И Хулда исполнинѓа пли цел

АКО англедер некобор берша сиен сине ко тикно остров ко Сангир Бесар ки Индонезија, тегани шај дикхлен трине таро амаре пхења ки плажа. Ко акава остров ола тане пенџарде баши ленгири служба адалеске со поможинена е манушенге те хаљовен и Библија. Ама ко адава периоди ола керѓе нешто скроз јавер.

Прво, ола кхувена сине ко пани те шај те аракхен баре бара, а пало адава ингарена лен сине ки плажа. Несаве бара сине баре сар фудбали. Тегани бешена сине ко тикне каштунале столице хем чекичеа пхагена сине о бара ко делија потикне таро е кхањакере јаре. Пало адава, чхивена сине о бара ко пластична кофе хем мора сине те уклен таро басамакија те шај те ресен кхере. Ко крајо, чхивена сине о бара ко вреќе кола со товаринена пе ко камиони те шај те користинен пе башо неве друмија.

Јекх таро пхења сине и Хулда. Лакере околностија дозволинѓе лаке повише саатија те керел акаја бути. Обично ој користинела сине адала паре те шај те грижинел пе пле фамилијаке. Ама акава пути ој мангља те штединел соске сине ла јавер да цел. Ој мангља те кинел песке таблет те шај те користинел и апликација JW Li­brary^®. И Хулда џанља кај о видеоклипија хем о јавера буќа со аракхљона ки апликација шај те поможинен лаке пошукар те керел пли служба хем пошукар те хаљовел и Библија.

Јекх текваш масек и Хулда керела сине секова сабајле бути по дуј саатија, хем аѓаар успејнѓа те пхагел доволно бара те шај те пхерел пе јекх тикно камиони. Ко крајо кхединѓа доволно паре те шај те кинел песке таблет.

И Хулда вакерела: „Точно тано адава кај сиум сине бут уморно тари бути хем дукхала ман сине ми снага. Ама кеда почминѓум те користинав мо нево таблет хем дикхљум кобор поможинела манге пошукар те керав мли служба хем полокхе те спреминав ман башо состанокија, бистерѓум са мле дукха“. Ој исто аѓаар вакерела кај о таблет поможинѓа лаке џикоте трајнела сине и пандемија соске преку лесте шај сине те учествујнел ко собраниска активностија. Радујнаја амен со и Хулда успејнѓа те исполнинел пли цел.