ПИСМО ЏИ КО ЕВРЕИЈА

1 Англедер бут време о Девел керѓа лафи амаре парапапонцар преку о пророкија ко бут прилике хем ко бут начинија. 2 Ама акана, ко крајо таро акала диве, ов керѓа аменцар лафи преку пло Чхаво коле со чхивѓа ле сар наследнико, колеске со ка припадинел са хем преку колесте со створинѓа о свето.* 3 Ки лесте дикхјола е Девлескири слава хем ов точно сикавела аменге саво тано о Девел, хем преку о моќно лафи ов керела са о буќа понадари да те постојнен. Откеда чистинѓа амен таро амаре гревија, ов бешља тари десно страна е Најбарескири ко небо. 4 Хем ов уло добором побаро таро ангелија со добинѓа анав* сој тано побаро таро ленгере анава.

5 На пример, коле ангелеске о Девел некогаш вакерѓа: „Ту сиан мло чхаво, авдиве ме уљум тло дад“? Или: „Ме ка овав леске дад, хем ов ка овел манге чхаво“? 6 Ама башо време кеда ов палем ка бичхалел пле Првобијаме ки пхув, ов вакерела: „Нека поклонинен пе леске са е Девлескере ангелија“.

7 Освен адава, башо ангелија вакерела: „Пле ангелен керела лен силна сар бавлал,* хем пле слуген керела лен сар јага“. 8 А башо Чхаво вакерела: „О Девел тано тло престол засекогаш, хем и палка* таро тло Царство тани и палка баши правда.* 9 Ту мангљан и праведност хем мрзинѓан о лошнипе. Адалеске о Девел, тло Девел, помазинѓа* тут маслоја хем денѓа тут побари радост таро тле амала“.* 10 Исто аѓаар вакерела: „Господаре, ту ко почеток чхивѓан о темелија е пхувјакере, хем о небо керѓан ле тле вастенцар. 11 Ола нане те постојнен више, а ту ка ачхове. Ка пуранѓовен сар шеја, 12 хем ту ка паќаре лен сар наметка, хем ка овен замениме. Ама ту никогаш на менинеа тут, хем тле бершенге нане крајо“.

13 Ама каске таро ангелија ов некогаш вакерѓа: „Беш тари мли десно страна са џикоте на чхивава тле душманен тело тле пре“? 14 Нане ли са о ангелија духија со служинена е Девлеске? Зарем о Девел на заповединела ленге те поможинен околенге со ка овен спасиме?

2 Адалеске мора пошукар те размислина башо буќа со шунѓем те шај никогаш те на цида амен тари вера. 2 Соске, ако о лафи* со сине вакердо преку о ангелија, докажинѓа пе кај тано сигурно хем аѓаар секоја грешка хем непослушно постапка сине праведно казними, 3 тегани сар шај амен те наша тари казна ако нане аменге важно асавко баро спасение? Башо адава спасение прво вакерѓа амаро Господари хем баши лесте потврдинѓе аменге окола со шунѓе ле лестар. 4 Хем о Девел преку знакија, преку чудија, преку разна моќна делија хем адалеа со делинѓа о поклонија тари пли сила* спрема пли волја, сикавѓа* кај адава со вакерѓе сине чаче.

5 Соске, о Девел на чхивѓа е ангелен те владинен е светоја кова со ваљани те авел хем колеске со амен кераја лафи. 6 Јекх мануш, јекх пути пишинѓа: „Сој тано о мануш па те мислине ки лесте, или о манушикано чхаво па те грижине тут леске? 7 Керѓан ле хари потеле таро ангелија, денѓан ле слава хем чест хем чхивѓан ле упро буќа кола со керѓан лен тле вастенцар. 8 Са чхивѓан тело лескере пре“. О Девел мукхља ов те владинел упро са хем аѓаар на ачхило ништо упро кова со ов на владинела. Ама акана панда на дикхаја кај ов владинела упро са. 9 Ама дикхаја кај е Исусеске, кова со сине кердо хари потеле таро ангелија, денди леске слава хем чест адалеске со цидинѓа муке џи ко мерибе. Ов преку е Девлескоро шукарипе со на заслужинаја ле муло секоле манушеске.

10 Са о буќа постојнена те шај те овел славимо о Девел хем ола постојнена преку лесте. Адалеске, те шај те дел буте чхавенге слава, е Девлеске сине исправно о Водачи преку касте со ка овен спасиме, те цидел муке те шај аѓаар те керел ле совршено. 11 Е Исусе хем околен кас со ов керѓа те овен света иси лен јекх дад. Адалеске, ов на лаџала те вакерел кај ола тане лескере пхраља, 12 кеда вакерела: „Ка вакерав тло анав мле пхраленге, гиленцар ка фалинав тут машкар о кхедимо народо“.* 13 Хем исто аѓаар вакерела: „Ка овел ман доверба ки лесте“. Хем вакерела акава да: „Аке, ме хем о чхаве со денѓа ман о Јехова“.*

14 Ама адалеске со адала „чхаве“ тане мануша таро рат хем мас, ов да уло мануш таро рат хем мас, те шај пле мерибаја те уништинел околе коле со иси ле моќ те анел мерибе, а адава тано о Бенг. 15 Хем те шај те ослободинел са околен кола со, адалеске со дарана сине таро мерибе, цело живото сине ко ропство. 16 Соске, чаче ов на ало те поможинел е ангеленге, него ало те поможинел е Авраамескере потомцонге.* 17 Адалеске ов мора сине те овел сар пле „пхраља“ ко са, те шај те овел милостиво хем верно првосвештенико ки служба е Девлеске, те шај башо е манушенгере гревија те дел жртва која со ка смиринел лен е Девлеа. 18 Адалеске со ов цидинѓа муке кеда сине искушимо, ов шај те поможинел околенге сој тане искушиме.

3 Адалеске пхраљален, кола со сиен света хем кола со сиен викиме те џан ко небо, шукар размислинен башо Исус коле со признајнаја ле сар апостоли хем сар првосвештенико. 2 Ов сине верно е Девлеске кова со чхивѓа ле ки адаја положба, исто сар со сине о Мојсеј џикоте служинела сине ко цело кхер е Девлескоро. 3 Соске, о Исус заслужинела побари слава таро Мојсеј, исто сар со заслужинела побари чест о градители таро кхер кова со градинѓа ле. 4 Џанѓола пе, секова кхер некој керѓа ле, а окова со керѓа са тано о Девел. 5 О Мојсеј сине верно сар слуга ко цело е Девлескоро кхер хем лескири служба сикавела сине* адава со ваљани сине те овел објавимо покасно. 6 Ама о Христос сине верно сар Чхаво сој чхивдо упро е Девлескоро кхер. Амен сием е Девлескоро кхер ако џи ко крајо храбро* кераја лафи хем цврсто икераја амен ки надеж колаја со дичинаја амен.

