О Исус уло Месија

О Јован проповединела сине: „Авела некој сој тано побаро мандар“. Кеда е Исусе сине ле околу 30 берш, тари Галилеја гело ки река Јордан, коте со о Јован крстинела сине е манушен. О Исус мангља о Јован те крстинел ле, ама о Јован вакерѓа леске: „Ме нашти те крстинав тут. Ту ваљани манде те крстине“. О Исус вакерѓа е Јованеске: „О Јехова мангела ту те крстине ман“. Аѓаар ола кхувѓе ки река Јордан хем о Јован целосно потопинѓа е Исусе ко пани.

Откеда крстинѓа пе о Исус, ов молинѓа пе. Ко исто моменти, о небо пхравдило хем е Девлескоро духо хулило сар гулуби. Тегани о Јехова вакерѓа таро небо: „Ту сиан мло мангло Чхаво, кова со радујнела ман“.

Кеда е Јеховаскоро духо хулило упро Исус, ов уло Христос, или Месија. Оттегани о Исус почминѓа те керел пли задача баши која со о Јехова бичхалѓа ле ки Пхув.

Одма пало пло крстибе, о Исус гело ки пустина хем ачхило адари 40 диве. Кеда иранѓа пе, гело ко Јован те дикхел ле. Кеда о Јован дикхља сар авела о Исус ки лесте вакерѓа: „Аке тано е Девлескоро Бакхро! Преку лесте ка овен простиме о гревија е манушенгере“. Акале лафенцар о Јован сикавѓа е манушенге кај о Исус тано о Месија. Дали џанеа со уло е Исусеа џикоте сине ки пустина? Ајде те дикха.