Девел викинѓа ле. Акава упатство вакерава ко са о собранија. 18 Ако некој сине више кердо сунети кеда сине викимо, нека ачхол аѓаар. А ако некој на сине кердо сунети кеда сине викимо, ма те керел пе сунети. 19 Нане важно дали јекх мануш тано кердо сунети, или на. Важно тано ов те икерел е Девлескере заповедија. 20 Секој нека ачхол аѓаар сар со сине кеда сине викимо. 21 Ако сиан сине робо кеда сиан сине викимо, ма секирин тут. Ама ако шај те ове слободно, користин и прилика. 22 Соске, секој со сине робо кеда о Господари викинѓа ле, овела ослободимо мануш кова со припадинела е Господареске. А исто аѓаар, секој со сине слободно мануш кеда о Господари викинѓа ле, овела е Христосескоро робо. 23 Тумен сиен скупо кинде. Ма овен више робија е манушенге. 24 Пхраљален, ачховен аѓаар сар со сиен сине кеда о Девел викинѓа тумен.

25 А околенге со никогаш на сине ко брако,* нане ман те вакерав ленге несави заповед таро Господари, него вакерава адава со ме мислинава, сар верно мануш колеске со о Господари сикавѓа милост. 26 Ко акава пхаро време, најшукар тано е манушеске те ачховел сар сој. 27 Ако иси тут ромни, ма роде начин те одвојне тут латар. А ако сиан бизи ромни, ма роде ромни. 28 Ама, ако женинеа тут, на кереа грево. Хем ако некој со никогаш на сине ко брако одлучинела те женинел пе, на керела грево. Ама асавкен ка овен лен неве проблемија ко живото.* Ме мангава те поможинав туменге те на овен тумен асавке проблемија.

29 Пхраљален, мангава те вакерав туменге акава: ачхило панда хари време. Отакана окола со иси лен ромња, нека овен сар окола со нане лен. 30 Окола со ровена, нека овен сар окола со на ровена. Окола со радујнена пе, нека овен сар окола со на радујнена пе. Окола со кинена, нека овен сар окола со нане лен ништо. 31 Хем окола со користинена о свето, нека овен сар окола со на користинена ле целосно. Соске, и сцена акале светоскири менинела пе. 32 Ме мангава те на секиринен тумен башо ништо. Окова со нане женимо грижинела пе башо адава сој е Господарескоро хем сар те угодинел е Господареске. 33 Ама окова сој женимо грижинела пе башо буќа е светоскере хем сар те угодинел пле ромњаке, 34 адалеске лескоро вило тано поделимо. Исто аѓаар, и џувли со нане женими или окоја со никогаш на сине женими, грижинела пе башо адава сој е Господарескоро, те шај лакоро тело хем лакере мисле* те овен света. А и џувли сој женими грижинела пе башо буќа е светоскере хем сар те угодинел пле ромеске. 35 Ме вакерава туменге акава башо тумаро шукарипе. На мангава те ограничинав тумен,* него мангава те поттикнинав тумен те понашинен тумен сар со ваљани, те шај те служинен е Господареске цело вилеа бизо нешто те лел тумаро внимание.

36 Ама, ако некој сој тано биженимо мислинела кај нашти те контролиринел пе хем кај пошукар ка овел те женинел пе, посебно ако више тано зрело ко тело хем ки годи,* тегани нека керел адава со мангела, на грешинела. Асавке нека женинен пе. 37 Ама ако некој тано сигурно кај нане ле потреба те женинел пе хем кај шај те контролиринел пле желбе, хем ко пло вило одлучинѓа те ачхол аѓаар, тегани шукар керела. 38 Значи, окова со кхувела ко брако керела шукар, ама окова со на кхувела ко брако керела панда пошукар.

39 И ромни ваљани те ачхол ко брако* пле ромеа са џикоте ов тано џивдо. Ама, ако лакоро ром мерела,* тегани ој тани слободно те женинел пе касаја мангела, само ако ов тано следбенико е Господарескоро. 40 Ама, ме мислинава кај ој ка овел посреќно ако ачховела аѓаар сар сој. А уверимо сиум кај манде да иси ман е Девлескири сила.*

8 А акана пишинава туменге баши храна која со дела пе сар жртва е идоленге. Сарине амен џанаја акаја бути. Ама, адава со о мануш џанела керела ле гордо, а о мангипе изградинела е јаверен. 2 Ако некој мислинела кај џанела нешто, ов панда на хаљола адаја бути сар со ваљани. 3 Ама ако некој мангела е Девле, тегани о Девел џанела ле.

4 А кеда кераја лафи башо адава те хал пе адава сој дендо сар жртва е идоленге, амен џанаја кај јекх идоли нане чаче девел хем џанаја кај иси само јекх Девел. 5 Уствари, о мануша буте буќенге вакерена кај тане девела, бизи разлика дали упре ко небо или теле ки пхув. Хем чаче иси бут „девела“ хем бут „господарија“. 6 Ама, аменге постојнела само јекх Девел, о Дад. Са о буќа авена лестар хем амен живинаја леске, хем аменге постојнела само јекх Господари, о Исус Христос. Са о буќа але преку лесте хем амен живинаја преку лесте.

7 Ама, са о мануша на хаљовена акава. Несаве англедер обожавинена сине идолија, адалеске кеда ола хана нешто со англедер сине дендо сар жртва јекхе идолеске, ола дикхена ко адава сар нешто сој поврзимо е идолеа. Тегани ленгири совест мучинела лен, соске тани слабо. 8 А и храна нане те анел амен попаше е Девлеа - ни нашаваја нешто ако на хаја, ни палем добинаја нешто ако хаја. 9 Ама пазинен о право со иси тумен те биринен, те на овел бар сопкибаске со ка керел окола сој слаба те грешинен. 10 Соске, иако ту џанеа кај о идолија на врединена ништо, окова со иси ле слабо совест шај те дикхел тут сар хаја ко храми јекхе идолескоро. Адава шај те охрабринел ле ов да те хал адава сој дендо сар жртва е идоленге хем аѓаар те џал против пли совест. 11 Чак ако џанеа кај шај те ха асавко хајбе, ту уништинеа и вера акале слабо манушескири. Ма бистре, ов тано тло пхрал каске со о Христос муло. 12 Кеда ту грешинеа против тло пхрал ко асавко начин хем поврединеа лескири слабо совест, ту грешинеа против о Христос. 13 Адалеске, ако адава со хава керела мле пхралескири вера те слабонел, ме никогаш нане те хав мас. Нане те керав ништо со ка слабонкерел и вера мле пхралескири.

