Осетинеа ли ту несаво пути коркори хем дараја?

Дикх е тикне чхаве ки слика. Дикхеа ли кај тано коркори хем дарала? Осетинѓан ли ту некогаш аѓаар?— Сарине по несаво пути осетинаја амен аѓаар. И Библија вакерела кај несаве амала е Јеховаскере осетинге пе коркори хем дарандиле. Јекх лендар сине о Илија. Ајде те дикха нешто баши лесте.

Бут берша англедер о Исус, ко Израел живинела сине о Илија. Адари сине цари о Ахав, а ов на служинела сине е Јеховаске. О Ахав хем лескири ромни, и Језавела, служинена сине јекхе ховавне девлеске, о Ваал. Адалеске да бут Израелција почминге те служинен е Ваалеске. И Језавела сине бут лошно царица хем мангља те мударел саринен со служинена сине е Јеховаске. О Илија да служинела сине е Јеховаске. Џанеа ли со керѓа о Илија?—

О Илија нашља! Гело ки пустина хем гаравѓа пе ки јекх пештера. Со мислинеа, соске керѓа адава?— Оја, ов дарандило. Ама о Илија на ваљани сине те дарал. Соске? Адалеске со џанела сине кај о Јехова шај те поможинел ле. О Јехова англедер сикавѓа е Илијаске кобор тано силно. Јекх пути, о Јехова одговоринѓа леске ки молитва адалеа со бичхалѓа јаг таро небо. Сигурно шај сине те поможинел ле акана да!

Кеда о Илија сине ки пештера, о Јехова пучља ле: ‚Со кереа акате?‘ О Илија вакерѓа: ‚Само ме ачхиљум коркори те служинав туке хем дарава те на мударен ман‘. Ов мислинѓа кај са о јавера со служинена сине е Јеховаске сине мударде. Ама, о Јехова пенѓа леске: ‚На, адава нане чаче. Иси 7.000 мануша со панда служинена манге. Ов храбро. Ваљани панда бут буќа те кере!‘ Со мислинеа, сине ли радосно о Илија кеда шунѓа акава?—

Со шај те сикљове таро адава со уло е Илијаја?— Никогаш на ваљани те мислине кај сиан коркори хем те дара. Иси ту амала со мангена е Јехова хем со мангена тут. Исто аѓаар, о Јехова тано бут силно хем секогаш ка поможинел ту! Радујнеа ли ту со џанеа кај никогаш на сиан коркори?—