ПИСМО ЏИ КО КОЛОШАЊА

1 Ме о Павле со сиум апостоли е Христос Исусескоро спрема е Девлескири волја, хем акате манцар тано амаро пхрал о Тимотеј, 2 пишинава акава писмо џи ко света мануша* хем о верна пхраља ко Колоси сој тане ко јекхипе е Христосеа:

Нека овел тумен о шукарипе со на заслужинаја ле хем о мир таро Девел кова сој амаро Дад.

3 Амен секогаш благодаринаја е Девлеске, кова сој Дад амаре Господареске е Исус Христосеске, кеда молинаја амен туменге. 4 Соске, шунѓем баши тумари вера ко Христос Исус хем башо мангипе со иси тумен спрема са о света мануша. 5 Тумен иси тумен акаја вера хем акава мангипе адалеске со иси тумен надеж кај ка добинен и награда со аџикерела тумен ко небо. Тумен англедер шунѓен баши акаја надеж кеда сине туменге проповедимо о чачипе - о шукар хабери, 6 кова со ресља џи ки туменде. Акава шукар хабери анела шукар резултатија хем ширинела пе ко цело свето. А адава овела машкар туменде да таро адава диве кеда шунѓен хем шукар пенџарѓен о чачипе башо е Девлескоро шукарипе со на заслужинаја ле. 7 Тумен сиклилен башо е Девлескоро шукарипе со на заслужинаја ле таро Епафрас, амаро мангло хем верно пхрал, кова со заедно аменцар служинела сар робо е Христосеске хем кова со аменге ко тхан поможинела тумен. 8 Ов исто аѓаар вакерѓа аменге кај е Девлескири сила* поможинѓа туменге те сикавен мангипе.

9 Адалеске амен да, на чхинавѓем те молина амен туменге таро диве кеда шунѓем акала буќа баши туменде хем родаја таро Девел шукар те пенџарен лескири волја, те овен пхерде мудрост, те овел тумен и способност шукар те хаљовен о буќа преку е Девлескири сила,* 10 те живинен аѓаар сар со ваљани те живинен окола со обожавинена е Јехова* хем целосно те угодинен леске аѓаар со ка керен секоја бути сој шукар хем аѓаар со са пошукар ка пенџарен е Девле. 11 Исто аѓаар, молинаја амен о Девел те користинел пли бари моќ те шај те зојракерел тумен хем те дел тумен и сила со ваљани туменге те шај стрпливо хем радосно те истрајнен ко са. 12 Понадари да благодаринен е Дадеске, кова со поможинѓа туменге те овен достојна те шај тумен да те наслединен адава со ов ветинѓа е света манушенге, кола сој тане водиме таро Девел.

13 Ов ослободинѓа амен тари власт е темницакири хем анѓа амен ко царство пле мангле Чхавескоро. 14 Преку лескере Чхавескири откупнина,* амаре гревија тане простиме. 15 О Чхаво сикавела аменге саво тано о Девел коле со нашти дикхаја ле, о првобијамо таро са сој створимо. 16 Преку лесте сине створиме са о јавера буќа ко небо хем ки пхув, о буќа со дикхаја лен хем о буќа со на дикхаја лен, било те овен престолија или господарија, било владе или властија. Са о јавера буќа сине створиме преку лесте хем леске. 17 Исто аѓаар, ов постојнела сине англедер са о јавера буќа хем преку лесте са о јавера буќа сине створиме. 18 Ов тано о шеро е собраниескоро, кова сој лескоро тело. Ов тано о почеток, о прво со воскреснинѓа таро муле* те шај те овел о прво ко са о буќа, 19 соске о Девел мангља ко Христос те овен са лескере особине, 20 хем преку лесте о Девел керела те смиринел пеа са, било ко небо било ки пхув. О Девел керела те овел адава преку е Исусескоро рат со сине чхордо ко стубо мучибаске.*

21 Тумен да јекх време сиен сине одвојме таро Девел, сиен сине лескере душмања адалеске со мислинена сине само башо лошна буќа, 22 ама акана ов керѓа те смиринен тумен леа преку е Исусескоро мерибе, кова со денѓа сар жртва пло манушикано тело. Ов керѓа адава те шај тумен англи лесте те овен мануша сој тане света, бизи маана хем со нане крива башо ништо. 23 Ама, џанѓола пе кај понадари да ваљани те ачховен ки вера, цврсто те икерен тумен ко темели е веракоро хем те овен зорале. Никогаш ма мукхен ништо те лел и надеж со добинѓен ла кеда шунѓен о шукар хабери со сине проповедимо са е манушенге тело небо. Ме о Павле, сиум слуга акале шукар хабереске.

