ПИСМО ЏИ КО ГАЛАТЈАЊА

1 Ме о Павле, апостоли кова со на сиум бичхалдо таро мануша, ни сиум чхивдо таро несаво мануш сар апостоли, него таро Исус Христос хем таро Девел, амаро Дад, кова со ваздинѓа е Исусе таро муле, 2 хем са о пхраља сој манцар, бичхалаја поздравија џи ко собранија ки Галатија:

3 Нека овел тумен о шукарипе со на заслужинаја ле хем о мир таро Девел, кова сој амаро Дад, хем таро Господари о Исус Христос. 4 О Христос денѓа пло живото башо амаре гревија те шај те ослободинел амен таро авдисутно лошно свето.* Ов керѓа адава, соске адаја сине и волја амаре Девлескири хем Дадескири, 5 коле со ваљани те славина ле засекогаш. Амин.

6 Чудинава ман со добором сигате иранена думо е Девлеске кова со викинѓа тумен преку е Христосескоро шукарипе со на заслужинаја ле, хем прифатинена јавер хабери сар те пхене адава тано о шукар хабери. 7 Ама јавер шукар хабери на постојнела. Постојнена само несаве со бунинена тумен хем со мангена те менинен о шукар хабери башо Христос. 8 Ама, чак амен или несаво ангели таро небо ако вакераја туменге нешто појавер таро шукар хабери со више вакерѓем туменге, те ова денде арман! 9 Сар со више вакерѓем, хем акана палем вакерава адава: те овел дендо арман секова јекх со ка вакерел туменге нешто појавер таро шукар хабери кова со више прифатинѓен!

10 Дали трудинава ман те угодинав е манушенге, или трудинава ман те угодинав е Девлеске? Ако трудинава ман те угодинав е манушенге, тегани ме на сиум е Христосескоро робо. 11 Соске, мангава те џанен, пхраљален, кај о шукар хабери со вакерѓум туменге на авела таро мануша, 12 соске ни на приминѓум ле таро мануш, ни на сикавѓа ман некој баши лесте, него о Исус Христос откринѓа ле манге.

13 Сигурно шунѓен сар живинава сине кеда сиум сине ко јудаизам,* кај бут прогонинава сине е Девлескоро собрание, соске мангава сине те уништинав ле. 14 Хем напредујнава сине ко јудаизам повише таро бут мле врсникија ко мло народо, соске сиум сине бут поревносно таро јавера башо мле парапапонгере традицие. 15 Ама кеда о Девел, кова со керѓа те бијанѓовав* хем кова со сикавѓа манге пло шукарипе со на заслужинаја ле аѓаар со викинѓа ман, одлучинѓа 16 те откринел пле Чхаве преку манде, аѓаар со ка вакерав о шукар хабери баши лесте е манушенге таро јавера народија, ме на гељум одма те родав совет несаве манушестар,* 17 ни на гељум ко Ерусалим ко адала со сине апостолија англедер манде, него гељум ки Арабија, хем пало адава иранѓум ман ко Дамаск.

18 Тегани пало трин берш гељум ко Ерусалим те дикхав е Кифа,* хем ачхиљум леа 15 диве. 19 Ама на дикхљум никас таро јавера апостолија освен е Јакове, е Господарескере пхрале. 20 А башо буќа коленге со пишинава туменге, англо Девел вакерава туменге кај на ховавава.

21 Пало адава, гељум ко несаве тхана тари Сирија хем тари Киликија. 22 Ама е Христосескере следбеникија ко собранија тари Јудеја никогаш на дикхле ман. 23 Ола само шунѓе таро јавера: „О мануш со англедер прогонинела амен сине, акана вакерела о шукар хабери баши вера која со мангела сине те уништинел ла“. 24 Башо адава со случинѓа пе манге, ола почминѓе те славинен е Девле.

2 Тегани пало 14 берш, ме палем гељум ко Ерусалим заедно е Варнаваја, хем исто аѓаар лељум манцар е Тите да. 2 Гељум соске о Господари откринѓа манге кај ваљани те џав адари, хем е пхраленге кола сој бут поштујме ко собрание вакерѓум о шукар хабери со вакерава ле е манушенге таро јавера народија. Адава керѓум ле кеда сиум сине коркори адале пхраленцар, соске мангљум те џанав дали адава со керѓум башо Девел тано шукар или на. Соске, ако нане шукар, тегани са адава со керѓум сине џабе.* 3 Ама чак ни о Тит, со сине манцар, иако тано Грко, на сине чхивдо силаја те керел пе сунети. 4 Акава проблеми иклило себепи о ховавне пхраља кола со почоране кхувѓе ко собрание хем мангле те руминен амари слобода со иси амен сар ученикија е Христос Исусескере. Ола мангле те чхивен амен палем те ова робија е Законескере. 5 Ама амен на шунѓем лен ич, ни најхари, те шај тумен те ачховен цврста ко чачипе таро шукар хабери.

