6 ЛЕКЦИЈА

Соске о Девел керѓа и Пхув?

О ДЕВЕЛ керѓа и Пхув те овел совршено тхан коте со ка џивдинен о мануша. Ко лескоро Лафи терѓола: „О небо тано е Јеховаскоро, а и пхув денѓа ла е манушенгере чхавенге“ (Псалм 115:16).

Англедер те керел е прво мануше, е Адеме (Адаме), о Девел ко јекх тикно тхан тари Пхув керѓа јекх шужи градина хем денѓа ла анав Еден. Е Девлескоро Лафи вакерела кај и лен Еуфрат хем и лен Тигар (Хидекел) тхавдена сине таро Еден.a Авдиве мислинела пе кај и градина Еден аракхљола сине ко авдисутно источно Кхоранипе. Оја, о Еден чаче постоњела сине ки Пхув!

О Девел керѓа е Адеме хем чхивѓа ле ки градина Еден „те керел бути хем те аракхел ла“ (1. Мојсеева 2:15). Пало адава, о Девел керѓа е Адемеске јекх ромни, е Хава (Ева) хем денѓа лен заповед: „Те овел тумен пхердо чхаве хем те овен бут џене, пхерен и пхув хем владинен лаја“ (1. Мојсеева 1:28). Значи, о Девел „на керѓа и пхув бизи цел, него керѓа ла те џивдинел пе ки лате“ (Исаија 45:18).

Ама о Адеми хем и Хава, противинѓе пе е Девлеске хем намерно на шунѓе лескоро закон. Адалеске о Девел палдинѓа лен таро Еден. Аѓаар ола нашти сине побутер те џивдинен ко адава џенети. И штета таро е Адемескоро грево тани бари. Е Девлескоро Лафи вакерела аменге: „Преку јекх мануш кхувѓа о грево ко сумнал хем преку о грево о мерибе, хем аѓаар о мерибе ширинѓа пе ко са о мануша, соске сарине грешинѓе“ (Римјаните 5:12).

Дали о Јехова откажинѓа пе адалестар со мангља те керел панда таро почеток — цели Пхув те овел џенети хем ки лате те џивдинен бахтале мануша? На! Ов вакерела: „Мо лафи со икљола таро мо муј нане те иранел пе чучо, него ка керел адава со мангава хем ка керел адава башо со и бичхалдо“ (Исаија 55:11). И Пхув палем ка овел џенети!

Саво ка овел тегани о џивдипе? Те дикха со ветинела аменге е Девлескоро Лафи ко акала дуј странице со авена пали акаја.

a Ко лил 1. Мојсеева 2:10-14 вакерела: „Таро Еден тхавдела сине лен со вадинела сине и градина, хем ој адатхар одвојнела пе сине ко штар лења. О анав е јекхакири тано Фисон. . . о анав тари дујто лен тано Гион. . . о анав тари тринто лен тано Хидекел [или Тигар] — ој тхавдела ко исток тари Асирија. А и штарто лен тани Еуфрат“. О прва дуј лења на џанѓола пе коте аракхљона хем кола тане ола.

О џенети со ка овел ки Пхув

О муле палем ка џивдинен: „Са окола со и ко гробо ка шунен лескоро гласо хем ка уштен“ (Јован 5:28, 29).

Нане побутер те овел пхурипе, насвалипе хем мерибе: „Нијекх таро мануша нане те вакерел: ‚Насвало сиум‘“ (Исаија 33:24). О Девел „ка косел секоја асвин таро ленгере јакхја, хем мерибе нане те овел, ни жалибе, ни ројбе, ни дукха“ (Откровение 21:4).

Ка овел бут хајбаске: „И пхув ка бијанел... амаро Девел ка дел амен берекети“ (Псалм 67:6).

Ка овен шуже кхера хем шукар бути: „Ола ка керен кхера хем ка џивдинен ки ленде... адала со и бириме мандар ка уживинен ки бути со ка керен пе вастенцар“ (Исаија 65:21, 22).

Нане побутер те овел марибе, криминал, хем насилство: О Јехова ка ‚чхинавел о марибе ки цели пхув‘ (Псалм 46:9). „О лошна ка овен уништиме тари пхув“ (Изреки 2:22).