24 Радујнава ман со цидава муке башо тумаро шукарипе. Џанава кај мора понадари да те цидав муке е Христосескоро себепи, башо шукарипе е собраниескоро, кова сој лескоро тело. 25 Ме служинава акале собраниеске соске, о Девел денѓа ман адаја задача, хем тумен иси тумен корист таро адава. Адалеске цело вилеа проповединава е Девлескоро лафи, 26 уствари е Девлескири тајна* која со сине гаравди таро мануша кола со живинена сине ко пурано време* хем таро пуране генерацие, ама акана адаја тајна откринѓа пе е Девлескере света манушенге. 27 О Девел мангља е света манушенге таро јавера народија те откринел акава баро барвалипе, пли тајна.* Акаја тајна тани кај о Христос тано ко јекхипе туменцар хем кај иси тумен надеж тумен да те добинен лескири слава. 28 Амен проповединаја баши лесте, секас предупрединаја хем сикаваја. Амен делинаја е јаверенцар и бари мудрост со добинѓем ла, те шај те поможина сариненге сој ко јекхипе е Христосеа те овен зрела. 29 Адалеске ме понадари да бут трудинава ман хем боринава ман, соске поможинела ман и сила со дела ман ов.

2 Соске, мангава те џанен кобор бут боринава ман баши туменге, башо окола сој ки Лаодикија хем башо са окола со никогаш на дикхле ман лично. 2 Керава акава те шај секаскоро вило те овел утешимо, те шај о мангипе те спојнел тумен јекх јекхеа, те шај те добинен са о благословија со авена кеда сиен цврсто увериме кај шукар хаљовена о чачипе, хем те шај шукар те пенџарен е Девлескири тајна,* а адава тано о Христос. 3 Цело скапоцено мудрост хем хаљојбе тане гаравде ки лесте. 4 Вакерава акава те шај никој те на преваринел тумен уверлива лафенцар. 5 Иако на сиум адатхе туменцар, ко мле мисле сиум туменцар хем радујнава ман со џанава кај машкар туменде иси редо хем со иси тумен цврсто вера ко Христос.

6 Тумен прифатинѓен амаре Господаре е Христос Исусе, адалеске понадари да џан пали лесте. 7 Сар со сиклилен, тумари вера ко Христос мора те овел зорали хем цврсто сар јекх каш со иси ле хор коренија, хем никогаш ма чхинавен те благодаринен е Девлеске башо са.

8 Пазинен никој те на преваринел* тумен филозофијаја хем ховавне хем чуче лафенцар кола со авена таро манушикане традицие. Асавке мануша размислинена ко начин сар со размислинела акава свето, а на сар о Христос, 9 кова со целосно сикавела е Девлескере особине. 10 Хем аѓаар преку лесте, кова сој упредер секоја влада хем власт, на фалинела туменге ништо. 11 Адалеске со сиен ко јекхипе леа тумен сиен сине керде сунети, ама на таро манушикане васта, него аѓаар со отфрлинѓен о грешна буќа со керела тумаро тело. Соске, окола сој тане е Христосескере слуге ваљани те овен керде сунети ко асавко начин. 12 Сиен сине паруме е Христосеа, соске сине тумен о исто крстибе сар лескоро, хем адалеске со сиен ко јекхипе леа тумен сиен воскресниме заедно леа преку тумари вера ко адава со керѓа пле силаја о Девел, кова со воскреснинѓа ле таро муле.

13 Иако сиен сине муле себепи тумаре гревија хем адалеске со на сиен сине керде сунети, о Девел денѓа тумен живото заедно е Исусеа хем цело вилеа простинѓа са тумаре гревија. 14 Ов бришинѓа о пишимо Закони кова со сикавела сине кај сием грешникија хем керѓа више те на важинел, аѓаар со ковинѓа ле ко стубо мучибаске.* 15 Преку о стубо мучибаске, ов перавѓа о владе хем о властија хем англи сариненде сикавѓа лен сар заробеникија, те шај те џанел пе кај ов побединѓа лен.

