Сар шај те ове е Девлескоро амал?

1, 2. Кој сине несаве таро е Јеховаскере амала?

КОЈ би мангеа те овел тло амал? Некас со мангеа хем со сложинеа тут леа. Некој со иси ле шукар особине кола со ценинеа лен.

² О Јехова биринела несаве манушен те овен лескере амала. На пример, о Авраам сине јекх таро е Јеховаскере амала (Исаија 41:8; Јаков 2:23). О Јехова, исто аѓаар, мангела сине е Давиде. Баши лесте вакерѓа кај тано мануш спрема лескоро вило (Дела 13:22). Исто аѓаар, о пророко о Даниел сине бут мангло е Јеховаске (Даниел 9:23).

3. Соске о Авраам, о Давид хем о Даниел сине е Јеховаскере амала?

³ Сар о Авраам, о Давид хем о Даниел уле е Јеховаскере амала? О Јехова вакерѓа е Авраамеске: „Шунѓан мло гласо“ (1. Мојсеева 22:18). О Јехова овела амал некасаја сој тано понизно хем со шунела ле. Чак јекх цело нација шај сине те овен амала леа. О Јехова вакерѓа е Израелцонге: „Шунен мло гласо, хем ме ка овав тумаро Девел, а тумен ка овен мло народо“ (Еремија 7:23). Ако ту да чаче мангеа те ове е Девлескоро амал, ваљани те шуне ле.

О ЈЕХОВА ЗАШТИТИНЕЛА ПЛЕ АМАЛЕН

4, 5. Сар о Јехова заштитинела пле амален?

⁴ И Библија вакерела кај о Јехова мангела „те сикавел пли сила ки корист околенге со служинена леске цело вилеа“ (2. Летописи 16:9). Ко Псалм 32:8, о Јехова ветинела пле амаленге: „Ка поможинав тут те хаљове о буќа хем ка сикавав тут башо друмо пало кова со ваљани те џа. Ка дав тут совет, мли јакх ка овел упри туте“.

⁵ О Бенг тано моќно непријатели кова со мангела те спречинел амен те ова амала е Девлеа. Ама, о Јехова мангела те заштитинел амен. (Читин Псалм 55:22.) Сар амала е Јеховаскере амен служинаја леске цело вилеа. Амен сием леске верна чак кеда аменге пхаро. Иси амен доверба сар со сине е псалмисте, кова со вакерѓа башо Јехова: „Ов тано тари мли десно страна, адалеске ка ачховав зорало“ (Псалм 16:8; 63:8). Сар о Бенг мангела те спречинел амен те ова амала е Девлеа?

О САТАНА КРИВИНЕЛА Е МАНУШЕН

6. Со вакерѓа о Сатана башо мануша?

⁶ Ко 11 поглавје сиклилем кај о Сатана кривинѓа е Јехова кај ховавела хем нане праведно адалеске со на дозволинѓа е Адамеске хем е Еваке коркори те одлучинен сој лошно хем сој шукар. Таро библиско лил Јов сикљоваја кај о Сатана исто аѓаар кривинѓа са е манушен со мангена те овен амала е Девлеа. О Сатана вакерѓа кај о мануша служинена е Девлеске тари корист, а на со мангена ле. Ов чак вакерѓа кај шај те керел секова мануш те овел против о Девел. Те дикха со шај те сикљова таро Јов хем сар о Јехова заштитинѓа ле.

7, 8. а) Сар дикхела сине о Јехова ко Јов? б) Со вакерѓа о Сатана башо Јов?

⁷ Кој сине о Јов? Ов живинѓа англедер 3.600 берша хем сине шукар мануш. О Јехова вакерѓа кај ко адава време на сине мануш сар лесте ки Пхув. О Јов бут поштујнела сине е Девле, хем мрзинела сине о лошнипе (Јов 1:8). Оја, о Јов чаче сине е Јеховаскоро амал.

⁸ О Сатана вакерѓа кај о Јов служинѓа е Девлеске тари корист. Ов вакерѓа е Јеховаске: „На чхивѓан ли ту ограда со заштитинела ле, лескоро кхер хем са со иси ле? Денѓан берекети ко са со керѓа пле вастенцар, хем лескири стока ширинѓа пе ки пхув. Ама, молинава тут, пружин тло вас хем ле лестар са со иси ле, хем дикх дали нане те вакерел лошна буќа баши туте“ (Јов 1:10, 11).

9. Со дозволинѓа о Јехова е Сатанаске те керел?

⁹ О Сатана кривинѓа е Јове кај служинела сине е Јеховаске само тари корист. Ов исто аѓаар вакерѓа кај шај те керел о Јов те на служинел е Јеховаске. Иако о Јехова на мислинѓа исто сар о Сатана, ама сепак дозволинѓа леске те искушинел е Јове те шај те дикхел пе дали служинела е Девлеске тари корист или адалеске со мангела ле.