6 Ама окола, коленде со дикхела пе сине сар важна мануша - иако манге тано са јекх саве сине ола, соске о Девел на дикхела кој тано кој - адала бут поштујме мануша на денѓе ман нисаво нево упатство. 7 Наместо адава, кеда ола дикхле кај сине манге дендо* о шукар хабери те вакерав ле е манушенге со нане керде сунети, исто сар е Петареске со сине дендо* о шукар хабери те вакерел ле околенге сој керде сунети, 8 (соске о Девел кова со денѓа власт е Петаре те овел апостоли околенге сој керде сунети, денѓа манге да власт те овав апостоли е манушенге таро јавера народија) 9 хем кеда халиле кај о Девел сикавѓа манге пло шукарипе со на заслужинаја ле, тегани о Јаков, о Кифа* хем о Јован, кола со сине сар стубија ко собрание, денѓе е Варнаваске хем манге пло десно вас сар знако кај согласинена пе амен те џа ко мануша таро јавера народија, а ола те џан ко окола сој керде сунети. 10 Замолинѓе амен само те на бистра е чороле пхрален, хем адава чаче бут трудинѓум ман те керав.

11 Ама кеда о Кифа ало ки Антиохија, ме англи јакх вакерѓум леске кај керѓа нешто со сине погрешно. 12 Соске, англедер те авен несаве мануша со сине паше е Јаковеа, ов хала сине околенцар со сине таро јавера народија, ама кеда ресле акала мануша, ов цидинѓа пе хем чхинавѓа те дружинел пе е манушенцар таро јавера народија, соске дарала сине таро окола со сине керде сунети. 13 Хем о јавера да Евреија почминѓе те овен лицемерна сар лесте, со чак о Варнава да почминѓа сар ленде те овел лицемерно. 14 Ама кеда дикхљум кај на постапинена* спрема о чачипе таро шукар хабери, вакерѓум е Кифаске англи сариненде: „Ако ту, кова со сиан Евреи, живинеа сар о мануша таро јавера народија, а на сар Евреи, тегани соске мангеа те чхиве е манушен таро јавера народија те живинен спрема о еврејска обичаија?“

15 Амен со сием бијаме сар Евреија, а на сар о мануша таро јавера народија кола со грешинена, 16 џанаја кај о Девел вакерела јекхе манушеске кај тано праведно на адалеске со икерела о заповедија таро Закони, него само адалеске со сикавела вера ко Исус Христос. Амен сикавѓем вера ко Христос Исус те шај о Девел аменге те вакерел кај сием праведна адалеске со иси амен вера ко Христос, а на адалеске со икераја о заповедија таро Закони. Соске, о Девел никаске нане те вакерел кај тано праведно адалеске со икерела о заповедија таро Закони. 17 Акана ако амен да, иако трудинаја амен о Девел те вакерел аменге кај сием праведна преку о Христос, сепак икљоваја сар грешникија, дали адава значинела кај о Христос поттикнинела амен те грешина? Сигурно на! 18 Соске, ако градинава палем адава со рушинѓум, сикавава кај сиум мануш со пхагела о Закони. 19 Адалеске со икерава ман сине ко Закони, ме сиум муло е Законеске, те шај те живинав е Девлеске. 20 Ме сиум ковимо ко стубо е Христосеа. На живинава више манге, него живинава живото сој ко јекхипе е Христосеа.* Адалеске, о живото со живинава ле акана ко акава тело, живинава ле спрема и вера со иси ман ко е Девлескоро Чхаво кова со мангља ман хем денѓа пло живото манге. 21 Ме на отфрлинава е Девлескоро шукарипе со на заслужинаја ле, соске ако јекх мануш овела праведно адалеске со икерела пе ко Закони, тегани о Христос џабе муло.

