ТЕ ЖИВИНА САР ХРИСТИЈАЊА
Амаре конгресија — прилике те сикава мангипе
Соске уживинаја добором бут ко амаре конгресија? Исто сар со сине ко празникија ко пурано Израел, ко конгресија иси амен прилика те обожавина е Јехова амаре пхраленцар хем пхењенцар. Адатхе добинаја бут шукар духовно храна која со поможинела аменге те ачхова паше е Јеховаја. Исто аѓаар, бахтале сием со шај те накхава време амаре амаленцар хем амаре фамилијаја. Адалеске со бут ценинаја амаре конгресија, мангаја те ова присутна ки ленде о сотрин диве.
Ко асавке прилике, кеда кхедаја амен заедно, на ваљани те мислина само ко адава со шај те добина амен, него хем ко адава сар шај амен те сикава мангипе е јаверенге (Га 6:10; Ев 10:24, 25). Кеда икераја о удар амаре пхралеске или пхењаке хем кеда астараја тхана само кобор со ваљани, сикаваја адалеа кај амен сием заинтересириме е јаверенге (Фп 2:3, 4). Ко конгресија иси амен прилика те кера неве амалипа. Англедер хем пали програма, хем ки пауза, шај те чхива аменге цел те запознајна неве амален (2Ко 6:13). Асавке амалипа шај те трајнен вечно! А сој најважно таро са, кеда о јавера ка дикхен о мангипе со владинела машкар аменде, шај ка манген ола да заедно аменцар те служинен е Јеховаске (Јвн 13:35).
ДИКХ О ВИДЕОКЛИПИ МЕЃУНАРОДНА КОНГРЕСИЈА „О МАНГИПЕ НИКОГАШ НА ЧХИНАВЃОЛА!“, А ПАЛО АДАВА ОДГОВОРИН КО АКАЛА ПУЧИБА:
Сар о пхраља хем о пхења сикавѓе мангипе е делегатенге таро јавера пхувја кола со але ко меѓународна конгресија ко 2019 берш?
Соске о јекхипе хем о мангипе ко е Јеховаскоро народо тано нешто посебно?
Кола буќа истакнинѓа о Водечко тело башо христијанско мангипе?
Сар шај те сикаве мангипе кеда сиан ко несаво конгрес?
Сар о чачутно мангипе керѓа те овен ко јекхипе амаре пхраља ки Германија хем ки Јужно Кореја?
Ко со ваљани те ова решиме?