ПИСМО ЏИ КО ФИЛИПЈАЊА

1 Ме о Павле хем о Тимотеј, кола со сием робија е Христос Исусескере, пишинаја акава писмо џи ко са о света мануша* сој тане ученикија е Христос Исусескере* со живинена ко Филипи, хем џи ко старешине хем о слуга-помошникија:

2 Нека овел тумен о шукарипе со на заслужинаја ле хем о мир таро Девел, кова сој амаро Дад, хем таро Господари о Исус Христос.

3 Секогаш кеда сетинава ман ки туменде, благодаринава мле Девлеске 4 хем секова пути кеда таро вило молинава ман е Девлеске секоле јекхеске тумендар, керава ле адава радосно, 5 башо са адава со керѓен те шај те ширинен о шукар хабери, панда таро прво диве кеда прифатинѓен о шукар хабери, па са џи акана. 6 Уверимо сиум кај о Девел ка завршинел и шукар бути со почминѓа ла ки туменде, џикоте на авела о диве е Христос Исусескоро. 7 Иси ман право те мислинав аѓаар туменге, соске мангава тумен цело вилеа хем о Девел туменге да сикавѓа пло шукарипе со на заслужинаја ле исто сар со сикавѓа манге. Тумен сарине поддржинена ман акана, џикоте сиум пханло ко синџирија, ама исто кеда бранинава сине о шукар хабери хем кеда трудинава ман сине те добина законско право те проповедина о шукар хабери.

8 Соске, о Девел тано манге сведоко кобор бут мангава те дикхав тумен саринен. Мангава тумен исто сар со мангела тумен о Христос Исус. 9 Хем понадари молинава ман тумаро мангипе са повише хем повише те бајрол, пошукар те пенџарен хем шукар те хаљовен е Девлескири волја. 10 Молинава ман те проценинен сој тано најважно, те шај те овен бизи маана хем те на сопкинен е јаверен са џикоте на авела е Христосескоро диве. 11 Исто аѓаар молинава ман, адалеа со ка поможинел тумен о Исус Христос, те керен са повише праведна буќа,* те шај те славинен хем те фалинен е Девле.

12 Пхраљален, мангава те џанен кај адава со случинела пе манге, уствари поможинѓа панда повише те ширинел пе о шукар хабери, 13 аѓаар, цело стража е царескири хем са о јавера шукар џанена кај сиум пханло адалеске со служинава е Христосеске. 14 Адава со сиум пханло денѓа сила буте пхраленге кола со служинена е Господареске хем акана ола да храбро хем бизи дар вакерена е Девлескоро лафи.

15 Точно тано адава кај несаве проповединена башо Христос адалеске сој тане завидлива хем мангена те натпреваринен пе, а јавера керена адава таро шукар мотивија. 16 Околен со иси лен шукар мотивија таро мангипе проповединена о хабери башо Христос. Ола керена адава соске џанена кај ме сиум биримо те бранинав о шукар хабери, 17 ама адала со на проповединена таро исправна мотивија, него адалеске со мангена те керен акошиба, ола мангена те керен манге проблемија џикоте сиум пханло. 18 Хем со постигнинена адалеа? Па ништо јавер, само со палем ко било саво начин проповединела пе башо Христос, бизи разлика дали таро исправна мотивија или на. Ме радујнава ман башо адава хем понадари да ка радујнав ман, 19 соске џанава кај ко крајо ка овав спасимо башо тумаре молитве вакерде таро вило хем адалеске со поможинела ман е Девлескири сила* која со сине денди е Исус Христосеске. 20 Уверимо сиум хем надинава ман кај нане те овел ништо со ка керел те лаџав, него кај понадари да ка проповединав бизи дар, те шај акана те фалинав* е Христосе сар со керава сине адава секогаш, било те живинав било те мерав.

21 Соске, ако ачховава џивдо, ме живинава башо Христос, ама ако мерава, адава ка овел панда пошукар манге. 22 А ако ачховава џивдо ко акава тело, тегани ка шај те керав повише башо Христос. Ама сепак нашти те вакерав со би биринава. 23 Соске, на џанава која таро акала дуј буќа те биринав, соске мангава те овав ослободимо те шај те овав е Христосеа хем адава тано бут пошукар. 24 Ама туменге ка овел пошукар ме те ачховав џивдо ко акава тело. 25 Адалеске со сиум уверимо ко акава, џанава кај ка ачховав џивдо хем ка овав сариненцар туменцар те шај те напредујнен ки тумари служба башо Девел хем те осетинен и радост со авела тари вера. 26 Кеда ка иранав ман ки туменде, тумари доверба ко Христос Исус ка бајрол панда повише мло себепи.

