ПРВО ПИСМО Е ПЕТАРЕСКОРО

1 Ме о Петар, апостоли е Исус Христосескоро, пишинава туменге со сиен бириме таро Девел, кола со сиен привремена жителија ко акава свето хем со сиен растуриме ко Понт, ки Галатија, ки Кападокија, ки Азија хем ки Витинија. 2 О Девел, амаро Дад, биринѓа тумен спрема адава со ов англедер џанља. Денѓа тумен пли сила* те шај те керел тумен света. Ов керѓа адава те шај те овен леске послушна хем те шај те овен чиста преку о рат е Исус Христосескоро.*

О Девел нека сикавел туменге панда повише пло шукарипе со на заслужинаја ле хем нека дел тумен панда побаро мир.

3 Нека овел фалимо о Девел, о Дад амаре Господарескоро е Исус Христосескоро, соске сикавѓа аменге бари милост. Адалеа со воскреснинѓа е Исус Христосе, керѓа палем те бијанѓова хем денѓа амен џивди надеж. 4 Хем денѓа амен наследство со на распадинела пе, со на мељарѓола хем со на нашавѓола. Ов гаравела адава наследство упре ко небо туменге, 5 колен со о Девел заштитинела пле силаја адалеске со иси тумен вера, те шај те добинен о спасение со ка овел откримо ко време кеда ка авел о крајо. 6 Тумен бут радујнена тумен башо акава, иако акана кратко време ка ваљани те жалинен адалеске со трпинена разна искушенија, 7 те шај тумари испитими вера те анел туменге фалба, слава хем чест ко време кеда ка појавинел пе* о Исус Христос. Акаја тумари вера тани поскапоцено таро злато кова со, иако тано испитимо* јагаја, на трајнела засекогаш. 8 Иако никогаш на дикхлен е Христосе, тумен мангена ле. Иако акана да на дикхена ле, сепак тумен верујнена ки лесте хем пхерде сиен бари радост која со нашти лафенцар те опишинел пе, 9 соске сиен сигурна кај себепи тумари вера, ка добинен тумаро спасение.

10 О пророкија со вакерѓе башо е Девлескоро баро шукарипе со на заслужинаја ле, кова со сикавѓа пе туменге, шукар испитинѓе хем детално истражинѓе башо акава спасение. 11 Ола бут шукар испитинѓе ко кова време хем ко саве околностија ка исполнинен пе упро Христос о буќа коленге со е Девлескири сила,* која со сине ки ленде, пророкујнѓа. Адаја сила пророкујнѓа англедер кај о Христос ка цидел муке хем кај пало адава ов ка овел славимо. 12 О Девел откринѓа е пророконге кај ола на служинена сине коркори песке, него туменге. О пророкија пишинѓе башо адава со сине објавимо туменге хем тумен шунѓен акала буќа преку окола со проповединѓе туменге о шукар хабери, аѓаар со поможинѓа ленге е Девлескири сила* која со сине бичхалди таро небо. Чак е ангелен иси лен бари желба те хаљовен акала буќа.

13 Адалеске, спреминен тумари годи баши напорно бути. Ко са овен трезвена. Надинен тумен ко шукарипе со на заслужинаја ле, кова со ка сикавел пе туменге кеда о Исус Христос ка појавинел пе.* 14 Сар послушна чхаве, ма мукхен понадари да те обликујнен тумен о желбе кола со сине тумен кеда на пенџарена сине е Девле, 15 него сар сој свето о Девел кова со викинѓа тумен, тумен да овен света ко са со керена. 16 Соске, ко Списија пишинела: „Тумен мора те овен света, соске ме сиум свето“.

