ПИСМО ЏИ КО ТИТ

1 Ме о Павле, сиум робо е Девлескоро хем апостоли е Исус Христосескоро. Мли служба тани спрема и вера сави со иси околен со о Девел биринѓа хем спрема адава со шукар пенџарава о чачипе кова со сикавела сар те овел пе верно е Девлеске ко са. 2 Хем са акава темелинела пе ки надеж башо вечно живото. О Девел, кова со нашти те ховавел, ветинѓа акава панда бут англедер. 3 А ко време со ов одрединѓа ле, објавинѓа пло лафи преку о проповедибе о шукар хабери, кова со сине дендо* манге спрема и заповед амаре Спасителескири, е Девлескири. 4 Пишинава акава писмо џи ко Тит, кова сој манге сар чачутно чхаво колеа со иси амен јекх исто вера:

Нека овел тут о шукарипе со на заслужинаја ле хем о мир таро Девел, о Дад, хем таро Христос Исус, амаро Спасители.

5 Мукхљум тут ко Крит те шај те средине о буќа со ваљани те испрајнен пе хем те чхиве старешине ки секоја диз спрема о упатствија со денѓум тут. 6 Секова јекх лендар мора те овел мануш колеске со нашти те вакерел пе кај тано криво башо нешто, со иси ле само јекх ромни, со иси ле чхаве сој верникија хем кола со нане пенџарде сар распуштена или бунтовна. 7 Соске, сар управители таро Девел, јекх надгледнико мора те овел мануш колеске со нашти те вакерел пе кај тано криво башо нешто, кова со на мангела са те овел спрема лескоро, со на хољанела сигате, со нане пијаница, ни насилно,* ни те овел алчно мануш кова со ко нечесно начин дикхела те овел ле корист, 8 него ваљани те овел гостопримливо, те мангел о шукарипе, исправно те размислинел, те овел праведно, верно, те овел ле самоконтрола, 9 цврсто те икерел пе ко чачутно лафи таро Девел ко пло начин сар сикавела, те шај те охрабринел е јаверен аѓаар со ка сикавел лен корисна* буќа хем те укоринел околен со керена лафи против адала корисна* сикљојба.

10 Соске, иси бут мануша сој тане бунтовна, со вакерена буќа со нане корисна хем со преваринена, а посебно окола со вакерена кај мора те овел пе сунети. 11 Мора те пхандел пе ленгоро муј, соске асавке мануша уништинена цело фамилиенгири вера аѓаар со сикавена башо буќа сој тане погрешна, само те шај ко нечесно начин те добинен нешто. 12 Јекх мануш таро Крит, пророко таро ленгоро народо, вакерѓа: „О мануша таро Крит секогаш ховавена, ола тане опасна ѕверија хем мрзале мануша со бут мангена те хан“.

13 Акала лафија чаче тане, адалеске строго укорин лен те шај ленгири вера те овел зорали 14 хем те на прифатинен о еврејска парамиса хем о заповедија таро мануша кола со цидена пе таро чачипе. 15 Е чиста манушенге, са о буќа тане чиста, ама окола сој тане мелале хем со нане лен вера, ленге ништо нане чисто, соске ленгири годи хем ленгири совест тане мелале. 16 Ола англо сариненде вакерена кај џанена е Девле, ама ленгере постапке сикавена кај откажинѓе пе лестар, соске ола тане одвратна, непослушна хем нане одобриме те керен било саво шукарипе.

2 А ту понадари да кер лафи спрема о сикљојбе сој тано корисно.* 2 О попхуре мурша нека овен урамнотежена ко са, те заслужинен е јаверенгоро поштовање,* исправно нека размислинен, нека овен зорале ки вера, пхерде мангипаја хем истрајна. 3 Исто аѓаар, о попхуре џувља нека понашинен пе аѓаар со ка сикавен кај поштујнена е Девле, те на клеветинен,* те на овел лен навика те пиен бут мол* хем нека сикавен е јаверен башо адава сој шукар, 4 те шај те сикавен е потерне џувлен те манген пумаре ромен, те манген пумаре чхавен, 5 исправно те размислинен, те овен чесна, домаќице, те овен шукар, те овен подложна пумаре роменге, те шај те на вакерел пе ништо лошно башо е Девлескоро лафи.

