Сар те реса џи ко вило е манушенгоро со сикаваја лен
1. Сар осетинѓе пе о мануша со шунѓе е Исусе кеда сикавела лен сине?
1 О Исус Христос ресела сине џи ко виле е манушенгере со шунела ле сине. Најхари ки јекх прилика, кеда о Исус објаснинѓа пе учениконге о света лила, ленгере виле „пхердиле“ (Лука 24:32). Адалеске со ваљани таро вило те овел пе послушно е Девлеске, сар шај те реса џи ко вило е манушенгоро те шај те поттикнина лен те керен промене ко пло џивдипе? (Рим. 6:17).
2. Соске ваљани те ова тактична хем прониклива кеда мангаја те реса џи ко вило е манушенгоро?
2 Ов тактично хем проникливо: Бут мануша нане те керен промене само ако вакерѓам ленге со и шукар а со и погрешно. Ако читинаја ленге бут стихија кола со сикавена кај адава со веруњена нане точно, тегани шај нане те манген те шунен амен. Те шај те поттикнина е манушен, прво ваљани те хаљова о причине соске веруњена ко несаве буќа хем соске керена лен. О тактична хем шукар бириме пучиба шај те охрабринен е манушен те вакерен пле најгаравде мисле (Изр. 20:5). Само тегани ка шај те бирина мисле или стихија тари Библија со ка ресен џи ко ленгоро вило. Исто аѓаар, ваљани те сикава кај чаче интересинаја амен ленге хем ваљани те ова стрплива (Изр. 25:15). Те овел амен ки годи кај секова мануш различно напредуњела духовно. Те мукха време е Јеховаскоро духо те влијањел ко адава сар размислинена хем со керена (Мар. 4:26-29).
3. Сар шај те поможина е интересентенге понадари да те сикавен шукар особине?
3 Поможин ленге понадари да те сикавен шукар особине: О библиска стихија со сикавена е Јеховаскоро шукарипе хем мангипе шај те поможинен е интересентенге понадари да те сикавен шукар особине. Шај те користина о стихија таро Псалм 139:1-4 или Лука 12:6, 7 те сикава козом о Јехова грижинела пе секаске амендар. Кеда о мануша таро вило ка ценинен е Јеховаскоро шукарипе со на заслужинаја ле, ленгоро мангипе ка бајрол хем ка манген те служинен леске (Рим. 5:6-8; 1. Јов. 4:19). Исто аѓаар, кеда ка хаљовен кај о буќа со керена лен влијањена упро Јехова, ола шај ка манген те керен адава со мангела ов (Пс. 78:40, 41; Изр. 23:15).
4. Кеда сиам ки служба, сар шај те сикава кај поштуњаја е манушенгоро право коркори те биринен со ка керен?
4 О Јехова никас на чхивела силаја те шунел ле. Наместо адава, ов сикавела аменге кобор тано шукар те кера адава со вакерела аменге ов (Иса. 48:17, 18). Амен ка ова сар о Јехова кеда ка сикава е манушен ко начин со ка поможинел ленге коркори те анен песке одлуке. Кеда некој ка уверинел пе кај ваљани те керел промене ко пло џивдипе, тегани о резултатија тане трајна (Рим. 12:2). Адава ка анел лен попаше е Јеховаја, кова со „испитинела о вило“ (Изр. 17:3).