17 Хем ако молинена тумен е Дадеске, кова со на делинела е манушен* кеда судинела ленге, него секаске судинела спрема лескере постапке, тегани мукхен тумаре постапке те сикавен кај дарана таро Девел џикоте живинена сар привремена жителија ко акава свето. 18 Соске, џанена кај на сиен сине ослободиме* таро тумаро чучо начин сар живинена, кова со наслединѓен ле таро тумаре парапапија, е буќенцар кола со распадинена пе, сар сој о сребро или о злато. 19 Наместо адава сиен сине ослободиме преку о скапоцено рат е Христосескоро, кова сој тано сар о рат јекхе бакхрескоро кова сој бизи маана хем сој чисто. 20 Точно тано кај ов сине биримо англедер те овел о свето, ама појавинѓа пе ко крајо таро акала времија тумаро себепи. 21 Преку лесте тумен верујнена ко Девел, кова со ваздинѓа ле таро муле хем денѓа ле слава. Адалеске, верујнен ко Девел хем надинен тумен ки лесте.

22 Акана, кеда улен чиста адалеске со сиен послушна е чачипаске хем шај те сикавен искрено пхраликано мангипе, манген тумен јекх јекхеа силно таро вило. 23 Соске, палем бијандилен, ама на таро семе со распадинела пе, него таро семе со на распадинела пе,* преку о лафи е Девлескоро кова сој џивдо хем вечно. 24 Соске, „са о мануша тане сар чар хем ленгоро шужипе тано сар лулуди ко поле. И чар шуќола хем и лулуди перела, 25 ама е Јеховаскоро* лафи ачхола засекогаш“. Хем акава „лафи“ тано о шукар хабери кова со сине туменге објавимо.

2 Адалеске, циден тумендар секова лошнипе, превара, лицемерство, завист хем секова клеветибе.* 2 Сар о бебија со родена тхуд, аѓаар тумен да бајрарен ки туменде силно желба башо чисто тхуд таро е Девлескоро лафи, те шај аѓаар со ка хранинен тумен леа, те бајровен џи ки зрелост хем ко крајо те овен спасиме, 3 ако чаче дикхлен* кобор тано шукар о Господари.

4 О мануша отфрлинѓе о џивдо бар, ама о Девел биринѓа ле хем англо лескере јакхја ов тано скапоцено. Кеда сикавена вера ки лесте,* 5 тумен овена сар џивде бара коленцар со градинела пе јекх духовно кхер, те шај те овен света свештеникија, хем аѓаар преку о Исус Христос те ден духовна жртве кола сој прифатлива е Девлеске. 6 Соске, ко Списија пишинела: „Аке! Ме чхивава ко Сион биримо бар, јекх скапоцено главно бар ки ќуша ко темели. Хем секој со сикавела вера ки лесте никогаш нане те разочаринел пе.“*

7 Значи, туменге адава бар тано скапоцено соске верујнена ки лесте, ама околенге со на верујнена ки лесте, „о бар со фрдинѓе ле о градителија, уло о главно бар ки ќуша“* 8 хем „бар со ка керел о мануша те сопкинен пе хем карпа со ка керел те перен“. Ола сопкинена пе адалеске со нане послушна е Девлескере лафеске. Адава сине пророкујмо кај ка случинел пе ленге. 9 Ама тумен сиен „биримо народо, царска свештеникија, свето народо, народо со припадинела само е Девлеске, те шај сегде те вакерен башо бут шукар особине хем постапке е Девлескере“, кова со викинѓа тумен те икљовен тари темница хем приминѓа тумен ки пли бут шужи светлина. 10 Соске, тумен јекх време на сиен сине народо, ама акана сиен е Девлескоро народо. Англедер на сикавела пе сине туменге милост, ама акана сикавела пе туменге милост.

11 Мангле пхраљален, поттикнинава тумен сар странција хем сар привремена жителија ко акава свето, понадари да те циден тумен подур таро телесна желбе, кола со водинена војна против туменде. 12 Живинен примерно машкар о мануша таро свето те шај кеда ка кривинен тумен кај керена лошнипе, те дикхен тумаре шукар постапке хем аѓаар те славинен е Девле ко диве кеда ка авел те испитинел саве тане секаскере постапке.