6 Исто аѓаар, поттикнин е потерне муршен исправно те размислинен, 7 а коркори ту ов пример ко са, аѓаар со ка кере шукар буќа. Сикав е јаверен башо адава сој чисто, зрело размислин,* 8 вакер лафија со ка овен корисна, лафија коленге со нане те критикујнен тут, те шај окола со противинена пе те овен лаџакерде, соске нане те овел лен ништо лошно те вакерен баши аменге. 9 Окола сој робија нека овен подложна пле господаренге ко са хем нека угодинен ленге, те на иранен ленге лафија, 10 те на чорен таро пумаре господарија, него ко са нека сикавен кај ленгере господарен шај те овен лен доверба ки ленде, те шај ко са те украсинен о сикљојба таро амаро Спасители, о Девел.

11 Соске, о Девел сикавѓа пло шукарипе со на заслужинаја ле хем адава шукарипе анела спасение различна манушенге. 12 Адава шукарипе сикавела амен те отфрлина са адава со нане спрема е Девлескири волја хем о желбе е светоскере, хем те живина ко асавко начин со ка сикава кај исправно размислинаја, кај сием праведна хем кај цело вилеа служинаја е Девлеске машкар ко авдисутно свето,* 13 џикоте аџикераја те исполнинел пе амари бут шужи надеж хем аџикераја амаро моќно Девел хем амаро Спасители, о Исус Христос, те сикавен кобор тане баре.* 14 О Христос денѓа пло живото аменге те шај те ослободинел* амен тари секоја постапка која сој против о закони, хем чистинѓа амен те шај те ова лескоро посебно народо, хем аѓаар те кера шукар буќа цело вилеа.

15 А ту понадари да сикав лен башо акала буќа, охрабрин лен хем укорин лен адалеске со добинѓан авторитети те кере адава. Никој те на дикхел ки туте сар потеле пестар.

3 Понадари да сетинкер е пхрален те овен подложна хем послушна е владетеленге хем е властенге, те овен спремна баши секоја шукар бути, 2 те на керен лошно лафи никастар, те на овен кавгаџие, него те овен разумна хем секогаш нека овен кротка са е манушенцар. 3 Соске, амен да јекх време на сием сине разумна, на сием сине послушна, сием сине ховавде таро јавера, сием сине робија различна желбенге хем мангаја сине само те уживина, сием сине лошна, завидлива, одвратна хем мрзинаја амен сине јекх јекхеа.

4 Ама кеда о Девел, кова сој амаро Спасители, сикавѓа пло шукарипе хем пло мангипе е манушенге, 5 ов спасинѓа амен, ама на баши амаре праведна постапке, него адалеске со иси ле милост. Ов спасинѓа амен кеда чистинѓа* амен хем адалеа керѓа амен џивде, хем кеда користинѓа пли сила* те керел амен неве. 6 О Девел бут денѓа амен тари пли сила* преку о Исус Христос амаро Спасители, 7 те шај, откеда о Девел ка вакерел баши аменге кај сием праведна преку пло шукарипе со на заслужинаја ле, те ова наследникија кола со надинена пе ко вечно живото.

8 Акала буќа сој вакерде тане чаче, хем ме мангава понадари да ту те нагласине акала буќа, те шај окола со верујнѓе ко Девел те концентриринен пе ко адава те керен шукар буќа. Акала буќа тане шукар хем корисна е манушенге.

9 Избегин глупава дискусие, истражибе о потекло, расправие хем акошибе башо Закони, соске нане нисави корист таро адава хем са адава тано џабе. 10 А таро мануш со ширинела ховавно сикајбе, откеда ка предупредине ле о прво хем о дујто пути, циде тут лестар. 11 Соске, асавко мануш цидинѓа пе таро друмо хем грешинела, па аѓаар осудинела коркори пес.

12 Кеда ка бичхалав ки туте е Артемасе или е Тихике, кер са со шај те аве ки манде ко Никопол, соске одлучинѓум адатхе те накхавав о евен. 13 Грижин тут те шај е Зина, кова со шукар пенџарела о Закони, хем е Аполо, те овел лен са со ваљанела ленге друмоске те шај те на фалинел ленге ништо. 14 А амаре пхраља нека сикљон те керен шукарипе, аѓаар со ка поможинен кеда ка овел потреба, те шај те на овен бизо плодија ки пумари служба.

15 Поздравинена тут са окола сој манцар. Поздравин околен со мангена амен хем сој амаре пхраља ки вера.

Е Девлескоро шукарипе со на заслужинаја ле нека овел туменцар.