7 Соске, сар со сине вакердо преку е Девлескири сила:* „Ако шунена лескоро гласо авдиве, 8 ма керен тумаре виле зорале, сар со керѓе тумаре парапапија кеда бут хољанкерѓе ман ко диве кеда искушинѓе ман ки пустина, 9 коте со искушинѓе ман хем испитинѓе ман, иако 40 берш дикхле са адава со керѓум. 10 Адалеске почминѓум те гадонав ман тари адаја генерација хем вакерѓум: ’Ко пло вило ола секогаш цидена пе таро друмо хем на пенџарѓе мле друмија‘. 11 Адалеске хаљум совли ки мли холи: ’Ола нане те кхувен ко мло одмор‘“.

12 Пазинен тумен, пхраљален, некој тумендар те на цидел пе дур таро Девел хем аѓаар те овел ле лошно вило колесте со нане вера. 13 Наместо адава, понадари да охрабринен тумен јекх јекхеа секова диве, са џикоте панда трајнела о диве колеске со вакераја „авдиве“, те шај нијекхескоро вило те на овел зорало таро грево коле со иси ле моќ те ховавел. 14 Соске, амен да ка добина адава со добинѓа о Христос само ако џи ко крајо аракхаја амари доверба која со сине амен ко почеток, 15 сар со сине вакердо: „Ако шунена лескоро гласо авдиве, ма керен тумаре виле зорале, сар со керѓе тумаре парапапија кеда бут хољанкерѓе ман“.

16 Соске, кој сине адала со шунѓе е Девлескоро гласо, а сепак бут хољанкерѓе ле? На сине ли са адала со иклиле таро Египет кеда водинѓа лен о Мојсеј? 17 Исто аѓаар, кастар о Девел гадонѓа пе 40 берш? На сине ли таро окола со грешинѓе хем муле ки пустина? 18 Хем каске хаља совли кај нане те кхувен ко лескоро одмор? Нане ли адаленге со на сине послушна? 19 Значи, дикхаја кај ола нашти сине те кхувен адалеске со на сине лен вера.

4 Адалеске со о ветување те кхувел пе ко лескоро одмор панда ачхола, секој амендар ваљани те пазинел* те на овел таро окола со на керѓе са со родела пе те шај те добинен акава ветување. 2 Соске, аменге да сине вакердо о шукар хабери исто сар амаре парапапонге. Ама ленге на користинѓа адава, соске лен на сине и исто вера сар со сине околен со сине послушна. 3 А амен кола со верујнаја, кхуваја ко лескоро одмор, а баши ленде вакерѓа: „Хава совли ки мли холи: ’Ола нане те кхувен ко мло одмор‘“, иако ов панда таро почеток е светоскоро почминѓа те одморинел откеда завршинѓа е створибаја. 4 Соске, ко јекх тхан башо ефтато диве вакерѓа акава: „Хем ко ефтато диве о Девел одморинѓа таро са адава со створинѓа“, 5 хем ов палем вакерела: „Ола нане те кхувен ко мло одмор“.

6 Окола со сине о прва со шунѓе о шукар хабери, на кхувѓе ко лескоро одмор адалеске со на сине послушна. Ама иси панда прилика е манушенге те кхувен ко е Девлескоро одмор, 7 адалеске пало бут време ко псалм со сине пишимо таро Давид, о Девел вакерѓа акава: „Ако шунена лескоро гласо авдиве, ма керен тумаре виле зорале“. Ов палем одрединѓа диве баши колеске со вакерела „авдиве“. 8 Соске, ако о Исус Навин ингарѓа е Израелцон ко адава одмор, пало адава о Девел нане сине те керел лафи башо несаво јавер диве. 9 Значи, е Девлескере народоске ачхола о одмор сар ко сабат. 10 Соске, окова со кхувѓа ко е Девлескоро одмор, одморинела пе таро буќа со керѓа, исто сар о Девел со одморинела таро буќа со створинѓа.

11 Адалеске, те да са амендар те кхува ко адава одмор те шај никој амендар те на џал пало пример околенгоро со на сине послушна. 12 Соске, е Девлескоро лафи тано џивдо хем силно, пооштро тано таро мачи со чхинела таро солдуј стране хем кхувела добором хор андре ко мануш со откринела саво тано ов андрал* хем саво тано авријалдан,* хем кхувела добором хор со одвојнела о кокала тари ленгири срж, хем шај те откринел саве тане о мисле хем о намере е вилескере. 13 На постојнела ништо сој тано гаравдо таро Девел, него са о буќа тане откриме хем пучарде англо јакхја околескере кова со ка судинел амен башо буќа со кераја.

14 Адалеске со иси амен баро првосвештенико кова со гело ко небо, о Исус, е Девлескоро Чхаво, понадари да те вакера баши амари вера ки лесте. 15 Соске, амаро првосвештенико нане некој со нашти те хаљовел амаре слабостија, него ов да сине искушимо ко са сар аменде, ама на грешинѓа. 16 Адалеске, бизи дар те ава паше узо престол е Девлескоро кова со сикавела аменге пло шукарипе со на заслужинаја ле,* те шај о Девел те сикавел аменге милост хем преку о шукарипе со на заслужинаја ле те поможинел амен ко право време.

5 Соске, секова мануш кова сој тано биримо те служинел сар првосвештенико, чхивдо тано те служинел е Девлеске ки корист е јаверенге те шај те дел е Девлеске поклонија хем жртве башо гревија. 2 Ов шај те сикавел сочувство околенге со грешинена бизо те овен свесна башо адава, соске џанела кај ле да иси ле слабостија, 3 хем адалеске ов мора те дел жртве башо пле да гревија сар со дела жртве башо е манушенгере гревија.

4 Нијекх мануш на дела песке асавки чест коркори, него о Девел кова со чхивела ле ки асавки служба, сар со чхивѓа е Ароне. 5 Аѓаар о Христос да, на денѓа пе коркори слава адалеа со уло првосвештенико, него денѓа ле слава о Девел кова со вакерѓа леске: „Ту сиан мло чхаво, авдиве ме уљум тло дад“. 6 А ко јавер тхан ко Списија вакерела: „Ту сиан свештенико сар о Мелхиседек хем ту ка ове свештенико засекогаш“.

7 Џикоте сине ки пхув, о Христос цело гласоја хем асвенцар молинела пе сине таро вило хем родела сине помош таро Девел кова со шај сине те спасинел ле таро мерибе, хем лескере молитве сине шунде, соске ов дарала сине таро Девел. 8 Иако сине е Девлескоро Чхаво, ов сиклило те овел послушно таро адава со цидинѓа муке. 9 Откеда сине кердо те овел совршено, са окола сој леске послушна, шај те добинен вечно спасение преку лесте, 10 соске о Девел ле чхивѓа те овел првосвештенико сар о Мелхиседек.