13 Е Господарескоро себепи, овен подложна секоле јекхеске со иси ле власт, било те овел адава е цареске, соске тано ки побари положба, 14 било е управителенге кола сој бичхалде лестар те казнинен околен со керена лошнипе, а те фалинен околен со керена шукарипе. 15 Соске, е Девлескири волја тани, адалеа со ка керен шукарипе, те пханден о муја е неразумна манушенгере, кола со керена лафи башо нешто со на џанена. 16 Живинен сар слободна мануша, ама ма користинен тумари слобода сар изговор те керен лошнипа, него користинен ла сар е Девлескере робија. 17 Поштујнен саринен, манген са е пхрален, даран таро Девел, поштујнен е царе.

18 О слуге нека овен подложна пумаре господаренге хем нека поштујнен лен сар сој тане дужна те керен, хем адава на само е господарен сој тане шукар хем разумна, него околен да коленге сој пхаро те угодинел пе. 19 Соске, ако некој трпинела неволје* хем неправде само те шај те овел ле чисто совест англо Девел, адава тано е Девлеске ки волја. 20 Иси ли нешто пофално ко адава те трпинен марибе адалеске со грешинѓен? Ама, ако трпинена муке адалеске со керена нешто шукар, тегани о Девел тано задоволно.

21 Уствари, тумен сиен сине викиме ко акава, соске о Христос да цидинѓа муке туменге хем денѓа тумен пример ко са те џан пало лескере чекорија. 22 Ов на керѓа грево, а ни на вакерѓа лафија со преваринена. 23 Кеда вреџинѓе ле, на иранѓа вреџибаја. Кеда цидинѓа муке, на заканинѓа пе, него мукхља пе е Девлеске ко васта, кова со праведно судинела. 24 Ов ко пло тело леља амаре гревија кеда сине ковимо ко стубо,* те шај те ослободинел амен таро гревија* хем те живина баши праведност. Хем „преку лескере ране тумен сиен сине сасљарде“. 25 Соске, сиен сине сар бакхре кола со нашавдиле, ама акана иранѓен тумен ко пастири кова со аракхела тумаро живото.*

3 Аѓаар, тумен о ромња, овен подложна тумаре роменге, те шај околен со на шунена е Девлескоро лафи те анен лен ки вера бизо лафија, него тумаре понашибаја, 2 адалеске со дикхена тумаро шукар* понашибе хем тумаро хор поштовање. 3 Ма украсинен тумен адалеа со дикхјола авријалдан, сар сој о плетибе бала, о пхирајбе злато или о урајбе шуже шеја, 4 него нека украсинел тумен адава сој гаравдо андре ко вило - о мирно хем о кротко стави* кова сој шужипе со на нашавѓовела. Адава шужипе тано скапоцено англо е Девлескере јакхја. 5 Соске, аѓаар украсинена пе сине о света џувља ко пурано време, кола со надинена пе сине ко Девел хем сине подложна пумаре роменге. 6 Аѓаар и Сара да сине послушно е Авраамеске хем викинела ле сине „господари“. А тумен сиен лакере чхаја ако понадари да керена шукарипе хем на дозволинена ништо те даравел тумен.

7 Аѓаар тумен да, о рома, понадари да живинен тумаре ромњенцар аѓаар со ка сикавен кај шукар хаљовена лен. Поштујнен е џувлен сар понежно чаро, соске ола да сар туменде наслединена о поклон е животоскоро со на заслужинела пе. Те на керѓен адава, тумаре молитве нане те овен шунде.

8 Ко крајо, сарине овен јекх ко мисле, овен сочувствителна, нека овел тумен пхраликано мангипе, овен милостива хем понизна. 9 Ма иранен лошнипаја е лошнипаске, ни вреџибаја е вреџибаске. Наместо адава, иранен шукарипаја, соске о Девел акалеске викинѓа тумен те шај те наслединен о благословија.

10 Соске, „окова со мангела те уживинел ко живото хем те дикхел шуже диве, нека аракхел пли чхиб таро керибе лошно лафи хем пло муј таро ховајбе. 11 Нека цидел пе таро лошнипе хем нека керел шукарипе. Нека родел о мир хем нека трудинел пе те икерел о мир. 12 Соске, е Јеховаскере* јакхја дикхена околен сој праведна хем лескере кана шунена ленгере молитве вакерде таро вило. Ама о Јехова* иранела пло думо* околенге со керена лошнипе“.

