ПИСМО ТАРО ЈАКОВ

1 Ме о Јаков, робо е Девлескоро хем е Господарескоро е Исус Христосескоро, поздравинава е дешудује племен сој тане растуриме ко са о стране.

2 Мангле пхраљален, радујнен тумен бут кеда ка аракхљовен ко разна искушенија, 3 соске џанена кај адалеске со тумари вера тани испитими ко асавко начин, адава керела те овен истрајна. 4 Мукхен и истрајност те исполнинел пли цел те шај те овен целосна хем шукар ко са о буќа, бизи нисави маана.

5 Значи, ако некаске тумендар фалинела мудрост, понадари да нека родел таро Девел хем ов ка дел ле, соске ов дела дарежливо сариненге хем бизо те родел о грешке. 6 Ама понадари да вераја нека родел са о буќа хем ич те на сумнинел пе, соске окова со сумнинела пе тано сар морско брани, коле со и бавлал ингарела ле акари-окори. 7 Асавко мануш ма те мислинел кај ка добинел нешто таро Јехова.* 8 Соске, асавко мануш нане одлучно хем нане стабилно ко са со керела.

9 О чороло пхрал нека радујнел пе* адалеске со о Девел акана чхивѓа ле ки побари положба, 10 а о барвало мануш ваљани те радујнел пе со сикљола те овел понизно, соске о барвале нане више те постојнен, сар и лулуди ко поле. 11 Соске, о кхам кеда икљола, пле татипаја керела и лулуди те шуќол, те перел хем ој нашавела пло шужипе. Аѓаар о барвало мануш ка шуќол џикоте прастала пало барвалипа.

12 Среќно тано о мануш кова со истрајнела ко искушенија. Соске, откеда ка истрајнел, о Девел ка прифатинел ле хем ка добинел и награда, а адава тано о живото кова со о Јехова* ветинѓа ле околенге со мангена ле. 13 Нијекх, кеда ка овел ко искушение, те на вакерел: „О Девел искушинела ман“. Соске, нијекх нашти искушинела е Девле лошнипаја, а ов да на искушинела никас лошнипаја. 14 Него, секова јекх тано искушимо аѓаар со цидела ле хем ховавела ле* лескири желба. 15 Пало адава, кеда и желба развинела пе, бијанела грево, а о грево ко крајо анела мерибе.

16 Мангле пхраљален, ма ховавѓовен. 17 Секова шукар хем совршено поклон авела упралдан, таро Дад е небесно светлинакоро, кова со на менинела пе сар со менинела пе и сенка. 18 Лескири волја сине те бијанел амен преку о лафи е чачипаскоро те шај те ова о прва плодија* таро адала колен со створинѓа.

19 Џанен акава, мангле пхраљален: секова мануш мора те овел спремно те шунел, а те на сиѓарел те керел лафи хем те на хољанел сигате. 20 Соске, кеда јекх мануш тано хољамо, ов на постапинела спрема е Девлескири праведност. 21 Адалеске, фрден тумендар секова мелалипе хем лошнипе,* хем кротко прифатинен те садинел пе ки туменде е Девлескоро лафи, кова со шај те спасинел тумен.

22 Ама, ма шунен само о лафи, него хем постапинен спрема лесте, те шај те на ховавен коркори тумен. 23 Соске, ако некој шунела о лафи, а на постапинела спрема лесте, тегани ов тано сар јекх мануш кова со дикхела пло муј ки ајна, 24 ама откеда ка дикхел пе, џала песке хем одма бистрела саво тано. 25 А окова со дела пестар са те хаљол о совршено закони кова со дела слобода хем икерела пе ки лесте, ов на бистрела адава со шунѓа, него постапинела спрема лесте. О мануш со керела аѓаар ка овел среќно.

26 Ако некој мислинела кај обожавинела е Девле, ама на контролиринела пли чхиб,* ов ховавела коркори пес* хем лескоро обожавибе на врединела. 27 О обожавибе кова сој тано чисто хем бизо нисаво мелалипе англо амаро Девел хем Дад, тано акава: те грижине тут е чхавенге сој бизо родителија хем е удовиценге ко ленгере неволје, хем те аракхе тут таро мелалипе акале светоскоро.

