ЛЕКЦИЈА 29

Со овела аменцар кеда мераја?

Печатимо издание

Дали муло тутар некој кас со мангљан? Ко асавко пхаро периоди шај пучеа тут: „Со овела аменцар кеда мераја? Дали ка шај некогаш палем те дикха амаре манглен со муле?“ Ки акаја хем ки следно лекција дикх сар о одговорија со иси ки Библија башо акала пучиба дена амен утеха.

1. Со овела аменцар кеда мераја?

О Исус спорединѓа о мерибе хор сојбаја. Јекх мануш кеда хор совела ов нане свесно башо адава со случинела пе околу лесте. Слично аѓаар, кеда некој мерела ов нане свесно башо ништо, на осетинела нисави дукх хем на цидела муке. И Библија јасно вакерела: „О муле на џанена ништо“. (Читин Проповедник 9:5.)

2. Соске тано шукар те џана со чаче овела кеда мераја?

Бут џене дарана таро мерибе хем таро муле. Ама, адава со вакерела и Библија башо муле шај те овел бут утешно. О Исус вакерѓа: „О чачипе ка ослободинел тумен“ (Јован 8:32). Спротивно таро адава со сикавена несаве религие, и Библија сикавела кај е мануше нане ле душа која со живинела пало мерибе. Адава значинела кај никој на мучинела пе пало мерибе. Исто аѓаар, адалеске со о муле нане свесна башо ништо, ола нашти ни те поврединен амен. Адалеске на ваљани те обожавина е мулен хем на ваљани те кера нисаве адетија ленге, а ни те молина амен баши ленгири душа.

Несаве мануша вакерена кај шај те керен лафи е муленцар. Ама, адава нашти те овел соске, сар со сиклилем англедер, „о муле на џанена ништо“. Окола со мислинена кај керена лафи е муленцар, ола шај уствари керена лафи е демоненцар кола со керена пе сар о мануша со муле. Адава со џанаја о чачипе башо муле заштитинела амен таро демонија. О Јехова предупрединела амен те на пробина те ава ко контакт е муленцар, соске мангела те заштитинел амен таро демонија. (Читин 5. Мојсеева 18:10-12.)

ДОЗНАЈН ПОВИШЕ

Сикљов повише башо адава со вакерела и Библија башо мерибе. Адава ка уверинел тут кај о Девел сој пхердо мангипаја никогаш на би мучинела околен со муле.

Јекх мануш хем лескере дуј тикне чхаве бешена ки јекх клупа ко парујбе лескере ромњакоро која сој е чхавенгири дај. О амала хем и фамилија але те утешинен лен.

3. Со чаче овела е муленцар?

Е манушен ко цело свето иси лен различна верувања башо адава со овела аменцар кеда мераја. Џанѓола пе, нашти са адала верувања те овен чаче.

Саво верување башо муле тано вообичаено ко тхан коте со живинеа?

Те шај те џане со сикавела и Библија башо адава со овела кеда мераја, дикх о ВИДЕОКЛИПИ.

ВИДЕОКЛИПИ: Со овела е манушенцар пало мерибе? — извадок (1:19)

Слике: Сцене таро видеоклипи „Со овела е манушенцар пало мерибе? — извадок“. 1. Јекх муло мануш пашљола ко кревети ки болница. 2. Јекх мануш кова со бешела машкар дуј мануша ко вози совела џикоте возинела пе.

Читин Проповедник 3:20, а пало адава керен лафи башо акала пучиба:

Спрема акава стихо, со овела е манушеа кеда мерела?
Дали несаво дело таро мануш живинела пало мерибе?

И Библија вакерела аменге башо мерибе е Лазарескоро, кова со сине паше амал е Исусеа. Џикоте читинеа Јован 11:11-14, приметин со вакерѓа о Исус башо Лазар кова со муло. Пало адава керен лафи башо акала пучиба:

Солеа спорединѓа о Исус о мерибе?
Сар акаја споредба сикавела аменге ки сави состојба тане о муле?
Дали туке логично адава со вакерела и Библија башо муле?

4. О чачипе башо муле ослободинела амен таро ховавне сикљојба

Ако џанаја о чачипе башо муле, тегани нане те дара лендар. Читин Проповедник 9:10, а пало адава керен лафи башо акава пучибе:

Дали шај о муле те поврединен амен?

О чачипе тари Библија исто аѓаар ослободинела амен таро верување кај ваљани те кера нешто башо муле или чак кај ваљани те обожавина лен. Читин Исаија 8:19 хем Откровение 4:11, а пало адава керен лафи башо акава пучибе:

Со мислинеа, сар осетинела пе о Јехова кеда некој обожавинела е мулен или родела лендар помош?

Слике: Обичаија со керена пе башо муле. 1. Јекх мануш перела ко кочака хем молинела пе англо јекх гробо хем анѓа хајбаске. 2. Трин мурша таро јекх племе кхелена уравде ко маске. 3. Јекх парада таро мануша пхиравена маске таро костури хем ингарена јекх бари фигура таро костури ко диве е муленгоро. — О чачипе башо муле ослободинела амен таро обичаија со на мангела лен о Јехова

5. О чачипе башо муле утешинела амен

Бут џене мислинена кај пало мерибе ка овен казниме башо лошна буќа со керѓе. Ама, утешно тано адава со џанаја кај никој на мучинела пе пало мерибе, чак ни окола со керѓе бут лошна буќа. Читин Римјаните 6:7, а пало адава керен лафи башо акава пучибе:

И Библија вакерела кај кеда јекх мануш мерела, ов англо Девел тано ослободимо таро пле гревија. Спрема акава, со мислинеа, дали некој откеда мерела тано мучимо башо гревија со керѓа џикоте сине џивдо?

Кобор повише запознајнаја е Јехова, добором повише хаљоваја кај ов никогаш на би мучинела е мулен. Читин 5. Мојсеева 32:4 хем 1. Јованово 4:8, а пало адава керен лафи башо акала пучиба:

Дали јекх Девел коле со иси ле асавке особине, сар сој спомниме ко акала стихија, ка дозволинел о муле те овен мучиме?
Со мислинеа, дали о чачипе башо муле шај те дел тут утеха хем соске?

НЕСАВЕ ШАЈ ВАКЕРЕНА: „Кој џанела со овела аменцар кеда мераја? Никој на иранѓа пе адатхар па те вакерел аменге“.