9 Зарем ме на сиум слободно те керав адава со мангава? Зарем ме на сиум апостоли? Зарем ме на дикхљум е Исусе, амаре Господаре? Зарем тумен на сиен доказ кај ме сиум апостоли? 2 Иако о јавера на дикхена ки манде сар апостоли, туменге ме сигурно сиум апостоли. Тумен сиен о печати кова со докажинела кај ме сиум апостоли е Господарескоро.

3 А околенге со критикујнена ман, те шај те бранинав ман, иси ман те вакерав ленге акава: 4 нане ли амен право те ха хем те пија? 5 Нане ли амен право те овел амен ромни која со исто аѓаар тани вернико хем ој да те авел аменцар, сар со керена адава о јавера апостолија, е Господарескере пхраља хем о Кифа?* 6 Само ме хем о Варнава ли ваљани те кера бути те шај те издржина амен? 7 Кова војнико служинела ко пло трошако? Кова мануш со садинела дракха ки пли нива, на хала таро адала дракха? Или, кова мануш со аракхела јекх стадо, на пиела таро тхуд со дела о стадо?

8 На вакерава акава соске обично о мануша керена аѓаар, него соске о Закони да керела лафи башо акала буќа. 9 Соске, е Мојсееске ко закони пишинела: „Ма пхан о муј е гурувескоро џикоте леа одвојнеа о гив таро стебло“. Зарем о Девел грижинела пе само е гурувенге? 10 Или ов вакерѓа адава амаро себепи? Чаче, адава сине пишимо амаро себепи, соске хем окова со оринела и нива хем окова со одвојнела о гив таро стебло ваљани те керен пумари бути аѓаар со ка надинен пе кај ка добинен пло дело тари жетва.

11 Ако амен делинѓем туменцар* о буќа со авена таро Девел, погрешно ли тано те добина* тумендар материјално поддршка? 12 Ако е јавере манушен иси лен право те добинен адава тумендар, нане ли амен панда побаро право те добина адава тумендар? Ама, амен на користинѓем адава право, него трпинѓем ки секоја пхари ситуација те шај те на чхинава никас таро адава те верујнел ко шукар хабери башо Христос. 13 На џанена ли кај окова со керела бути ко храми, хала таро буќа со о мануша анена ко храми хем окова со служинела ко жртвенико, добинела дело тари жртва со дела пе ко жртвенико? 14 Аѓаар о Господари да заповединѓа, окола со проповединена о шукар хабери, те живинен таро шукар хабери.

15 Ама ме на искористинѓум ништо таро акава. Хем на пишинѓум туменге акава адалеске со родава тумендар нешто акана. Пошукар ка мерав него те керав адава. Никаске нане те дозволинав те лел мандар адава колеа со шај те фалинав ман! 16 А ако вакерава о шукар хабери, адалеа на ваљани те фалинав ман, соске адава сиум дужно те керав. Чаче, тешко манге ако на вакерава о шукар хабери! 17 Ако керава адава доброволно, ка добинав награда, ама чак ако керава адава бизо те мангав, сепак адаја тани задача со денѓа* ман о Девел. 18 Тегани која тани мли награда? Мли награда тани те проповединав о шукар хабери бизо те платинел пе манге башо адава, аѓаар на злоупотребинава мло право со иси ман сар проповеднико е шукар хаберескоро.

19 Иако ме сиум слободно мануш, ме коркори керѓум ман робо са е манушенге, те шај те анав ко е Христосескоро друмо кобор со шај повише манушен. 20 Е Евреенге сиум сине сар Евреи, те шај те анав е Евреен ко е Христосескоро друмо. Околенге сој тело Закони сиум сине сар некој сој тело Закони, иако ме на сиум тело Закони, те шај те анав ко е Христосескоро друмо околен сој тело Закони. 21 Околенге сој бизо Закони сиум сине сар некој сој бизо Закони - иако на сиум бизо е Девлескоро закони, него сиум тело е Христосескоро закони - те шај те анав ко е Христосескоро друмо околен сој бизо Закони. 22 Околенге сој слаба сиум сине слабо, те шај те анав ко е Христосескоро друмо околен сој слаба. Сариненге сиум сине са, те шај ко секова начин те спасинав некас. 23 Керава са башо шукар хабери, те шај те проповединав ле е јаверенге.

24 На џанена ли кај ки јекх трка са о тркачија прастана, ама само јекх добинела и награда? Адалеске, прастан ко асавко начин те шај те добинен и награда. 25 А секова натпреварувачи сикавела самоконтрола ко са. Ола керена адава те шај те добинен круна таро листија која со распадинела пе, а амен кераја адава те шај те добина награда која со на распадинела пе. 26 Ме на прастава бизи цел хем на кхувава ме вастеа ко чучо, 27 него марава* мло тело хем керава ле сар мло робо, те шај откеда проповединѓум е јаверенге, те на овав ме отфрлимо.

10 Пхраљален, мангава те џанен кај са амаре парапапија сине тело облако хем сарине ола накхле таро море. 2 Хем сарине ола крстинѓе пе аѓаар со сине ко јекхипе е Мојсееа кеда сине тело облако хем кеда накхле таро море. 3 Сарине ола хале и исто духовно храна 4 хем сарине ола пиле таро исто духовно пани. Ола пиле тари духовно карпа која со џала сине ленцар. Адаја карпа претставинела сине е Христосе. 5 Ама побаро дело лендар на угодинѓе е Девлеске, адалеске сине мударде ки пустина.

