ДУЈТО ПИСМО Е ПЕТАРЕСКОРО

1 Ме о Симон Петар, со сиум робо хем апостоли е Исус Христосескоро, пишинава џи туменде кола со преку и праведност амаре Девлескири хем амаре Спасителескири е Исус Христосескири, добинѓен о скапоцена чачутне сикљојба, кола со добинѓем амен да:

2 О Девел нека сикавел туменге панда повише пло шукарипе со на заслужинаја ле хем нека дел тумен панда побаро мир аѓаар со шукар ка пенџарен е Девле хем е Исусе, амаре Господаре. 3 Преку е Девлескири моќ амен сар поклон добинѓем са адава со ваљани аменге те шај те живина хем те шај те служина леске цело вилеа, адалеске со шукар пенџарѓем е Девле, кова со викинѓа амен преку пли слава хем пло шукарипе. 4 Акале буќенцар о Девел денѓа амен сар поклон о скапоцена хем о бут шуже ветувања, те шај преку ленде тумен да те овен духовна суштествија сар сој о Девел, соске нашлен таро румиме буќа акале светоскере, кола со авена таро погрешна желбе.

5 Адалеске, ден тумендар са ки тумари вера те додајнен о шукарипе, ко шукарипе о пенџарибе е чачипаскоро, 6 ко пенџарибе е чачипаскоро и самоконтрола, ки самоконтрола и истрајност, ки истрајност о служибе е Девлеске цело вилеа, 7 ко служибе е Девлеске цело вилеа о пхраликано мангипе, ко пхраликано мангипе о мангипе спрема са о мануша. 8 Соске, ако иси тумен акала буќа ки туменде хем сикавена лен ки бари мера, тегани нане те овен бизи бути хем нане те овен сар каш кова со на дела плодија, соске шукар пенџарѓен амаре Господаре е Исус Христосе.

9 Соске, ако некас нане ле акала буќа, ов тано короло, пхандела пле јакхја англи светлина* хем бистрела кај о Девел чистинѓа ле таро лескере пуране гревија. 10 Адалеске, пхраљален, панда повише трудинен тумен те ачховен машкар околенде со о Девел викинѓа хем биринѓа, соске ако сикавена адала особине, тумен никогаш нане те перен. 11 Уствари, ко асавко начин дарежливо ка дел пе туменге прилика те кхувен ко вечно Царство амаре Господарескоро хем Спасителескоро, е Исус Христосескоро.

12 Адалеске ме секогаш ка сетинкерав тумен ко акала буќа, иако тумен џанена лен хем сиен цврсто увериме ко чачипе со прифатинѓен. 13 Ама мислинава кај ка овел шукар, са џикоте сиум ко акава тело,* те сетинкерав тумен те шај те ачховен џангавде, 14 соске џанава кај панда хари ка мукхав акава тело, сар со јасно сикавѓа манге хем амаро Господари о Исус Христос. 15 Ме понадари да ка дав мандар са, те шај откеда ка џав манге, тумен те сетинен тумен ко са акала буќа.

16 Амен на вакерѓем туменге баши сила хем и присутност амаре Господарескири е Исус Христосескири спрема несаве ховавне парамиса кола сој шукар измислиме, него адалеске со амаре јакхенцар дикхлем лескири бари слава. 17 Соске, ов приминѓа и чест хем и слава таро Девел, о Дад, кастар со авела и бари слава, кеда вакерѓа леске акала лафија: „Акава тано мло чхаво, мло мангло, кова со керела ман радосно“. 18 Амен шунѓем акала лафија, кола со але таро небо кеда сием сине леа ки свето планина.

19 Адалеске амен сием поувериме кај о пророштвија чаче ка исполнинен пе, хем тумен шукар керена со пазинена ко адала пророштвија. Ко тумаре виле, акала пророштвија мора те овен сар јекх лампа која со светинела ко темно тхан. Керен адава са џикоте на пхравѓола о диве хем на појавинела пе и сабалутни ѕвезда.* 20 Соске, тумен најангле џанен акава: нијекх пророштво таро Списија на авела таро некаскоро лично размислибе. 21 Соске, нијекх пророштво на сине вакердо адалеске со адава мангља о мануш, него о мануша вакерена сине о лафија со авена таро Девел аѓаар сар со водинела* лен сине е Девлескири сила.*

2 Ама, машкар о израелско народо исто аѓаар сине ховавне пророкија хем машкар туменде да ка овен ховавне учителија. Ола, бизо те приметинел пе, ка анен секте* кола со ка уништинен тумари вера хем нане те признајнен е газда кова со кинѓа лен, хем адава себепи ола сигате ка овен уништиме. 2 Освен адава, бут мануша ка џан пало ленгоро безобразно понашибе* хем ленгоро себепи ка керел пе лошно лафи башо друмо е чачипаскоро. 3 Исто аѓаар, адалеске сој тане алчна ола ка дикхен те искористинен тумен ховавне лафенцар. Ама и осуда баши ленде која со о Девел анѓа ла панда бут време англедер на каснинела хем ленгоро уништибе на совела.

