О Исус „сиклило те овел послушно“

О Исус отсекогаш сине послушно е Јеховаске (Јован 8:29). Тегани, соске ки Библија пишинела: „Сиклило те овел послушно таро адава со цидинѓа муке“? (Евр. 5:8).

Џикоте сине ки пхув, о Исус доживинѓа буќа кола со на доживинѓа лен ко небо. На пример, лескере родителија мангена сине е Јехова, ама сине несовршена (Лука 2:51). О лошна верска водачија хем о неправедна владетелија понашинена пе сине бут лошно леа (Мат. 26:59; Мар. 15:15). Освен адава, ов муло ко јекх бут мучно начин. Ки Библија баши лесте пишинела: „Сикавѓа бари понизност хем уло послушно џи ко мерибе“ (Фил. 2:8).

Таро акала искуствија о Исус сиклило те овел послушно ко јекх бут појавер начин. Аѓаар, ов уло совршено Цари хем Првосвештенико кова со шај те хаљол амаре слабостија (Евр. 4:15; 5:9). О Исус уло поскапоцено хем покорисно е Јеховаске откеда сиклило те овел послушно таро адава со цидинѓа муке. Амен да шај те ова поскапоцена е Јеховаске хем те ова покорисна баши било која задача која со шај ка дел ла аменге ако ачховаја послушна чак кеда ка аракхљова ко пхаре околностија (Јак. 1:4).