Сар те заштитина амен тари јекх опасно стапица е Сатанаскири

ЏИКОТЕ о Израелција спреминена пе сине те накхен и река Јордан хем те кхувен ки пхув која со о Девел ветинѓа кај ка дел ла ленге, несаве џувља кола со на сине Израелке але те посетинен лен. Ола викинѓе е израелско муршен ки јекх бари гозба. Адава шај дикхјола сине сар бут шукар прилика. Е Израелцонге сигурно сине привлечно и прилика те овен лен неве амала, те кхелен хем те хан шукар хајбе. Иако о обичаија хем о морална мерилија адале џувљенгере разликујнена пе сине таро адава со сине сикавде о Израелција преку е Девлескоро закони, несаве лендар шај мислинѓе песке: „Ола нане те влијајнен упри аменде. Ка пазина“.

Со случинѓа пе? О библиско извештај вакерела аменге: „О народо почминѓа те керел сексуално неморал е моавска чхаенцар“. Уствари, адала џувља мангле те чхивен е Израелцон те обожавинен ховавне девлен. Хем успејнѓе ко адава! Нормално тано адава со о Јехова бут хољанѓа против о Израел (4. Мој. 25:1-3).

Адала Израелција пхагле е Девлескоро закони ко дуј начинија: клањинѓе пе е идоленге хем керѓе сексуално неморал. Бут џене муле адалеске со на сине послушна (2. Мој. 20:4, 5, 14; 5. Мој. 13:6-9). Панда пожално тано ако размислинаја ко кова време случинѓа пе акава. Те на пхаѓен сине е Девлескоро закони, адала Израелција панда хари ка накхен сине о Јордан хем ка кхувен сине ки Ветими пхув (4. Мој. 25:5, 9).

Поврзимо акалеа, о апостол Павле пишинѓа: „Са адала буќа случинѓе пе ленге сар пример хем тане пишиме сар предупредување аменге со живинаја ко крајо акале светоскоро“ (1. Кор. 10:7-11). Сигурно, о Сатана сине бахтало кеда некој таро адала Израелција керѓе пхаро грево, хем адалеске о Јехова на дозволинѓа ленге те кхувен ки Ветими пхув. Ваљани сериозно те хаљова адава предупредување соске џанаја кај о Сатана ка овел бут бахтало ако успејнела те чхинавел амен те кхува ко е Девлескоро нево свето!

ОПАСНО СТАПИЦА

О Сатана авдиве мангела те астарел ки стапица е Девлескере слуген, хем те шај те успејнел ко адава ов користинела тактике кола со англедер успејнѓе леске ко бут мануша. Сар со дикхлем, ов користинѓа о сексуално неморал те шај те завединел е Израелцон. Ко амаро да време о неморал тано опасно стапица. Те шај те успејнел те астарел амен ки адаја стапица, о Сатана користинела и порнографија.

Авдиве некој шај те дикхел порнографија бизо никој те џанел башо адава. Англедер бут берша, окова со мангела сине те дикхел порнографија мора сине те џал ко кино коте со сикавена пе неморална филмија или те џал ко посебна дуќане те шај те кинел лила или списанија со иси лен порнографска содржине. Бут мануша веројатно на џана сине ко асавке тхана адалеске со лаџана сине те на дикхел лен некој. Ама авдиве, секас со иси интернет шај те дикхел порнографија ки бути или ко саво било јавер тхан. А ко бут пхувја, хем о мурша хем о џувља шај те дикхен порнографија кхере.

Ама адава нане са. О електронска уредија керена полокхо те авел пе џи ки порнографија. О мануша шај те дикхен неморална слике ко адала уредија џикоте пхирена ки улица, или џикоте возинена пе ко автобуси или ко вози.

Адалеске со авдиве тано бут полокхо гаравиндор те дикхел пе порнографија, ој керела штета бут повише манушенге него англедер. Бут мануша со дикхена порнографија уништинена пло брако, на дикхена шукар ки песте хем мељарена пли совест. Сој панда полошно, шај те руминен пло амалипе е Јеховаја. Спрема акава, шај те ове сигурно кај и порнографија тани бут штетно. Ко бут случаија ој керела баре емоционална ране околенге со дикхена ла. Иако асавке ране шај похари те сасљон, ола шај те мукхен белегија со ка ачховен бут време.

Ама о Јехова шај те заштитинел амен тари акаја стапица е Сатанаскири. Ако мангаја те овел амен е Јеховаскири заштита, мора те кера адава со о Израелција ко пурано време на керѓе — верно те шуна е Јехова (2. Мој. 19:5). Мора те ова свесна кај о Девел мрзинела и порнографија. Соске шај те ова сигурна ко адава?