11 Иси амен бут те вакера баши лесте, ама адава тано пхаро те објаснинел пе, соске тумен на трудинена тумен те хаљон.* 12 Соске, иако џи акана тумен више ваљани сине те овен учителија, сепак панда ваљани некој те сикавел тумен башо основна буќа таро е Девлескоро свето лафи. Улен асавке каске со палем ваљани тхуд, а на зорали храна. 13 Соске, секој со понадари да пиела тхуд, на пенџарела е Девлескоро лафи кова со сикавела амен сој исправно, соске тано тикно чхаво. 14 Ама и зорали храна тани е зрела манушенге кола со сиклиле те користинен пумари способност те размислинен те шај те разликујнен сој исправно, а сој погрешно.

6 Адалеске акана, кеда више верујнаја ко основна сикљојба башо Христос, те напредујна џи ки зрелост хем те на ирана амен палем ко основна сикљојба,* сар сој: о каибе башо постапке колендар со нане нисави корист* хем и вера ко Девел, 2 о сикљојбе башо крстибе хем о чхијбе васта упри некасте, о воскресение таро муле хем о вечна одлуке со анела о Девел кеда судинела. 3 А ка напредујна џи ки зрелост ако поможинела амен о Девел.

4 Соске, околенге со добинѓе и светлина, со добинѓе о поклон таро небо хем исто аѓаар е Девлескири сила,* 5 со добинѓе о шукар лафи е Девлескоро хем дикхле о благословија* таро свето* со ка авел, 6 а пало адава цидинѓе пе тари вера, нашти те поможинел пе ленге те иранен пе хем те каинен пе, соске ола коркори палем ковинена е Девлескере Чхаве ко стубо хем лаџакерена ле англо сариненде. 7 Соске, о мануша тане сар и пхув. Кеда и пхув приминела о пани таро бршим, кова со често перела ки лате, адава тано благослов таро Девел. Тегани адава сој садимо бајрола хем користинела околенге со керѓе бути ки адаја пхув. 8 Ама, ако ки адаја пхув бајрона каре хем диво чар, тегани ка отфрлинел пе хем бут сигате о Девел ка дел ла арман, хем ко крајо адаја пхув ка тхарел пе.

9 Ама, иако амен кераја лафи ко асавко начин, увериме сием, мангле пхраљален хем пхењален, кај тумен џана ко пошукар друмо таро окола со цидинѓе пе тари вера, соске адава друмо ингарела ко спасение. 10 Соске, о Девел нане неправедно, па те бистрел адава со керѓен хем о мангипе со сикавѓен лескере анавеске, аѓаар со служинѓен адаленге сој света* хем понадари да служинена ленге. 11 Ама мангаја секова јекх тумендар понадари да бут те трудинел пе, сар со керела сине адава таро почеток, те шај џи ко крајо те овен сигурна кај тумари надеж со аџикерена ла, ка исполнинел пе, 12 те шај те на овен мрзале, него те овен сар окола со баши пли вера хем стрпливост добинена адава со сине ленге ветимо.

13 Соске, кеда о Девел денѓа о ветување е Авраамеске ов хаља совли упри песте, соске нане никој побаро лестар те шај те хал совли упри лесте, 14 хем вакерѓа: „Ме сигурно ка благословинав тут хем сигурно ка керав те овел баро тло потомство“. 15 Аѓаар о Авраам, откеда сикавѓа стрпливост, добинѓа акава ветување. 16 Соске, о мануша хана совли упри некасте сој побаро лендар, хем ленгири совли тани гаранција која со чхивела крајо секоле расправијаке. 17 Исто аѓаар, кеда о Девел да мангља појасно те сикавел околенге со ка наслединен о ветување кај лескири намера на менинела пе, ов денѓа гаранција адалеа со хаља совли. 18 Акала дуј буќа* нане никогаш те менинен пе хем о Девел нашти те ховавел баши ленде. Амен со нашлем ко Девел те шај ов те заштитинел амен, акала буќа охрабринена амен цврсто те икера амен ки надеж сој англи аменде. 19 Акаја надеж тани амаре животоске* сар јекх сигурно хем цврсто котва* хем ој ингарела амен те кхува пали завеса.* 20 О Исус кхувѓа адатхе англедер аменде, аѓаар пхравѓа хем спреминѓа о друмо аменге. Ов уло засекогаш првосвештенико сар о Мелхиседек.

7 Соске, адава Мелхиседек, кова со сине цари ко Салим хем свештенико е Најбаре Девлескоро, иклило англо Авраам кеда ов иранела пе сине откеда побединѓа е царен, хем благословинѓа ле, 2 а о Авраам денѓа ле* десеток таро са. Лескоро анав, Мелхиседек, значинела „Праведно Цари“, а исто аѓаар ов тано цари таро Салим, со значинела „Цари со анела мир“. 3 На џанѓола пе кој тано лескоро дад хем кој тани лескири дај. Нигде на пишинела котар авела, кеда бијандило хем кеда муло. Ама, адалеске со ов уло слично сар е Девлескоро Чхаво, ачхола свештенико засекогаш.

4 Дикхен само кобор баро сине о мануш колеске со амаро парапапо,* о Авраам, денѓа десеток* таро барвалипе со леља пле душманендар ки борба. 5 Точно тано кај, спрема о Закони, е Левискере чхаве, сој бириме те служинен сар свештеникија, иси лен заповед те кхеден десеток* таро народо, уствари таро пумаре пхраља, иако ола да тане е Авраамескере потомција. 6 Ама о Мелхиседек, кова со на сине потомцо е Левискоро, леља десеток таро Авраам хем благословинѓа околе колеске со о Девел денѓа ветување. 7 Сарине џанаја кај окова со дела о благослов тано побаро таро окова со добинела о благослов. 8 О левитија кола со добинена десеток тане мануша со мерена, а акава мануш со добинѓа десеток о Списија сведочинена кај живинела. 9 Чак шај те вакерел пе кај преку о Авраам, исто аѓаар о Леви да, кова со приминела десеток, платинѓа о десеток, 10 соске ов панда на бијандило сар потомцо пле парапапоске е Авраамеске кеда о Мелхиседек иклило англо Авраам.

11 Значи, ако о мануша шај сине те добинен совршенство преку и свештеничко служба е Левискере чхавенгири (соске, адава сине јекх дело таро Закони со сине дендо е народоске), тегани соске сине потребно те појавинел пе јекх јавер свештенико колеске со вакерела пе кај тано сар о Мелхиседек, а на сар о Арон? 12 Адалеске со менинела пе и свештеничко служба, мора те менинел пе о Закони да. 13 Соске, о мануш колеске со вакерена пе акала буќа авела сине таро јавер племе хем никој таро адава племе на служинѓа ко жртвенико. 14 Соске, јасно тано кај амаро Господари авела таро е Јудаскоро племе, а о Мојсеј никогаш на вакерѓа кај таро адава племе ка авен о свештеникија.