27 Живинен аѓаар сар со ваљани те живинен окола со ширинена о шукар хабери башо Христос. Хем аѓаар, бизи разлика дали ка авав ки туменде или на, тумен ка ачховен цврста, ка овен тумен иста мисле хем ка овен ко јекхипе џикоте заедно боринена тумен те икерен тумари вера ко шукар хабери. 28 Никогаш ма даран таро окола со противинена пе туменге. Са адава ка овел доказ кај ола ка овен уништиме, а тумен ка овен спасиме. Адава доказ авела таро Девел. 29 Туменге сине денди и чест, на само те сикавен вера ко Христос, него исто аѓаар хем те циден муке баши лесте. 30 Соске, тумен да боринена тумен е иста неволјенцар, коленцар со дикхена кај ме да боринава ман хем шунена кај ме панда боринава ман ленцар.

2 Адалеске, ако машкар туменде охрабринена тумен сар христијања, ако утешинена тумен мангипаја, ако сикавена јекх јекхеске грижа, мангипе хем сочувство, 2 керен те овав бут радосно аѓаар со сложно ка размислинен хем ка овел тумен о исто мангипе, ко са ка овен ко јекхипе хем ка овен тумен о иста мисле. 3 Ма керен ништо адалеске со мангена те акошен тумен или тари гордост, него понизно дикхен е јаверен сар побаре тумендар. 4 Хем ма дикхен само туменге те овел шукар, него исто аѓаар е јаверенге да.

5 Размислинен аѓаар сар со размислинела сине о Христос Исус, 6 кова со, иако сине слично сар о Девел, ов никогаш на мислинѓа те лел е Девлескоро тхан хем те овел јекх леа. 7 Наместо адава, ов откажинѓа пе таро са со сине ле, прифатинѓа те овел сар робо хем уло мануш. 8 На само адава, кеда ало сар мануш, сикавѓа бари понизност хем уло послушно џи ко мерибе, хем адава мерибе ко стубо мучибаске.* 9 Баш адалеске о Девел чхивѓа ле ки побари положба тари адаја со сине ле англедер хем цело вилеа денѓа ле анав* сој тано упредер секова јавер анав, 10 те шај е Исусеске ко анав те перен ко кочака са окола сој тане ко небо, ки пхув хем тели пхув. 11 Хем секова јекх* ваљани јавно те признајнел кај о Исус Христос тано амаро Господари, те шај аѓаар те славинел пе о Девел, амаро Дад.

12 Адалеске, мле мангле, сар со сиен сине секогаш послушна, на само џикоте сиум сине туменцар, него панда повише акана кеда на сиум туменцар, понадари да ден тумендар са те овен спасиме аѓаар со ка даран хем хор ка поштујнен е Девле. 13 Соске, о Девел мангела те дел тумен хем и желба хем и сила те постапинен спрема лескири волја. 14 Керен са бизо те жалинен тумен хем бизо те распрајнен тумен, 15 те шај те овен е Девлескере чхаве со нане крива башо ништо хем сој тане чиста виленгере. Аѓаар со нане те овен крива башо ништо, тумен ка светинен сар силно светлина, иако живинена машкар акаја румими хем лошно генерација. 16 Цврсто икерен тумен ко е Девлескоро лафи со дела живото. Тегани ка овел ман причина те радујнав ман ко е Христосескоро диве, соске ка џанав кај на прастандиљум хем на трудинѓум ман џабе. 17 Ама чак те дав ман сар жртва со чхорела пе* упри тумари жртва хем упри служба со керена ла е Девлеске, адалеске со иси тумен вера ки лесте, ме бут радујнава ман заедно туменцар. 18 А исто аѓаар тумен да ваљани бут те радујнен тумен заедно манцар.

19 Надинава ман кај о Господари о Исус ка мукхел сигенде те бичхалав ки туменде е Тимотее, те шај кеда ка добинав хабери тумендар те овав охрабримо. 20 Соске, нане ман никој сар лесте, кова со чаче ка грижинел пе башо адава со ваљани туменге. 21 Соске, са о јавера грижинена пе само песке, а на башо адава со мангела о Исус Христос. 22 Ама тумен џанена кај о Тимотеј сикавѓа кај нане асавко, него кај ов сар јекх чхаво пле дадеа ревно служинѓа манцар те ширина о шукар хабери. 23 Адалеске, надинава ман кај само со ка дознајнав со ка овел манцар, ка шај те бичхалав ле ки туменде. 24 Хем уверимо сиум кај, ако тани е Господарескири волја, панда хари ме да ка шај те авав ки туменде.

