ДУЈТО ПИСМО ЏИ КО СОЛУНЈАЊА

1 Ме о Павле, а акате манцар тане о Силван* хем о Тимотеј, пишинава акава писмо џи ко собрание ко Солун, кова сој ко јекхипе е Девлеа, амаре Дадеа, хем е Господареа е Исус Христосеа:

2 Нека овел тумен о шукарипе со на заслужинаја ле хем о мир таро Девел, о Дад, хем о Господари о Исус Христос.

3 Дужна сием секогаш те благодарина е Девлеске баши туменде пхраљален, а иси амен хем причина башо адава, соске тумари вера овела са позорали хем о мангипе со иси тумен јекх јекхеске са повише бајрола. 4 Адалеске амен фалинаја тумен машкар е Девлескере собранија, соске истрајнена хем иси тумен вера, иако иси тумен прогонство хем пхарипа. 5 Са адава тано доказ кај о Девел праведно судинела хем кај ка овен достојна башо е Девлескоро Царство, колеске со цидена муке.

6 Адалеске со о Девел тано праведно, ов ка иранел околенге со керена туменге неволје. 7 А тумен со трпинена неволје ка чхинавен те циден муке, а исто аѓаар амен да, кеда таро небо ка појавинел пе* о Господари о Исус заедно пле моќна ангеленцар 8 ки бари јаг, хем ка одмаздинел пе околенге со на пенџарена е Девле хем околенге со на прифатинена о шукар хабери башо амаро Господари о Исус. 9 Амаро Господари ка казнинел лен аѓаар со ка овен вечно уништиме хем аѓаар ола ка овен цидиме дур таро лескере јакхја хем нане те дикхен лескири бари моќ. 10 Адава ка овел ко диве кеда о Господари ка авел. Тегани ов ка овел славимо пле света слугенцар хем ка воодушевинен пе леске сарине со верујнѓе ки лесте, а машкар ленде ка овен тумен да, кола со верујнѓен ко адава со сведочинѓем туменге.

11 Адалеске амен стално молинаја амен туменге, хем родаја таро амаро Девел те дикхел тумен сар достојна башо адава со викинѓа тумен хем пле силаја целосно те исполнинел са о шукарипе со мангела те керел туменге, хем те исполнинел са адава со тумен керена адалеске со сиен поттикниме тари вера. 12 Акава тано аѓаар те шај о анав амаре Господарескоро е Исусескоро те славинел пе тумаре постапкенцар хем тумен те шај те овен славиме адалеске со сиен ко јекхипе леа. Акаја слава авела адалеске со амаро Девел хем о Господари о Исус сикавена аменге пло шукарипе со на заслужинаја ле.

2 Ама, пхраљален, кеда керела пе лафи баши присутност* амаре Господарескири, е Исус Христосескири, хем башо адава со ка ова кхедиме те шај те ова заедно леа, молинаја тумен 2 ма дозволинен никаске локхесте те менинел тумаро исправно размислибе, ни ма дозволинен те овен вознемириме тари несави порака, која со дикхјола сар те пхене авела таро Девел, ни таро несаво лафи или таро несаво писмо, кова со дикхјола сар те пхене тано амендар, а кова со вакерела кај е Јеховаскоро* диве тано акате.

3 Ма дозволинен некој, ко било саво начин те ховавел тумен, соске адава диве нане те авел са џикоте прво на авела о отпадништво* хем на откринела пе о мануш кова со противинела пе е законеске. Ов тано адава со ка овел уништимо. 4 Ов тано противнико хем ваздела пе упредер секова јекх кас со викинена девел или упредер са адава со о мануша обожавинена. Ов бешела е Девлеске ко храми хем англи сариненде сикавела пе сар девел. 5 На сетинена тумен ли кај, џикоте панда сиум сине туменцар, вакерава сине туменге башо акала буќа?