6 Адава со уло ленцар тано аменге пример ма те манга те кера адава сој лошно, сар со керѓе ола. 7 Ма те обожавина идолија, сар со керѓе несаве лендар, сар со пишинела ко Списија: „О народо бешља те хал хем те пиел, па уштило те веселинел пе“. 8 Ма те кера неморал,* сар со керѓе несаве лендар хем ко јекх диве муле 23.000 џене. 9 Ма те искушина е Јехова,* сар со керѓе несаве лендар хем адалеске муле таро сапа. 10 Ма те жалина амен, сар со керѓе несаве лендар хем адалеске сине мударде таро е Девлескоро ангели. 11 Са адала буќа со случинѓе пе ленге тане пример аменге хем пишиме тане сар предупредување аменге со живинаја ко крајо акале светоскоро.*

12 Значи, кој мислинела кај терѓола, нека пазинел те на перел. 13 Секова искушение со иси тумен, сине е јаверен да. Ама о Девел тано верно хем нане те мукхел те овен искушиме повише таро адава со шај те издржинен, него ка поможинел туменге кеда иси тумен искушение те шај те издржинен ле.

14 Адалеске, мангле пхраљален, нашен таро идолопоклонство. 15 Керава туменцар лафи сар манушенцар кола со шукар хаљовена о буќа. Адалеске, коркори одлучинен дали адава со вакерава тано исправно. 16 Кеда пијаја тари чаша баши благодарност колаке со благодаринаја е Девлеске, нане ли амен корист таро е Христосескоро рат? Кеда хаја таро маро кова со пхагаја, нане ли амен корист таро е Христосескоро тело? 17 Адалеске со иси јекх маро, сарине амен сием јекх тело, иако сием бут џене, соске сарине хаја адава јекх маро.

18 Размислинен башо Израелција. Зарем окола со хана таро жртве кола со дена пе ко храми, на делинена ли адала жртве е жртвеникоја? 19 Дали акалеа мангава те вакерав кај јекх идоли, или адава со дела пе сар жртва леске значинела нешто? 20 На. Него вакерава кај кеда о мануша таро јавера народија дена жртве, ола дена жртве е демоненге, а на е Девлеске. А ме на мангава те овел тумен нешто е демоненцар. 21 Нашти те пиен тари чаша е Јеховаскири* хем тари чаша е демоненгири. Нашти те хан тари е Јеховаскири* софра хем тари е демоненгири софра. 22 Или, мангаја те кера е Јехова* љубоморно? Зарем сием посилна лестар?

23 Са тано дозволимо, ама нане са корисно. Са тано дозволимо, ама са на изградинела. 24 Никој те на родел пли корист, него и корист е јаверескири.

25 Хан таро било саво мас со бикинела пе ко пазари бизо те мучинел тумен тумари совест хем ма испитинен ништо. 26 Соске, ко Списија пишинела: „Е Јеховаскири* тани и пхув хем са со иси ки лате“. 27 Ако некој со нане вернико канинела тумен ко хајбе, хем тумен одлучинена те џан, тегани хан са со ка икалел пе англи туменде бизо те мучинел тумен тумари совест хем ма испитинен ништо. 28 Ама ако некој вакерела туменге: „Акава сине дендо сар жртва е идоленге“, тегани ма хан себепи адалескоро со вакерѓа туменге, те шај те на мучинел никас лескири совест. 29 На мислинава ки тли совест, него ки совест е јаверескири. Иако иси ман слобода, на мангава мли слобода те овел судими тари е јаверенгири совест. 30 Чак ако благодаринава е Девлеске башо адава со хава, хем иси ман право те хав адава, тегани соске те хав ако башо адава о јавера ка керен лошно лафи мандар?

31 Значи, било те хан или било те пиен или било со јавер те керен, керен са баши е Девлескири слава. 32 Ма овен тумен себепи те сопкинен пе ни о Евреија, ни о Гркија, ни е Девлескоро собрание, 33 сар ме со трудинава ман те угодинав сариненге ко са хем на родава мли корист, него и корист буте манушенгири, те шај те овен спасиме.

11 Џан пало мло пример, сар ме со џава пало е Христосескоро пример.

2 Пофалинава тумен адалеске со секогаш сетинена тумен ки манде хем со икерена тумен ко са адава со сикавѓум тумен. 3 Ама, мангава те џанен кај поглавари секоле ромеске тано о Христос, поглавари е ромњаке тано о ром, а поглавари е Христосеске тано о Девел. 4 Кеда јекх мурш со молинела пе или со пророкујнела учхарела пло шеро, ов лаџакерела пло шеро. 5 А кеда јекх џувли молинела пе или пророкујнела хем лакоро шеро нане учхардо, ој лаџакерела пло шеро, соске адава тано исто сар те пхене лакоро шеро тано муравдо. 6 Соске, ако јекх џувли на учхарела пло шеро, нека чхинел пле бала. Ама ако е џувљаке тано лаџаво те чхинел пле бала или те муравел пло шеро, тегани нека учхарел пло шеро.

7 А о мурш на ваљани те учхарел пло шеро, соске ов тано слично сар о Девел хем ов анела слава е Девлеске, а и џувли анела слава е муршеске. 8 Соске, о Девел на керѓа е мурше таро е џувљакоро тело, него ов керѓа е џувља таро е муршескоро тело. 9 Хем о мурш на сине кердо баши џувли, него и џувли сине керди башо мурш. 10 Адава себепи хем е ангеленгоро себепи, и џувли ваљани те учхарел пло шеро те шај адалеа те сикавел кај поштујнела е муршескоро авторитети.

