Која тани е Девлескири волја?
О Девел мангела те ова бахтале хем те џивдина засекогаш ко рај ки Пхув!
Шај пучеа ту: ‚Сар шај адава те овел?‘ И Библија вакерела кај е Девлескоро Царство шај те керел адава, хем е Девлескири волја тани са о мануша те сикљон башо адава Царство хем те џанен која тани лескири намера аменцар (Псалм 37:11, 29; Исаија 9:7).
О Девел мангела аменге о најшукар.
Сар јекх шукар дад со мангела пле чхавенге о најшукар, аѓаар амаро Дад о Јехова мангела амен те ова бахтале засекогаш (Исаија 48:17, 18). Ов ветинѓа кај окола со ка ‚керен лескири волја ка џивдинен засекогаш‘ (1. Јованово 2:17).
О Девел мангела те џа пало лескоро друмо.
И Библија вакерела кај о Јехова мангела те ‚сикавел амен башо лескоро друмо‘ те шај те џа пало лесте (Исаија 2:2, 3). Ов кхединѓа ‚народо башо пло анав‘ те шај те вакерен лескири волја ки цело Пхув (Дела 15:14).
О Девел мангела сложно те служина леске.
Окола со служинена е Јеховаске тане сложна хем искрено мангена пе (Јован 13:35). Кој авдиве ки цело Пхув сикавела е манушен те служинен сложно е Девлеске? Акаја брошура ка поможинел ту те џане.