6 Хем тумен акана џанена, пхраљален, сој адава со чхинавела ле те откринел пе англедер о време сој одредимо башо адава. 7 Чаче, о лошнипе акале манушескоро више почминѓа, иако тано гаравдо хем ка ачхол гаравдо са џикоте више нане те овел окова со чхинавела ле. 8 Тегани ка овел откримо о мануш кова со противинела пе е законеске. О Господари, о Исус, ка мударел ле е силаја* со икљола таро лескоро муј хем ка уништинел ле кеда ка сикавел пе лескири присутност. 9 Ама и присутност е манушескири кова со противинела пе е законеске тани себепи о Сатана. Ов дела ле пли сила те шај те керел разна моќна делија, ховавне знакија, чудија, 10 секоја неправда хем превара. Акала буќа ховавена е манушен кола со ка овен казниме адалеа со ка овен уништиме, соске ола на прифатинѓе хем на замангле о чачипе кова со шај сине те спасинел лен. 11 Адалеске о Девел дозволинела ола те овен превариме таро ховавно сикајбе, те шај те верујнен е ховавне лафенге, 12 аѓаар сарине ола те овен осудиме, соске на верујнѓе ко чачипе, него мангле и неправедност.

13 Ама амен сием дужна секогаш те благодарина е Девлеске баши туменде пхраљален, кола со сиен мангле таро Јехова,* соске о Девел себепи тумари вера ко чачипе, панда таро почеток биринѓа тумен те шај те овен спасиме адалеа со керѓа тумен света пле силаја. 14 Преку о шукар хабери со проповединѓем туменге, ов викинѓа тумен те овен спасиме те шај те добинен и слава со иси амаре Господаре е Исус Христосе. 15 Адалеске пхраљален ачховен цврста хем понадари да икерен тумен ко буќа коленге со сиен сине сикавде, бизи разлика дали лафенцар или преку несаво амаро писмо. 16 Хем амаро Господари о Исус Христос хем о Девел, амаро Дад, кова со мангља амен хем кова со преку пло шукарипе со на заслужинаја ле денѓа амен вечно утеха хем шужи надеж, 17 нека утешинен тумаре виле хем нека керен тумен зорале те шај секогаш те керен хем те вакерен адава сој шукар.

3 Ко крајо пхраљален, понадари да молинен тумен аменге те шај понадари да сигате те ширинел пе е Јеховаскоро* лафи хем те славинен ле о јавера да мануша сар со славинена ле тумен, 2 хем молинен тумен о Девел те заштитинел амен таро румиме хем лошна мануша, соске са е манушен нане лен вера. 3 Ама о Господари тано верно хем ов ка зајакнинел тумен хем ка заштитинел тумен таро Бенг.* 4 Хем сар следбеникија е Господарескере амен иси амен доверба ки туменде кај тумен керена хем кај понадари да ка керен адава со сикавѓем тумен. 5 Молинаја амен о Господари понадари да те водинел тумаре виле те шај те манген е Девле хем те истрајнен џикоте понадари да џана пало Христос.

6 Пхраљален, ко анав е Господарескоро, е Исус Христосескоро, вакераја туменге те циден тумен секоле пхралестар кова со живинела неуредно хем со на икерела пе ко адава со сикавѓем тумен.* 7 Тумен џанена сар ваљани те џан пало амаро пример, соске џикоте сием сине туменцар, 8 амен на живинѓем неуредно, а ни на халем некаскоро маро џабе. Него диве хем рат, керѓем напорно бути те шај те на ова ко терет никаске тумендар. 9 Хем адава на керѓем ле адалеске со нане амен право те рода тумендар помош, него манглем те мукха туменге пример пали колесте со ваљани те џан. 10 Уствари, џикоте сием сине туменцар, амен денѓем тумен акаја заповед: „Ако некој на мангела те керел бути, на ваљани ни те хал!“ 11 Соске, шунаја кај несаве тумендар живинена неуредно хем ич на керена бути, него мешинена пе ко адава со нане ленгири бути. 12 Ко анав е Господарескоро, е Исус Христосескоро, асавкенге заповединаја хем советинаја лен те керен пли бути ко мир хем те хан о маро кова со коркори ка заработинен ле.

13 А тумен пхраљален, ма откажинен тумен таро адава те керен шукарипе. 14 Ако некој на шунела адава со вакерѓем ко акава писмо, обележинен ле хем чхинавен те дружинен тумен леа, те шај те лаџал. 15 Ама ма дикхен ки лесте сар тумаро душмани, него понадари да советинен ле сар тумаро пхрал.

16 О Господари кова со дела мир, нека дел тумен мир секогаш хем ко са. О Господари нека овел сариненцар туменцар.

17 Ме, о Павле, пишинава туменге акава поздрав мле вастеа. Адава тано мло знако ко секова писмо, аѓаар пишинава ме.

18 О шукарипе кова со на заслужинаја ле амаре Господарескоро е Исус Христосескоро, нека овел сариненцар туменцар.