ПРВО ПИСМО ЏИ КО СОЛУНЈАЊА

1 Ме о Павле, а акате манцар тане о Силван* хем о Тимотеј, пишинава акава писмо џи ко собрание ко Солун, кова сој ко јекхипе е Девлеа, кова сој амаро Дад, хем е Господареа е Христос Исусеа:

Нека овел тумен о шукарипе со на заслужинаја ле хем о мир таро Девел.

2 Секогаш благодаринаја е Девлеске баши туменде кеда спомнинаја тумен ко амаре молитве. 3 Соске, англо амаро Девел, кова сој амаро Дад, амен никогаш на бистраја адава со тумен керена адалеске со иси тумен вера, кобор трудинена тумен адалеске со иси тумен мангипе хем кобор истрајнена ко пхарипа адалеске со иси тумен надеж ко амаро Господари о Исус Христос. 4 Соске, амен џанаја пхраљален, кај о Девел кова со мангела тумен, ов биринѓа тумен. 5 Соске, о шукар хабери со проповединѓем туменге, на керѓем ле адава само лафенцар, него адава керѓем соске поможинѓа аменге е Девлескири сила,* сием сине цврсто увериме кај адава со вакераја туменге тано о чачипе хем адава хабери силно влијајнѓа упри туменде. А тумен коркори џанена саве сием сине машкар туменде, хем адава сине башо тумаро шукарипе. 6 Хем тумен гелен пало амаро пример хем пало пример е Господарескоро, соске иако сине тумен бут неволје, тумен радосно прифатинѓен е Девлескоро лафи. А адаја радост авела тари е Девлескири сила.* 7 Аѓаар, тумен улен пример са е верниконге ки Македонија хем ки Ахаја.

8 Уствари, на само со тумен ширинѓен е Јеховаскоро* лафи ки Македонија хем ки Ахаја, него хем шундило сегде баши тумари вера ко Девел, адалеске амен на ваљани те вакера ништо. 9 Соске, коркори о мануша вакерена башо адава сар амен прво пути алем ки туменде хем сар тумен отфрлинѓен тумаре идолен хем почминѓен те служинен сар робија е џивде хем е чачутне Девлеске, 10 хем кај аџикерена лескоро Чхаво о Исус те авел таро небо, коле со ов ваздинѓа ле таро муле хем кова со спасинела амен тари е Девлескири бари холи со авела.

2 Пхраљален, тумен коркори џанена кај амари посета ки туменде на сине џабе. 2 Сар со шунѓен, англедер адава ко Филипи цидинѓем муке хем сием сине малтретириме. Ама адалеске со поможинѓа амен амаро Девел, кхединѓем храброст те проповедина туменге о шукар хабери, иако сине амен баро противибе.* 3 Соске, адава со поттикнинаја тумен те керен, на авела таро погрешна идее или таро нечиста мотивија хем ни на кераја ле те шај некас те преварина. 4 Наместо адава, сар асавке кас со о Девел чхивѓа те проповединен о шукар хабери, амен на кераја лафи те шај те угодина е манушенге, него е Девлеске кова со испитинела амаре виле.

5 Уствари тумен џанена кај амен никогаш на фалинѓем тумен само те шај те преварина тумен хем на сикавѓем амен сар шукар мануша само те шај те добина тумендар нешто. О Девел тано аменге сведоко башо акава! 6 Ни на родинѓем слава таро мануша, ни тумендар, ни е јаверендар, иако сар е Христосескере апостолија амен шај сине те ова туменге ко терет. 7 Наместо адава, грижинѓем амен туменге, сар јекх дај која со парварела пле чхавен хем мангипаја грижинела пе ленге. 8 Аѓаар, пхерде мангипаја спрема туменде, сием сине спремна на само те вакера туменге е Девлескоро шукар хабери, него хем те да амаро живото туменге, соске бут заманглем тумен.

9 Сигурно сетинена тумен, пхраљален, кобор трудинѓем амен хем кобор мучинѓем амен. Џикоте проповединаја сине туменге е Девлескоро шукар хабери, кераја сине бути диве хем рат те шај никаске тумендар те на ова ко терет. 10 Тумен, кола со сиен верникија, сиен сведокија, а исто аѓаар о Девел да кај кеда сием сине туменцар амен сием сине верна, керѓем адава сој тано праведно хем на сием сине крива башо ништо. 11 Тумен шукар џанена кај амен понадари да поттикнинѓем, утешинѓем хем советинѓем секоле јекхе тумендар сар со керела јекх дад пле чхавенцар, 12 те шај понадари да те живинен ко начин сар со мангела о Девел кова со викинела тумен те авен ко лескоро Царство хем те добинен слава.