11 Сепак, ко е Господарескоро собрание, и џувли нашти бизо мурш хем о мурш да нашти бизи џувли. 12 Соске, сар и џувли со авела таро е муршескоро тело, аѓаар о мурш да тано бијамо тари џувли, ама са авела таро Девел. 13 Тумен коркори проценинен дали личинела јекхе џувљаке те молинел пе е Девлеске англо јавера бизо те учхарел пло шеро? 14 Нане природно е мурше те овен ле баре бала, соске адава лаџакерела ле, 15 ама е џувља те овен ла баре бала, адава анела лаке чест. Соске, и бал сине лаке денди сар шамија. 16 Ама ако некој мангела те распрајнел пе башо акава хем мангела тумен те прифатинен јекх јавер обичај, вакерен леске кај амен хем са е Девлескере собранија нане амен јавер обичај.

17 Тумаре состанокија керена туменге повише штета него со поможинена тумен, адалеске ме нашти те пофалинав тумен џикоте дава тумен акала упатствија. 18 Сар прво, шунава кај кеда заедно кхедена тумен ко собрание иси поделбе машкар туменде, хем ме верујнава кај нешто таро адава тано чаче. 19 Соске, машкар туменде сигурно ка овен хем секте,* те шај аѓаар јасно те дикхјол кас тумендар о Девел прифатинела.

20 Кеда кхедена тумен заедно те хан е Господарескири вечера, тумен на керена адава сар со ваљани. 21 Соске, кеда авела о време те хан е Господарескири вечера, тумен прво хана тумари вечера, адалеске некој тано бокхало, а некој тано мато. 22 Нане тумен ли тумаре кхера коте со шај те хан хем те пиен? Или на сикавена поштовање спрема е Девлескоро собрание хем понижинена околен сој чороле? Со те вакерав туменге? Ваљани ли те пофалинав тумен? Башо акава нашти те пофалинав тумен.

23 Ме сикавѓум тумен адава со ме сиклиљум таро Господари: и рат кеда ваљани сине те овел предајмо, о Господари о Исус леља маро, 24 благодаринѓа пе е Девлеске, пхагља о маро хем вакерѓа: „Акава претставинела мло тело со дела пе сар жртва туменге. Керен акава те сетинен тумен ки манде“. 25 Исто керѓа е чашаја да, хем откеда хаља и вечера, вакерѓа: „Акаја чаша претставинела о нево сојуз* кова со ка важинел преку мло рат. Керен акава, секогаш кеда пиена латар, те сетинен тумен ки манде“. 26 Соске, секогаш кеда хана акава маро хем пиена тари акаја чаша, тумен вакерена башо мерибе е Господарескоро, са џикоте ов на авела.

27 Адалеске, секова јекх со хала о маро хем пиела тари чаша е Господарескири, а нане достојно, ка грешинел против е Господарескоро тело хем рат. 28 Адалеске, секова јекх ваљани прво шукар те испитинел коркори пес дали тано достојно, хем пало адава ов шај те хал таро маро хем те пиел тари чаша. 29 Соске, кој хала хем пиела, а на хаљовела кај адава со хала хем пиела претставинела е Господарескоро тело, анела осуда коркори песке. 30 Адалеске бут машкар туменде тане слаба хем насвале, а бут џене муле* да.* 31 Ама ако шукар испитинаја коркори амен, нане те ова осудиме. 32 А о Јехова* кеда судинела аменге, ов воспитинела амен, те шај ма те ова осудиме заедно е светоја. 33 Адалеске, пхраљален, кеда ка кхеден тумен те хан адаја вечера, аџикерен џикоте на авена сарине. 34 Ако некој тано бокхало, нека хал кхере, те шај ма те овен осудиме кеда кхедена тумен заедно. А о јавера буќа ка решинав лен кеда ка авав адари.

12 Пхраљален, мангава шукар те хаљовен о поклонија со авена тари е Девлескири сила.* 2 Тумен џанена, кај англедер те овен верникија,* сиен сине ховавде те служинен е идоленге кола со нашти ни те керен лафи. Тумен керена сине са адава со ола мангена. 3 Адалеске мангава те џанен кај нијекх сој водимо тари е Девлескири сила* на вакерела: „О Исус тано дендо арман“, хем нијекх нашти те вакерел: „О Исус тано Господари“, ако нане водимо тари е Девлескири сила.*

4 О поклонија тане различна, ама е Девлескири сила* тани јекх. 5 Иси различна начинија сар те служинел пе, ама о Господари тано јекх. 6 Иси различна начинија сар о Девел влијајнела упро мануша те шај ола те керен различна буќа, ама о Девел тано јекх. 7 А јасно дикхјола кај е Девлескири сила* поможинела секоле јекхеске те овел ки корист е јаверенге. 8 Значи, е Девлескири сила* дела јекхеске и способност мудро те керел лафи, хем адаја исто сила дела е јавереске и способност те вакерел адава со о јавера на џанена. 9 Адаја исто сила* дела јекхеске вера, а јавереске и способност те сасљарел,* 10 јекхеске те керел чудија, јавереске те пророкујнел, а некаске те хаљовел дали несаве пораке тане таро Девел или на, некаске те керел лафи ко различна чхибја хем некаске дела и способност те превединел адава со сине вакердо ко јавера чхибја. 11 Са адала буќа керела лен и јекх исто сила* која со секаске дела способност аѓаар сар со мангела о Девел.

12 Сар о тело сој тано јекх, ама иси ле повише делија, хем са о делија таро адава тело, иако тане бут, ола тане јекх тело, аѓаар тано хем о Христос. 13 Сарине амен сием сине крстиме тари јекх исто сила* те шај те ова јекх тело, бизи разлика дали сием Евреија или Гркија, или дали сием робија или слободна мануша, сарине амен добинѓем исто сила.*

14 Соске, о тело нане ле само јекх дело, него повише делија. 15 Ако о про вакерела: „Адалеске со на сиум вас, ме на сиум дело таро тело“, адава на значинела кај нане дело таро тело. 16 Хем ако о кан вакерела: „Адалеске со на сиум јакх, ме на сиум дело таро тело“, адава на значинела кај нане дело таро тело. 17 Ако цело тело би овела сине јакх, тегани сар ка шај сине јекх мануш те шунел? Ако цело тело би овела сине кан, тегани сар ка шај сине јекх мануш те осетинел о мирис? 18 О Девел чхивѓа секова дело таро тело ко тхан коте со ов мангља.