3 Ах, тумен сиен Галатјања со на хаљовена! Кој тано адава со ховавѓа тумен? Туменге англедер сине шукар објаснимо соске о Исус Христос сине ковимо ко стубо. 2 Мангава те пучав тумен само акава: дали приминѓен е Девлескири сила* адалеске со икерѓен о заповедија таро Закони или адалеске со верујнѓен ко шукар хабери со шунѓен? 3 Добором ли на хаљовена? Ко почеток дозволинѓен те водинел тумен е Девлескири сила,* ама акана зарем трудинена тумен те исполнинен тумари цел, аѓаар со мукхена те водинел тумен о манушикано размислибе? 4 Зарем џабе трпинѓен добором бут муке? Сигурно сиум кај на сине џабе. 5 Значи, дали окова преку колесте со добинѓен е Девлескири сила* хем со керела чудија машкар туменде, керела адава адалеске со икерена о заповедија таро Закони или адалеске со сикавѓен вера ко шукар хабери со шунѓен? 6 Аѓаар сине е Авраамеа да „адалеске со сине ле вера ко Јехова,* ов дикхела ле сине сар праведно“.

7 Сигурно џанена кај околен со иси лен вера тане е Авраамескере чхаве. 8 А англедер бут време о Девел ко Списија вакерѓа кај ов ка вакерел е манушенге таро јавера народија кај тане праведна адалеске со иси лен вера. Ов англедер вакерѓа е Авраамеске акава шукар хабери: „Преку туте ка овен благословиме са о народија“. 9 Адалеске, околен со иси лен вера, тане благословиме исто сар о Авраам коле со сине ле вера.

10 Сарине окола со иси лен доверба само ко заповедија таро Закони, тане денде арман, соске пишимо тано: „Дендо тано арман секој со на икерела пе ко са о буќа сој тане пишиме ко лил* е Законескоро хем на керела адава“. 11 Освен адава шај јасно те дикха кај о Девел никаске на вакерела кај тано праведно адалеске со икерела пе ко Закони, соске „о праведнико ка живинел адалеске со иси ле вера“. 12 А о темели е Законескоро нане и вера, него „кој ка икерел пе ко адава со пишинела ко Закони, ка живинел“. 13 О Христос кинѓа амен хем аѓаар ослободинѓа амен тари е Законескири арман, адалеа со ов леља и арман упри песте аменге ко тхан, соске пишимо тано: „Дендо тано арман секова јекх сој ковимо* ко стубо“. 14 Адава случинѓа пе те шај о благослов со сине ветимо е Авраамеске те авел преку о Христос Исус е манушенге таро јавера народија, те шај преку амари вера те добина и сила* со о Девел ветинѓа кај ка дел ла аменге.

15 Пхраљален, ка вакерав туменге јекх пример: кеда керела пе јекх сојуз,* чак ако тано кердо само таро мануша, никој нашти те вакерел кај адава сојуз на важинела, ни нашти те додајнел леске нешто. 16 А о ветувања сине денде е Авраамеске хем лескере потомствоске.* На пишинела: „Хем тле потомцонге“, сар те пхене тане повише џене. Наместо адава, пишинела: „Хем тле потомствоске“,* соске мислинела пе само јекхе потомцоске, а адава тано о Христос. 17 Хем вакерава акава да: о Девел прво керѓа о сојуз, хем пало 430 берш ов денѓа о Закони. Ама адалеа ов на чхинавѓа о сојуз хем о ветување со денѓа ле. 18 Соске, ако о наследство добинела пе преку о Закони, тегани ов на добинела пе више преку о ветување. Ама о Девел цело вилеа денѓа е Авраамеске о наследство преку о ветување.

19 Тегани, соске сине дендо о Закони? Ов сине покасно дендо те шај те дикхјон о грешке, џикоте на авела о потомство* каске со сине дендо о ветување. О Девел денѓа е ангеленге те објавинен о Закони преку јекх посреднико.* 20 Ама на ваљани посреднико кеда иси само јекх страна, а адаја страна сине о Девел кеда денѓа о ветување. 21 Дали тегани о Закони тано против е Девлескере ветувања? Сигурно на! Соске, ако о мануша добинена сине закони кова со шај те дел живото, тегани ола ка шај сине те овен праведна преку о закони. 22 Ама о Списија сикавѓе кај о мануша сине чхивде тели власт е гревоске, те шај о ветување со добинела пе тари вера ко Исус Христос, те овел дендо околенге со сикавена кај верујнена ки лесте.

