О Јосија мангела сине е Девлескоро закони

О Јосија уло цари ки Јуда кеда сине ле офто берш. Ко адава време, о мануша керена сине бут магие хем обожавинена сине идолија. Кеда сине е Јосија 16 берш, мангела сине те сикљол сар те служинел исправно е Јеховаске. Кеда сине ле 20 берш, почминѓа те уништинел о идолија хем о жртвеникија со сине ки цело пхув. А кеда сине ле 26 берш, нарединѓа те обновинел пе о храми е Јеховаскоро.

Ко храми, о првосвештенико, о Хелкија, аракхља јекх лил коте со сине пишимо е Јеховаскоро закони. Шај акава сине о исто лил со пишинѓа ле о Мојсеј. О Сафан, со сине писари е царескоро, анѓа о лил е Јосијаске хем почминѓа те читинел ле леске. Џикоте шунела сине адава со читинела, халило кај о мануша бут берша на керена сине адава со вакерела о Јехова. Тегани о цари, о Јосија, вакерѓа е Хелкијаске: „О Јехова тано бут хољамо аменге. Џа хем молин тут леске. О Јехова ка вакерел аменге со те кера“. Тегани, преку и пророчица, и Олда, о Јехова вакерѓа ленге: „О мануша тари Јуда бистерѓе ман. Ола ка овен казниме, ама на џикоте тано о Јосија цари, соске ов тано понизно“.

Кеда шунѓа башо адава о Јосија, гело ко храми хем викинѓа са е манушен тари Јуда. Тегани ов читинѓа е Јеховаскоро Закони англо цело народо. О Јосија хем о народо ветинѓе е Јеховаске кај ка шунен е Девле таро вило.

О народо тари Јуда бершенцар на славинена сине о празнико Пасха. Ама, кеда о Јосија читинѓа о Закони кај и Пасха ваљани те славинел пе секова берш, вакерѓа е народоске: „Ка славина и Пасха башо Јехова“. Тегани о Јосија спреминѓа те ден пе бут жртве хем ко храми те овел хор со ка гиљавел. Аѓаар о мануша славинѓе и Пасха, хем пало адава, ефта диве славинена сине о Празнико е маренгоро бизо квасацо. Асавки Пасха на сине панда таро време е Самоилескоро. О Јосија чаче мангела сине бут е Девлескоро закони. Дали уживинеа џикоте сикљовеа башо Јехова?