13 Адалеске амен на чхинаваја те благодарина е Девлеске, соске кеда шунѓен е Девлескоро лафи амендар, тумен на прифатинѓен ле сар лафи таро мануш, него прифатинѓен ле аѓаар сар сој чаче, сар лафи таро Девел, хем адава лафи влијајнела упри туменде. 14 Соске, тумен пхраљален гелен пало пример е Девлескере собраниенгоро тари Јудеја кола сој ко јекхипе е Христос Исусеа. Соске, тумен да цидинѓен муке таро тумаро народо, исто сар ола со цидена муке таро Евреија, 15 кола со чак мударѓе е Господаре е Исусе хем е пророкон, а амен прогонинѓе амен. Освен адава, ола на угодинена е Девлеске, него тане против адава сој корисно са е манушенге, 16 соске трудинена пе те чхинавен амен те проповедина е манушенге таро јавера народија те шај ола те спасинен пе. Аѓаар ола пхерена пе са повише гревија. Ама е Девлескири бари холи ресља лен.

17 Пхраљален, иако кратко време сием сине одвојме тумендар хем на дикхлем тумен, тумен сиен сине аменге ко вило. Адалеске со бут фалинѓен аменге, керѓем са со шај лично те дикха тумен. 18 Адалеске манглем те ава ки туменде, а ме о Павле, на јекх пути него дуј пути трудинѓум ман те авав, ама о Сатана чхинавѓа амен. 19 Соске, сој тани амари надеж, амари радост или амари круна колаја со ка дичина амен англо амаро Господари о Исус ко време тари лескири присутност?* Зарем на сиен адава тумен? 20 Оја, тумен сиен амари гордост хем амари радост.

3 Адалеске, кеда нашти сине више те издржина, мислинѓем кај тано најшукар те ачхова коркори ки Атина, 2 а бичхалѓем е Тимотее, амаре пхрале хем е Девлескере слуга,* кова со проповединела о шукар хабери башо Христос, те зајакнинел тумен хем те утешинел тумен те шај тумари вера те овел цврсто, 3 хем аѓаар никаскири вера те на слабонел таро акала неволје. Соске, тумен џанена кај асавке буќа сигурно ка случинен пе аменге. 4 Кеда сием сине ки туменде, англедер вакерѓем туменге кај ка овен амен акала неволје, хем сар со џанена аѓаар да уло. 5 Адалеске со нашти сине више те издржинав, бичхалѓум ле ки туменде, те шај те дознајнав баши тумари верност, соске дарандиљум кај ко несаво начин о Бенг* шај чхивѓа тумен те грешинен хем кај шај сине џабе адава со трудинѓем амен.

6 Ама о Тимотеј акана само со иранѓа пе тумендар хем анѓа аменге шукар хаберија баши тумари вера хем мангипе, хем кај сиен радосна кеда сетинена тумен ки аменде хем едвај аџикерена те дикхен амен, исто сар амен да со едвај аџикераја те дикха тумен. 7 Адалеске пхраљален, иако нане амен адава со ваљани аменге хем иси амен неволје, амен утешинѓем амен кеда шунѓем баши тумари верност. 8 Адалеске со шунѓем кај тумен цврсто икерена тумен ко јекхипе е Господареа, амен џивдилем. 9 Чаче благодаринаја е Девлеске баши туменге, соске керѓен амен бут радосна. 10 Диве хем рат, таро вило молинаја амен е Девлеске те шај те дикха тумен хем те да тумен адава со фалинела туменге те шај тумари вера те овел зорали.

11 Молинаја амен о Девел, амаро Дад хем амаро Господари, о Исус, те пхравен аменге о друмо те ава ки туменде. 12 Исто аѓаар, мангаја о Господари те керел тумаро мангипе спрема јекх јекхесте хем спрема сариненде те бајрол хем те пхерел тумаре виле, исто сар сој амаро вило пхердо мангипаја спрема туменде. 13 Аѓаар тумаре виле ка овен цврста, нане те овен крива башо ништо хем ка овен света англо амаро Девел, о Дад, кеда амаро Господари о Исус ка овел присутно са пле света слугенцар.

4 Пхраљален, тумен живинена ко начин сој угодно е Девлеске, сар со сикавѓем тумен амен. Ама акана, ко анав е Господарескоро е Исусескоро, амен поттикнинаја тумен хем молинаја тумен понадари да те керен адава панда повише. 2 Соске, тумен џанена саве упатствија* денѓем тумен ко анав е Господарескоро е Исусескоро.

3 Соске, е Девлескири волја тани акаја: тумен ваљани те овен света хем те циден тумен подур таро неморал.* 4 Секова јекх тумендар ваљани те џанел сар те контролиринел пло тело* те шај те овен света хем те добинен чест. 5 Ма овен сар о мануша таро јавера народија со на пенџарена е Девле, соске лен иси лен алчна сексуална желбе со нашти контролиринена лен. 6 Нијекх на ваљани те керел адава со нане исправно хем те керел штета пле пхралеске, соске о Јехова* казнинела башо са акала буќа, сар со више вакерѓем туменге хем строго предупрединѓем тумен. 7 Соске, о Девел на викинѓа амен те живина живото кова со нане чисто, него викинѓа амен те ова света. 8 Адалеске, окова со отфрлинела акала предупредувања, ов на отфрлинела мануше, него е Девле, кова со дела тумен пли сила.*

9 А башо пхраликано мангипе на ваљани те пишина туменге, соске тумен коркори сиен сине сикавде таро Девел те манген тумен јекх јекхеа. 10 Уствари, тумен чаче сикавена мангипе са е пхраленге ки цело Македонија. Ама, поттикнинаја тумен, пхраљален, те керен адава панда повише. 11 Трудинен тумен те живинен мирно, те дикхен тумари бути хем те керен бути тумаре вастенцар, сар со сикавѓем тумен, 12 те шај о мануша сој авријал таро собрание те дикхен кај тумен живинена примерно хем те на ваљанел туменге никастар ништо.