15 Хем акава уло панда појасно кеда појавинѓа пе јавер свештенико кова сој сар о Мелхиседек. 16 Ов служинела сар свештенико, на адалеске со авела таро племе кова со родела о Закони, него адалеске со иси ле и сила која со дела ле живото со нашти те уништинел пе. 17 Соске, баши лесте ко јекх тхан ко Списија пишинела: „Ту сиан свештенико сар о Мелхиседек хем ту ка ове свештенико засекогаш“.

18 Значи, и заповед со сине англедер на важинела више, соске тани слабо хем нане корисно. 19 Соске, о Закони на керѓа ништо те овел совршено, него адава керѓа ле и пошукар надеж која со дела амен о Девел хем која со керела те ова попаше леа. 20 Освен адава, адалеске со о Девел хаља совли кеда чхивѓа е Исусе сар првосвештенико 21 (соске, иси мануша со уле свештеникија бизо о Девел те хал совли баши ленде, ама ов уло свештенико кеда баши лесте о Девел хаља совли хем вакерѓа: „О Јехова* хаља совли хем нане те перел пишмани: ’Ту ка ове свештенико засекогаш‘“), 22 о Исус уло гаранција башо јекх пошукар сојуз.* 23 Освен адава, о свештеникија себепи о мерибе нашти сине те продолжинен пумаре службаја, адалеске јавера але ленге ко тхан хем продолжинѓе адале службаја. 24 А ов живинела засекогаш хем адалеске никој нане те лел лескоро тхан ки свештеничко служба. 25 Адалеске ов шај целосно те спасинел околен со молинена е Девле ко лескоро анав. Ов шај те спасинел лен соске секогаш тано џивдо те молинел е Девле те поможинел ленге.

26 Соске, асавко првосвештенико ваљани аменге: кова сој верно, со нане ле лошнипе ки песте, сој чисто, сој одвојмо таро грешникија хем сој ваздимо поупре таро небо. 27 Различно таро јавера првосвештеникија, ов на ваљани секова диве те дел жртва, прво башо пле гревија хем пало адава башо е народонгере гревија, соске ов адава керѓа јекх пути хем засекогаш кеда денѓа пе пес сар жртва. 28 Соске, преку о Закони, мануша сој тане грешникија тане чхивде сар првосвештеникија, ама откеда о Девел денѓа амен адава Закони, ов хаља совли кај сар првосвештенико ка чхивел пле Чхаве, кова со сине кердо те овел совршено засекогаш.

8 И главно мисла таро адава со вакераја тани акаја: амен иси амен асавко првосвештенико кова со бешља ки десно страна таро е Најбарескоро престол ко небо. 2 Ов тано слуга кова со служинела ко свето тхан хем ко чачутно шатори кова со ваздинѓа ле о Јехова,* а на мануш. 3 Соске, секова првосвештенико сине чхивдо те дел поклонија хем жртве. Адалеске сине потребно е Исусе да те овел ле нешто со те дел. 4 Те овел сине ов ки пхув на би овела сине свештенико, соске више иси свештеникија кола со дена поклонија спрема о Закони. 5 Акала мануша служинена е Девлеске ко тхан кова сој слика хем сенка таро буќа сој ко небо, сар со сикавела и заповед со денѓа о Девел е Мојсееске кеда ваљани сине те керел о шатори: „Дикх те кере са спрема о плани кова со сине туке сикавдо ки планина“. 6 Ама акана о Исус добинѓа јекх пошукар служба, соске о сојуз* да баши колеске со уло посреднико тано пошукар хем тано законски утврдимо преку о пошукар ветувања.

7 Соске, те на фалинел сине ништо е прво сојузеске, нане сине те ваљанел о дујто. 8 Соске, о Девел укоринела пле народо кеда вакерела: „’Аке, ка авен диве‘, вакерела о Јехова,* ’кеда ка керав нево сојуз е манушенцар таро Израел хем е манушенцар тари Јуда. 9 Адава нане те овел сар о сојуз со керѓум ле ленгере парапапонцар ко диве кеда астарѓум лен таро вас те икалав лен тари египетско пхув, соске ола на ачхиле ко мло сојуз, хем адалеске ме чхинавѓум те грижинав ман ленге‘, вакерела о Јехова.*

10 ’Соске, о сојуз со ка керав ле е манушенцар таро Израел пало адала диве тано акава‘, вакерела о Јехова.* ’Ка чхивав мле законија ки ленгири годи хем ка пишинав лен ко ленгере виле. Хем ме ка овав ленгоро Девел, а ола ка овен мло народо.

11 Хем никој више нане те сикавел е јавере таро пло народо, ни пле пхрале, адалеа со ка вакерел: „Пенџарен е Јехова!“* Соске, сарине ка пенџарен ман, таро најтикно џи ко најбаро. 12 Соске, ме ка простинав ленге башо ленгере неправедна постапке хем нане више те сетинав ман ко ленгере гревија‘“.

13 Кеда вакерела „нево сојуз“, ов о претходно сојуз керела ле пурано. Адава сој пурано хем со пхујрола, панда хари ка нашавѓовел.

9 О сојуз со сине англедер, сине ле законија сар те керел пе свето служба е Девлеске хем сине ле пло свето тхан ки пхув. 2 Сине кердо шатори хем ки прво просторија таро адава шатори сине о светилнико хем о астали упри колесте со сине о маре кола со сине денде сар жртва англо Девел. Адаја просторија викинела пе сине Свето просторија. 3 А пали дујто завеса ко шатори, сине просторија со викинела пе сине Најсвето просторија. 4 Ки адаја просторија сине о златно кадилнико,* о сандуко е сојузескоро, кова со сине целосно обложимо златоја, ки лесте сине о златно чаро манаја, е Аронескоро каш кова со цутонѓа хем о плоче таро бар е Девлескере законенцар.* 5 А упро сандуко сине о бут шуже херувимија,* кола со пле сенкаја учхарена сине о капако е смирибаскоро.* Ама акана нане о време те керел пе подетално лафи башо адава.

6 Откеда са акава аѓаар тано кердо, о свештеникија стално кхувена ки прво просторија таро шатори те керен пумари свето служба е Девлеске. 7 Ама ки дујто просторија кхувела само о првосвештенико јекх пути ко берш, хем на кхувела бизо рат, кова со дела ле сар жртва башо пле гревија хем башо гревија е народоскере кола со керѓе лен бизо те овен свесна башо адава. 8 Аѓаар е Девлескири сила* јасно сикавела кај о друмо џи ко свето тхан панда на сине пхравдо џикоте постојнела сине о прво шатори. 9 Акава шатори претставинела о буќа со случинена пе ко авдисутно време хем сикавела кај о поклонија хем о жртве со панда дена пе, нашти те керен совршено чисто и совест околескири со керела свето служба е Девлеске. 10 Адала поклонија хем жртве тане поврзиме само хајбаја, пијбаја хем различно чистибаја* спрема е Мојсеескоро закони. Са акала буќа со родела лен сине о Закони сине само башо телесна буќа хем важинена сине са џи ко време кова со сине одредимо те анел пе са ко редо.

