О Израелција денѓе ветување е Јеховаске

Околу дуј масек откеда геле песке таро Египет, о Израелција ресле џи ки планина Синај хем пхравѓе песке шаторија. О Мојсеј сине ки планина хем о Јехова вакерѓа леске: „Ме спасинѓум е Израелцон. Ако шунена ман хем ако икерена ме законија, ка овен мло посебно народо“. Кеда о Мојсеј иранѓа пе теле ко мануша вакерѓа ленге адава со вакерѓа леске о Јехова. Сар реагиринѓе? Сарине вакерѓе: „Ка кера са со ка вакерел аменге о Јехова“.

О Мојсеј палем уклило ки планина. Адари о Јехова вакерѓа леске: „Пало трин диве, палем ка керав туја лафи. Вакер е народоске те на уклел упре ки планина Синај“. Пало адава, о Мојсеј хулило теле ко Израелција хем вакерѓа ленге те овен спремна соске ка шунен е Јеховаскоро гласо.

Пало трин диве, о Израелција дикхле темно облако упри планина, а исто аѓаар дикхле хем шунѓе звукија таро громија хем гласо тари шинг. Тегани о Јехова ало ки планина сар јаг. О Израелција тресинена сине тари дар. Цело планина почминѓа те тресинел хем сине учхарди чуро. О звуко тари шинг овела сине са посилно хем посилно. Тегани о Девел вакерѓа: „Ме сиум о Јехова. На смејнена те служинен јавере девленге“.

О Мојсеј палем гело ки планина хем о Јехова денѓа ле законија е манушенге сар ваљани те служинен леске хем сар те понашинен пе. О Мојсеј пишинѓа акала законија хем читинѓа лен е Израелцонге. Сарине ола ветинѓе: „Амен ка кера са со вакерела аменге о Јехова“. Оја, ола денѓе лафи е Девлеске. Ама, дали керѓе адава со ветинѓе?