Дали џанљан?
Соске сине шукар со о Јехова прифатинела сине сар жртва дуј различна врсте чирикља?
СПРЕМА о Закони, хем о грлице хем о гулубија шај сине те ден пе сар жртва е Јеховаске. Акала дуј чирикља секогаш спомнинена пе сине заедно ко закони башо жртве хем јекх израелцо шај сине те дел сар жртва било која лендар (3. Мој. 1:14; 12:8; 14:30). Соске сине акава шукар? Јекх причина сине адаја со нашти сине локхе те аракхел пе грлице. Соске?
Грлица
О грлице на ачховена ко јекх тхан, ола аракхљовена ко Израел ко масекија кеда тано тато. Ама кеда авела о масек октомври ола џана ко потате пхувја ко југ хем палем иранена пе ко Израел кеда почминела о пролет (Песна 2:11, 12; Ерем. 8:7). Адава значинела кај ко пурано време ко јевен јекхе Израелцоске сине пхаро те дел сар жртва јекх грлица.
Диво гулуби, пештернико
Тари јавер страна о гулубија обично ачховена ко јекх тхан хем адалеске о Израелција шај сине ко цело берш локхе те астарен гулубија. Освен адава, о Израелција аракхена сине гулубија кхере. (Споредин Јован 2:14, 16.) Спрема јекх лил башо библиска растенија хем животне, „ко са о гава хем дизја ки Палестина о мануша аракхена сине гулубија. Секова израелцо со аракхела сине гулубија сине ле ќумези, или керела сине дупка ко ѕидо те шај о гулубија атхе те живинен“ (Bible Plants and Animals). (Споредин Исаија 60:8.)
Гулуби ки јекх дупка ко ѕидо
О Јехова сикавѓа кај тано љубезно хем разумно адалеа со прифатинѓа те ден пе сар жртве чирикља кола со о Израелција шај сине локхе те аракхен лен ко било саво време таро берш.