Со поможинѓа е Рикардоске хем е Андресеске

Е Библија иси ла бари моќ те менинел о живото е манушенгоро. Те дикха дуј примерија башо акава таро Рикардо хем таро Андрес.

РИКАРДО: Кеда сине ман 15 берш уљум члени ки јекх банда. Мле неве амала бут влијајнѓе упри манде, адалеске чхивѓум манге цел те пханљовав деш берш ко затвор. Акава шај изглединела глупаво, ама ко тхан коте со живинава, о мануша бут поштујнена адален со сине ко затвор. Ме да мангљум те ценинен ман хем те поштујнен ман.

Пробинѓум са о лошна буќа — дрога, неморал хем насилство. Јекх рат учествујнѓум ко пукајбе. Мислинѓум кај ка мударен ман, ама спасинѓум ман бизо те овел манге нешто. Пало адава, почминѓум те размислинав посериозно башо адава со ка керав мле животоја, хем одлучинѓум те менинав ман. Ама, сар? Со шај сине те поможинел ман?

Бут џене тари мли фамилија нашти сине ваздена шеро таро проблемија хем на сине хич среќна. Ама адава на сине аѓаар ме вујкоскере фамилијаја. Џанава сине кај тане шукар мануша хем кај живинена спрема о библиска начелија. Уствари, лендар шунѓум кај о Девел викинела пе Јехова. Адалеске, кратко пало пукајбе молинѓум ман е Јеховаске. Спомнинѓум лескоро анав хем родинѓум лестар те поможинел ман. Бут чудинѓум ман кеда о тајсутното диве јекх таро е Јеховаскере сведокија кхувѓа ко мло удар! Ов почминѓа те проучинел манцар.

Сигате пало адава, сине ман баро проблеми. Мле пуране амала бут пути јавинена пе сине манге хем викинена ман сине те икљовав ленцар. Одбинава лен сине иако на сине манге локхо. Сиум сине одлучно понадари да те проучинав и Библија, хем бут радујнава ман со керѓум адава! Мло живото скроз менинѓа пе хем акана сиум чаче бут среќно.

Сетинава ман сар јекх пути ки молитва вакерѓум е Девлеске кај англедер мангљум те овав пханло деш берш ко затвор сар члени ки јекх банда те шај о јавера те поштујнен ман. Пало адава, молинѓум ман те поможинел манге те служинав леске полновремено најхари деш берш хем аѓаар те поможинав е јаверенге исто сар манге со поможинѓе. О Девел одговоринѓа ки адаја молитва. Више 17 берш побаро дело таро мло време накхавава те сикавав е манушен баши Библија. Хем никогаш на гељум ко затвор!

Ама, бут џене таро мло пурано друштво тане бершенцар ко затвор. А несаве муле. Кеда размислинава башо време со накхља бут сиум благодарно мле фамилијаке кола сој тане е Јеховаскере сведокија. Ола сине спремна те живинен спрема о библиска мерилија хем те разликујнен пе таро јавера. Поштујнава лен бут повише него со поштујнава сине било кас тари банда. Ама англедер са благодарно сиум е Девлеске со сикавѓа манге о најшукар начин живибаске.

АНДРЕС: Бијандиљум хем бариљум ки јекх чороли населба коте со и дрога, те лел пе паре силаја, о мударибе хем и проституција сине нешто нормално. Мло дад сине пијаница хем зависно тари дрога. Ов хем мли дај нон-стоп акошена пе сине хем марена пе.

Панда таро тикнипе почминѓум те маќовав хем те дрогиринав ман. По цело диве сиум сине ки улица. Чорава сине хем пало адава бикинава сине адала буќа. Кеда хари бариљум мо дад пробинѓа те овел манцар попаше, ама ко погрешно начин. Сикавѓа ман те шверцујнав дрога хем буќа со на сине дозволиме ки пхув хем пало адава те бикинав лен. Башо кратко време кхединѓум бут паре. Ама јекх диве али и полиција ко мло удар. Леле ман хем пало адава сиум сине осудимо панџ берш те пханљовав ко затвор адалеске со пробинѓум те мударав.

Јекх сабај читинѓе известување ко затвор, колеа со викинѓе е затвореникон ки јекх библиско дискусија која со организиринѓе ла е Јеховаскере сведокија. Одлучинѓум те џав те шај те дикхав башо со керела пе лафи. Адава со шунѓум сине манге логично хем адалеске почминѓум те проучинав и Библија. Е Јеховаскере сведокија на гаравѓе мандар о библиска сикљојба само те шај те на поврединен ман, него јасно вакерѓе манге сој шукар а сој лошно англо е Девлескере јакхја.

Сигате халиљум кај ваљани манге помош те шај те керав промене. Посебно кеда несаве затвореникија почминѓе те заканинен пе манге адалеске со на свиџинела пе сине ленге адава со почминѓум те керав. Адалеске, молинѓум е Јехова те дел ман сила хем мудрост, а ов поможинѓа ман. На само со на даравѓе ман ленгере закане, него хем кхединѓум храброст те вакерав е јавере затворениконге баши Библија.

Кеда ало о време те мукхен ман таро затвор, добором дарандиљум сар ка снаџинав ман авријал со мангљум те ачховав панда хари ко затвор. Несаве затвореникија керена сине манге чао вастеа џикоте џава манге, а несаве сине радосна хем вакерѓе манге: „Ајде учителе, пхравдо тло друмо“.

Дарава чак те замислинав манге саво ка овел сине мло живото ако на мукхава сине о Девел те сикавел ман. Превише сиум благодарно е Девлеске со мангела ман хем со на ваздинѓа пле васта мандар.a