Кој тано о душмани е чачутне веракоро?

АНГЛЕДЕР те керел и Пхув, о Јехова керѓа е мељаикон ко небо. Сар со накхела сине о време, јекх мељаико мангља сарине те служинен леске, а адава заслужинела само о Девел. Кеда почминѓа те керел несаве буќа те шај те пхерел адаја желба, тегани ов уло Шејтани (Сатана) хем Бенг (Иблис). О анав „Шејтан“ значинела „Противнико“, адава тано некој со противинела пе е Девлеске. Сар противинѓа пе о Бенг е Девлеске?

О Бенг ховавѓа е Хава те на шунел е Девле. Чхивѓа ла те мислинел кај адалеске со о Јехова забранинѓа лаке те хал таро каш, гаравела латар нешто шукар. Ов бизи лаџ пхенѓа кај о Девел ховавела хем кај на ваљани и Хава те шунел ле, аѓаар со вакерѓа лаке: „О Девел џанела кај ко адава диве кеда ка хан лестар, ка пхравѓон тумаре јакхја, хем ка овен сар о Девел, ка џанен со и шукар а со и лошно“ (1. Мојсеева 3:5). И Хава на сине гоѓавер со веруњѓа ко лескере ховавне лафија. Ој пхагља е Девлескоро закон хем влијањѓа упро Адеми ов да те керел адава. Таро тегани, о Бенг тано душмани са околенге со сикавена чачутни вера. Авдиве да, ов панда ховавела е манушен. Сар?

Бајрола и ховавни вера ко Девел

О Бенг ховавѓа е Израелцон преку о идолија хем о манушикане адетија. О Иса, о Месија, вакерѓа е религиозна водаченге кај адалеске со сикавена е јаверен „манушикане заповедија“, ленгоро служибе на врединела англо Девел (Матеј 15:9). Кеда адава народо на прифатинѓа е Месија, о Девел да на прифатинѓа лен. О Иса вакерѓа ленге: „Е Девлескоро Царство ка лел пе тумендар хем ка дел ле е народоске со ка керел адава со ов родела лестар“ (Матеј 21:43). Тегани, адала со шунена сине е Иса уле е Девлескоро мангло народо.

Пало адава, о Бенг мангља те ховавел околен со шунена сине е Иса. Керѓа ли адава? Преку јекх парамис, о Иса англедер вакерѓа со ка овел. Ки адаја парамис, јекх мануш сејнѓа гив ки пи нива. Пало адава, ало јекх душмани хем сејнѓа диво чар машкар о гив. Солдуј сине мукхле те бајрон џи ки жетва. Тегани и диво чар сине одвојми таро гив хем сине уништими, а о гив сине кхедимо ко амбари.

О Иса пе учениконге вакерѓа со значинела акаја парамис. Ов тано о Сејачи. Поадари вакерѓа: „О шукар семе тано о чхаве е Царствоскере, и диво чар тани о чхаве е Лошноскере, а о душмани со сејнѓа ла тано о Бенг. И жетва тани о крајо акале сумналескоро, а о жетварија тане о ангелија“ (Матеј 13:38, 39). О Иса спорединѓа пе чачутне ученикон е гивеа. Ама о Бенг, сар диво чар сејнѓа ховавне ученикија машкар о хас ученикија е Исаскере. Сар со вакерѓа о Иса, пало лескоро мерибе иклиле ховавне ученикија. Ола сикавѓе е манушен ховавне сикљојба сар со и о тројство, кај трин џене тане јекх Девел. О ховавне ученикија исто аѓаар почминѓе те користинен идолија хем те мешинен пе ки политика. Само хари џене икерена пе сине ко адава со сикавела сине о Иса.

И чачутни вера ко Девел ка побединел

О Иса вакерѓа кај ка менинен пе о буќа. Е Девлескере мељаикија ка одвојнен околен со нане лен чачутни вера ко Девел те овен уништиме. Тегани, окола со иси лен чачутни вера, локхесте ка пенџарѓовен. Ко крајо, о Бенг, о најпурано хем о најбаро душмани е чачутне веракоро, исто аѓаар ка овел уништимо. Оја, и чачутни вера ко Девел ка побединел!

Ама сар шај авдиве те пенџара кој сикавела чачутни вера ко Девел? Башо акава пучибе ка керел пе лафи понадари.