И ромни ко бунари

Пали Пасха, о Исус хем лескере ученикија иранѓе пе ки Галилеја преку и Самарија. Паше узи диз Сихар, о Исус ачхило ко бунари е Јаковескоро. Џикоте одморинела пе сине, лескере ученикија геле ки диз те кинен хајбаске.

Пало несаво време, ко бунари али јекх ромни те пхерел пани. О Исус вакерѓа лаке: „Де ман хари пани“. Ој вакерѓа леске: „Соске кереа манцар лафи кеда џанеа кај ме сиум Самарјанка? О Евреија на керена лафи е Самарјаненцар“. О Исус пхенѓа лаке: „Те џане сине кој сиум ме, ту ка роде сине мандар пани хем ме ка дав тут сине пани со дела живото“. Ој пучља ле: „Сар мислине? Нане тут ни кофа те икале пани“. О Исус вакерѓа лаке: „Секој со ка пиел таро пани со ме дава ле никогаш повише нане те овел жедно“. Тегани и ромни пхенѓа: „Господаре, де ман таро адава пани“.

О Исус вакерѓа лаке: „Викин те роме те авел“. Ој пхенѓа: „Нане ман ром“. О Исус вакерѓа лаке: „Оја. Панџ пути сиан сине женими, а акана живинеа манушеа со на сиан ко брако“. И ромни вакерѓа: „Дикхава кај сиан пророко. Мло народо верујнела кај шај те служина е Девлеске ки акаја планина, ама о Евреија вакерена кај мора те служина леске ко Ерусалим. Ама ме верујнава кеда ка авел о Месија, ов ка вакерел аменге сар те служина е Девлеске“. Тегани о Исус вакерѓа нешто со на вакерѓа никаске: „Ме сиум о Месија“.

И ромни гели сигате ки диз хем вакерѓа е Самарјаненге: „Мислинава кај аракхљум е Месија. Џанела са баши манде. Авен те дикхен!“ Ола геле лаја ко бунари, хем адари о Исус почминѓа те сикавел лен.

О Самарјанија викинѓе е Исусе те ачхол ки ленгири диз. Ов ачхило адари дуј диве хем поучинела сине е манушен, хем бут џене верујнѓе ки лесте. Ола вакерѓе е Самарјанкаке: „Акана, кеда шунѓем со вакерела акава мануш, џанаја кај ов тано адава со ка спасинел о свето“.