Со ка керел е Девлескоро Царство?

СО ВИШЕ КЕРЃА Е ДЕВЛЕСКОРО ЦАРСТВО?

Ки англуни статија керѓем лафи башо знако со вакерѓа ле о Исус. Адава знако тано јасно доказ кај е Девлескоро Царство, коте сој Цари о Исус, почминѓа те владинел ко небо.

Тари Библија сикљоваја кај кеда о Исус почминѓа те владинел, ов прво фрдинѓа е Сатана хем е демонен таро небо. Акана ола шај само те влијајнен упри Пхув хем адалеске таро 1914 берш и ситуација ко свето овела са полошно (Откровение 12:7, 9).

Иако о условија ко свето овена секова диве са попхаре, о Исус, сар Цари таро е Девлескоро Царство, керѓа несаве буќа те шај те поможинел е манушен ки цело Пхув. На пример, и библиско образовно програма, која со пророкујнѓа о Исус, поможинела буте манушенге те сикљовен те применинен о библиска советија ко пло живото (Исаија 2:2-4). Аѓаар милиоња мануша сиклиле сар те овел лен побахтали фамилија хем те на дозволинен и бути или о материјална буќа те лен о прво тхан ко ленгоро живото. Акала мануша више авдиве живинена јекх пошужо живото хем дена пестар са те шај те стекнинен особине кола со мангела о Девел хем аѓаар те поддржинен о Царство.

СО КА КЕРЕЛ Е ДЕВЛЕСКОРО ЦАРСТВО ПАНДА ХАРИ?

Иако о Исус више почминѓа те владинел ко небо, ки Пхув панда владинена манушикане владе. Сепак, о Девел вакерѓа е Исусеске те џал машкар пле душмања хем те владинел упри ленде (Псалм 110:2). Панда хари о Исус ка уништинел са пле противникон хем ка анел спасение околенге со мангена те овен послушна е Девлеске.

Е Девлескоро Царство ка керел акала буќа:

• Ка уништинел и ховавни религија. О религие со ширинена ховајба башо Девел хем со керена е манушенгоро живото пхаро ка овен уништиме. Ки Библија и ховавни религија претставими тани сар блудница. О мануша ка овен шокириме кеда ка овел уништими (Откровение 17:15, 16).

• Ка уништинел о манушикане владе. Е Девлескоро Царство ка анел крајо е манушикане владенге (Откровение 19:15, 17, 18).

• Ка уништинел е лошна манушен. Со ка овел околенцар со игнориринена е Девлескере законија хем на мангена те менинен пе? И Библија вакерела кај о лошна мануша ка овен уништиме тари Пхув (Изреки 2:22).

• Ка уништинел е Сатана хем е демонен. О Сатана хем о демонија нане више те ховавен е манушен (Откровение 20:3, 10).

Со значинена са акала буќа околенге со поддржинена е Девлескоро Царство?

СО КА КЕРЕЛ Е ДЕВЛЕСКОРО ЦАРСТВО Е МАНУШЕНГЕ?

Сар Цари ко е Девлескоро Царство, о Исус ка керел бут повише таро о манушикане владетелија. Ама, о Исус нане те владинел коркори него заедно 144.000 царенцар коленге со и Библија вакерела кај тане бириме тари Пхув (Откровение 5:9, 10; 14:1, 3). О Исус ка грижинел пе е Девлескири волја те керел пе акате ки Пхув. Саве буќа е Девлескоро Царство ка керел е манушенге?

• Ка цидел о насвалипа хем о мерибе. „Нијекх со живинела ки пхув нане те вакерел: ‚Насвало сиум‘“. Исто аѓаар, „о мерибе нане те овел више“ (Исаија 33:24; Откровение 21:4).

• Ка анел чачутно мир хем сигурност. „Баро мир ка овел тле чхавен“ хем „секова јекх ка бешел тели пли дракх хем тели пли смоква хем нијекх нане те даравкерел лен“ (Исаија 54:13; Михеј 4:4).

• Ка дел амен бути со исполнинела амен. „Адала сој тане бириме мандар ка уживинен ки бути со ка керен пе вастенцар. Нане те трудинен пе џабе“ (Исаија 65:22, 23).

• Ка решинел о еколошка проблемија. „Ка овен бахтале и пустина хем и шуки пхув хем о пусто тхан ка овел пхердо лулуѓенцар“ (Исаија 35:1).

• Ка сикавел е манушен башо Девел те шај те добинен вечно живото. „Те шај те овел лен вечно живото ваљани шукар те пенџарен тут, е јекхе чачутне Девле, хем околе со бичхалѓан ле, о Исус Христос“ (Јован 17:3).

О Девел мангела те добине акала берекетија (Исаија 48:18). Ки следно статија ка овел објаснимо со ваљани те кере панда авдиве те шај те живине ко асавке шуже условија.