4 Чаче, о Девел на мукхља бизи казна е ангелен кола со грешинѓе, него фрдинѓа лен ко тартар,* пханља лен синџиренцар* ки густо темница коте со аџикерена те овен судиме. 5 Хем на мукхља бизи казна е свето да таро е Ноескоро време, ама спасинѓа е Ное кова со проповединела сине баши праведност хем ефта јаверен кеда анѓа потоп хем уништинѓа о свето со сине пхердо лошна манушенцар. 6 Освен адава, ов осудинѓа о дизја Содом хем Гомор аѓаар со целосно тхарѓа лен, са џикоте на ачхило лендар само право. Аѓаар сикавѓа е лошна манушенге со ка случинел пе ленге. 7 А ослободинѓа е праведно мануше е Лоте, кова со бут мучинела пе сине себепи о безобразно понашибе* е лошна манушенгоро, 8 соске диве пало диве, акава праведно мануш мучинела сине пли праведно душа* адалеске со дикхела сине хем шунела сине лошна буќа со керена сине акала мануша џикоте живинела сине машкар ленде. 9 Значи, о Јехова* џанела сар те спасинел таро искушение е манушен сој тане верна леске, а околен сој неправедна икерела лен башо диве кеда ка овен судиме те овен уништиме, 10 а посебно околен со мангена те мељарен е јаверенгоро тело хем со дикхена сар потеле пестар околен со иси лен авторитети.

Ола тане дрска хем тврдоглава, на дарана те керен лошно лафи таро окола коленге со о Девел сикавѓа чест. 11 А о ангелија, иако тане посилна хем помоќна лендар, на осудинена асавкен хем на вреџинена лен адалеске со поштујнена е Јехова.* 12 Ама акала мануша, сој тане сар неразумна животне, кола со постапинена спрема о инстинкт хем тане бијаме те овен астарде хем мударде, керена лафи башо буќа кола со на хаљовена лен. Ленгоро лошно понашибе ка ингарел лен џи ко уништибе. 13 Ола ка овен уништиме себепи пумаре лошна постапке.

Ола уживинена те задоволинен пумаре телесна желбе, хем адава керена ле чак сред диве. Ола тане сар флеке хем мелалипе машкар туменде. Џикоте хана хем пиена туменцар, ола уживинена те преваринен е јаверен пумаре ховавне сикајбаја. 14 Ленгере јакхја тане пхерде прељубаја хем нашти те чхинавен те грешинен. Астарена ки замка околен со иси лен слабо вера.* Ленгоро вило тано сикло те овел алчно. Ола тане чхаве сој денде арман. 15 Мукхле о право друмо хем сине ховавде. Геле пало е Валаамескоро друмо, о чхаво е Веорескоро, кова со мангља и награда со ваљани сине те добинел ла башо пле лошна постапке, 16 ама сине укоримо адалеске со гело против адава сој исправно. Лескири херни, јекх животно кова со нашти те керел лафи, керѓа леа лафи манушикане гласоја хем чхинавѓа е пророко те керел делинипе.

17 Адала мануша тане сар изворија бизо пани хем облакија бизо пани кола сој ингарде тари силно бавлал. Лен аџикерела лен и најкали темница. 18 Ола вакерена баре лафија, ама адала лафија тане чуче. Преку о телесна желбе хем пумаре безобразно понашибаја,* ола астарена ки замка околен со само со нашле таро мануша кола со керена погрешна буќа. 19 Ветинена ленге слобода, а коркори ола тане робија е гревоске. Соске, секој тано робо околеске со иси ле власт упри лесте. 20 Чаче, ако ола, откеда шукар пенџарѓе е Господаре хем е Спасителе е Исус Христосе хем аѓаар нашле таро мелалипе акале светоскоро, палем мешинена пе ко акала буќа хем акала буќа контролиринена лен, тегани овела ленге полошно него англедер те пенџарен о чачипе. 21 Ленге ка овел сине пошукар те на пенџарен сине целосно о праведно друмо, него те пенџарен ле, а пало адава те циден пе таро света заповедија со добинѓе лен. 22 Адава со уло ленге сикавела кај тано чаче адава со вакерена: „О џукел иранела пе ко адава со чхадља хем о бало со сине нанѓардо палем иранела пе ки чик те валкајнел пе“.