2 Пхраљален, зарем шај те верујнен ко амаро славно Господари о Исус Христос, а ко исто време те делинен е манушен?* 2 Соске, ако ко тумаро состанок авела мануш со пхиравела златна ангрустика хем скупа шеја, а авела хем чороло мануш мелале шеенцар, 3 дали е манушеске со пхиравела скупа шеја сикавена повише поштовање хем вакерена леске: „Ту беш акате ко шужо тхан“, а е чоролеске вакерена: „Ту терѓов ко пре“, или: „Беш теле“? 4 Ако керена аѓаар, зарем на керена разлике машкар туменде хем на овена ли судие со анена неправедна* одлуке?

5 Шунен, мангле пхраљален. Зарем о Девел на биринѓа околен со о свето дикхела лен сар чороле, те овен барвале ки вера хем те наслединен о Царство кова со ов ветинѓа околенге со мангена ле? 6 Ама тумен понижинѓен е чоролен. Нане ли о барвале адала кола со мучинена тумен хем влечинена тумен англо судо? 7 Нане ли ола адала кола со вреџинена о анав со анела туменге чест, кова со денѓа тумен о Девел? 8 Значи, ако тумен икерена о царско закони, сар со пишинела ко Списија: „Манг тле пашутне сар коркори тут“, тегани шукар керена. 9 Ама, ако понадари да делинена е манушен,* тегани тумен грешинена хем о закони осудинела тумен сар грешникија.

10 Соске, ако некој икерела цело Закони, ама пхагела само јекх заповед лестар, криво тано сар те пхене пхагља цело Закони. 11 Соске, окова со вакерѓа: „Ма кер прељуба“, исто вакерѓа: „Ма мудар“. Значи, ако на кереа прељуба, а мудареа, ту палем пхагеа о Закони. 12 Понадари да керен лафи хем понашинен тумен сар окола со ка овен судиме спрема о закони кова со дела слобода е манушенге.* 13 Окова со на сикавела милост е јаверенге, леске да ка овел судимо бизи милост. Соске, и милост тани побари таро судибе.

14 Пхраљален, сави корист иси ако некој вакерела кај иси ле вера, а на сикавела адава ко пле постапке? Шај ли асавки вера те спасинел ле? 15 Ако несаве пхрале или пхења нане лен со те уравен* хем нане лен доволно хајбаске сој ленге потребно секова диве, 16 а некој тумендар вакерела ленге: „Џан туменге ко мир, таќовен хем чаљовен“, ама на дела лен адава со ваљани ленге живибаске, сави корист иси таро адава? 17 Аѓаар тано е вераја да, ако на сикавела пе ко постапке, ој тани мули.

18 Ама некој шај те вакерел: „Тут иси тут вера, а ман иси ман постапке со сикавена мли вера. Сикав манге тли вера бизо постапке, а ме ка сикавав туке мли вера преку мле постапке“. 19 Верујнеа кај иси јекх Девел, нели? Шукар кереа. Ама о демонија да верујнена хем тресинена. 20 Глупаво манушеа, кеда ка хаљове кај и вера бизо постапке тани џабе? 21 Зарем о Девел на вакерѓа амаре дадеске е Авраамеске кај тано праведно башо лескере постапке откеда ов пле чхаве е Исако чхивѓа ле ко жртвенико те дел ле сар жртва? 22 На дикхеа ли кај лескири вера сине поврзими лескере постапкенцар, хем кај лескири вера ули целосно* преку лескере постапке 23 хем исполнинѓе пе о лафија таро Списија: „Е Аврааме сине ле вера ко Јехова* хем адалеске ов дикхља ки лесте сар праведно мануш“, хем сине викимо е Јеховаскоро* амал.

24 Дикхена кај о мануш ка овел праведно англо Девел башо пле постапке, а на само баши пли вера. 25 Исто аѓаар баши Раав, и неморално џувли,* на вакерѓа ли о Девел кај тани праведно себепи лакере постапке, откеда шукар приминѓа е шпионен хем бичхалѓа лен таро јавер друмо? 26 Значи, сар сој о тело бизо дишибе* муло, аѓаар и вера да бизо постапке тани мули.

3 Пхраљален, бут џене машкар туменде на ваљани те овен учителија, соске џанена кај аменге сар учителија построго ка судинел пе. 2 Соске, сарине амен бут пути грешинаја. Ако некој на грешинела ко лафија, ов тано совршено мануш кова сој тано способно те контролиринел хем цело пло тело.* 3 Ако чхиваја е грастенге ко муј дизгиња* те шај те шунен амен, тегани амен управинаја хем цело ленгере телоја. 4 Дикхен хем о бродија, иако тане бут баре хем о силна бавлала ингарена лен, о мануш кова со управинела е бродеа шај те ингарел о броди коте ов со мангела преку јекх тикно кормило.