13 Уствари, кој ка керел туменге штета ако ревносно керена адава сој шукар? 14 Ама, чак те циден да муке адалеске со сиен праведна, тумен сиен среќна. Сепак, ма даран таро адава со ола дарана* хем ма вознемиринен тумен. 15 Него поштујнен ко тумаре виле е Христосе сар Господари хем секогаш овен спремна англо секој со ка пучел тумен те бранинен и надеж со иси тумен, ама адава керен ле ко кротко начин хем сикавен хор поштовање.

16 Икерен чисто тумари совест, те шај аѓаар, било со те вакерен против туменде, окола со керена лошно лафи тумендар те овен лаџакерде таро тумаро шукар понашибе сар е Христосескере следбеникија. 17 Соске, пошукар те трпинен адалеске со керена шукарипе, ако адава тани е Девлескири волја, него те трпинен адалеске со керена лошнипе. 18 Соске, о Христос муло јекх пути хем засекогаш башо гревија, праведнико башо неправедна, те шај те анел тумен ко Девел. Ов муло сар мануш, ама сине ирамо ко живото сар духовно личност. 19 Аѓаар ов гело те проповединел е духонге сој тане ко затвор, 20 кола со на сине послушна кеда о Девел стрпливо аџикерѓа ко диве е Ноескере џикоте градинела пе сине и арка ки која со сине само некобор џене, ола сине офто џене кола со безбедно накхле таро пани хем сине спасиме.

21 Адава со уло ко адала диве, шај те споредина ле е крстибаја кова со акана спасинела тумен да преку о воскресение е Исус Христосескоро. (О крстибе на цидела о мелалипе таро тело, него е крстибаја родела пе чисто совест таро Девел.) 22 О Христос тано тари е Девлескири десно страна, соске гело ко небо коте со о ангелија, о властија хем о силе тане леске подложна.

4 Адалеске со о Христос цидинѓа муке џикоте сине мануш, тумен да спреминен тумен те шај те размислинен ко исто начин сар лесте, соске кој цидинѓа муке ов чхинавѓа те керел грево, 2 те шај о време со ачхола ле таро лескоро живото сар мануш, те на живинел ле аѓаар со ка задоволинел о манушикане желбе, него ка керел адава со мангела о Девел. 3 Соске, доста сине со англедер керена сине адава со керена о мануша таро свето, кеда безобразно понашинена* тумен сине, на контролиринена сине тумаре погрешна желбе, претерано пиена сине, керена сине распуштена забаве, натпреваринена тумен сине ко пијбе хем керена сине одвратно идолопоклонство. 4 Ола акана чудинена пе со тумен више на прастана ленцар ко исто румимо друмо, адалеске керена лошно лафи баши туменде. 5 Ама акала мануша ка одговоринен англо окова сој спремно те судинел хем е џивденге хем е муленге. 6 Уствари, адалеске о шукар хабери сине објавимо е муленге да, те шај - иако о мануша судинена ленге спрема адава со дикхјола авријалдан - англо е Девлескере јакхја ола те живинен аѓаар со ка водинел лен е Девлескири сила.*

7 Паше тано о крајо башо са. Адалеске, исправно размислинен хем секогаш овен спремна те молинен тумен. 8 А сој најважно, нека овел тумен баро мангипе јекх јекхеске, соске о мангипе учхарела бут гревија. 9 Овен гостопримлива јекх јекхеа бизо те жалинен тумен. 10 Служинен јекх јекхеске, секој е поклонеа со добинѓа ле, сар шукар управителија* кола со поможинена е јаверенге те добинен е Девлескоро шукарипе со на заслужинаја ле, кова со сикавела пе ко разна начинија. 11 Ако некој керела лафи, нека керел адава сар некој со вакерела е Девлескере лафија. Ако некој служинела, нека керел адава сар некој со зависинела тари сила која со дела ла о Девел. Аѓаар о Девел преку о Исус Христос ка овел славимо ко са. Лескири тани и слава хем и моќ засекогаш. Амин.