11 Ама, кеда ало о Христос сар првосвештенико хем керѓа те овен амен о благословија кола со иси амен акана, ов накхља таро побаро хем посовршено шатори кова со нане кердо таро манушикане васта хем кова со на аракхљола ки пхув. 12 Ов кхувѓа ко свето тхан, јекх пути хем засекогаш, ама на е ратеа таро јунција хем бузња, него пле ратеа хем аѓаар керѓа те ова вечно ослободиме.* 13 Соске, ако о рат е бузњенгоро, е јунцонгоро хем о право е терне гурумњенгоро керела свето околен сој нечиста, па аѓаар ленгоро тело овела чисто, 14 тегани кобор повише о рат е Христосескоро, кова со преку е Девлескири вечно сила* која со влијајнѓа упри лесте денѓа пес сар совршено жртва е Девлеске, ка керел чисто амари совест таро постапке кола со нане корисна те шај те кера свето служба е џивде Девлеске.

15 Адалеске о Христос тано о посреднико* е неве сојузескоро те шај те добинен о ветување башо вечно наследство са окола сој викиме. Ов муло те шај преку и откупнина те овен ослободиме таро гревија со сине керде тело пурано сојуз. 16 Соске, кеда керела пе сојуз е Девлеа, о мануш преку касте со керѓа пе адава сојуз, мора те мерел. 17 Адалеске со о сојуз почминела те важинел чак пало мерибе, о сојуз на важинела са џикоте тано џивдо о мануш преку касте со керѓа пе о сојуз. 18 Спрема акава, чак ни о сојуз со сине англедер на почминѓа те важинел бизо рат. 19 Соске, кеда о Мојсеј англо цело народо вакерѓа о заповедија таро Закони, леља рат таро јунција хем таро бузња, мешинѓа лен пањеа, леља лоли волна хем пханља ла ки прачка таро исоп,* топинѓа ла ко рат хем леа прскинѓа о лил* е сојузескоро хем цело народо, 20 хем вакерѓа: „Акава тано о рат кова со керела о сојуз е Девлеа те важинел хем о Девел мангела те икерен тумен ко акава сојуз“. 21 Пало адава, е ратеа прскинѓа о шатори хем са о предметија со користинена лен сине баши свето служба. 22 Според о Закони, е ратеа скоро са шај те керел пе чисто хем бизо те чхорел пе рат нашти те простинен пе о гревија.

23 Адалеске ваљани сине о буќа кола со претставинена адава сој ко небо те чистинен пе ко асавко начин, а башо буќа сој ко небо ваљанена бут пошукар жртве таро акала жртве. 24 Соске, о Христос на кхувѓа ко свето тхан кердо таро манушикане васта, кова со претставинела о чачутно свето тхан, него кхувѓа ко небо те шај акана те појавинел пе англо Девел баши аменде. 25 Хем ов на керѓа адава те шај повише пути те дел пе сар жртва, сар о првосвештенико со кхувела секова берш ко свето тхан е ратеа со нане лескоро. 26 Кеда би о Христос керела сине аѓаар, тегани ов таро почеток е светоскоро ка цидел сине бут пути муке. Ама акана, ко крајо таро акава свето,* ов ало јекх пути засекогаш те цидел о грево. 27 Исто сар о мануша со јекх пути мора те мерен, а пало адава те судинел пе ленге, 28 аѓаар о Христос јекх пути засекогаш денѓа пес сар жртва те шај те лел* о гревија буте манушенгере. А кеда о дујто пути ка појавинел пе, ов нане те појавинел пе те шај палем те цидел о грево, него ка појавинел пе те спасинел околен со едвај аџикерена ле.

10 Адалеске со ко Закони аракхаја само и сенка таро благословија со ваљани те авен, ама на хем о благословија, о свештеникија нашти никогаш адале иста жртвенцар, кола со дена лен секова берш, те керен совршена е манушен кола со мангена те авен паше узо Девел. 2 Иначе, би чхинавела пе сине те ден пе жртве, соске окола со служинена е Девлеске би овена сине чиста јекх пути засекогаш хем ленгири совест више на би мучинела лен сине башо гревија. 3 Тари јавер страна, акала жртве сетинкерена е манушен секова берш кај тане грешна, 4 соске о рат е јунцонгоро хем е бузњенгоро нашти те цидел о гревија.

5 Адалеске о Христос кеда ало ко свето вакерѓа е Девлеске: „’Животинска жртве хем јавера жртве ту на мангљан, него спреминѓан манге тело. 6 На сине туке ки волја о жртве со тхарена пе хем о жртве башо грево‘. 7 Тегани вакерѓум: ’Аке, ме аљум (ко свиток* баши манде пишинела) те керав тли волја, о Девла‘“. 8 Прво вакерела: „На мангљан хем на сине туке ки волја о животинска жртве хем о јавера жртве, о жртве со тхарена пе хем о жртве башо грево“, а адала тане жртве кола со дена пе спрема о Закони. 9 А пало адава, вакерела: „Аке, аљум те керав тли волја“. Ов чхинавѓа о прво те шај те почминел те важинел о дујто. 10 Адале „волјаја“ сием сине керде света преку е Исус Христосескоро тело кова со сине дендо сар жртва јекх пути засекогаш.

11 Исто аѓаар, секова свештенико, диве пало диве, авела ко пло тхан те шај те керел пли свето служба хем често дела о иста жртве, кола со никогаш нашти целосно те циден о гревија е манушенгере. 12 Ама о Христос денѓа засекогаш јекх жртва башо гревија хем бешља тари десно страна е Девлескири, 13 па таро адава моменти аџикерела лескере душмања те овен чхивде тело лескере пре. 14 Соске, адалеа со денѓа јекх жртва ов керѓа те овен засекогаш совршена окола сој тане керде света. 15 Освен адава, е Девлескири сила* да уверинела амен ко акава, соске прво вакерела: 16 „’Акава тано о сојуз со ка керав ленцар пало адала диве‘, вакерела о Јехова.* ’Мле законија ка чхивав лен ко ленгоро вило хем ка пишинав лен ки ленгири годи‘“. 17 А пало адава вакерела: „Више нане те сетинав ман ко ленгере гревија хем ко ленгере лошна постапке“. 18 А кеда о Девел простинела о гревија, више на ваљани те ден пе жртве башо гревија.