23 Ама англедер те овел амен вера ко Христос, о Закони аракхела амен сине, сием сине чхивде тели лескири власт хем аџикераја сине кеда о Девел ка откринел аменге кај ваљани те верујна ко Христос. 24 Аѓаар, о Закони сине аменге воспитувачи* кова со ингарѓа амен џи ко Христос, те шај о Девел те вакерел кај сием праведна адалеске со иси амен вера. 25 Хем акана кеда иси амен вера ко Христос, на ваљани аменге више воспитувачи.

26 Чаче, тумен сарине сиен е Девлескере чхаве адалеске со верујнена ко Христос Исус. 27 Соске, сарине тумен со крстинѓен тумен хем акана сиен ко јекхипе е Христосеа, гелен пало пример е Христосескоро.* 28 Више нане ни Евреи ни Грко, више нане ни робо ни слободно мануш, више нане ни мурш ни џувли, соске сарине сиен јекх ко јекхипе е Христос Исусеа. 29 Ако сиен е Христосескере, тегани тумен сиен е Авраамескоро потомство* хем тумен ка добинен о наследство со сине ветимо е Авраамеске.

4 Мангава те вакерав кај јекх наследнико, са џикоте тано тикно чхаво, ов на разликујнела пе таро јекх робо, иако са припадинела леске. 2 Соске, са џикоте на авела о диве кова со одрединѓа лескоро дад, јавера мануша тане одговорна леске хем јавера управинена е кхереа. 3 Аѓаар амен да, џикоте сием сине чхаве, сием сине робија, соске џаја сине пало начин сар со размислинела акава свето. 4 Ама кеда накхља о време кова со сине одредимо, о Девел бичхалѓа пле Чхаве, кова со сине бијамо тари јекх џувли хем кова со сине тело Закони, 5 те шај те ослободинел хем те кинел околен со сине тело Закони, те шај амен те ова посвојме сар чхаве.

6 Хем акана, адалеске со тумен сиен чхаве, о Девел бичхалела ко амаре виле пли сила* која со сине денди лескере Чхавеске. Акаја сила теринела амен те викина: „Абба,* мо Дад!“ 7 Адалеске, ту више на сиан робо, него чхаво е Девлеске. Хем ако ту сиан чхаво е Девлеске, ов исто аѓаар ка дел тут наследство.

8 Уствари, џикоте на пенџарена сине е Девле, тумен служинена сине сар робија е ховавне девленге. 9 А акана кеда пенџарена е Девле, уствари, акана кеда о Девел пенџарѓа тумен, сар шај палем те иранен тумен ко буќа таро акава свето со нане лен нисави корист хем мангена палем те овен ленге робија? 10 Тумен мислинена кај несаве диве, масекија, периодија хем берша тане посебна, хем славинена лен. 11 Секиримо сиум туменге, соске дарава кај адава со трудинѓум ман те поможинав туменге, шај сине џабе.

12 Пхраљален, молинава тумен, овен сар со сиум ме, соске јекх време ме да сиум сине сар со сиен тумен. Англедер тумен на понашинѓен тумен манцар лошно. 13 Сетинена тумен кај ачхиљум ки туменде адалеске со сиум сине насвало хем тегани сине ман прво пути прилика те проповединав туменге о шукар хабери. 14 Иако мло насвалипе сине туменге искушение, ама сепак тумен на отфрлинѓен ман хем на гадонѓен тумен мандар, него приминѓен ман сар Девлескоро ангели, сар о Христос Исус. 15 Кај тани адаја радост со сине тумен тегани? Соске, сигурно сиум кај сиен сине спремна, чак ако шај сине, те икален тумаре јакхја хем те ден лен манге. 16 Дали акана, адалеске со вакерава туменге адава сој чаче, уљум тумаро душмани? 17 Адала мануша керена са те шај тумен те овен тари ленгири страна, ама на адалеске со иси лен шукар намере, него соске мангена те циден тумен мандар те шај цело вилеа те џан пали ленде. 18 А секогаш тано шукар, ако некој керела са со шај те придобинел тумен адалеске со иси ле шукар намере, хем адава на ваљани те керел само кеда ме сиум туменцар, 19 мле тикне чхаве. Баши туменде палем иси ман дукха саве со иси јекхе џувља кеда бијанела. Адала дукха ка трајнен са џикоте на обликујнена тумари личност те овел сар е Христосескири. 20 Би мангава сине акана те овав туменцар хем те керав туменцар лафи ко пошукар начин, соске на џанава со те керав туменцар.