12 Мангле пхраљален хем пхењален, ма изненадинен тумен со доживинена искушенија кола сој тане сар јаг, сар те пхене нешто чудно случинела пе туменге. 13 Наместо адава, радујнен тумен, соске тумен да цидена о иста муке саве со цидинѓа о Христос, те шај исто аѓаар бут те радујнен тумен ко време кеда ка откринел пе лескири слава. 14 Ако вреџинена тумен башо е Христосескоро анав, тумен сиен среќна, соске адава значинела кај тумен иси тумен е Девлескири славно сила.*

15 Ама, нијекх тумендар ма те цидел муке адалеске сој тано убијцо, чор, или адалеске со керела лошнипе или мешинела пе е јаверенге ко буќа. 16 Ама, ако некој цидела муке адалеске сој тано христијани, ма те лаџал, него понадари да нека славинел е Девле адалеа со ка живинел спрема адава анав со пхиравела. 17 Соске, ало о време те почминел о судибе хем адава таро е Девлескоро кхер. А ако о судибе почминела амендар, тегани со ка овел околенцар со нане послушна е Девлескере шукар хабереске? 18 „Хем ако е праведно манушеске тано пхаро те спасинел пе, тегани со ка овел е лошно манушеа хем е грешникоја?“ 19 Адалеске, окола со цидена муке башо адава со керена е Девлескири волја, нека ден* пумаро живото е верно Створителеске хем понадари да нека керен шукарипе.

5 Адалеске со ме да сиум старешина хем сведоко е Христосескере мукенге, хем ме да ка добинав и слава со ка овел открими, поттикнинава е старешинен сој машкар туменде: 2 овен пастирија е Девлескере стадоске сој туменге дендо те грижинен тумен леске аѓаар со ка служинен сар надгледникија. Ма керен ле адава силаја, него доброволно, соске о Девел аѓаар мангела. Ма керен ле адава адалеске со мангена те добинен нешто ко нечесно начин, него керен ле адава цело вилеа. 3 Ма господаринен упро окола со припадинена е Девлеске, него овен пример е стадоске. 4 А кеда ка појавинел пе о главно пастири, ка добинен и круна тари слава која со на распадинела пе.

5 Аѓаар тумен да, о терне мурша, овен подложна е попхуре муршенге.* А сарине понашинен тумен јекх јекхеа понизно,* соске о Девел противинела пе околенге сој горда, а е понизна манушенге сикавела пло шукарипе со на заслужинаја ле.

6 Адалеске, овен понизна тело е Девлескоро моќно вас те шај ов те ваздел тумен кеда ка авел време, 7 хем са тумаре секирацие фрден леске, соске ов грижинела пе туменге. 8 Размислинен трезвено хем пазинен! Тумаро душмани, о Бенг, пхирела акари-окори сар лави кова со викинела хем родела некас те хал. 9 А тумен противинен тумен леске, ачховен зорале ки вера, соске џанена кај о иста муке трпинена лен тумаре пхраља да ко цело свето. 10 Ама, откеда хари ка циден муке, о Девел кова со ко секова начин сикавела пло шукарипе со на заслужинаја ле, кова со викинѓа тумен те овен ко јекхипе е Христосеа хем те добинен вечно слава, ов целосно ка обучинел тумен. Ов ка керел тумен зорале, ка поможинел туменге те ачховен верна хем ка керел те терѓовен цврсто. 11 Лескири тани и моќ засекогаш. Амин.

12 Преку о Силван,* коле со дикхава сар верно пхрал, пишинѓум туменге кратко писмо те шај те охрабринав тумен хем те уверинав тумен кај о Девел чаче сикавѓа туменге пло шукарипе со на заслужинаја ле. Цврсто икерен тумен ко адава шукарипе. 13 Поздравинела тумен окоја сој ко Вавилон,* сој тани бирими сар тумен со сиен, хем о Марко мло чхаво. 14 Мангипаја ресен тумен јекх јекхеа.*

Нека овел мир саринен тумен со сиен ко јекхипе е Христосеа.