16 Адалеске, ма мукхен никој те судинел туменге башо адава со хана хем со пиена или башо адава дали славинена празникија, дали славинена и терни месечина* или дали икерена о сабат. 17 Адала буќа тане само сенка таро адава со ка авел, ама са акала буќа исполнинена пе ко Христос. 18 Ма мукхен нисаво мануш те лел тумендар и награда, чак ако керела пе кај тано понизно хем кај обожавинела ко несаво начин е ангелен. Асавко мануш упорно ачхола ко адава со дикхља ко визие. Ов ваздела пе е буќенцар со на врединена ништо, соске тано водимо таро манушикано размислибе, 19 хем на икерела пе цврсто ко Христос, кова сој о шеро. О Христос тано адава кова со дела са сој потребно е цело телоске, а адава тано о собрание, те шај шукар те функциониринел. Ов користинела о зглобија хем о мускулија* те шај те спојнел о тело заедно, хем преку лесте о Девел керела цело тело те бајрол.

20 Тумен мулен заедно е Христосеа хем сиен ослободиме таро начин сар размислинела акава свето. Тегани, соске живинена аѓаар сар те пхене панда сиен дело таро свето? Соске џана панда пало лескере правилија, сар сој: 21 „Ма астар, ма пробин, ма пипин?“ 22 Акала тане само заповедија хем правилија таро мануша башо буќа со хана пе хем со пиена пе хем пало адава више на постојнена. 23 Адала со икерена пе ко акала заповедија изглединена сар мудра хем кај понизно служинена е Девлеске, ама ола коркори одлучинена сар те обожавинен е Девле. Иако ола мучинена пумаро тело, сепак адава на поможинела лен те боринен пе против о желбе пумаре телоскере.

3 Ама, ако о Девел воскреснинѓа тумен е Христосеа, тегани роден адава сој ко небо, коте со о Христос бешела тари е Девлескири десно страна. 2 Овен концентририме ко адава сој ко небо, а на ко адава сој ки пхув. 3 Соске, тумен мулен хем тумаро живото тано гаравдо ко Христос, кова сој ко јекхипе е Девлеа. 4 Кеда о Христос, кова сој амаро живото, ка појавинел пе, тегани тумен да ка појавинен тумен леа ки слава.

5 Адалеске, мударен о желбе со авена таро тело: о неморал,* о мелалипе, и неконтролирано сексуално желба, о штетна желбе хем и алчност која сој тани идолопоклонство. 6 Е Девлескири бари холи ка авел упро мануша кола со керена акала буќа. 7 Тумен да англедер керена сине акала буќа. 8 Ама акана мора те циден тумендар са акала буќа: о гнев, и холи, о лошнипа, о лафија со вреџинена, хем безобразна лафија те на икљовен таро тумаро муј. 9 Ма ховавен тумен јекх јекхеа. Хуљавен и пурани личност хем лакере постапке, 10 а уравен и неви личност која со стално обновинела пе џикоте са пошукар пенџарена е Девле. Акаја неви личност, која со створинѓа ла о Девел, керела те овен са послична сар лесте. 11 Акате нане више ни Грко, ни Евреи, ни некој сој кердо сунети, ни некој со нане кердо сунети, ни странцо, ни Скити,* ни робо, ни некој сој слободно, него о Христос тано са хем ко сарине.

12 Адалеске, сар мануша сој бириме таро Девел, света хем мангле, уравен тумен ко баро сочувство, ки љубезност, ки понизност, ки кроткост хем ки стрпливост. 13 Понадари да трпинен тумен јекх јекхеа хем цело вилеа простинен туменге, чак ако иси тумен причина те жалинен тумен е јаверендар. Сар о Јехова* со спремно простинѓа туменге, аѓаар керен тумен да. 14 Освен адава, уравен тумен ко мангипе, соске о мангипе керела е манушен те овен совршено ко јекхипе.

15 Хем исто аѓаар, е Христосескоро мир нека владинел упро тумаре виле, соске сиен викиме ко адава мир адалеске со сиен делија таро јекх тело. Овен благодарна. 16 Мукхен о сикајба е Христосескере целосно те пхерен тумаре виле хем те керен тумен мудра. Понадари да сикавен хем охрабринен јекх јекхе псалменцар, гиленцар со фалинена е Девле, гиленцар со обожавинена е Девле коленцар со сикавена кај сиен благодарна. Гиљавен таро вило е Јеховаске.* 17 Било со те керен или те вакерен, керен адава ко анав е Господарескоро е Исусескоро. Преку лесте благодаринен е Девлеске, о Дад.