О САТАНА НАПАДИНЕЛА Е ЈОВЕ

10. Со керѓа о Сатана е Јовеске, хем со керѓа о Јов?

¹⁰ Сар прво, о Сатана керѓа те чорен хем те мударен лескере стока. Пало адава, мударѓа повише таро лескере слуге. О Јов нашавѓа са со сине ле. Ко крајо, о Сатана мударѓа лескере деше чхавен ки јекх бари бавлал. Ама, о Јов ачхило верно е Јеховаске. И Библија вакерела: „Ко са адава о Јов на грешинѓа хем на вакерѓа ништо лошно башо Јехова“ (Јов 1:12-19, 22).

11. а) Со керѓа панда о Сатана е Јовеске? б) Со керѓа о Јов?

¹¹ О Сатана на откажинѓа пе. Ов вакерѓа е Јеховаске: „Кхув ле ко лескере кокала хем мас, хем сигурно ка вакерел лошна буќа баши туте“. О Сатана денѓа е Јове јекх пхаро насвалипе (Јов 2:5, 7). Ама, о Јов понадари да ачхило верно е Јеховаске. Ов вакерѓа: „Са џикоте на мерава, нане те откажинав ман тари мли верност“ (Јов 27:5).

12. Сар о Јов сикавѓа кај о Сатана ховавела сине?

¹² О Јов на џанела сине башо буќа со вакерѓа лен о Сатана баши лесте, хем соске иси ле добором муке. Ов мислинѓа кај о Јехова керела леске са адала буќа (Јов 6:4; 16:11-14). Ама, о Јов ачхило верно е Јеховаске. Адалеа сикавѓа кај ов на служинела е Девлеске тари корист. Ов сине е Девлескоро амал адалеске со мангела ле сине. О буќа со вакерѓа лен о Сатана сине ховавне!

13. Кова сине о резултати тари верност е Јовескири?

¹³ Иако о Јов на џанела сине со случинѓа пе ко небо, ов ачхило верно е Девлеске хем сикавѓа кај о Сатана тано лошно. Адалеске со ачхило верно, о Јехова денѓа ле бут берекетија (Јов 42:12-17).

САР О САТАНА КРИВИНЕЛА ТУТ

14, 15. Башо со кривинела о Сатана са е манушен?

¹⁴ Шај те сикљова бут важна буќа таро адава со случинѓа пе е Јовеа. Авдиве, о Сатана кривинела амен кај служинаја е Јеховаске тари корист. Ко Јов 2:4 ов вакерѓа: „О мануш ка дел са со иси ле башо пло живото“. О Сатана кривинела са е манушен кај тане себична, а на само е Јове. Бут берша откеда муло о Јов, о Сатана панда вакерела сине лошна буќа башо Јехова хем кривинела сине лескере слуген. На пример, ко Изреки 27:11 пишинела: „Ов гоѓавер, мо чхаво, хем радујнкер мло вило, те шај те одговоринав околеске кова со асала манге“ (Изреки 27:11).

¹⁵ Ту шај те бирине те шуне е Јехова хем те ове лескоро верно амал, хем адалеа те сикаве кај о Бенг ховавела. Шај ка ваљани те кере баре промене ко тло живото, ама адаја тани и најшукар одлука со шај те ане ла! Адаја одлука тани бут сериозно. О Сатана вакерела кај ту нане те ачхове верно е Девлеске кеда иси тут проблемија. Ов трудинела пе те ховавел амен ма те ачхова верна е Девлеске. Сар керела адава?

16. а) Ко саве начинија о Сатана пробинела те чхинавел е манушен те служинен е Јеховаске? б) Сар шај о Сатана те чхинавел тут те служине е Јеховаске?

¹⁶ О Сатана ко разна начинија трудинела пе те чхинавел амен те ова е Девлескере амала. Ов нападинела „сар лави со викинела кеда тано бокхало хем родела некас те хал“ (1. Петрово 5:8). Ма ов изненадимо кеда тле амала, некој тари тли фамилија, или јавера, мангена те на проучине и Библија хем те на кере адава сој исправно. Тегани шај ка осетине тут нападимоa (Јован 15:19, 20). О Сатана исто аѓаар керела пе кај тано „ангели е светлинакоро“. Ов пробинела те чхивел амен те на ова верна е Јеховаске адалеа со ховавела амен те џа пало лескоро сикљојбе, а на пало е Девлескоро (2. Коринќаните 11:14). Јавер начин со користинела о Сатана тано те обесхрабринел амен аѓаар со ка мислина аменге кај на сием доволно шукар мануша те служина е Девлеске (Изреки 24:10).

