Соске ваљани поодориг да те сикљове башо Јехова?

1. Соске тано шукар поодориг да те сикљове тари Библија?

Адава со тари акаја брошура сиклиљан о основна буќа со сикавела и Библија, сигурно керѓа побутер те манге е Јехова. Ама, адава мангипе мора поодориг да те бајраре ле (1. Петрово 2:2). Тли надеж башо вечно џивдипе зависинела таро адава дали ка ове са попаше е Девлеа аѓаар со ка сикљове таро лескоро Лафи, и Библија. Читин Јован 17:3; Јуда 21.

Кобор побутер пенџареа е Јехова, добором побари ка овел тли вера. И вера ка поможинел ту те кере адава со родела о Девел (Евреите 11:1, 6). Ка поттикнинел ту те кајне ту хем те кере промене ко тло џивдипе. Читин Дела 3:19.

2. Сар шај те поможине јаверенге адалеа со сиклиљан башо Девел?

Сарине мангаја те вакера о шукар буќа со џанаја лен. Адалеске, сигурно ка манге ту да те вакере јаверенге башо адава со сиклиљан. Џикоте поодориг сикљовеа тари Библија, ка хаљове сар шај те користине ла те шај те објаснине соске верујнеа ко Јехова хем кова тано о шукар хабери. Читин Римјаните 10:13-15.

Бут џене амендар најангле вакерге о шукар хабери пле фамилијаке хем амаленге. Ама, шукар ка овел те пазине сар ка кере ленцар лафи. Наместо те вакере ленге кај ленгири религија нане шукар, вакер ленге о шукар буќа со ветинела о Девел. Исто аѓаар, те овел ту ки годи кај о мануша побутер дикхена со кереа, а на со вакереа. Читин 2. Тимотеј 2:24, 25.

3. Кобор паше шај те ове е Девлеа?

Ако проучинеа и Библија, духовно ка бајрове. Сар со накхела о време, ка ове бут паше е Јеховаја хем ка ове дело тари лескири фамилија. Читин 2. Коринќаните 6:18.

4. Сар шај поодориг да духовно те бајрове?

Шај духовно те бајрове ако поодориг да сикљовеа тари Библија (Евреите 5:13, 14). Пуч јекхе таро е Јеховаскере сведокија те проучинел туја и Библија е лилеа Со сикавела амен и Библија? Кобор побутер сикљовеа тари Библија, добором побахтало ка ове. Читин Псалм 1:1-3; 73:27, 28.

О шукар хабери авела таро Јехова, о бахтало Девел. Ка ове паше леа ако уљан паше лескере народоја (Евреите 10:24, 25). Ако поодориг кереа адава со о Јехова мангела ка шај те добине о чачутно џивдипе — о вечно џивдипе. И најшукар бути со шај те кере тани те ове паше е Девлеа. Читин 1. Тимотеј 1:11; 6:19.