19 Ако сарине би оваја сине јекх исто дело, тегани адава на би овела сине тело. 20 А аѓаар иси бут делија, ама јекх тело. 21 И јакх нашти те вакерел е вастеске: „На ваљанеа манге“, или палем, о шеро нашти те вакерел е пренге: „На ваљанена манге“. 22 Уствари, о делија таро тело, кола со изглединена сар слаба, ола да тане потребна. 23 Шукар грижинаја амен башо делија таро тело коленге со мислинаја кај нане добором важна. Аѓаар, побаро внимание даја адале делонге таро тело кола со нане добором шуже. 24 А о делија таро амаро тело кола со изглединена шукар, ленге на ваљани добором те грижина амен. О Девел аѓаар составинѓа о тело, те шај те добинен побари грижа окола делија таро тело коленге со адава ваљани. 25 Ов керѓа адава те шај те на овен поделбе ко тело, него са о делија те грижинен пе јекх јекхеске. 26 Хем ако јекх дело тано повредимо, тегани са о делија осетинена и дукх леа. А ако јекхе делоске сикавела пе чест, тегани са о делија радујнена пе леа.

27 Тумен сиен е Христосескоро тело, хем секова јекх тумендар тано дело таро адава тело. 28 О Девел секаске ко собрание денѓа те овел ле пло тхан: прво е апостолен, дујто е пророкон, трито е учителен, пало адава околен со керена чудија, околен со иси лен и способност* те сасљарен, околен со поможинена е јаверенге, околен со иси лен и способност те предводинен хем околен со керена лафи ко разна чхибја. 29 Зарем сарине тане апостолија? Зарем сарине тане пророкија? Зарем сарине тане учителија? Зарем сарине керена чудија? 30 Зарем саринен иси лен и способност* те сасљарен? Зарем сарине керена лафи ко разна чхибја? Зарем сарине превединена адава сој вакердо ки јавер чхиб? 31 Ама, ден тумендар са те шај те добинен побаре поклонија. А ме ка сикавав туменге јекх друмо кова сој упредер са.

13 Те керав да лафи ки е манушенгири хем ки е ангеленгири чхиб, а нане ман мангипе, тегани би овава сине сар инструменти кова со керела бут галама хем на дела пријатно звуко. 2 Те овел ман да о поклон те пророкујнав, те хаљовав да са е Девлескере тајне,* те џанав да са о буќа хем те овел ман да вера добором зорали со ка шај те преместинав планине, а мангипе нане ман, ништо на сиум. 3 Хем те дав да са со иси ман те шај те парварав е јаверен, хем те дав да мло живото те шај те фалинав ман, а мангипе нане ман, тегани нане ман нисави корист.

4 О мангипе тано стрпливо хем љубезно, о мангипе нане љубоморно, на фалинела пе, на ваздела пе, 5 на понашинела пе непристојно,* на родела пли корист, на хољанела локхесте, на памтинела о лошнипе. 6 О мангипе на радујнела пе е буќенге сој погрешна,* него радујнела пе е чачипаске. 7 Са поднесинела, са верујнела, ко са надинела пе, са трпинела.

8 О мангипе никогаш на чхинавѓола. А о поклон е пророкујбаске ка нашавѓовел, о поклон те керел пе лафи ко јавера чхибја ка чхинавѓовел, о поклон преку чудо те џанен пе о буќа нане више те овел. 9 Соске, адава со џанаја нане целосно хем амаро пророкујбе нане целосно. 10 А кеда ка авел адава сој целосно, адава со нане целосно ка нашавѓовел. 11 Кеда сиум сине чхаво, керава сине лафи сар чхаво, размислинава сине сар чхаво, хаљовава сине о буќа сар чхаво. Ама кеда бариљум, отфрлинѓум о чхаворикано. 12 Соске, акана дикхаја ки ајна која со на сикавела јасно о буќа,* а тегани ка дикха јасно. Акана адава со џанава нане целосно, а тегани адава со џанава ка овел целосно, сар о Девел со џанела ман целосно. 13 А акана ачхиле акала трин буќа: и вера, и надеж хем о мангипе. Ама најбаро таро акала тано о мангипе.

14 Понадари да сикавен мангипе, ама исто аѓаар ден тумендар са те добинен о поклонија со авена тари е Девлескири сила,* а посебно о поклон те пророкујнен. 2 Соске, е мануше со иси ле поклон те керел лафи ко јавера чхибја, керела лафи е Девлеа, а на е манушенцар, соске ле никој нашти те хаљовел ле, иако ов вакерела е Девлескере тајне* преку лескири сила.* 3 Ама окова со пророкујнела ов изградинела, охрабринела хем утешинела е јаверен адалеа со вакерела. 4 Окова со керела лафи ки јавер чхиб, ов изградинела коркори пес, а кој пророкујнела, изградинела о собрание. 5 Ме би мангава сине саринен те овел тумен о поклон те керен лафи ко јавера чхибја, ама повише би мангава сине те пророкујнен. Соске, ако окова со иси ле о поклон те керел лафи ко јавера чхибја на превединела адава со вакерела, о собрание нане те изградинел пе. Адалеске окова со пророкујнела тано покорисно. 6 Пхраљален, ка поможинел ли туменге ако авава ки туменде хем керава лафи ко јавера чхибја со на џанена лен? Ка поможинав туменге само ако вакерава туменге башо адава со о Девел откринѓа манге, ако вакерава туменге нешто со џанава преку чудо, ако пророкујнава или ако сикавава тумен.

7 Аѓаар тано исто е инструментенцар, сар сој и флејта или и харфа. Ако о звуко нане јасно, сар ка хаљол пе со башалела пе ки флејта или ки харфа? 8 Соске, ако и труба на дела јасно звуко, кој ка спреминел пе баши борба? 9 Аѓаар тумен да, ако тумаре чхибјаја на вакерена лафија со шај локхесте те хаљовен пе, сар о јавера ка хаљовен тумен? Тегани џабе керена лафи. 10 Ко свето иси бут различна чхибја, ама секоја чхиб шај те хаљовел пе. 11 Соске, ако ме на хаљовава о лафија со вакерела лен манге о мануш со керела манцар лафи ки јавер чхиб, ме леске ка овав странцо хем ов ка овел странцо манге. 12 Аѓаар тумен да, адалеске со едвај аџикерена те добинен о поклонија со авена тари е Девлескири сила,* роден те овен тумен повише поклонија со ка изградинен о собрание.