21 Вакерен манге, тумен со мангена те икерен тумен ко Закони, на џанена ли со вакерела о Закони? 22 На пример, пишимо тано кај е Аврааме сине ле дуј чхаве, јекх тари слугинка, а јекх тари лескири ромни која со на сине робинка. 23 Ама о чхаво тари слугинка сине бијамо сар со бијанѓовена са о јавера чхаве, а о чхаво тари лескири ромни сине бијамо преку е Девлескоро ветување. 24 Са акава иси ле симболично значење. Соске, адала дуј џувља претставинена дуј сојузија.* Јекх лендар сине кердо ки планина Синај хем са окола сој тане тело акава сојуз тане робија. Акава сојуз тано сар и Агара. 25 И Агара тани о Синај, и планина ки Арабија хем претставинела о авдисутно Ерусалим, соске тани ко ропство пле чхавенцар. 26 А о Ерусалим кова сој ко небо тано слободно. Ов тано амари дај.

27 Соске, ко Списија пишинела: „Радујн тут, ту со нашти те ачхове кхамни хем со на бијанеа! Радосно викин, ту со нане тут бијанибаскере дукха! Соске, и ромни која сој мукхли иси ла повише чхаве тари окоја со иси ла ром“. 28 А тумен пхраљален, сиен чхаве бијаме преку е Девлескоро ветување, исто сар со сине бијамо о Исак. 29 Ама исто сар тегани, окова со сине бијамо сар со бијанѓовена са о јавера чхаве, прогонинела сине околе со сине бијамо преку е Девлескири сила,* аѓаар тано акана да. 30 Ама со вакерена о Списија? Ки ленде пишинела: „Бркин е слугинка хем лакере чхаве, соске о чхаво е слугинкакоро никогаш нане те овел наследнико заедно е чхавеа со иси тут тле ромњаја, која со нане робинка“. 31 Значи, пхраљален, амен на сием чхаве е слугинкакере, него чхаве е ромњакере, која со нане робинка.

5 О Христос ослободинѓа амен те шај те овел амен асавки слобода. Адалеске, ачховен зорале хем ма мукхен палем те овен робија сој пханле ко јарем.*

2 Аке, ме, о Павле, вакерава туменге кај ако керена тумен сунети, тегани нане те овел тумен корист таро адава со керѓа о Христос. 3 Хем секоле манушеске со керела пе сунети, палем вакерава кај тано дужно те икерел пе ко цело Закони. 4 Ако трудинена тумен о Девел те вакерел туменге кај сиен праведна преку о Закони, тегани тумен одвојнена тумен таро Христос хем коркори тумен цидена тумен таро лескоро шукарипе со на заслужинаја ле. 5 А амен, надинаја амен хем едвај аџикераја те ова праведна англо е Девлескере јакхја преку лескири сила,* адалеске со иси амен вера. 6 Соске, адава дали тане керде сунети или на, е Христос Исусескере следбениконге нане ле нисави вредност, него важно тани само и вера која сој тани водими таро мангипе.

7 Тумен шукар прастана сине. Кој чхинавѓа тумен таро адава понадари да те икерен тумен ко чачипе? 8 О сикајбе околенгоро со чхинавѓе тумен на авела таро Девел кова со викинела тумен. 9 Хари квасацо керела те ушљол цело хумер. 10 Уверимо сиум кај тумен со сиен ко јекхипе е Господареа ка согласинен тумен манцар. А окова со бунинела тумен, било кој те овел, ка добинел и казна со заслужинела ла. 11 А ако ме, пхраљален, понадари да вакерава кај ваљани те овел пе сунети, тегани на би овава сине панда прогонимо. Хем тегани о стубо мучибаске више на би овела сине бар сопкибаске. 12 Кешки те керен пе евнухија* окола со трудинена пе те бунинен тумен!

13 А тумен пхраљален сиен сине бириме те овен слободна. Само ма користинен адаја слобода сар прилика те задоволинен тумаре грешна желбе, него о мангипе нека поттикнинел тумен те служинен сар робија јекх јекхеске. 14 Соске, цело Закони тано кхедимо хем чхивдо ки акаја јекх заповед: „Манг тле пашутне сар коркори тут“. 15 Ама, ако тумен понадари да кицинена тумен хем хана тумен машкар туменде, пазинен ма те уништинен тумен јекх јекхеа.

