Трудин ту те кере ученикија
1. Со ваљани те кера те шај о мануша те спасинен пе?
1 Таро извештај баши служба башо 2014 берш, дикхјола пе кобор е Девлескере слуге ревно хем одлучно проповединена о шукар хабери башо Царство (Мат. 24:14). Е службаја таро кхер ко кхер, е посебно акциенцар кеда делинаја трактатија хем покане, хем е сведочибаја ко прометна тхана, амен проповединаја о хабери тари Библија буте манушенге сар никогаш поангле. Ама, те шај те спасинен пе о мануша, амен ваљани те поможина ленге те овен ученикија е Исусескере аѓаар со ка проучина ленцар и Библија (1. Тим. 2:4).
2. Кола пучиба шај те поможинен амен те ова секогаш спремна те нудина библиско студија?
2 Ов секогаш спремно те нудине библиско студија: Кеда некој сикавела интерес, дали трудинеа ту те пуче ле башо лескоро телефонско број или адреса? Дали пало кратко време џаја ки лесте те шај те почмине библиско студија? Дали кеда сведочинѓан прво пути некаске трудинѓан ту те сикаве леске сар проучинела пе и Библија? Кеда последно пути нудинѓан библиско студија околенге со редовно ингареа ленге о списанија? Дали сикавѓан о видеоклипија Соске те сикљове тари Библија? хем Сар шај те сикљове тари Библија? те колегенге, соучениконге, комшиенге, фамилијаке хем јаверенге со џанеа лен? Кеда проповединеа е количкаја баши литература, ако некој леља нешто читибаске, дали вакереа леске кај шај бизо лове те проучинел и Библија?
3. Со ваљани те шај шукар те сикава е манушен башо чачипе?
3 О Јехова хем о Исус ка поможинен ту: Адава со о Исус вакерѓа „џан хем керен ученикија“, сикавела кај ваљани те трудина амен хем те ла иницијатива. Ама, ов на мукхља амен коркори, него вакерѓа кај ка овел аменцар (Мат. 28:19, 20). О Јехова, исто аѓаар, дела амен по свети дух, бут публикацие, хем сикавела амен сар шај те сикава е манушен башо чачипе (Зах. 4:6; 2. Кор. 4:7). Шај те молина амен о Јехова те поможинел аменге те манга те кера акаја важно бути (Фил. 2:13).
4. Соске ваљани те трудина амен те кера ученикија?
4 Адава со проповединаја о шукар хабери керела амен бахтале. Ама, бут побахтале сиам кеда сикаваја некас о чачипе хем поможинаја леске те овел ов да аменцар ко „друмо со ингарела ко џивдипе“ (Мат. 7:14; 1. Сол. 2:19, 20). Со и панда поважно, кеда трудинаја амен те кера ученикија, кераја е Јехова бахтало соске ов ‚на мангела никој те овел уништимо него саринен те овел лен прилика те кајнен пе‘ (2. Пет. 3:9).