О Исус кеда сине ле дешудуј берш

О Јосиф хем и Марија живинена сине ко Назарет заедно е Исусеа хем ленгере јавере чхавенцар. О Јосиф грижинела пе сине пе фамилијаке адалеа со керела сине бути сар столари хем сикавела сине пле фамилија башо Јехова хем башо лескоро Закони. Ола редовно џана сине ки синагога те обожавинен е Јехова, хем секова берш џана сине ко Ерусалим те славинен и Пасха.

Кеда е Исусе сине ле 12 берш, лескири фамилија цидинѓа баро друмо џи ко Ерусалим. И диз сине пхерди манушенцар со але те славинен и Пасха. Пало празнико, о Јосиф хем и Марија цидинѓе те џан песке кхере. Ола мислинѓе кај о Исус тано ленцар ки адаја група. Ама, кеда дикхле кај нане машкар ленгири фамилија, почминѓе те роден ле.

Тегани, о Јосиф хем и Марија иранѓе пе ко Ерусалим, хем трин диве родинѓе пе чхаве. Ко крајо, аракхле ле ко храми. Адатхе о Исус бешела сине машкар о учителија, шунела сине шукар хем пучела лен сине пхаре пучиба. О учителија сине изненадиме таро Исус аѓаар со почминѓе ола да те пучен ле пучиба. Ола сине воодушевиме таро лескере одговорија. Шај сине јасно те дикхен кај о Исус шукар хаљола е Јеховаскоро закони.

О Јосиф хем и Марија сине бут секириме. И Марија вакерѓа: „Мо чхаво, сегде родинѓем тут! Кај сиан сине?“ О Исус одговоринѓа: „На џанена ли сине кај ме ваљани те овав ко кхер ме Дадескоро?“

О Исус иранѓа пе кхере пе родителенцар. О Јосиф сикавела сине е Исусе те овел шукар столари. Со мислинеа, саво сине о Исус џикоте сине терно чхаво? Џикоте бајрола сине, о Исус овела сине са помудро, хем бут мангена ле сине о Девел хем о мануша.