ШУН Е ЈЕХОВАСКЕРЕ ЗАПОВЕДИЈА

17. Соске ваљани те шуна е Јехова?

¹⁷ Кеда сием послушна е Јеховаске, тегани сикаваја кај о Сатана ховавела. Со ка поможинел амен те ова послушна? И Библија вакерела: „Манг е Јехова, тле Девле, са тле вилеа, са тле душаја хем са тле силаја“ (5. Мојсеева 6:5). Амен шунаја е Девле, адалеске со мангаја ле. Сар со бајрола амаро мангипе кон о Јехова, аѓаар бајрола амари желба те кера са со родела амендар ов. О апостол Јован пишинѓа: „Те мангел пе е Девле значинела те икерен пе лескере заповедија, а лескере заповедија нане пхаре“ (1. Јованово 5:3).

18, 19. а) Кола буќа тане погрешна англо Јехова? б) Котар џанаја кај о Јехова на родела амендар нешто со нашти те кера?

¹⁸ Кола тане несаве буќа со о Јехова вакерела кај тане погрешна? Ки рамка „Мрзин адава со мрзинела о Јехова“ тане денде несаве таро адала буќа. Ко почеток, шај ка мислине кај несаве таро адала буќа нане добором лошна. Ама кеда ка читине о библиска стихија хем хор ка размислине баши ленде, тегани ка хаљове кобор тане мудра е Јеховаскере законија. Исто аѓаар, ка хаљове кај ваљани те кере несаве промене ко тло живото. Шај ка овел туке пхаро те кере промене, ама ка овел тут мир хем радост адалеске со сиан амал е Девлеа (Исаија 48:17, 18). Котар џанаја кај шај те кера адала промене?

¹⁹ О Јехова никогаш на родела амендар те кера нешто со нашти те кера (5. Мојсеева 30:11-14). Сар чачутно амал, ов џанела амен пошукар амендар. Ов џанела амаре силна хем слаба стране (Псалм 103:14). О апостол Павле охрабринела амен: „О Девел тано верно, хем нане те мукхел те овен искушиме повише таро адава со шај те издржинен, него ка поможинел туменге кеда иси тумен искушение те шај те издржинен ле“ (1. Коринќаните 10:13). Амен шај те ова сигурна кај о Јехова секогаш ка дел амен сила те кера адава сој тано исправно. Ов ка дел амен сила „која со накхавела и нормално“ те поможинел амен те шај те издржина о пхаре ситуацие (2. Коринќаните 4:7). О Јехова поможинѓа е Павлеске кеда сине ле искушенија, адалеске ов шај сине те вакерел: „Са шај те керав соске поможинела ман адава кова со дела ман сила“ (Филипјаните 4:13).

СИКЉОВ ТЕ МАНГЕ АДАВА СО МАНГЕЛА О ЈЕХОВА

20. Саве особине ваљани те сикаве хем соске?

²⁰ Ако мангаја те ова е Јеховаскере амала, нане доволно само те на кера адава со о Јехова вакерела кај тано погрешно, него ваљани те кера јавер да нешто (Римјаните 12:9). Е Девлескере амала мангена адава ов со мангела. Ко Псалм 15:1-5 тане денде несаве таро адала буќа. (Читин.) Е Јеховаскере амала сикавена лескере особине, ола сикавена „мангипе, радост, мир, стрпливост, љубезност, шукарипе, вера, кроткост хем самоконтрола“ (Галатите 5:22, 23).

21. Сар шај те сикаве о особине со мангела лен о Девел?

²¹ Сар шај те сикаве акала шукар особине? Адалеа со ка сикљове со мангела о Јехова хем редовно ка читине хем ка проучине и Библија (Исаија 30:20, 21). Џикоте кереа акава, тло мангипе спрема о Јехова ка бајрол, хем ка манге те ове леске послушно.

22. Кола ка овен о резултатија ако шунеа е Јехова?

²² О промене со ваљани те кере лен ко тло живото шај те спорединен пе пуране шеенцар кола со хуљавена пе хем неве шеенцар кола со уравена пе. И Библија вакерела кај ваљани „те хуљаве и пурани личност“ хем „те ураве и неви личност“ (Колошаните 3:9, 10). Чак кеда нане те овел локхо, кеда кераја акала промене хем шунаја е Јехова, ов ветинела кај ка дел амен „бари награда“ (Псалм 19:11). Оја, бирин те шуне е Јехова хем сикав кај о Сатана ховавела. Служин е Јеховаске, ама на соске ка добине награда ки иднина, него адалеске со мангеа ле. Тегани чаче ка ове е Јеховаскоро амал!