16 Адалеске вакерава туменге: понадари да живинен аѓаар со ка мукхен те водинел тумен е Девлескири сила* хем аѓаар нане те џан пало тумаре желбе е телоскере. 17 Соске о тело, себепи пле желбе тано против е Девлескири сила,* а е Девлескири сила тани против о тело. Акала буќа противинена пе јекх јекхеске хем аѓаар тумен на керена адава со мангена те керен. 18 Освен адава, ако водинела тумен е Девлескири сила,* тегани на сиен тело Закони.

19 А о постапке е грешно телоскере јасно дикхена пе. Ола тане: неморал,* мелалипе, безобразно понашибе,* 20 идолопоклонство, спиритизам,* душманлуко, акошиба, љубомора, те избувнинел пе тари холи, сериозна несогласувања, поделбе, секте,* 21 завист, претерано пијбе, распуштена забаве хем јавера слична буќа. Ме панда англедер предупрединава тумен сар со више предупрединѓум тумен, кај окола со керена асавко нешто нане те наслединен е Девлескоро Царство.

22 А о особине* со авена тари е Девлескири сила* тане: мангипе, радост, мир, стрпливост, љубезност, шукарипе, вера, 23 кроткост, самоконтрола. Против адава нане закони. 24 А окола сој тане е Христос Исусескере ученикија ковинѓе ко стубо пумаро тело хем пумаре силна хем лошна желбе.

25 Ако живинаја спрема о водство тари е Девлескири сила,* тегани понадари да те живина спрема о водство со добинаја ле тари адаја сила. 26 Те на ова чалмџие, ма те натпреварина амен јекх јекхеа, те на завидина јекх јекхеске.

6 Пхраљален, чак ако несаво мануш почминела те џал ко погрешно друмо бизо те овел свесно башо адава, тумен со сиен духовна, ко јекх кротко начин испрајнен ле. Ама пазинен тумен, соске дарава кај шај тумен да те овен искушиме. 2 Понадари да пхиравен о пхарипа јекх јекхескере, хем аѓаар ка исполнинен е Христосескоро закони. 3 Соске, ако некој мислинела кај тано нешто, а нане ништо, коркори песте ховавела. 4 Ама, секова мануш нека испитинел пле постапке хем тегани ка овел ле причина те радујнел пе башо буќа со керела лен ов, а на адалеске со спорединела пе е јаверенцар. 5 Соске, секој ка пхиравел пло товар.*

6 Исто аѓаар, окова со сикљола башо е Девлескоро лафи, нека делинел са о шукар буќа со иси ле околеа со сикавела ле.

7 Ма ховавѓовен: е Девлеа нане кхелибе. Соске, со ка сејнел о мануш, адава ка кхедел. 8 Окова со сејнела водимо таро пле телесна желбе, таро тело ка кхедел пропаст, а кој сејнела водимо тари е Девлескири сила,* тари е Девлескири сила ка кхедел вечно живото. 9 Адалеске, ма те откажина амен те кера шукарипе, соске ако на уморинаја амен, ка кхеда о плоди кеда ка авел време. 10 Адалеске, џикоте иси амен прилика, те кера шукарипе сариненге, а посебно амаре пхраленге хем пхењенге ки вера.

11 Дикхен кобор баре буквенцар пишинава туменге акава писмо мле вастеа.

12 Са окола со мангена те угодинен е јаверенге, теринена тумен те овен сунети. Ола керена адава само те на овен прогониме адалеске сој тане следбеникија е Христосескере, кова со муло ко стубо мучибаске.* 13 Соске, чак окола со керена пе сунети на икерена пе ко Закони, него ола мангена тумен те керен тумен сунети те шај ола те фалинен пе адалеа со тумен керѓен тумаре телоске. 14 А ме на мангава те фалинав ман нисаве јавере буќаја, освен амаре Господареа е Исус Христосеа, кова со муло ко стубо мучибаске. Манге, о свето тано осудимо те мерел преку лесте, а е светоске, ме сиум осудимо те мерав преку лесте. 15 Соске, нане важно дали ка овел пе сунети или на, него важно тано те овел пе нешто нево со створинела о Девел. 16 Са окола со живинена спрема акава правило нека овел лен мир хем о Девел нека сикавел ленге милост. Ола тане е Девлескоро Израел.

17 Отакана више никој ма те керел манге проблемија, соске ме ко мло тело пхиравава о белегија кола со сикавена кај сиум е Исусескоро робо.

18 Амаро Господари о Исус Христос, пхраљален, нека сикавел туменге пло шукарипе со на заслужинаја ле џикоте сикавена исправно стави. Амин.