Писмо таро Водечко тело

Мангле пхраљален хем пхењален,

Сар слуге е Јеховаскере, амен мангаја лескоро Лафи, и Библија. Ој кеда керела лафи баши историја, увериме сием кај дела точна информацие, кај иси ла корисна советија хем поуке хем ко бут шужо начин сикавела аменге кај о Девел мангела са е манушен (Псалм 119:105; Лука 1:3; 1. Јованескоро 4:19). Мангаја те поможина е јаверенге да те сикљовен о скапоцена чачипа таро е Девлескоро Лафи. Адалеске, мило аменге со акана иси амен акава лил, е насловеа „Поуке со шај те сикљове тари Библија“. Те дикха која тани лескири цел.

Акава лил првенствено тано кердо е чхавенге. Ама, исто аѓаар шај те поможинел е возрасна манушенге со мангена те џанен повише баши Библија. Адалеске со и Библија тани лил са е манушенге, о поуке тари акаја публикација шај те поможинен секоле манушеске те овел чаче среќно.

О лил користинела о библиска извештаија те шај те раскажинел аменге со уло таро почеток кеда сине кердо о прво мануш хем понадари. Сине дендо баро труд те шај о настанија тари Библија те претставинен пе ко јасно хем едноставно начин хем, кобор со шај, ко редо сар со случинѓе пе.

Ама, ко акава лил нане само раскажиме настанија тари Библија. О тексти хем о слике керде тане те шај те претставина аменге о настанија со уле хем те хаљова сар осетинѓе пе о мануша сој спомниме.

Акаја публикација поможинела аменге те дикха кај и Библија тани лил која со керела лафи башо мануша со чаче постојнена сине — мануша со шунена сине е Јехова хем мануша со на шунена ле сине. Исто аѓаар, поттикнинела амен те сикљова таро ленгоро пример (Римјања 15:4; 1. Коринќања 10:6). Акава лил тано делимо ко 14 делија. Ко почеток таро секова дело тане денде о главна поуке со шај те сикљова лен.

Ако сиан родители, шај заедно те чхавеа те читине јекх лекција, те керен лафи башо слике хем пало адава те читинен о библиска стихија ко кола со темелинела пе и лекција. Поможин те чхавеске те хаљол сар тане поврзиме о библиска стихија е поукенцар тари лекција. Слично аѓаар шај те кере кеда поможинеа јекхе возрасно манушеске те џанел и порака тари Библија.

Надинаја амен кај акава лил ка поможинел са е искрена манушенге — е терненге хем е пхуренге — те сикљовен таро е Девлескоро Лафи хем те икерен лескере поуке ко пло живото. Аѓаар, ола да ка овен дело тари е Девлескири фамилија коте со иси мангипе.