19 Значи пхраљален, адалеске со преку е Исусескоро рат амен иси амен целосно доверба кај шај те кхува ко свето тхан, 20 преку јекх нево хем џивдо друмо, кова со пхравѓа ле аменге ов адалеа со накхља тари завеса,* а адаја завеса тани лескоро тело, 21 хем адалеске со иси амен баро свештенико чхивдо те овел одговорно е Девлеске ко кхер, 22 те ава англо Девел искрено вилеа хем зорале вераја, соске амаре виле тане чистиме* тари нечисто совест хем амаро тело тано тховдо е чисто пањеа. 23 Истрајно те вакера е јаверенге баши амари надеж бизо те сумнина амен, соске окова со денѓа о ветување тано верно. 24 Хем те размислина* јекх јекхеске те шај те поттикнина амен те сикава мангипе хем те кера шукарипе. 25 Те на мукха амаре состанокија сар несаве со керена, него те охрабрина амен јекх јекхеа, са повише кобор со дикхена кај авела попаше о диве.

26 Соске, ако намерно грешинаја откеда шукар пенџарѓем о чачипе, тегани на постојнела јавер жртва башо амаре гревија, 27 него аџикерела амен и страшно казна хем и холи со тхабљола сар јаг која со ка глтинел околен со противинена пе. 28 О мануш со пхагела е Мојсеескоро закони, хем башо адава потврдинена дуј или трин сведокија, казнинела пе мерибаја, бизо те сикавел пе леске милост. 29 Тегани замислинен кобор попхари казна заслужинела окова со газинела е Девлескере Чхаве, хем со мислинела кај о рат е сојузескоро, кова со керѓа ле те овел свето, нане ле нисави вредност хем кова со вреџинела е Девлескере сила* која со ов дела амен адалеске со сикавела аменге пло шукарипе со на заслужинаја ле. 30 Соске, амен џанаја кај о Девел вакерѓа: „И одмазда тани мли, ме ка иранав ленге“, хем исто аѓаар вакерѓа: „О Јехова* ка судинел пле народоске“. 31 Страшно тано те добина казна таро џивдо Девел.

32 Сетинен тумен ко пуране диве коленде со, откеда запознајнѓен о чачипе, издржинѓен ки пхари борба хем ко муке. 33 Понекогаш тумен сиен сине икалде англо јавера* те шај те асан туменге хем те циден муке, а понекогаш поможинѓен околенге* кола со доживинѓе асавко нешто. 34 Соске, тумен сикавѓен сочувство околенге со сине пханле ко затвор хем на нашавѓен тумари радост кеда леле тумендар тумаро имот, соске џанена кај иси тумен наследство сој тано пошукар хем ка ачхол засекогаш.

35 Адалеске, ма чхинавен храбро* те керен лафи, соске адава анела бари награда. 36 Туменге ваљани истрајност, те шај откеда керѓен адава сој спрема е Девлескири волја, те добинен адава сој тано ветимо. 37 Соске, „само панда хари“ хем „ка ресел окова со авела хем нане те каснинел“. 38 „О праведнико ка живинел адалеске со иси ле вера“, ама „ако цидела пе, нане те овел спрема мли волја“. 39 Амен на сием адалендар со тари дар цидена пе таро Девел хем џана ко уништување, него адалендар со иси лен вера хем спасинена пло живото.

11 И вера тани те овел пе силно уверимо кај ка случинел пе адава ко со надинаја амен, ој тани јасно доказ кај чаче постојнела адава со на дикхела пе. 2 Адалеске со о мануша таро пурано време сине лен вера, о Девел сикавѓа ленге кај тане леске ки волја.

3 Вераја хаљоваја кај цело свето* сине створимо* е Девлескере лафеа. Аѓаар о Девел користинѓа адава со нашти те дикха, те шај те керел адава со шај те дикха.

4 Вераја о Абел денѓа е Девлеске жртва која со сине повредно тари е Каинескири. Баши адаја вера о Девел сикавѓа леске кај тано праведно, соске о Девел прифатинѓа лескири жртва хем иако тано муло, себепи пли вера, ов панда керела лафи.

5 Вераја о Енох сине ингардо те шај те на цидел муке кеда ка мерел хем никој нашти сине те аракхел ле, соске о Девел ингарѓа ле. Ама англедер те овел ингардо, о Девел сикавѓа леске кај тано леске ки волја. 6 А бизи вера нашти те угодина е Девлеске, соске окова со мангела те авел паше џи лесте мора те верујнел кај ов постојнела хем кај наградинела околен со ревно родена ле.

7 Вераја о Ное, откеда о Девел предупрединѓа ле башо адава со панда на дикхела пе сине, сикавѓа кај дарала таро Девел хем керѓа арка те шај те спасинел пле фамилија. Адале вераја ов осудинѓа о свето хем наслединѓа и праведност, која со авела тари вера.

8 Вераја о Авраам, кеда о Девел викинѓа ле, сине послушно хем гело ко тхан со ваљанѓа те добинел ле сар наследство. Ов гело бизо те џанел коте џала. 9 Вераја о Авраам живинѓа сар странцо ки ветими пхув, сар ко дурипе. Хем живинѓа ко шаторија е Исакоја хем е Јаковеа коленге со о Девел исто аѓаар ветинѓа кај ка дел лен адаја пхув. 10 Соске, ов аџикерѓа и диз со иси ла чачутне темелија, која со керѓа ла хем градинѓа ла о Девел.

11 Вераја и Сара да ачхили кхамни,* иако накхља лакоро време те бијанел, соске верујнѓа кај окова со денѓа ла о ветување тано верно. 12 Адалеске, таро јекх мануш, коле со више нашти сине те овен ле чхаве,* бијандиле бут мануша, кобор со иси ѕвезде ко небо хем нашти сине те гејнен пе, сар и пошик ко морско брего.

13 Са акала мануша ачхиле верна џи ко мерибе, иако на добинѓе адава со сине ленге ветимо, него дикхле ле адава дуралдан хем радујнѓе пе леске хем англи сариненде вакерена сине кај ола тане странција хем привремена жителија ки пхув коте со живинена сине. 14 Соске, окола со керена лафи ко асавко начин, јасно сикавена кај ола ревносно родена тхан кова со ка овел ленгоро. 15 А те мислинен сине баши и пхув котар со иклиле, би аракхена сине прилика те иранен пе адари. 16 Ама акана ола бут мангена јекх пошукар тхан, тхан кова со авела таро небо. Адалеске, о Девел на лаџала ола те викинен ле пло Девел, соске чак спреминѓа ленге диз.

17 Вераја о Авраам, кеда о Девел искушинѓа ле, сар те пхене више денѓа е Исако сар жртва. О мануш кова со добинѓа о ветувања коленге со радујнѓа пе, сине спремно те дел сар жртва пле единствено бијаме чхаве, 18 иако сине леске вакердо: „Окола со ка авен таро Исак, ленге ка вакерел пе кај тане тло потомство“.* 19 Ама ов џанља кај о Девел шај чак те ваздел лескере чхаве таро муле, хем адатхар да лескоро чхаво иранѓа пе леске, а адава сикавѓа со ка случинел пе ки иднина.

