Трудин тут понадари да те кере пошукар и служба
1. Кола примерија таро прво веко сикавена аменге кај ваљани те ова са пошукар ки служба?
1 Е Јеховаскере слуге ваљани те трудинен пе те керен са пошукар хем пошукар и служба. Адалеске о Исус сикавѓа пе ученикон сар шај пошукар те проповединен (Лука 9:1-5; 10:1-11). Исто аѓаар, о Акила хем и Прискила викинѓе ки песте е Аполо те шај ‚поточно те вакерен леске башо е Девлескоро дром‘ (Дела 18:24-26). Тари исто причина, о Павле охрабринѓа е Тимотее, кова со сине искусно ки служба, понадари да те трудинел пе те керел пошукар и служба, те шај лескоро „напредок те дикхен сарине“ (1. Тим. 4:13-15). Бизи разлика кобор време проповединаја о шукар хабери, сарине амен ваљани те ова са пошукар ко проповедибе.
2. Сар шај те сикљова е јаверендар?
2 Сикљов е јаверендар: Јекх начин сар те ова са пошукар ки служба тано те сикљова таро јавера (Изр. 27:17). Адалеске, дикх сар о јавера објавителија керена лафи ки служба. Роде советија таро окола со и шукар ки служба, хем шун лен шукар саве советија ка ден тут (Изр. 1:5). Со те кере ако туке пхаро те почмине библиско студија или те кере повторна посете? Ма аџикер, него џа пуч е пхрале со водинела тли група или јекхе искусно објавителе те поможинел тут. Исто аѓаар, ма бистре редовно те молине ту башо свети дух, соске о Јехова шај те поможинел тут те ове пошукар ки служба (Лука 11:13).
3. Сар те реагирина кеда добинаја совет со на родинѓем ле?
3 Ако добинѓан совет со на родинѓан ле, ма хољан (Проп. 7:9). Исто сар о Аполо, прифатин о совет аѓаар со ка ове понизно хем благодарно. Ако кереа акава, ка сикаве кај сиан мудро (Изр. 12:15).
4. Соске о Исус вакерѓа те ова пошукар ки служба?
4 Ов пошукар ки служба те шај те славине е Девле: Јекхе споредбаја, о Исус охрабринѓа пе ученикон те овен пошукар ки служба. Ов спорединѓа песте јекхе дракхаја, а пе помазана ученикон гранкенцар. Ов вакерѓа кај лескоро Дад ка чистинел секоја гранка ‚те шај те дел побутер плоди‘ (Јован 15:2). Исто сар јекх мануш со мангела лескири дракх те дел побутер плоди аѓаар о Јехова да мангела амен те да побутер „плоди таро амаро муј“ (Евр. 13:15). Кова тано о резултати кеда оваја пошукар ки служба? О Исус вакерѓа аменге о одговор: „Мо Дад прославинела пе ако анена бут плоди“ (Јован 15:8).