Царство со ка владинел засекогаш

Јекх рат, о цари о Навуходоносор дикхља јекх чудно суно. Добором дарандило со нашти сине више те совел. Викинѓа пле магионичарен хем вакерѓа ленге: „Објаснинен манге со дикхљум ко суно“. Ола пучле ле: „А со дикхљан ко суно?“ О Навуходоносор вакерѓа ленге: „На! Тумен ка вакерен манге со дикхљум ко суно! Или ка мударав тумен!“ Ола палем пучле ле: „Вакер аменге со дикхљан ко суно, хем тегани ка вакера туке со значинела то суно“. Тегани, ов пхенѓа ленге: „Тумен мангена те ховавен ман. Вакерен манге со дикхљум ко суно!“ Ола вакерѓе леске: „Нане мануш ки Пхув со шај те вакерел туке то суно. Адава со родеа нашти те кера ле“.

О Навуходоносор бут хољанѓа хем нарединѓа са о магионичарија хем о мудра мануша те овен мударде ки цели пхув. Машкаро адала мудра мануша сине о Даниел, о Седрах, о Мисах хем о Авденаго. О Даниел родинѓа таро цари те дел ле хари време. Пало адава, ов хем лескере амала молинѓе пе е Јеховаске хем родинѓе помош таро Јехова. Со керѓа о Јехова?

Ки јекх визија, о Јехова сикавѓа е Даниелеске со дикхља о Навуходоносор ко суно хем со значинела адава. О тајсутно диве, о Даниел гело ко е царескоро слуга хем вакерѓа леске: „Ма мудар е мудро манушен. Ме шај те објаснинав о суно е цареске“. О слуга ингарѓа е Даниеле ко Навуходоносор. О Даниел вакерѓа е цареске: „О Девел сикавѓа со ка овел туја ки иднина. Акава тано тло суно: Дикхљан јекх баро кипи. О шеро лескоро сине таро злато, о колин хем о васта таро сребро, о воги хем о бутија таро бакари, о чанга таро железо, а о пре теле сине таро састрн мешимо глинаја. Тегани тари јекх планина откачинѓа пе јекх бар хем кхувѓа е кипе ко пре. О кипи са пхагило уло прашина која со ингарѓа ла и балвал. А о бар уло бари планина, која со шириндили ки цели Пхув.

Пало адава, о Даниел вакерѓа: „Аке со значинела о суно: О шеро таро злато тано тло царство. О сребрено дело тано о царство со ка авел пали туте. Пало адава, ко цело свето ка владинел јекх царство кова сој претставимо бакареа. Пали лесте ка авел царство со ка овел зорало сар железо. А о последно царство со ка владинел ка овел делимо — несаве делија ка овен зорале сар железо, а несаве ковле сар глина. О бар со уло планина тано е Девлескоро Царство. Акава Царство ка уништинел са о јавера царствија хем ов ка владинел засекогаш“.

Кеда шунѓа акала лафија, о Навуходоносор поклонинѓа пе е Даниелеске. О Цари вакерѓа: „Тло Девел сикавѓа туке со значинела о суно. Нане јавер Девел сар лесте“. Пало акава, о Навуходоносор на мударѓа е Даниеле. Ов чхивѓа ле те овел главно надгледнико упро са о мудра мануша хем те овел владетели ко Вавилон. Дали шај те дикхе сар о Јехова одговоринѓа е Даниелеске ки молитва?