20 Исто аѓаар, о Исак да вераја благословинѓа е Јакове хем е Исаве адалеа со вакерѓа ленге со ка овел ки иднина.

21 Вераја о Јаков, англедер те мерел, благословинѓа е Јосифескере солдује чхавен хем поклонинѓа пе е Девлеске џикоте икерела пе сине ко пло каш.

22 Вераја о Јосиф, англедер те мерел, вакерѓа башо е Израелцонгоро икљојбе таро Египет хем заповединѓа со те керен лескере кокалонцар.

23 Вераја е Мојсеескере родителија гаравѓе ле трин масек откеда бијандило, соске дикхле кај о чхаво тано шужо хем на дарандиле тари е царескири заповед. 24 Вераја о Мојсеј, кеда барило, одбинѓа те викинен ле чхаво е фараонескере чхајакоро, 25 хем биринѓа те овел мучимо е Девлескере народоја, а на те уживинел ко грешна задоволствија со накхена. 26 Ов керѓа адава, соске и лаџ со трпинѓа сар биримо* таро Девел сине леске повредно таро цело египетско барвалипе, соске дикхља ки награда со ка добинел. 27 Вераја мукхља о Египет, ама на керѓа адава адалеске со дарала сине тари е царескири холи, соске ов сине истрајно сар те пхене дикхела е Девле коле со никој нашти те дикхел ле. 28 Вераја славинѓа и Пасха* хем прскинѓа о удара ратеа, те шај е Девлескоро ангели те на мударел* ленгере првобијаме чхавен.

29 Вераја о Израелција накхле таро Црвено Море сар те пхене пхирена ки шуки пхув, ама кеда о Египќања пробинѓе те накхен, тасавдиле.

30 Вераја пеле о ѕидија таро Ерихон откеда ефта диве о народо пхирѓа околу ленде. 31 Вераја и неморално џувли* и Раав на мули заедно околенцар кола со на сине послушна е Девлеске, соске ој шукар приминѓа е шпионен.

32 Хем со те вакерав панда? Нане те овел ман доволно време ако почминава те керав лафи башо Гедеон, о Варак, о Самсон, о Јефтај, о Давид хем башо Самоил хем о јавера пророкија. 33 Ола вераја побединѓе царствија, керѓе адава сој праведно, добинѓе ветувања, пханле е лавенгере муја, 34 ачхавѓе и сила е јагакири, нашле таро оштро мачи, добинѓе сила кеда сине слаба, уле храбра ки војна хем палдинѓе е војска со нападинѓа лен. 35 О џувља преку о воскресение добинѓе пумаре манглен со муле, а јавера сине мучиме џи ко мерибе, ама на откажинѓе пе тари пумари вера само те шај те овен ослободиме, соске мангле те добинен јекх пошукар воскресение. 36 Јавера палем, сине искушиме аѓаар со асана сине ленге, сине камшикујме, хем чак повише таро адава, сине пханле ко синџирија хем сине чхивде ко затвор. 37 Сине мударде баренцар, искушиме, чхинде ко екваш пилаја, мударде мачеа, уравде ки бакхрани хем ки бузњани кожа џикоте сине ко чоролипе, ки неволја хем џикоте сине малтретириме. 38 Ола сине превише шукар башо јекх асавко свето. Живинена сине ко пустине хем ко планине, хем гаравена пе сине ко пештере хем ко дупке тели пхув.

39 Иако о Девел, адалеске со сине лен вера, сикавѓа ленге кај тане леске ки волја, сепак ола на добинѓе адава со сине ленге ветимо, 40 соске е Девле сине ле ки годи те дел амен нешто бут пошукар, те шај ола те на овен керде совршена англедер аменде.

12 Значи, адалеске со околу аменде иси добором баро облако таро сведокија, те фрда амендар секова товар хем грево кова со шај локхесте те перавел амен, хем истрајно те праста ки трка сој англи аменде. 2 Џикоте кераја адава, те на цида амаре јакхја таро Исус кова сој Водачи амаре веракоро хем окова сој биримо таро Девел те поможинел аменге амари вера те овел целосно. Баши радост со сине англи лесте, трпинѓа муке ко стубо мучибаске* бизо те мислинел ки лаџ, хем бешља тари десно страна таро е Девлескоро престол. 3 Значи, шукар размислинен башо пример околескоро со трпинѓа асавко противибе таро муј е грешна манушенгоро, кола со кериндор адава коркори пес осудинѓе, те шај те на уморинен тумен хем те на откажинен тумен.

4 Ки тумари борба против о грево, тумен панда на боринѓен тумен џи ко мерибе. 5 А бистерѓен о совет со сине туменге дендо сар јекх дад со дела совет пле чхавенге: „Мо чхаво, ма дикх ко воспитибе* таро Јехова* сар нешто со нане важно хем ма откажин тут кеда укоринела тут, 6 соске кас мангела о Јехова,* ле воспитинела, казнинела* секоле јекхе со прифатинела ле сар пло чхаво“.

7 Тумен трпинена адалеске со ко асавко начин о Девел воспитинела тумен. О Девел постапинела туменцар сар јекх дад со постапинела пле чхавенцар. А кова дад на воспитинела пле чхаве? 8 Ама, ако о Девел на воспитинела тумен да сар со воспитинела е јаверен, тегани тумен на сиен лескере чхаве, него јаверескере чхаве. 9 Освен адава, амаре телесна дада воспитинена амен сине хем амен поштујнаја лен сине. Тегани, на ваљани ли повише те ова послушна амаре небесно Дадеске кова со водинела амаро живото пле силаја.* Соске, ако кераја аѓаар ка живина. 10 Соске, амаре телесна дада воспитинѓе амен само кратко време хем аѓаар сар ола со мислинѓе кај тано шукар, а о Девел воспитинела амен баши амари корист те шај амен да те ова света сар сој тано ов. 11 Чаче, кеда некој добинела укор, ко моменти нане радосно, него тажно, соске адава дукхала. Ама адава анела бари корист адаленге сој спремна те сикљон, хем пало адава, ола шај те живинен праведно хем те овел лен мир.

12 Адалеске, зојракерен о уморна васта хем о слаба кочака, 13 хем понадари да керен права о друмија коленде со пхирена тумаре пре, те шај о про сој слабо те на шининел пе, него те сасљол. 14 Трудинен тумен те овен ко мир са е манушенцар хем те овен света, соске бизо адава нијекх мануш ка нашти те дикхел е Господаре. 15 Шукар пазинен нијекх те на нашавел е Девлескоро шукарипе со на заслужинаја ле хем те на појавинел пе несаво отровно корено кова со ка керел штета хем ка отрујнел буте џенен. 16 Хем пазинен машкар туменде те на овел некој сој неморално* или некој со на ценинела о света буќа, сар о Исав кова со јекхе хајбаске откажинѓа пе таро пле правија со сине ле сар првобијамо. 17 А џанена кај пало адава, кеда родинѓа те добинел о благослов, ов сине одбимо, иако асвенцар молинѓа пле даде те менинел пли одлука, ов на успејнѓа ко адава.

