Е Јованескере визие

Џикоте о апостол Јован сине ко затвор ко остров Патмос, о Исус сикавѓа леске 16 визие, или слике, башо адава со ка овел ки иднина. Ко акала визие сине сикавдо сар ка славинел пе е Девлескоро свето анав, сар ка авел лескоро Царство хем сар ка керел пе лескири волја хем ко небо хем ки Пхув.

Ки јекх визија, о Јован дикхља е Јеховаскоро славно престол ко небо, хем околу лесте сине 24 старешине уравде ко парне шеја хем златна круне ко шере. Таро престол светинена хем шунѓона сине громија. О 24 старешине поклонинена пе сине е Јеховаске хем служинена сине леске. Ки јавер визија о Јован дикхља бут мануша таро са о нацие хем чхибја сар служинена е Јеховаске. О бакхро, кова со претставинела е Исусе, грижинела пе сине ленге хем ингарела лен сине ко пања со дена живото. Покасно, ки јавер визија о Јован дикхела е Исусе сар Цари ко небо хем леа о 24 старешине. Ки јавер визија, о Јован дикхела сар о Исус боринела пе е аждереа, кова сој о Сатана, хем лескере демоненцар. О Исус фрдинѓа лен таро небо теле ки Пхув.

Пало адава, о Јован дикхља нешто бут шукар, сар о Бакхро хем о 144.000 бириме терѓона ки планина Сион. Исто аѓаар, дикхља сар јекх ангели летинела околу и Пхув хем вакерела е манушенге те шунен е Девле хем те славинен ле.

Јавер визија сине баши и војна Армагедон. Ки адаја војна, о Исус пле небесно војскаја побединѓа е Сатана хем лескере лошно свето. Ки последно визија, о Јован дикхља сар ко небо хем ки Пхув иси совршено мир. О Сатана хем окола сој тари лескири страна сине целосно уништиме. Ко крајо, сарине ко небо хем ки Пхув славинена сине е Девлескоро свето анав, Јехова, хем служинена сине само леске.