Дали џанљан?

Сар сине организиримо о патујбе бродеа ко прво веко?

КО ВРЕМЕ е Павлескоро ки глобала на постојнена сине бродија кола со пренесинена сине само патникија. Те шај те патујнен бродеа, о патникија мора сине те пучен дали иси товарно броди кова со џала џи ко тхан коте со мангена те џан хем дали приминела патникија (Дела 21:2, 3). О патникија понекогаш уклена сине ко бродија кола со на ингарена лен сине директно џи ко тхан коте со мангена те џан. О бродија ачховена сине ко различна пристаништа, хем аѓаар о патникија шај сине те роден јавер броди кова со ка ингарел лен попаше узо тхан коте со мангена те џан (Дела 27:1-6).

Ко адава време о бродија патујнена сине само одредено периоди таро берш, хем на сине лен точно распоред башо патујбе. О морнарија кола со сине суеверна на откажинена сине о патујбе само башо лошно време, него исто аѓаар башо несаво лошно знако, сар на пример, ако шунена сине гавранескоро гласо кова со терѓола сине ко шеле е бродескере или ако дикхена сине ко брего котора таро уништимо броди. Е морнаренге бут поможинела сине и бавлал која со пхудела сине ко правцо коте со мангена те џан. Адалеске, кеда ка пхудел сине асавки бавлал, ола одма цидена сине таро пристаниште. Откеда ка аракхел броди коте со шај те уклел, о патнико аџикерела сине пле багажеа ко пристаниште са џикоте на шунела те вакерен кај о броди цидела.

О историчари Лајонел Касон вакерела: Ко Рим сине локхо начин о мануша те аракхен броди патујбаске. Адалеске, на ваљани сине ола коркори те роден песке броди. Лескоро пристаниште сине ко тхан коте со и река Тибар икљовела сине ко море. Паше узи лесте сине и диз Остија. Ки лате сине баро плоштад коте со сине претставништва таро фирме со ингарена роба броденцар. Ола сине таро разна дизја: таро Нарбон [ки авдисутни Франција], тари Картагина [ко авдисутно Тунис]... хем јавера. Ако мангела сине некој те патујнел негде бродеа, ваљани сине само те џал ко претставништва хем те аракхел броди кова со џала џи ко тхан коте со мангела те џал“.

О патујбе преку море штединела сине време е патниконге, ама сине несаве ризикија да. На пример, некобор пути о Павле доживинѓа бродолом ко пле мисионерска патујба (2. Кор. 11:25).