18 Соске, тумен на ален паше узи планина која со шај те пипинел пе хем која со тхабљола ки јаг, а ни узо кало облако, и бари темница хем и силно бавлал, 19 а ни ко тхан коте со шундило о звуко тари труба хем о гласо кова со керела лафи таро небо. Кеда шунѓа адава гласо, о народо молинѓа е Мојсее адава гласо више те на керел ленцар лафи. 20 Соске, ола дарандиле тари акаја заповед: „Ако чак несаво животно пипинѓа и планина, нека овел мудардо баренцар!“ 21 А адава со дикхле, сине добором страшно со о Мојсеј вакерѓа: „Дарава хем тресинава“. 22 Ама тумен ален паше узи планина Сион хем и диз е џивде Девлескири, узо небесно Ерусалим, хем узо бут* ангелија 23 кхедиме ко јекх тхан, хем узо собрание е првобијаменгоро, коленгере со анава тане пишиме упре ко небо, узо Девел кова сој Судија сариненге, узо праведна мануша кола со живинена спрема е Девлескири сила* хем сој тане керде совршена, 24 узо Исус, кова сој тано посреднико башо нево сојуз, хем узо рат кова сој тано прскимо, со керела лафи башо пошукар буќа таро е Абелескоро рат.

25 Пазинен те на овен непослушна околеске со керела лафи. Соске, ако сине казниме о мануша кола со на шунѓе околе со вакерѓа е Девлескере предупредувања ки пхув, тегани кобор повише амен ка ова казниме ако сием непослушна околеске со керела лафи таро небо. 26 Ко адава време лескоро гласо тресинкерѓа и пхув, а акана ов ветинѓа: „Панда јекх пути ка тресинкерав на само и пхув него хем о небо“. 27 А о лафија „панда јекх пути“ значинена кај ка овел цидимо адава со шај те тресинел пе, јавере лафенцар адава со на керѓа ле о Девел, те шај те ачхол адава со нашти те тресинел пе. 28 Адалеске со ваљани те добина о Царство кова со нашти те тресинкерел пе, понадари да те трудина амен те добина е Девлескоро шукарипе кова со на заслужинаја ле, преку кова со шај те служина е Девлеске спрема лескири волја, аѓаар со ка сикава кај дараја лестар хем кај хор поштујнаја ле. 29 Соске, амаро Девел тано јаг со глтинела.

13 Понадари да сикавен пхраликано мангипе јекх јекхеске. 2 Ма бистрен те сикавен гостопримливост. Адалеске со сине гостопримлива, несаве бизо те џанен приминѓе сар гостија ангелен. 3 Мислинен ко окола сој ко затвор,* сар те пхене тумен да сиен пханле ленцар, хем мислинен ко окола сој малтретириме, соске тумен да сиен мануша.* 4 Сарине ваљани те поштујнен о брако, хем о ром хем и ромни мора те овен верна јекх јекхеске, соске о Девел ка судинел околенге со керена неморал* хем прељуба. 5 Ко тумаро живото те на овел тумен мангипе спрема о паре, него овен задоволна адалеа со иси тумен. Соске, ов вакерѓа: „Никогаш нане те мукхав тут хем никогаш нане те иранав туке мло думо“. 6 Адалеске храбро шај те вакера: „О Јехова* тано мло помошнико, нане те дарав. Со шај те керел манге о мануш?“

7 Сетинен тумен ко адала со предводинена машкар туменде, кола со вакерѓе туменге е Девлескоро лафи, џикоте дикхена о шукар резултатија таро ленгоро начин сар живинена, тумен да нека овел тумен сар ленгири вера.

8 О Исус Христос тано о исто ерати хем авдиве, хем засекогаш.

9 Ма дозволинен те ховавен тумен разна хем чудна сикљојба, сој тане појавер таро адала со амен прифатинѓем. Соске, пошукар тано е вилеске те овел зојракердо таро е Девлескоро шукарипе со на заслужинаја ле, него таро правилија башо хајбе, кола со на користинена ништо е манушенге коленге со адала правилија тане бут важна.

10 Иси амен жртвенико колестар со нане лен право те хан окола кола со керена свето служба ко шатори. 11 Соске, о тело е животненгоро, коленгоро со рат о првосвештенико ингарела андре ко свето тхан сар жртва башо гревија, тхарела пе авријал таро логори. 12 Адалеске о Исус да цидинѓа муке авријал тари е дизјакири порта, те шај те керел свето е манушен пле ратеа. 13 Адалеске амен да те џа ки лесте авријал таро логори, аѓаар со ка трпина* и исто лаџ сар со трпинѓа ов, 14 соске акате амен нане амен и диз со ка ачхол засекогаш, него едвај аџикераја и диз со ваљани те авел. 15 Преку о Исус секогаш те да е Девлеске жртва адалеа со ка фалина ле, јавере лафенцар плоди таро амаро муј кова со објавинела лескоро анав. 16 Освен адава, ма бистрен те керен шукарипе хем те делинен адава со иси тумен е јаверенцар, соске асавке жртве мангела о Девел.

17 Овен послушна адаленге со предводинена машкар туменде хем овен ленге подложна, соске ола стално грижинена пе баши туменде сар асавке со ка одговоринен англо Девел башо адава, те шај радосно те керен адава, а на пхарипаја, соске адава би овела туменге ки штета.

18 Молинен тумен аменге, соске увериме сием кај иси амен чисто* совест, хем мангаја ко са о буќа те ова чесна. 19 Посебно поттикнинава тумен те молинен тумен те шај те иранав ман ки туменде со шај посигате.

20 О Девел коле со иси ле мир хем кова со дела мир, кова со воскреснинѓа таро муле е баре пастире е бакхренгоро, амаре Господаре е Исусе, кова со денѓа рат башо вечно сојуз, 21 нека дел тумен са адава со ваљани туменге те шај те керен лескири волја хем преку о Исус Христос ов нека поттикнинел амен те кера адава сој леске угодно. О Девел нека овел славимо засекогаш! Амин.

22 Молинава тумен пхраљален, прифатинен акала охрабрувачка лафија, соске са акава пишинѓум туменге ко јекх кратко писмо. 23 Мангава те вакерав туменге пхраљален, кај амаре пхрале е Тимотее ослободинѓе ле. Ако ов сигенде авела, ме ка авав леа ки туменде.

24 Поздравинен са околен со предводинена машкар туменде хем са околен сој света.* О пхраља тари Италија поздравинена тумен.

25 Е Девлескоро шукарипе со на заслужинаја ле нека овел сариненцар туменцар.