МРЗИН ЛА САР СО МРЗИНЕЛА ЛА О ЈЕХОВА

Размислин башо акава: о законија со денѓа лен о Девел е Израелцонге сине појавер таро законија со сине е јавере народон ко адава време. Е Девлескере законија сине сар јекх ѕидо со заштитинела сине е Израелцон таро лошно влијание е јавере народонгоро (5. Мој. 4:6-8). Адала законија јасно сикавѓе јекх важно чачипе — о Јехова мрзинела о сексуално неморал.

Кеда спомнинѓа о неморална буќа со керена сине о народо со живинена околу о Израелција, о Јехова вакерѓа: „Ма керен... адава со керела пе ки ханаанско пхув, колате со ингарава тумен... И пхув тани мелали, хем ка казнинав ла башо лакере грешке“ (3. Мој. 18:3, 25) Е свето Израелско Девлеске, адава со керена сине о Ханаанција сине добором бут одвратно со чак и пхув коте со живинена сине ули мелали.

Иако о Јехова казнинѓа е Ханаанцон, о јавера народија понадари да керена сине сексуално неморал. Повише таро 1.500 берш пало адава, башо народија машкар коленде живинена сине о христијања, о Павле пишинѓа кај „нашавѓе секова чувство башо морал“. Уствари, „ола мукхле пе ко погрешна постапке бизи нисави лаџ те шај алчно те керен секова мелалипе“ (Еф. 4:17-19). Авдиве да бут џене тане бут неморална хем ни хари на лаџана башо адава. Адалеске, о чачутне слуге е Девлескере ваљани бут те пазинен со дикхена хем кобор со шај повише те аракхен пе таро неморална постапке сој ко акава свето.

И порнографија на сикавела поштовање спрема о Девел. Ов створинѓа е манушен спрема пло лико хем денѓа амен чувство башо адава сој исправно а сој погрешно. О Девел сикавѓа бари мудрост кеда денѓа законија башо сексуална односија. Лескири намера сине о сексуална односија те анен задоволство околенге сој ко брако (1. Мој. 1:26-28; Изр. 5:18, 19). Ама, со керена окола со пишинена, сниминена или ширинена о порнографско материјали? Ола целосно газинена е Девлескере морална мерилија. Чаче, о мануша со ширинена и порнографија на поштујнена е Јехова. О Девел ка судинел околенге со отфрлинена лескере мерилија адалеа со сниминена или ширинена неморално материјали (Рим. 1:24-27).

А сар тано е манушенцар со намерно читинена или дикхена порнографија? Несаве шај дикхена ко адава сар забава со нане опасно. Ама, ола уствари поддржинена околен со на поштујнена е Јеховаскере мерилија. Шај на сине лен асавки намера кеда почминѓе те дикхен порнографија. Сепак, и Библија јасно сикавела кај о слуге е чачутне Девлескере ваљани те мрзинен и порнографија. И Библија поттикнинела амен: „Тумен со мангена е Јехова, мрзинен адава сој лошно!“ (Пс. 97:10).

Чак окола со мангена те избегинен и порнографија шај те овел ленге пхаро те керен адава. Адалеске со сием несовршена шај те овел аменге пхаро те борина амен е мелале сексуална желбенцар. Исто аѓаар, амаро несовршено срце шај те убединел амен кај нане погрешно те дикха порнографија (Ерем. 17:9). Ама, бут џене со уле е Девлескере слуге побединѓе ки адаја борба. Акава шај те уверинел тут кај ту да шај те победине ако боринеа тут асавке погрешна желбенцар. Те дикха сар е Девлескоро Лафи шај те поможинел туке те на мукхе о Сатана те астарел тут ки акаја замка.

ОТФРЛИН О НЕМОРАЛНА МИСЛЕ

Сар со више дикхлем, бут Израелција мукхле о неисправна желбе те анен лен џи ки катастрофа. Шај авдиве да те случинел пе акава. О Јаков, о пхрал е Исусескоро, керѓа лафи баши акаја опасност: „Секова јекх тано искушимо аѓаар со цидела ле хем ховавела ле лескири желба. Кеда и желба овела бут бари, анела џи ко грево“ (Јак. 1:14, 15). Кеда јекх неисправно желба ка развинел пе џи ки несави мера ко некаскоро вило, бут бари тани и веројатност кај адава мануш ка керел грево. Адалеске мора те отфрлина о неморална мисле.

Ако приметинеа кај често размислинеа башо неморална буќа, одма кер нешто. О Исус вакерѓа: „Ако тло вас или тло про чхивела тут те кере грево, чхин ле хем фрде ле тутар... Хем ако тли јакх чхивела тут те кере грево, икал ла хем фрде ла тутар!“ (Мат. 18:8, 9). О Исус на мангља те пхенел кај ваљани те кера амен сакати. Ов денѓа акаја споредба те поможинел аменге те хаљова кај ваљани те дикха со чхивела амен те размислина башо неморална буќа, хем тегани сигате хем одлучно те кера о потребна промене. Сар шај те применина акава совет кеда керела пе лафи баши порнографија?

