О Исус керела сине бут чудија

О Исус ало теле ки Пхув те проповединел башо е Девлескоро Царство. Те шај те сикавел со ка керел о Исус сар Цари, о Јехова денѓа ле свети дух те керел чудија. Ов шај сине те сасљарел са о насвалипа. Било кај те џал, ки лесте авена сине насвале мануша, хем ов сасљарела лен сине. О короле шај сине те дикхен, о кашуке те шунен, о сакатија те пхирен, хем сасљарела сине околен со сине лен демонија ки ленде. Чак кеда пипинена сине лескере шеја, о мануша сасљона сине. О мануша џана сине пало Исус било кај те џал. Чак кеда мангела сине те овел коркори, о Исус поможинела сине е манушенге.

Јекх пути, џикоте о Исус сине ко јекх кхер, о мануша анѓе јекхе парализириме мануше. Ама, ола нашти сине те ингарен е мануше андре ко кхер соске сине бут гужва. Адалеске керѓе дупка ко крови те шај адатхар те мукхен ле. Тегани о Исус пхенѓа леске: „Ушти хем џа“. О мануш уштило, хем о народо сине воодушевимо.

Ки јекх јавер прилика, џикоте о Исус кхувела сине ко јекх гав, 10 мануша со сине насвале тари лепра терѓовена сине подур лестар хем викинена сине: „Исус, поможин амен!“ Ко адава време, о лепрозна мануша на смејнена сине те авен попаше узо јавера. Адале деше манушенге о Исус вакерѓа те џан ко храми. Според е Јеховаскоро закони, аѓаар ваљани сине те керел секој со ка сасљол тари лепра. Ола цидинѓе хем, џикоте панда сине ко друмо, састиле. Кеда халило кај састило, јекх таро адала деш мануша иранѓа пе ко Исус те благодаринел пе леске хем те славинел е Девле. Иако о содеш састиле, само јекх ало те благодаринел пе е Исусеске.

Јекх ромни со сине 12 берш насвали, бут мангела сине те сасљол. Џикоте о Исус сине машкар о мануша, ој али палалдан хем пипинѓа лескири наметка. Ко исто моменти, састили. Тегани о Исус пучља: „Кој пипинѓа ман?“ И ромни дарандили, ама али англи лесте хем вакерѓа леске со керѓа. О Исус утешинѓа ла хем вакерѓа лаке: „Ми чхај, џа хем нека овел тут мир“.

Јекх важно мануш со викинела пе сине Јаир замолинѓа е Исусе: „Молинава тут, ава ки манде! Ми чхај тани бут насвали“. Ама, англедер о Исус те ресел адари, и чхај мули. Кеда ресља англо е Јаирескоро кхер, дикхља сар бут мануша ровена е чхајаке. О Исус вакерѓа ленге: „Ма ровен — ој само совела“. Тегани астарѓа е чхаја таро вас хем вакерѓа: „Чхае, ушти!“ Е Јаирескири чхај уштили одма. О Исус вакерѓа лакере родителенге те ден ла нешто те хал. Шај ли те замислине туке кобор ола сине радосна?