3 Мангле пхраљален, акава тано више о дујто писмо кова со пишинава туменге хем, исто сар ко прво, ко акава да писмо поттикнинава тумен те користинен тумари способност јасно те размислинен аѓаар со сетинкерава тумен ко адава со више џанена, 2 те шај те сетинен тумен ко лафија со вакерѓе* лен о света пророкија хем ко заповедија таро Господари хем Спасители, кова со денѓа лен преку тумаре апостолија. 3 Најангле, џанен акава: ко последна диве ка појавинен пе мануша кола со ка асан башо адава сој шукар хем ка керен лошна буќа кола сој спрема ленгере желбе 4 хем ка вакерен: „Кај тани лескири присутност со ветинѓа ла? Панда откеда муле амаре парапапија, са о буќа ачхиле иста сар со сине ко време кеда о Девел керѓа е манушен“.

5 Ола намерно на прифатинена о чачипе кај о небо постојнела сине бут време англедер хем кај и пхув цврсто терѓола сине упредер о пани хем машкар о пани преку е Девлескоро лафи. 6 Аѓаар, адава свето сине уништимо кеда о пани учхарѓа цели пхув. 7 Преку адава исто лафи, о небо хем и пхув со авдиве постојнена, тане одредиме те овен уништиме јагаја хем аракхена пе са џи ко диве кеда ка овен судиме хем уништиме о лошна мануша.

8 Мангле пхраљален хем пхењален, ма бистрен кај е Јеховаске* јекх диве тано сар 1.000 берша, а 1.000 берша тане сар јекх диве. 9 О Јехова* на каснинела те керел адава со ветинѓа, сар со несаве мислинена кај каснинела, него ов тано стрпливо туменцар, соске на мангела никој те овел уништимо, него мангела саринен те овел лен прилика те каинен пе. 10 Ама е Јеховаскоро* диве ка авел сар чор. Хем ко адава диве, о небо ка нашавѓовел јекхе силно звукоја, о буќа сој тане ко небо хем ки пхув ка тхабљон хем ка овен уништиме, и пхув хем о буќа сој керде ки лате ка овен откриме.

11 Адалеске со са акала буќа ка овен уништиме ко асавко начин, размислинен башо адава саве мануша ваљани те овен. Тумаре постапке нека овен света хем нека сикавен кај тумен сиен верна е Девлеске ко са, 12 џикоте аџикерена* хем секогаш иси тумен ки годи е Јеховаскоро* диве. Ко адава диве о небо ка овел уништимо јагаја, хем о буќа сој ко небо хем ки пхув ка топинѓовен ки бари јаг. 13 Ама сар со ветинѓа ов, аџикераја нево небо хем неви пхув коте со ка живинел и праведност.

14 Мангле пхраљален хем пхењален, адалеске со аџикерена акала буќа, ден тумендар са те шај ко крајо англо Девел те овен чиста, бизи маана хем ко мир. 15 А ки стрпливост амаре Господарескири дикхен сар спасение, сар со пишинѓа туменге хем амаро мангло пхрал о Павле спрема и мудрост која сој леске денди. 16 Ов керела лафи башо акала буќа ко са пле писмија. Ама ко адала писмија иси буќа со пхаре хаљовена пе, буќа со превртинена лен окола со на хаљовена лен хем сој слаба ки вера, сар со керена е јавере да делонцар таро Списија, хем адава ка анел ола те овен уништиме.

17 Мангле пхраљален, адалеске со англедер џанена акала буќа, пазинен те на ховавен тумен адала лошна мануша пле ховајбаја хем те на нашавен тумари одлучност те ачховен ко исправно друмо. 18 Ама надинава ман кај ка добинен панда повише о шукарипе со на заслужинаја ле амаре Господарескоро хем Спасителескоро е Исус Христосескоро хем кај са пошукар ка пенџарен ле. Ов нека овел славимо акана хем засекогаш. Амин.