5 Исто аѓаар и чхиб да тани јекх тикно дело таро тело, ама бут фалинела пе. Аке, чак јекх тикни јаг шај те тхарел бари шума. 6 И чхиб да тани јаг. Таро са амаре делија таро тело и чхиб претставинела јекх свето пхердо лошнипаја, соске ој мељарела цело тело хем уништинела цело живото е манушескоро хем тхарела сар и геена.* 7 Соске, секова диво животно, секоја птица, сап или гуштери хем морско животно шај те питоминел пе хем о мануша успејнѓе те контролиринен лен. 8 Ама нијекх мануш нашти те питоминел и чхиб. Пхаро тано те контролирине ла, керела бари штета хем пхерди тани отрово со мударела. 9 Амен користинаја и чхиб те фалина е Јехова,* амаре Даде, ама исто аѓаар е чхибјаја даја арман е манушен кола сој створиме „слична сар о Девел“. 10 Таро исто муј икљола хем и фалба хем и арман.

Пхраљален, на ваљани аѓаар те овел. 11 Зарем таро исто извор икљола хем о гудло хем о ќерко пани? 12 Пхраљален, шај ли и смоква те бијанел маслинке или и дракх, смокве? Аѓаар нашти таро извор лондале пањеа те икљол гудло пани.

13 Кој машкар туменде тано мудро хем разумно? Нека сикавел адава аѓаар со шукар ка понашинел пе хем аѓаар со ко кротко начин ка керел са о буќа. А адаја кроткост авела тари мудрост. 14 Ама ако ко тумаре виле иси тумен бари љубомора хем желба те акошен тумен,* ма фалинен тумен баши тумари мудрост, соске ако керена адава, тегани тумен ховавена. 15 Адаја мудрост на авела таро Девел кова сој ко небо, него тани таро акава свето, ој тани телесно* хем демонско. 16 Соске, коте со иси љубомора хем акошибе,* адатхе нане редо хем иси разна лошна буќа.

17 А о мануш со иси ле и мудрост со авела таро Девел, кова сој ко небо, најангле живинела живото сој тано чисто, освен адава мангела о мир, разумно тано, спремно тано те овел послушно, пхердо тано милост, керела адава сој шукар,* на делинела е манушен,* нане лицемерно. 18 А и праведност сејнела пе кеда иси мир хем лакоро плоди ка кхеден ле* окола со керена те овел мир.

4 Котар авена о војне хем о акошиба со иси машкар туменде? На авена ли таро тумаре себична желбе кола со боринена пе те контролиринен тумен?* 2 Мангена нешто, ама нане тумен. Мрзинена* е јаверен хем мангена те лен адава сој ленгоро, ама сепак ништо на добинена. Тумен акошена тумен хем водинена војне. А нане тумен, соске на родена таро Девел. 3 А кеда родена, на добинена, соске родена таро погрешна намере, те шај те задоволинен тумаре себична желбе.

4 Тумен со на сиен верна е Девлеске,* на џанена ли кај о амалипе е светоја тано душманлуко е Девлеа? Адалеске, кој мангела те овел амал е светоја, овела душмани е Девлеске. 5 Мислинена ли кај о Списија џабе вакерена: „Амаро вило* кова со чхивела амен те ова завидлива керела те овел амен силно желба башо различна буќа“? 6 Ама о шукарипе со на заслужинаја ле, кова со дела амен о Девел, тано побаро тари амари завист. Адалеске о Списија вакерена: „О Девел противинела пе околенге сој горда, а е понизна манушенге сикавела шукарипе со на заслужинела пе“.

7 Адалеске, овен подложна е Девлеске, а противинен тумен е Бенгеске, хем ов ка нашел тумендар. 8 Овен паше е Девлеа, хем ов ка овел паше туменцар. Тумен о грешникија, тховен тумаре васта, тумен со на сиен одлучна, чистинен тумаре виле. 9 Жалинен, тугујнен хем ровен. Ма асан више, него тугујнен, ма радујнен тумен више, него жалинен. 10 Понизно подложинен тумен е Јеховаске* хем ов ка ваздел тумен.

11 Пхраљален, чхинавен те керен лафи против јекх јекхесте. Кој керела лафи против јекх пхрал или судинела пле пхралеске, ов керела лафи против о закони хем судинела е законеске. А ако судинеа е законеске, тегани ту сиан лескоро судија, а на сиан окова со икерела пе ко закони. 12 Само о Девел тано окова со дела законија хем само ов тано Судија, само ов шај те спасинел хем те уништинел некас. А кој сиан ту те судине тле пашутнеске?