18 Тумен о ромња, овен подложна тумаре роменге, соске адава очекујнела пе таро следбеникија е Господарескере. 19 Тумен о рома, понадари да манген тумаре ромњен хем ма понашинен тумен ленцар грубо. 20 Тумен о чхаве, шунен тумаре родителен ко са, соске аѓаар ка угодинен е Господареске. 21 Тумен о дада, ма хољанкерен* тумаре чхавен, те шај те на обесхрабринен пе. 22 Тумен о робија, ко са овен послушна тумаре Господаренге, на само кеда ола дикхена тумен, те шај само те угодинен е манушенге, него керен адава искрено вилеа соске поштујнена е Јехова.* 23 Било со те керен, керен адава цело вилеа, сар е Јеховаске,* а на сар е манушенге. 24 Керен акава, соске џанена кај таро Јехова* ка добинен о наследство сар награда. Овен робија е Господареске, е Христосеске. 25 Ма бистрен кај окова со керела лошна буќа ка овел казнимо башо адава со керѓа хем кај о Девел на делинела е манушен.*

4 Тумен о господарија, понашинен тумен тумаре робонцар ко јекх праведно хем чесно начин, соске џанена кај тумен да иси тумен Господари ко небо.

2 Никогаш ма чхинавен те молинен тумен, хем џикоте керена адава ачховен џангавде хем благодаринен е Девлеске. 3 Исто аѓаар, молинен тумен аменге да о Девел те дел амен прилика те проповедина те шај те вакера лескири тајна* башо Христос, а баши адаја тајна ме сиум пханло ко затвор. 4 Молинен тумен те шај јасно те проповединав о хабери, аѓаар сар со ваљани те керав.

5 Понадари да понашинен тумен мудро околенцар сој авријал таро собрание. Шукар користинен тумаро време.* 6 Сар о лон со керела о хајбе те овел вкусно, аѓаар тумаре лафија секогаш нека овен пријатна е јаверенге те шај те џанен те одговоринен секаске сар со ваљани.

7 О Тихик, мло мангло пхрал хем верно слуга кова со заедно манцар служинела сар робо е Господареске, ка вакерел туменге са башо адава со овела манцар. 8 Бичхалава ле ки туменде те шај те џанен сар сием хем те шај те утешинел тумаре виле. 9 Ов ка авел заедно е Онисимеа, мло верно хем мангло пхрал, кова со сине туменцар. Ола ка вакерен туменге башо са адава со случинела пе акате.

10 Поздравинена тумен о Аристарх, кова со заедно манцар тано пханло ко затвор хем о Марко, о братучети е Варнаваскоро, колеске со панда англедер сине туменге вакердо те доџакерен ле шукар кеда ка авел ки туменде, 11 хем о Исус коле со викинена Јуст. Ола тане таро окола сој керде сунети. Само ола тане мле соработникија ки служба башо е Девлескоро Царство, ола поможинѓе ман хем утешинѓе ман. 12 Поздравинела тумен о Епафрас, кова со исто аѓаар сине туменцар хем кова со служинела сар робо е Христос Исусеске. Ов секогаш таро вило молинела пе туменге те шај понадари да те ачховен зрела хем те овен цврсто увериме ко са адава сој е Девлескири волја. 13 Ме чаче вакерава туменге кај ов бут трудинела пе баши туменде хем башо окола со живинена ки Лаодикија хем ко Хиераполис.

14 Исто аѓаар поздравинена тумен о Лука, о мангло доктори, хем о Димас. 15 Поздравинен мандар е пхрален ки Лаодикија, исто аѓаар е пхења е Нимфа хем о собрание кова со кхедела пе ко лакоро кхер. 16 Откеда акава писмо ка читинел пе ки туменде, нека читинел пе хем ко собрание ки Лаодикија, а тумен да исто читинен адава писмо со бичхалѓум ки Лаодикија. 17 Хем исто аѓаар, вакерен е Архипеске акава: „Де тутар са те шај шукар те завршине тли служба со добинѓан ла таро Господари“.

18 Ме о Павле, пишинава туменге акава поздрав мле вастеа. Понадари да мислинен ки манде, соске сиум пханло ко синџирија. О Девел нека сикавел туменге пло шукарипе со на заслужинаја ле.