13 Адалеске, окова со керела лафи ки јавер чхиб нека молинел пе те шај те превединел да адава со вакерела. 14 Соске, ако молинава ман ки јавер чхиб адава керава адалеске со добинѓум о поклон тари е Девлескири сила,* ама ми годи на хаљовела адава со вакерава. 15 Значи со ваљани те керав? Ка молинав ман е поклонеа со добинѓум ле тари е Девлескири сила,* ама исто аѓаар ка молинав ман те шај те хаљовав адава со вакерава. Ка гиљавав гиља со фалинена е Девле е поклонеа со добинѓум ле тари е Девлескири сила,* ама исто аѓаар ка гиљавав гиља со фалинена е Девле аѓаар со ка користинав лафија со хаљовава. 16 Соске, ако фалинеа е Девле е поклонеа со добинѓан ле тари лескири сила,* сар ка шај окова сој туја те вакерел „амин“ ки тли молитва со благодаринеа е Девлеске, ако ов на џанела адава со вакереа? 17 Точно тано кај ту ко шукар начин благодаринеа е Девлеске, ама е обично мануше нане ле нисави корист. 18 Благодаринава е Девлеске со иси ман о поклон те керав лафи ко повише чхибја него сарине тумен. 19 Ама ко собрание пошукар ка вакерав панџ лафија со хаљовена пе те шај те сикавав е јаверен, него 10.000 лафија со на хаљовена пе ки јавер чхиб.

20 Пхраљален, ма размислинен сар тикне чхаве, него кеда керела пе лафи башо лошнипе овен тикне чхаве, а размислинен сар зрела мануша. 21 Ко Закони пишинела: „’Ка керав лафи акале народоја ки е странцонгири чхиб хем ка користинав о лафија е јабанџиенгере, ама ни тегани нане те манген те шунен ман‘, вакерела о Јехова“.* 22 О поклон те керел пе лафи ко различна чхибја тано знако околенге со нане верникија, а на е верниконге. А те пророкујнел пе тано знако е верниконге, а на околенге со нане верникија. 23 Адалеске, ако цело собрание кхедела пе хем сарине почминена те керен лафи ко различна чхибја, а авена о обична мануша или о мануша со нане верникија, нане ли те вакерен кај тумен иклилен тари годи? 24 Ама, ако сарине тумен пророкујнена, хем авела јекх мануш со нане вернико или јекх обично мануш, тумаре лафија со шунела ка овен леске сар укор хем ка чхивен ле шукар те испитинел коркори пес. 25 Тегани ов ка џанел адава сој гаравдо ко лескоро вило, па ка перел пле мујеа теле џи ки пхув хем ка обожавинел е Девле е лафенцар: „Чаче, о Девел тано машкар туменде“.

26 Значи пхраљален, со ваљани те керен кеда кхедена тумен? Некој тумендар ка гиљавел фалба е Девлеске, јавер ка сикавел, а о јавер ка вакерел адава со откринѓа леске о Девел, некој ка керел лафи ки јавер чхиб, а некој ка превединел адава сој вакердо. Керен са акава те шај те изградинен тумен јекх јекхеа. 27 Ако несаве керена лафи ко јавера чхибја, адава нека овен највише дуј или трин џене, хем ола ваљани те керен лафи јекх пало јекх, а некој ваљани те превединел адава со сине вакердо. 28 Ама ако нане некој со превединела, тегани окола со керена лафи ко јавера чхибја нека чутинен ко собрание хем нека керен лафи само ки песте хем е Девлеа. 29 Нека керен лафи дуј или трин пророкија, а о јавера ваљани те трудинен пе те хаљовен со значинела адава со вакерѓе. 30 Кеда сиен кхедиме заедно, ако о Девел откринела нешто некаске со бешела адатхе, нека керел лафи ов. А окова со керела сине лафи ко адава моменти нека чутинел. 31 Сарине тумен шај те пророкујнен јекх пало јекх те шај сарине те сикљовен хем те овен охрабриме. 32 Окола со пророкујнена ваљани те користинен о поклон со добинѓе тари е Девлескири сила* ко исправно начин. 33 Соске, о Девел тано Девел со керела мир, хем керела о буќа ко начин сој шукар организиримо.

Сар со керела пе ко са о собранија е света манушенгере,* 34 о џувља нека чутинен ко собрание, соске нане ленге дозволимо те керен лафи. Нека овен подложна сар со вакерела о Закони да. 35 Ако мангена те сикљовен нешто, ваљани те пучен пумаре ромен кхере, соске лаџаво тано и џувли те керел лафи ко собрание.

36 Зарем е Девлескоро лафи иклило тумендар? Зарем само тумен приминѓен е Девлескоро лафи?

37 Ако некој мислинела кај тано пророко или кај иси ле о поклон со авела тари е Девлескири сила,* ов мора те прифатинел кај акава со пишинава туменге тани заповед таро Господари. 38 Ама ако некој на мангела те прифатинел акава, тегани ни о Девел нане те прифатинел ле. 39 Адалеске пхраљален, трудинен тумен те пророкујнен, ама ма чхинавен никас таро адава те керел лафи ко јавера чхибја. 40 А са нека овел пристојно хем сар сој о редо.

15 Пхраљален, мангава те сетинкерав тумен ко шукар хабери со вакерѓум туменге. Тумен прифатинѓен адава хабери хем цврсто икерена тумен ки лесте. 2 Ако понадари да цврсто икерена тумен ко шукар хабери, сиен спасиме. Ако на икерена тумен, тегани џабе улен верникија.