25 Ама акана мислинава кај ваљани те бичхалав ки туменде е Епафродите, мло пхрал кова со служинела заедно манцар хем кова со исто сар манде тано војнико е Христосескоро, коле со тумен бичхалѓен те поможинел манге, 26 соске едвај аџикерела те дикхел тумен хем тано бут тажно со шунѓен кај насвалило. 27 Оја, ов сине добором насвало со ка мерел сине, ама о Девел жалинѓа ле хем жалинѓа манде да, те шај те на овел манге панда попхаро. 28 Бичхалава ле ки туменде со шај посигате, те шај кеда палем ка дикхен ле те радујнен тумен, тегани ме да нане те секиринав ман добором туменге. 29 Адалеске, доџакерен ле пхравде вастенцар сар со доџакерена е Господарескере следбеникон. Хем сикавен кај ценинена бут асавке пхрален, 30 соске ов харичкаске ка мерел сине џикоте служинела сине е Христосеске* хем чхивѓа ки опасност пло живото баши манде, соске тумен нашти сине те овен акате те поможинен манге.

3 Ко крајо пхраљален, понадари да радујнен тумен адалеске со сиен следбеникија е Господарескере. Манге нане пхаро те пишинав туменге палем башо иста буќа, соске адава тано башо тумаро шукарипе.

2 Пазинен тумен таро мануша со нане чиста,* пазинен тумен таро окола со керена лошнипе е јаверенге, пазинен тумен таро окола кола со родена тумендар те овен керде сунети. 3 Соске, амен иси амен о чачутно сунетлуко, амен кола со служинаја е Девлеске водиме тари лескири сила,* дичинаја амен е Христос Исусеа хем нане амен доверба ко тело. 4 Ама ман, повише таро јавера мануша, иси ман соске те овел ман доверба ко тело.

Хем ако некој мислинела кај иси ле причине те овел ле доверба ко тело, тегани ман иси ман панда повише: 5 сиум сине кердо сунети ко офтото диве, Израелцо сиум таро е Бенјаминескоро племе, бијамо сиум сар Евреи тари дај хем таро дад со сине Евреија. Сар фарисеи строго икерава ман сине ко Закони, 6 тари ревност прогонинава сине о собрание хем строго икерава ман сине ко адава со вакерела о Закони кај тано исправно. 7 Са адала буќа со англе сине манге вредна, акана себепи о Христос дикхава кај нане лен нисави вредност. 8 Хем на само адава, нијекх бути нане вредно кеда спорединава ла е најскапоцено буќаја, адава тано со пенџарава е Христос Исусе мле Господаре. Лескоро себепи откажинѓум ман таро са, хем ко са адава дикхава сар ѓубре, само те шај те добинав е Христосе 9 хем те овав ко јекхипе леа. Ама на вакерава кај сиум праведно адалеске со икерава ман ко Закони, него адалеске со верујнава ко Христос, соске о Девел дикхела амен сар праведна адалеске со иси амен вера. 10 Мли цел тани те џанав е Христосе хем и сила лескере воскреснибаскири, те цидав муке сар лесте, па чак те мерав сар лесте. 11 Соске, надинава ман ако шај несар те овав машкар окола со прва ка воскреснинен.

12 Ме на вакерава кај више добинѓум акаја награда, а ни палем кај више уљум совршено. Ама дава мандар са, те шај те добинав и награда. Соске, џанава кај о Христос Исус биринѓа ман башо акава. 13 Пхраљален, ме на мислинава кај више добинѓум и награда. Ама јекх тано сигурно: бистрава адава сој тано пали манде хем трудинава ман те ресав адава сој тано англи манде. 14 Прастава те ресав џи ки мли цел те добинав и награда ко небо, која со о Девел дела ла аменге, колен со викинѓа амен преку о Христос Исус. 15 Адалеске, сарине амен со сием зрела ваљани аѓаар те размислина. Ама ако некој размислинела појавер, тегани о Девел нека поможинел леске те размислинел исправно. 16 Бизи разлика кобор напредујнѓем џи акана, ваљани понадари да те напредујна, џикоте џаја ко акава исто друмо.

