О СВЕТО КО ХАОС

1 | Аракх тло састипе

СОСКЕ ТАНО ВАЖНО

Кеда ка овел несави пхари ситуација или ка случинел пе несави несреќа, адава шај те влијајнел упро састипе е манушенгоро.

О пхаре ситуацие керена е манушенге стрес, а кеда о стрес трајнела повише време адава шај те керел проблемија ко састипе.
Ко кризна ситуацие, о здравство шај те овел бут оптоваримо хем адалеске шај те овел попхаро те лечине тут.
Кеда иси криза, е манушенге шај те овел пхаро те кинен о основна буќа сар сој о хајбе хем о иљачија.

Со ваљани те џане

О сериозна насвалипа хем о стрес шај те керел те ане лошна одлуке кола со ка влијајнен штетно ко тло састипе.
Ако на пазинеа ко тло састипе шај те овел полошно, па чак тло живото те овел ки опасност.
Кобор пошукар састипе иси тут добором полокхесте ка овел туке те ане шукар одлуке кеда ка овен пхаре ситуацие.
Бизи разлика дали сиан чороло или барвало, ту шај те кере нешто те шај те аракхе тло састипе.

Со шај те кере панда акана

Секогаш кеда шај јекх мудро мануш размислинела башо опасностија со шај те овен хем керела нешто те шај те избегинел лен. Акава важинела башо састипе да. Обично иси потикне шансе те заразине тут или барем те овен тут полокхе симптомија ако икереа шукар хигиена. Уствари, пошукар те спречине него те лечине.

„Адалеа со икераја шукар лично хигиена хем амаро кхер тано чисто, даја похари паре докторенге хем иљаченге“ (Андреас).a

a Несаве анава ко акава списание тане мениме.

СО ШАЈ ТЕ КЕРЕ — Корисна советија

Акала советија шај те поможинен тут те аракхе тло састипе

ИКЕР ШУКАР ХИГИЕНА

Икер шукар хигиена

Ки Библија пишинела: „О гоѓавер мануш дикхела о лошнипе хем цидела пе“ (Изреки 22:3). Трудин тут англедер те размислине со шај те керел тло састипе полошно хем циде тут таро адава.

Често тхов тле васта сапунеа хем пањеа, посебно англедер те пипине хајбе или откеда ка џа ко веце.
Редовно чистин хем кер дезинфекција ко кхер, посебно о површине хем о предметија со често пипинена пе.
Кобор со шај ма те овел тут паше контакт е манушенцар со иси лен несаво заразно насвалипе.

ХРАНИН ТУТ ЗДРАВО

Хранин тут здраво

Ки Библија пишинела: „Никој на мрзинела коркори пес, него аракхела пес хем ценинела пес“ (Ефешања 5:29). Сикаваја кај грижинаја амен аменге аѓаар со пазинаја со внесинаја ко амаро тело.

Пи бут пани.
Ха разно овошје хем зеленчук.
Ма ха бут мрсно, лондало хем гудло.
Ма пушин, ма пи превише алкохол или ма користин дрога.

„Те шај ма те насваљова трудинаја амен те хранина амен здраво. Ако на кераја адава цело плата ка џал ко иљачија. Адала паре пошукар те користина лен баши здраво храна“ (Карлос).

ВЕЖБИН ХЕМ ОДМОРИН ТУТ ДОВОЛНО

Вежбин

Ки Библија пишинела: „Пошукар тано јекх шака одмор, него дуј шаке труд хем прастајба пали бавлал“ (Проповедник 4:6). Ваљани те кера бути, ама исто аѓаар ваљани доволно те одморина амен да.

Ов физички активно. Ко почеток шај те почмине редовно те пхире. Ако сиан физички активно, шај те кере пошукар тло састипе чак ако сиан ко берша, ако иси тут несаво инвалидитети или несаво хронично насвалипе.
Одморин тут доволно

Одморин тут доволно. Ако несаво време на совеа доволно адава шај те керел те овел тут повише стрес хем похари концентрација. А ако адава трајнела повише време шај те анел џи ко посериозна проблемија е састипаја.
Бирин туке време кеда ка чхиве тут те сове хем икер тут ко адава. Трудин тут те сове хем те уште ко исто време секова диве.
Трудин тут те на дикхе телевизија хем те на користине електронска уредија џикоте сиан ко кревети.
Избегин пхари храна, кофеин или алкохол англедер те сове.

„Халиљум кај о сојбе влијајнела ко мло састипе. Ако на совава доволно понекогаш дукхала ман мо шеро хем сиум сар мудардо. Ама кеда сиум шукар суто иси ман чувство кај шај те керав са. Иси ман бут енергија ама хем поретко насваљовава“ (Џастин).