3 Јекх таро најважна буќа со сиклиљум ме хем со вакерѓум туменге тани акаја: о Христос муло башо амаре гревија, сар со пишинела ко Списија; 4 сине парумо хем воскреснинѓа ко трито диве, сар со пишинела ко Списија; 5 хем појавинѓа пе е Кифаске,* а пало адава е дешудује апостоленге. 6 Пало адава појавинѓа пе повише таро 500 пхраленге кола со сине кхедиме ко јекх тхан. Повише џене лендар тане панда џивде, а несаве муле.* 7 Пало адава појавинѓа пе е Јаковеске, па после са е апостоленге. 8 А сар последно појавинѓа пе манге да, адалеске сиум сар чхаво кова со предвреме бијандило.

9 Соске, ме сиум најтикно таро апостолија хем на заслужинава те овав викимо апостоли, соске прогонинава сине е Девлескере собрание. 10 Ама адалеске со о Девел сикавѓа манге пло шукарипе со на заслужинаја ле, ме сиум апостоли. Хем на сине џабе адава со сикавѓа манге пло шукарипе со на заслужинаја ле, соске ме трудинѓум ман повише таро са о јавера апостолија. Ама адава на керѓум ле мле силаја, него преку е Девлескоро шукарипе со на заслужинаја ле. 11 Адалеске, бизи разлика дали ме или о јавера апостолија, сарине амен проповединаја јекх хабери, хем тумен верујнѓен ко адава хабери.

12 Ако о хабери со проповединаја тано кај о Христос воскреснинѓа таро муле, сар шај тегани несаве тумендар те вакерен кај нане воскресение? 13 Соске, ако нане воскресение, тегани ни о Христос на воскреснинѓа таро муле. 14 Ама, ако о Христос на воскреснинѓа, тегани амаро проповедибе тано џабе хем тумари вера тани џабе. 15 Освен адава, ако о муле чаче нане те воскреснинен, тегани би оваја сине сведокија кола со вакерена ховајба башо Девел, соске вакераја кај о Девел воскреснинѓа е Христосе, а уствари на воскреснинѓа ле. 16 Соске, ако о муле нане те воскреснинен, тегани ни о Христос на воскреснинѓа. 17 А ако о Христос на воскреснинѓа, тегани тумари вера тани џабе хем панда на сиен ослободиме таро тумаре гревија. 18 Тегани окола да со више муле* сар следбеникија е Христосескере нашавдиле засекогаш. 19 Ако амари надеж ко Христос тани само башо акава живото, тегани таро са о мануша амен сием највише жалибаске.

20 Ама амен џанаја кај о Христос воскреснинѓа таро муле. Ов тано о прво со воскреснинѓа* таро окола со муле.* 21 Адалеске со о мерибе ало преку јекх мануш, о воскресение да авела преку јекх мануш. 22 Соске, сар со преку о Адам сарине мерена, аѓаар преку о Христос сарине ка добинен живото. 23 Ама секој ко пло редо: прво о Христос,* а пало адава, џикоте трајнела е Христосескири присутност,* окола со припадинена леске. 24 Пало адава, ко крајо, кеда ка уништинел секоја влада, хем секоја власт хем сила, ов ка дел о Царство пле Девлеске хем Дадеске. 25 Соске, ов мора те владинел сар цари са џикоте о Девел на чхивела са лескере душманен тело лескере пре. 26 А сар последно душмани, о мерибе ка овел уништимо. 27 О Списија вакерена кај о Девел „чхивѓа са те овел тело лескере пре“. Ама кеда вакерела кај ’са тано чхивдо тело лескере пре‘, јасно тано кај о Девел нане подложно леске, соске ов тано адава кова со чхивѓа са тело лескере пре. 28 А кеда о Девел ка чхивел са тело лескере пре, тегани о Чхаво да ка подложинел пе е Девлеске, кова со чхивѓа са тело лескере пре, те шај о Девел те овел сариненге са.

29 А ако о муле чаче нане те воскреснинен, тегани со ка овел околенцар со крстинена пе те шај те мерен? Соске ола крстинена пе те шај те мерен? 30 Хем соске амен стално чхиваја амаро живото ки опасност? 31 Чаче вакерава туменге, пхраљален, кај сиум секова диве ки опасност те мерав, исто сар сој чаче кај дичинава ман туменцар кола со сиен ученикија е Христос Исусескере, амаро Господари. 32 Ако боринѓум ман ѕверонцар ко Ефес, таро иста причине сар со керена о јавера мануша, сави корист иси ман таро адава? Ако о муле нане те воскреснинен, тегани „те ха хем те пија, соске тајса ка мера“. 33 Ма ховавѓовен! О лошно друштво руминела о шукар навике. 34 Освестинен тумен хем керен адава сој исправно. Ма грешинен, соске несаве машкар туменде на пенџарена е Девле. Вакерава туменге акава те шај те лаџан.

35 Ама некој ка пучел: „Сар ка воскреснинен о муле? Саво тело ка овел лен?“ 36 Глупаво манушеа! Адава со садинеа ваљани прво те мерел па те шај те бајрол.* 37 Хем кеда садинеа, на садинеа растение* кова сој тано више баро, него само јекх тикно зрно, сар на пример, гив или несаво јавер зрно. 38 А о Девел керела секова јекх те бајрол аѓаар сар ов со мангела, хем секова семе тано различно кеда бајрола. 39 Нане секова тело исто: јавер тано о тело е манушескоро, јавер тано о тело е стокакоро, јавер тано о тело е чирикленгоро хем јавер тано о тело е мачхенгоро. 40 Хем околен сој ко небо иси лен тело, хем околен сој ки пхув иси лен тело. О шужипе околенгоро сој ко небо тано појавер таро шужипе околенгоро сој ки пхув. 41 О шужипе е кхамескоро тано појавер таро шужипе е месечинакоро или таро шужипе е ѕвезденгоро. Уствари, о шужипе секоле ѕвездакоро да тано појавер.