13 Шунен акана, тумен со вакерена: „Авдиве или тајса ка џа ки акаја-акаја диз хем адатхе ка ачхова јекх берш, ка кера бути хем ка заработина“, 14 а на џанена сар ка овел тумаро живото тајса. Соске, тумен сиен магла која со појавинела пе само кратко хем пало адава нашавѓола. 15 Наместо адава, ваљани те вакерен: „Ако тани е Јеховаскири* волја, ка живина хем ка кера акава или окова“. 16 А тумен акана фрдена чалми хем дичинена тумен адалеа. Са акава фрдибе чалми тано лошно. 17 Адалеске, ако некој џанела сар те керел адава сој исправно, а на керела, адалеа керела грево.

5 Шунен акана тумен о барвале, ровен хем жалинен башо муке со авена упри туменде. 2 Тумаро барвалипе кирнило хем о инсектија* хале тумаре шеја. 3 Тумаро злато хем тумаро сребро астарѓа ’рѓа хем ленгири ’рѓа ка овел сведоко против туменде хем ка хал тумаро тело. Адава со кхединѓен, ка овел сар јаг ко последна диве. 4 Аке, о работникија со кхединѓе о плодија таро тумаре ниве викинена, соске на денѓен лен ленгири плата, хем о Јехова* о заповеднико е војскенгоро шунѓа сар викинена баши помош окола со кхедена и жетва. 5 Тумен ки пхув живинѓен раскошно хем само задоволинѓен тумаре желбе. Сар о животне со тхуљарена пе башо диве чхинибаске, аѓаар тумен тхуљарѓен тумаре виле. 6 Тумен осудинѓен хем мударѓен е праведнико. Адалеске ов акана противинела пе туменге.

7 Овен стрплива пхраљален џи ки е Господарескири присутност.* Аке, о земјоделцо да стрпливо аџикерела о скапоцено плоди тари пхув, џикоте на перела о есенско бршим хем о пролетно бршим. 8 Тумен да овен стрплива хем зојракерен тумаре виле, соске паше тани е Господарескири присутност.

9 Ма овен хољаме јекх јекхеске,* пхраљален, те шај те на овен осудиме. Аке, о Судија терѓола англо удар. 10 Пхраљален, нека овен туменге пример о пророкија, кола со керена сине лафи ко анав е Јеховаскоро,* башо адава сар те трпинен лошнипе хем те овен стрплива. 11 Аке, башо окола со истрајнѓе вакераја кај тане среќна. Шунѓен кобор истрајнѓа о Јов хем џанена сар о Јехова* благословинѓа ле ко крајо - џанена кај о Јехова* тано пхердо сочувство хем милост.

12 А сој најважно, пхраљален, чхинавен те хан совли упро небо, упри пхув или упро било со јавер. Наместо адава, кеда ка вакерен: „Оја“, адава нека значинел „оја“, а кеда ка вакерен: „На“, адава нека значинел „на“, те шај те на овен осудиме.

13 Ако некој машкар туменде цидела муке, нека молинел пе. А ако некој тано радосно, нека гиљавел гиља со фалинена е Девле.* 14 Ако некој тано насвало машкар туменде, нека викинел е старешинен таро собрание, хем ола нека молинен пе леске хем нека макхен ле масло е Јеховаске* ко анав. 15 Хем и молитва која сој бичхалди вераја ка сасљарел е насвале* хем о Јехова* ка ваздел ле. Хем ако керѓа гревија, ка овел леске простимо.

16 Адалеске, признајнен тумаре гревија јекх јекхеске хем молинен тумен јекх јекхеске те шај те сасљовен. Е праведникоскири молитва сој вакерди таро вило, иси ла бари сила хем чаче шај те поможинел. 17 О Илија да сине мануш коле со сине ле о иста чувствија сар аменде, ама кеда молинѓа пе таро вило те на дел бршим, на денѓа бршим ки адаја пхув трин берш хем шов масек. 18 Пало адава палем молинѓа пе, хем таро небо пело бршим хем и пхув денѓа плодија.

19 Пхраљален, ако некој машкар туменде сине ховавдо хем цидинѓа пе таро чачипе, хем некој тумендар поможинѓа леске те иранел пе, 20 џанен кај окова со иранѓа е грешнико таро лескоро погрешно друмо, ка спасинел адале мануше таро мериба хем ка учхарел бут гревија.