И Елисавета бијанѓа чхаво

Накхле повише таро 400 берш откеда сине обновиме о ѕидија таро Ерусалим. Паше узи акаја диз живинела сине о свештенико о Захарија хем лескири ромни, и Елисавета. Ола сине бут време ко брако, ама на сине лен чхаве. Јекх диве џикоте о Захарија тхарела сине темјани андре ко храми, појавинѓа пе леске о ангели, о Габриел. Ов бут дарандило, ама о Габриел вакерѓа леске: „Ма дара. Анава туке шукар хабери таро Јехова. Ти ромни, и Елисавета, ка бијанел мурш кова со ка викинел пе Јован. О Јехова биринѓа е Јоване баши јекх важно задача“. О Захарија пучља: „Сар шај те верујнав ко адава? Ме хем ми ромни сием бут пхуре те овен амен чхаве“. О Габриел вакерѓа: „О Девел бичхалѓа ман те вакерав туменге акава хабери. Ама, адалеске со на верујнѓан ман, нане те кере лафи са џикоте на бијанѓовела о чхаво“.

О Захарија ачхило андре ко храми повише време таро адава со ачхола сине. Кеда конечно иклило, о мануша со сине адатхе мангле те џанен со уло. О Захарија нашти сине те керел лафи. Ов шај сине те керел знакија пе вастенцар. Тегани о мануша халиле кај о Захарија добинѓа порака таро Девел.

Пало несаво време, и Елисавета ачхили кхамни хем бијанѓа мурш, баш сар со вакерѓа о ангели. Ленгири фамилија хем ленгере амала але те дикхен е бебе. Ола сине бут радосна баши Елисавета. Ој вакерѓа ленге: „Лескоро анав ка овел Јован“. Тегани ола вакерѓе лаке: „Ама никој ки амари фамилија на викинела пе Јован. Нека викинел пе Захарија, сар по дад“. Ама, о Захарија леља јекх плочка хем пишинѓа: „Лескоро анав тано Јован“. Таро адава моменти, о Захарија палем шај сине те керел лафи! О мануша тари цело Јудеја шунѓе башо акава чхаво хем пучена пе сине: „Со ка овел леа кеда ка бајрол?“

О Захарија пхердило свети дух хем вакерѓа јекх пророштво: „Нека овел фалимо о Јехова. Ов ветинѓа е Авраамеске кај ка бичхалел Месија, со ка спасинел амен. О Јован ка овел пророко, хем ка пхравел друмо е Месијаске“.

Нешто посебно уло е Маријаке да, која со сине фамилија е Елисаветаке. Со сине адава? Те дикха ко јавер поглавје.