42 Аѓаар ка овел околенцар со воскреснинена таро муле. О тело со парунела пе* кирњола, а о тело со воскреснинела нашти те кирњол. 43 Парунела пе ки лаџ, воскреснинела ки чест. Парунела пе* сар слабо, воскреснинела сар силно. 44 Парунела пе* телесно тело, а воскреснинела духовно тело. Ако иси телесно тело, тегани иси духовно да. 45 Сар со пишинела ко Списија: „О прво мануш о Адам уло џивди душа“.* А о последно Адам уло духо* кова со дела живото. 46 Ама о духовно тело на авела прво. Прво авела о телесно тело, а пало адава о духовно. 47 О прво мануш ало тари пхув хем сине кердо таро право е пхувјакоро, а о дујто мануш ало таро небо. 48 Окола сој тане керде таро право е пхувјакоро, тане сар о прво мануш кова со сине кердо таро право е пхувјакоро. А окола сој ко небо, тане сар окова со ало таро небо. 49 Сар акана со сием слична околеа сој тано кердо таро право е пхувјакоро, аѓаар ка ова слична околеа сој ко небо.

50 Ама, акава вакерава туменге, пхраљален: о тело хем о рат нашти те наслединен е Девлескоро Царство, ни окова со кирњола нашти те наслединел адава со нашти кирњола. 51 Акана ка вакерав туменге јекх тајна е Девлескири:* сарине нане те мера,* ама сарине ка менина амен, 52 ко јекх моменти, сар кеда трепкинела пе јакхенцар, џикоте шунела пе и последно труба. И труба ка шунѓол хем о муле ка уштен е телоја кова со нашти те кирњол хем амен ка менина амен. 53 Акава тело со кирњола ка менинел пе ко тело кова со нашти те кирњол, хем акава тело со мерела ка менинел пе ко тело кова со нашти никогаш те мерел. 54 Ама кеда о тело со кирњола овела тело кова со нашти те кирњол хем кеда о тело со мерела овела тело со нашти никогаш те мерел, тегани ка исполнинел пе адава со пишинела ко Списија: „О мерибе тано уништимо засекогаш“. 55 „Мерибе, кај тани тли победа? Мерибе, кај тано тло отров?“ 56 О отров со мејрарела тано о грево, а о грево добинела пли сила таро Закони. 57 Ама амен благодаринаја е Девлеске со дела амен и победа преку амаро Господари о Исус Христос!

58 Адалеске, мангле пхраљален, овен цврста, стабилна хем секогаш овен зафатиме ки бути е Господареске, соске џанена кај са адава со керена ки тумари служба е Господареске нане џабе.

16 А кеда керела пе лафи башо кхедибе о прилогија е пхраленге,* тумен да ваљани те керен аѓаар сар со вакерѓум е собраниенге ки Галатија. 2 Секова прво диве таро курко, секој тумендар нека цидел нешто ки страна хем нека кхедел кобор со шај, те шај ма те кхеден пе о прилогија кеда ме ка авав. 3 А кеда ка авав, ка бичхалав околен, коленге со тумен пишинѓен ко тумаре писмија кај тане доверлива, те ингарен ко Ерусалим адава со тумен доброволно кхединѓен. 4 Ако би овела шукар ме да те џав адари, тегани ола ка авен манцар.

5 А ме ка авав ки туменде кеда ка накхав тари Македонија, соске ме сигурно ка накхав тари Македонија. 6 Хем шај ка ачховав ки туменде повише време, шај цело евен. Пало адава, тумен шај те авен манцар џи негде ко друмо, те шај те испратинен ман адари коте со ваљани те џав. 7 Соске, на мангава акава пути те дикхав тумен само ко накхибе, него надинава ман кај ка ачховав несаво време туменцар, ако о Јехова* дозволинела. 8 А ко Ефес ка ачховав џи ко празнико Педесетница,* 9 соске денѓа пе манге бари прилика* службаке, ама иси бут противникија.

10 А ако авела о Тимотеј туменде, доџакерен ле шукар хем соработинен леа, те шај те на овел секиримо башо ништо џикоте тано туменцар. Соске, ов да керела пли задача таро Јехова* сар ме со керава. 11 Адалеске, никој те на дикхел ки лесте сар потеле пестар. Кеда ка авел ки манде испратинен ле те ресел безбедно, соске аџикерава ле заедно е пхраленцар.

12 А кеда керела пе лафи башо амаро пхрал о Аполо, ме бут молинѓум ле те авел ки туменде е пхраленцар. Ов на планиринела сине те авел ки туменде акана, ама ка авел кеда ка овел ле прилика.

13 Ачховен џангавде, ачховен цврста ки вера, понадари да овен храбра хем овен зорале. 14 Са керен мангипаја.

15 Пхраљален, тумен џанена кај о кхерутне е Стефанасескере сине о прва со уле верникија ки Ахаја* хем кај посветинѓе пе те служинен околенге сој света.* 16 Поттикнинава тумен пхраљален, понадари да те соработинен асавке манушенцар хем са околенцар кола со бут трудинена пе хем служинена заедно ленцар. 17 Бут радујнава ман со о Стефанас, о Фортунат хем о Ахаик тане акате манцар. Иако тумен на сиен акате манцар, ола бут поможинѓе манге туменге ко тхан. 18 Ола бут охрабринѓе ман, ама хем туменде да. Адалеске, сикавен кај ценинена асавке манушен.

19 Поздравинена тумен о собранија тари Азија. Сар ученикија е Господарескере, о Акила хем и Приска, заедно е собраниеа со кхедела пе ко ленгоро кхер, бут поздравинена тумен. 20 Поздравинена тумен са о пхраља. Мангипаја ресен тумен јекх јекхеа.*

21 Ме о Павле, пишинава туменге акава поздрав мле вастеа.

22 Ако некој на мангела е Господаре, нека овел дендо арман. Господаре, молинаја тут, ава! 23 О шукарипе со на заслужинаја ле е Господарескоро, е Исусескоро, нека овел туменцар. 24 Мангава тумен саринен со сиен ко јекхипе е Христос Исусеа.