13 Хем мангаја, пхраљален, тумен те џанен со ка овел околенцар сој муле,* те шај те на тугујнен сар о јавера мануша со нане лен надеж. 14 Соске, ако верујнаја кај о Исус муло хем воскреснинѓа, тегани верујнаја кај о Девел околен да кола со муле,* а сине ко јекхипе е Христосеа, ка воскреснинел лен те шај те овен е Исусеа. 15 Соске, акава вакераја туменге спрема е Јеховаскоро* лафи: амен со ка ова џивде ко време тари е Господарескири присутност нане те воскреснина англедер окола со муле.* 16 Соске, коркори о Господари ка хулел таро небо хем ка заповединел архангелескере гласоја хем е Девлескере трубаја, хем најангле ка уштен окола сој муле, а сине ко јекхипе е Христосеа. 17 Пало адава, амен со сием џивде, заедно ленцар ка ова ингарде ко облакија те шај те аракха амен е Господареа ко небо хем аѓаар амен секогаш ка ова е Господареа. 18 Адалеске, утешинен тумен јекх јекхеа акале лафенцар.

5 А башо времија хем башо диве сој одредиме, на ваљани те пишинел пе туменге, пхраљален. 2 Соске, тумен шукар џанена кај е Јеховаскоро* диве ка авел сар чор со авела ки рат. 3 Кеда о мануша ка вакерен: „Мир хем сигурност!“, тегани ка овен уништиме изненадено, сар o дукха со астарена јекхе кхамне џувља, хем ола ка нашти те нашен. 4 Ама тумен пхраљален, на сиен ки темница, па адава диве те изненадинел тумен сар е дивескири светлина со изненадинела е чорен, 5 соске тумен сарине сиен чхаве е светлинакере хем чхаве е дивескере. Амен на сием чхаве ни е раќакере, ни е темницакере.

6 Адалеске, те на сова сар о јавера, него те ачхова џангавде хем те размислина трезвено. 7 Соске, окола со совена, раќате совена хем окола со маќона, раќате маќона. 8 А амен кола со сием чхаве е дивескере, понадари да те размислина трезвено хем те чхива ко колин о оклоп е веракоро хем е мангипаскоро, а ко шеро те чхива о шлеми - и надеж кај ка ова спасиме. 9 Соске, о Девел на биринѓа амен те осетина лескири бари холи, него те ова спасиме преку амаро Господари о Исус Христос. 10 Ов муло аменге те шај амен, бизи разлика дали сием џангавде или соваја,* заедно леа те живина. 11 Адалеске, понадари да охрабринен тумен машкар туменде хем изградинен јекх јекхе, сар со више керена.

12 Молинаја тумен, пхраљален, сикавен поштовање околенге со трудинена пе машкар туменде, со предводинена ки служба е Господареске хем со советинена тумен. 13 Сикавен ленге кај бут ценинена лен хем мангена лен баши бути со керена. Овен ко мир јекх јекхеа. 14 А поттикнинаја тумен, пхраљален, опоменинен околен со живинена неуредно, утешинен околен сој разочариме, поможинен околенге сој слаба, овен стрплива сариненцар. 15 Пазинен никој никаске те на иранел башо лошнипе лошнипаја, него секогаш трудинен тумен те керен шукарипе јекх јекхеске хем са е јаверенге.

16 Секогаш радујнен тумен. 17 Ма чхинавен те молинен тумен. 18 Овен благодарна башо са. О Девел мангела те керен адава, соске сиен следбеникија е Христос Исусескере. 19 Ма чхинавен е Девлескере сила те влијајнел упри туменде.* 20 Ма дикхен ко пророштвија сар нешто со на врединела. 21 Испитинен са те шај те уверинен тумен кај адава тано чаче, цврсто икерен тумен ко адава сој тано шукар. 22 Икерен тумен подур таро секова лошнипе.

23 О Девел кова со дела мир, нека керел тумен те овен света баши лескири служба. Хем са тумаре шукар особине со сикавена, тумаро живото хем тумаро тело, пхраљален, нека ачховен света са џи ки присутност амаре Господарескири е Исус Христосескири. 24 Окова со викинела тумен тано верно, хем ов сигурно ка керел са акава.

25 Пхраљален, понадари да молинен тумен аменге.

26 Мангипаја ресен тумен са е пхраленцар.*

27 Молинава тумен ко анав е Господарескоро, акава писмо те овел читимо са е пхраленге.

28 О шукарипе со на заслужинаја ле амаре Господарескоро е Исус Христосескоро нека овел туменцар.