Штар терне чхаве ачхиле верна

Кеда о Навуходоносор заробинѓа е кнезон тари Јуда хем ингарѓа лен ко Вавилон, чхивѓа е Асфеназе кова со служинела сине ко царско дворо, те надглединел лен. О Навуходоносор вакерѓа е Асфеназеске лендар те биринел е најсастен хем е најмудра терне чхавен. Акала терне чхаве ваљанѓе те школујнен пе трин берш, те шај пало адава те служинен ко царско дворо ко Вавилон. Ола ваљанѓе те сикљовен те читинен, те пишинен хем те керен лафи ки чхиб која со керела пе сине ко Вавилон. Исто аѓаар, ола ваљани сине те хан таро адава хајбе со хала сине о цари хем лескере мануша. Штар таро адала терне сине о Даниел, о Ананија, о Мисаил хем о Азарија. О Асфеназ денѓа лен вавилонска анава: Валтазар, Седрах, Мисах хем Авденаго. Дали адава со сине школујме ко царско дворо керѓа те на служинен више е Јеховаске?

Акала штар терне одлучинѓе те овен послушна е Јеховаске. Ола џанена сине кај на ваљани те хан таро хајбе кова со хала сине о цари, соске о закони е Јеховаскоро забранинела сине те хан пе несаве животне. Адалеске ола вакерѓе е Асфеназеске: „Молинаја тут ма чхив амен те ха таро царско хајбе“. О Асфеназ вакерѓа ленге: „Ако на хален хем о цари дикхела кај изглединена сар насвале, ка мударел ман!“

О Даниел сине ле јекх идеа. Ов вакерѓа е Асфеназеске: „Молинаја тут де амен деш диве само зеленчук хем пани. Пало адава, дикх сар изглединаја амен, а сар изглединена о терне со хана таро царско хајбе“. О Асфеназ согласинѓа пе.

Пало деш диве, о Даниел хем лескере трин амала изглединена сине бут посасте таро јавера терне. О Јехова бут радујнѓа пе со ачхиле леске послушна. Ов чак денѓа е Даниелеске мудрост те хаљол визие хем суне.

Кеда завршинѓе е школујбаја, о Асфеназ ингарѓа е тернен англо Навуходоносор. Ов керѓа лафи ленцар хем дикхља кај о Даниел, о Ананиј, о Мисаил хем о Азариј тане погоѓавер хем пошукар хаљовена о буќа таро јавера терне. Тегани биринѓа ленде те керен бути ко царско дворо. Кеда ваљани сине те анел важна одлуке, о цари често родела сине лендар совет. О Јехова акале штаре тернен денѓа лен мудрост која со сине побари таро са о мудра мануша хем магионичарија е царескере.

Иако сине ки туѓо пхув, о Даниел, о Ананиј, о Мисаил хем о Азариј на бистерѓе кај о Јехова тано ленгоро Девел. Дали ту да ка ове секогаш послушно е Јеховаске, чак кеда те родителија нане туја?