Пучиба

◼ Ваљани ли о објавителија те користинен Интернет те шај те сведочинен или те проучинен манушенцар со на пенџарена лен тари јавер пхув?

Несаве објавителија користинена Интернет те проучинен несаве манушенцар таро пхувја коте тано забранимо те проповединел пе или коте со иси хари објавителија. Несаво пути акава начин иси ле шукар резултатија. Ама, шај те овел опасно кеда о објавителија преку имејл или чет-рум контактиринена некасаја со на пенџарена ле. (Дикх ки Амари служба башо Царство таро јули 2007 берш, 3 стр.) Иако амари цел тани те вакера е искрена манушенге о хабери башо Царство, преку акава начин несаво пхрал или пхен шај те авел ко контакт лошно друштвоја или отпадниконцар (1. Кор. 1:19-25; Кол. 2:8). Ко пхувја коте со о проповедибе тано ограничимо или забранимо, асавки комуникација шај те овел контролирими таро властија. Адава шај те анел џи ки опасност е пхрален хем е пхењен тари адаја пхув. Адалеске, о објавителија на ваљани преку Интернет те роден манушен тари јавер пхув хем те проповединен ленге о шукар хабери.

Кеда сведочинаја неформално некаске со ало ки посета тари јавер пхув, на ваљани понадари да те сведочина леске кеда ка иранел пе ки пли пхув, освен ако на добинаја несаве јавера упатствија тари подружница. Наместо адава, ка овел пошукар те сикава леске сар шај те користинел и jw.org те добинел побутер информацие или сар те авел ко контакт е подружницаја тари лескири пхув. Исто аѓаар, шај те охрабрина ле те џал ки дворана со и леске најпаше. Ама, ко несаве пхувја нане дворане. Ако мангела те посетинен ле е Јеховаскере сведокија, тегани ваљани те пхера о формулари Те молиме, посети го ова лице (S-43) хем те да ле е секретареске, а ов ка бичхалел ле преку jw.org. И подружница со и тани одговорно башо проповедибе ки пхув коте со џивдинела о мануш со интересинела пе, џанела о околностија адари хем ој најшукар џанела сар те поможинел леске. (Дикх ки Амари служба башо Царство таро јуни 2014 берш, 7 стр., хем Амари служба башо Царство таро ноември 2011 берш, 2 стр.)

Ако несаво мануш со моментално посетинаја ле селинела пе ки јавер пхув или ако моментално проучинаја некасаја со и тано тари јавер пхув а аракхљам ле преку Интернет, тегани ваљани те икера амен ко упатствија со и тане денде акате. Асавке манушеске понадари да шај те сведочина само џикоте на авела ко контакт е објавителенцар таро лескоро тхан. Ама, ако о мануш џивдинела ки пхув коте со и тано ограничимо или забранимо те проповединел пе, тегани мора бут те пазина кеда кераја лафи башо библиска теме преку писмо, телефони или електронски (Мат. 10:16).