САЈ СКУПО — САР ТЕ ИКЉОВЕ КО КРАЈО

Ма нашав тли надеж

Дали о трошако башо живото ки тли пхув тано побаро тари тли плата? Секиримо ли сиан дали шај те грижине тут туке хем тле фамилијаке? Ако оја, шај на џанеа со аџикерела тут ки иднина. Ама чак ко асавке пхаре ситуацие на ваљани те нашаве тли надеж.

СОСКЕ ТАНО ВАЖНО

Адален со иси лен надеж мангена те случинен пе шукар буќа, ама ленгири надеж нане само желба. И надеж мотивиринела лен те керен са со шај те шај ленгири ситуација те овел пошукар. На пример, несаве истражувања сикавена кај е манушен со иси лен надеж...

обично тане поиздржлива
прилагодинена пе
анена помудра одлуке кола со поможинена ленге те овел лен пошукар састипе хем пошукар живото

СО ШАЈ ТЕ КЕРЕ

Прво, дознајн сар и Библија шај те поможинел тут панда авдиве. Ки Библија иси практична предлогија кола со шај те поможинен туке те икљове ко крајо кеда бајрона о цене. Акала предлогија шај те поможинен туке те овел тут побари контрола упро тло живото хем те ове поспремимо те икљове ко крајо е проблеменцар со ка авен.

„И способност шукар те размислине ка аракхел тут; адава со хаљовеа о буќа ка заштитинел тут“ (Изреки 2:11).

Дујто, дознајн со вакерела и Библија баши иднина. Кеда ка хаљове кобор врединела и мудрост која со аракхљола ки Библија, шај адава те поттикнинел тут те џане нешто повише башо адава со вакерела и Библија баши иднина. На пример, ка дикхе кај о Девел на само со мангела те овел тут иднина хем надеж него керѓа хем темели баши адаја надеж (Еремија 29:11). А адава темели тано е Девлескоро Царство.

СОЈ Е ДЕВЛЕСКОРО ЦАРСТВО ХЕМ СО КА КЕРЕЛ?

Е Девлескоро Царство тани влада која со ка владинел упри цели пхув (Даниел 2:44; Матеј 6:10). Кеда ка владинел акаја небесно влада никој повише нане те цидел муке, нане те овел чороло, сарине ка живинен ко мир хем секас ка овел адава сој леске потребно те шај те овел среќно. Башо акала буќа керена лафи о следна стихија:

„Ка ове среќно хем шукар ка живине“ (Псалм 128:2).

„[О мануша со ка живинен кеда ка владинел е Девлескоро Царство] нане те керен бути џабе“ (Исаија 65:23).

„Ки пхув о гив бут ка бијанел“ (Псалм 72:16).

Милионија мануша иси лен доверба ко акала ветувања соске тане увериме кај о Девел нашти те ховавел (Тит 1:2). Соске ту да на истражинеа и Библија? И надеж баши која со керела лафи шај те дел тут андруно мир те шај те икљове ко крајо е економска проблеменцар хем те овел тут доверба кај аџикерела амен пошукар иднина.