17 Пхраљален, сарине џан пало мло пример хем дикхен околен со џана пало пример со денѓем тумен. 18 Соске, иси бут кола со акана понашинена пе сар душмања со мрзинена е Христосескоро стубо мучибаске.* Лендар бут пути вакерава туменге сине, ама англе кеда керава сине лендар лафи, адава керава ле сине радосно, ама акана кеда керава лендар лафи, ровава. 19 Ола ка овен уништиме, ленгере желбе тано ленгоро девел,* ола дичинена пе е буќенцар колендар со ваљани те лаџан хем мислинена само башо буќа кола сој ки пхув. 20 А амаро кхер тано ко небо* хем амен едвај аџикераја е спасителе те авел адатхар, амаре Господаре сој тано ко небо, о Исус Христос. 21 Ов ка користинел пли бари моќ со добинѓа ла, те владинел упри са. Хем ка керел амаро тело, кова сој слабо, те овел славно сар лескоро.

4 Пхраљален, бут мангава тумен хем едвај аџикерава те дикхав тумен. Тумен сиен мли радост хем сиен манге сар круна. Мангле пхраљален, поттикнинава тумен те ачховен верна* е Господареске.

2 Поттикнинава е Еводија хем е Синтихија те овен лен о иста мисле џикоте служинена е Господареске. 3 Молинава туте да, мло верно соработнико, те поможине акале пхењенге кола со боринѓе пе башо шукар хабери заедно манцар, е Клементеа хем е јавере мле соработниконцар, коленгере со анава тане пишиме ко лил е животоскоро.

4 Секогаш радујнен тумен башо Господари. Хем палем вакерава туменге: радујнен тумен! 5 Са о мануша нека дикхен кај сиен разумна.* О Господари тано паше. 6 Ма секиринен тумен башо ништо, него са адава со ваљани туменге роден е Девлестар ки молитва. Молинен тумен леске цело вилеа хем благодаринен тумен леске. 7 Ако керена аѓаар о мир таро Девел, кова сој упредер таро адава со шај о мануш те хаљол, ка аракхел тумаре виле хем тумаре мисле преку о Христос Исус.

8 Ко крајо пхраљален, са сој чачутно, са сој важно, са сој праведно, са сој чисто, са со поттикнинела ко мангипе, башо са со керела пе шукар лафи, са сој шукар, са со врединела те фалинел пе, башо адава размислинен. 9 Керен адава со сиклилен, со прифатинѓен, со шунѓен хем со дикхлен мандар. Тегани о Девел кова со дела мир ка овел туменцар.

10 Ме бут радујнава ман хем сиум благодарно е Господареске со палем почминѓен те мислинен манге. Џанава кај тумен секогаш мислинена сине манге, ама на сине тумен прилика те сикавен адава. 11 На вакерава акава адалеске со фалинела манге нешто, соске сиклиљум те овав задоволно ки било која ситуација. 12 Џанава сар тано те овел тут хари, а џанава хем сар тано те овел тут бут. Сиклиљум сар те овав задоволно ко са хем ки секоја ситуација - хем кеда сиум чало хем кеда сиум бокхало, хем кеда иси ман бут хем кеда иси ман хари. 13 Са шај те керав, соске поможинела манге окова со дела ман сила.

14 Сепак шукар керѓен со поможинѓен ман ко мле неволје. 15 Уствари, тумен о Филипјања бут шукар џанена кај кеда ме гељум манге тари Македонија, откеда тумен прво пути шунѓен башо шукар хабери, на поможинѓа манге ни јекх јавер собрание, освен тумен. 16 Чак кеда сиум сине ко Солун, тумен бичхалѓен манге несаве буќа со ваљанѓе манге хем адава на јекх пути, него дуј пути. 17 На вакерава акава адалеске со родава тумендар нешто. Мангава само о шукар буќа со керена те додајнен пе туменге ки сметка.* 18 Ама иси ман са со ваљани манге, чак повише таро адава. Ништо на фалинела манге откеда таро Епафродит добинѓум адава со бичхалѓен манге. Тумаро поклон тано сар пријатно мирис хем жртва прифатливо е Девлеске. 19 А мло Девел таро пло баро* барвалипе ка дел тумен са адава со ваљани туменге преку о Христос Исус. 20 Нека славинел пе амаро Девел хем Дад засекогаш! Амин.

21 Поздравинен мандар секоле свето мануше* сој е Христос Исусескоро ученико. О пхраља да сој манцар поздравинена тумен. 22 Поздравинена тумен са о света мануша, а посебно окола тари е цезарескири палата.

23 Амаро Господари о Исус Христос нека сикавел туменге пло шукарипе со на заслужинаја ле адалеске со иси тумен исправно стави.