Сар мангела о Девел те обожавина ле?

Сар со дикхлем ки претходно лекција, о Девел на прифатинела са о религие. Сепак, амен шај те обожавина амаре Створителе ко начин со керела ле бахтало. Кова „обожавибе“ [или која религија] прифатинела о Девел? (Јаков 1:27, фуснота.) Те дикха со сикавела и Библија.

1. Котар шај те сикљова сар те обожавина е Девле ко исправно начин?

Амен адава шај те сикљова тари Библија. Ки молитва о Исус вакерѓа е Девлеске: „Тло лафи тано чачипе“ (Јован 17:17). Несаве религие на прифатинена о чачипе сој тано ко е Девлескоро Лафи и Библија. Наместо адава, ола повише икерена пе ко манушикане сикљојба хем традицие. Ама, о Јехова на мангела околен со „отфрлинена е Девлескири заповед“. (Читин Марко 7:9.) Тари јавер страна, амен кераја е Девле бахтало кеда икераја амен ки Библија хем лакере советија.

2. Сар ваљани те обожавина е Јехова?

Адалеске со о Јехова тано амаро Створители, ов заслужинела те обожавина само лесте (Откровение 4:11). Акава значинела кај амен мора те манга хем те обожавина само ле, бизо те користина несаве идолија, слике или иконе. (Читин Исаија 42:8.)

Амаро обожавибе мора те овел „свето хем прифатливо“ е Јеховаске (Римјаните 12:1). Акава значинела кај амен ваљани те живина спрема лескере законија. На пример, окола со мангена е Јехова, икерена пе ко лескере мерилија башо брако. Исто аѓаар, ола избегинена штетна навике, сар сој о пушибе цигаре хем о злоупотребибе дрога хем алкохол.a

3. Соске ваљани те обожавина е Јехова заедно е јаверенцар?

Ко амаре состанокија со икераја лен секова курко иси амен прилика заедно е јаверенцар те фалина е Јехова (Псалм 111:1, 2). Јекх начин сар кераја адава тано аѓаар со гиљаваја гиља коленцар со фалинаја е Девле. (Читин Псалм 104:33.) О Јехова родела те ова присутна ко состанокија соске мангела амен хем соске џанела кај ола ка поможинен аменге те ова бахтале засекогаш. Ко состанокија амен охрабринаја е јаверен хем ола охрабринена амен.

ДОЗНАЈН ПОВИШЕ

4. На ваљани те користина слике или предметија кеда обожавинаја е Девле

ВИДЕОКЛИПИ: Дали о Девел прифатинела религиозна слике хем идолија кеда обожавинаја ле? (3:26)

• Со случинѓа пе кеда о Израелција мангле те обожавинен е Девле јекхе кипеа?

Несаве мануша користинена слике или предметија кеда обожавинена е Девле соске аѓаар мангена те осетинен пе попаше леа. Ама, адава уствари цидела лен подур лестар. Читин 2. Мојсеева 20:4-6 хем Псалм 106:35, 36, а пало адава керен лафи башо акала пучиба:

• Кола слике или предметија дикхљан кај о мануша користинена кеда обожавинена е Девле?

• Со мислинела о Јехова башо адава со користинена слике или предметија?

• Со мислинеа ту башо адава те користинел пе слике или предметија?

5. Ако обожавинаја само е Јехова ка ова ослободиме таро ховавне сикљојба

ВИДЕОКЛИПИ: О чачипе ослободинѓа ман (5:16)

Читин Псалм 91:14, а пало адава керен лафи башо акава пучибе:

• Со ветинѓа о Јехова кај ка керел баши аменде ако сикаваја кај мангаја ле адалеа со обожавинаја само ле?

6. Амен обожавинаја е Девле ко состанокија

Амен фалинаја е Јехова хем охрабринаја амен јекх јекхеа аѓаар со гиљаваја хем даја коментарија ко состанокија. Читин Псалм 22:22, а пало адава керен лафи башо акала пучиба:

• Дали уживинеа те шуне коментарија ко состанокија?

• Дали мангеа ту да те де јекх коментари?

7. О Јехова тано бахтало кеда вакераја е јаверенге адава со сикљоваја

Иси бут начинија сар шај те вакера е јаверенге о чачипа тари Библија. Читин Псалм 9:1 хем 34:1, а пало адава керен лафи башо акава пучибе:

• Која бути со сиклиљан тари Библија би мангеа те вакере е јаверенге?

СО СИКЛИЛЕМ

Амаро Створители тано бахтало кеда обожавинаја само ле, кеда фалинаја ле ко состанокија хем кеда вакераја е јаверенге башо адава со сиклилем.

Сар ка одговорине?

• Котар шај те сикљова башо адава сар мангела о Девел те обожавина ле?

• Соске ваљани те обожавина само е Јехова?

• Соске ваљани заедно е јаверенцар те обожавина е Девле?

ИСТРАЖИН

Ко искуство е насловеа „Повеќе не им робувам на идолите“, читин сар јекх џувли чхинавѓа те обожавинел идолија.

„Библијата менува животи“ (Стражарска кула таро 1 јули 2011)

Сикљов со шај те поможинел туке те де коментарија ко состанокија.

„Фалин е Јехова ко собрание“ (Стражарско кула таро јануари 2019)

Дикх сар јекхе терне сине ле корист таро адава со сине присутно ко состанокија иако на сине леске локхо те авел ки ленде.

О Јехова грижинѓа пе манге (3:07)

Бут мануша верујнена кај о крсто претставинела о христијанство. Ама, дали амен ваљани те користина ле ко амаро обожавибе?

„Соске е Јеховаскере сведокија на користинена крсто?“ (интернет статија)