Ако икљола туке несаво порнографско материјали, на ваљани те мислине туке: „Адава нане те влијајнел упри манде“. Наместо адава, одма дикх јавертхе. Одма ачхав и телевизија, о компјутери или о мобилно уред. Размислин башо нешто сој чисто. Ако кереа аѓаар, адава ка поможинел туке те контролирине тле мисле наместо те мукхе о погрешна желбе те контролиринен тут.

СО АКО АНГЛЕДЕР ДИКХЉАН ПОРНОГРАФИЈА?

Со ваљани те кере ако успејнѓан те чхинаве те дикхе порнографија, ама понекогаш палем авена туке адала слике ко мисле? О порнографска слике хем о мелале мисле шај те ачховен ки годи бут време. Ола шај те појавинен пе ко било кова време. Ако случинела пе туке нешто асавко, шај ка овел тут желба те кере нешто со нане чисто, сар на пример те мастурбирине. Адалеске ов свесно кај асавке мисле шај те појавинен пе туке таро јекх пути хем ов спремно те борине тут против ленде.

Ов са поодлучно те размислине хем те постапине аѓаар сар со мангела о Јехова. Ов сар о апостол Павле кова со сине спремно те марел пло тело хем те икерел ле сар робо (1. Кор. 9:27). Ма мукх о погрешна желбе те контролиринен тут. О Павле пишинѓа: „Менинен тумен аѓаар со ка менинен тумаро начин сар размислинена, те шај те овен увериме со мангела о Девел те керен — буќа сој тане шукар, совршена хем прифатлива леске“ (Рим. 12:2). Ма бистре — ка ове бут побахтало ако размислинеа хем постапинеа аѓаар сар со мангела о Девел него ако задоволинеа тле погрешна желбе.

Трудин тут те памтине несаве библиска стихија. Пало адава, кеда ка појавинен пе туке несаве неисправна мисле, де тутар са те размислине башо адала стихија. О стихија сар сој Псалм 119:37, Исаија 52:11, Матеј 5:28, Ефешаните 5:3, Колошаните 3:5 хем 1. Солуњаните 4:4-8 ка поможинен туке те овел тут исто стави баши порнографија сар о Јехова хем те хаљове сар ов мангела те постапине.

Со ако ко несаве прилике осетинеа кај нашти те борине тут е желбаја те дикхе или те размислине башо неморална буќа? Џа пало пример е Исусескоро (1. Пет. 2:21). Откеда крстинѓа пе, о Сатана повише пути искушинѓа ле. Со керѓа о Исус? Ов секогаш спротивставинела пе сине. Адалеа со цитиринѓа различна стихија таро е Девлескоро Лафи, на пело ко искушенија е Сатанаскере. О Исус вакерѓа: „Наш, Сатано!“, хем о Сатана мукхља ле (Мат. 4:1-11). О Исус никогаш на чхинавѓа те спротивставинел пе е Бенгеске, а на ваљани те чхинаве ни ту. О Сатана хем лескоро свето понадари да ка пробинен те пхерен тли годи неморална мисленцар, ама продолжин те борине тут. Ту шај те победине ки борба против и порнографија. О Јехова шај те поможинел тут те победине тле душмане.

МОЛИН ТУТ Е ЈЕХОВАСКЕ ХЕМ ОВ ЛЕСКЕ ПОСЛУШНО

Понадари да молин е Јехова те поможинел туке. О Павле вакерѓа: „Вакерен е Девлеске со родена. Хем о мир таро Девел, кова сој упредер секоја мисла, ка аракхел тумаре виле хем тумаре мисле преку о Христос Исус“ (Фил. 4:6, 7). О Девел ка дел тут андруно мир со ка поможинел туке те на кере нешто погрешно. Ако овеа паше е Јеховаја, ов да ка овел паше туја (Јак. 4:8).

И најшукар заштита таро е Сатанаскере стапице тани о паше амалипе е Најбаре Владетелеа ко универзум. О Исус вакерѓа: „Авела о владетели е светоскоро [о Сатана]. Ле нане ле сила упри манде“ (Јован 14:30). Соске о Исус сине добором уверимо ко адава? Ов јекх пути објаснинѓа: „Окова со бичхалѓа ман тано манцар. На мукхља ман коркори, соске ме секогаш керава адава сој спрема лескири волја“ (Јован 8:29). Џикоте трудинеа тут те кере бахтало е Јехова, шај те ове сигурно кај ов нане те мукхел тут. Избегин акаја стапица — и порнографија — хем тегани нане те ове жртва е Сатанаскири.