Поддржин е Девлескоро Царство панда акана!
Замислин туке кај ко тхан коте со живинеа авела са попаше јекх страшно бура. О медиумија предупрединена е манушен: „НАШЕН ТАРО ТУМАРЕ КХЕРА! АРАКХЕН ТУМЕНГЕ ТХАН ГАРАЈБАСКЕ!“ Со ка овел мудро те кере? Џанѓола пе, те наше ко јекх сигурно тхан.
Ко симболично начин, сарине амен панда хари ка соочина амен јекхе страшно „бураја“ — јекх „бари неволја“ колаке со керѓа лафи о Исус (Матеј 24:21). Нашти те наша тари акаја неволја. Сепак, шај те кера нешто те шај те заштитина амен. Сој тано адава?
Ки јекх проповед, о Исус Христос денѓа акава совет: „Најангле роден о царство хем е Девлескири праведност“ (Матеј 6:33). Сар шај те кера адава?
Најангле роден е Девлескоро Царство. Адава значинела кај е Девлескоро Царство ваљани те овел аменге поважно таро било со јавер (Матеј 6:25, 32, 33). Соске? Адалеске со о мануша нане способна те решинен о проблемија ко свето. Адава ка успејнел само е Девлескоро Царство.
Роден е Девлескири праведност. Ваљани те трудина амен те живина спрема е Девлескере праведна законија хем начелија. Соске? Ако коркори одлучинаја сој тано шукар, а сој лошно, ка овен амен лошна последице (Изреки 16:25). Тари јавер страна, ако живинаја спрема е Девлескере мерилија, на само со ка кера бахтало е Девле него исто аѓаар адава ка овел амаре шукарипаске (Исаија 48:17, 18).
Соске тано важно секогаш те рода е Девлескоро Царство хем лескири праведност? О Исус предупрединѓа те на мукха несаве буќа те лен амаро внимание, сар на пример о паре, мислиндор кај ола ка анен аменге сигурност. Или те мукха о секирацие ко живото те анен амен џи ко адава степен те на овел амен више време те рода е Девлескоро Царство (Матеј 6:19-21, 25-32).
О Исус ветинѓа аменге, кај ако поддржинаја е Девлескоро Царство, ка овен амен о потребна буќа авдиве, а ки иднина ка уживина ко вечна берекетија (Матеј 6:33).
Иако е Исусескере ученикија ко прво веко родинѓе најангле е Девлескоро Царство хем лескири праведност, ленгере проблемија на чхинавдиле. Сепак, ола сине заштитиме. Ко саво начин?
Адава со живинѓе спрема е Девлескере праведна мерилија заштитинѓа лен таро лошна последице коленцар со соочинена пе сине окола со на сине послушна е Девлеске. Ленгири бари вера ко Царство поможинѓа лен те соочинен пе чак е најпхаре проблеменцар. Исто аѓаар, о Девел денѓа лен „сила, која со накхавела и нормално“ те шај те издржинен о пхарипа (2. Коринќаните 4:7-9).
ДАЛИ НАЈАНГЛЕ КА РОДЕ Е ДЕВЛЕСКОРО ЦАРСТВО?
О Христијања ко прво веко шунѓе е Исусескири заповед најангле те роден е Девлескоро Царство. Ола сегде проповединена сине о шукар хабери башо Царство (Колошаните 1:23). Ама, дали некој керела адава проповедничко дело авдиве?
Оја! Е Јеховаскере сведокија свесна тане кај панда хари е Девлескоро Царство ка уништинел акава лошно свето. Адалеске керена са со шај те овен послушна е Исусескере лафенге: „Акава шукар хабери башо царство ка проповединел пе ко цело свето, башо сведоштво са е народонге, хем тегани ка авел о крајо“ (Матеј 24:14).
Дали ка прифатине о шукар хабери? Поттикнинаја тут те џа пало пример со мукле о мануша тари пурани диз Верија. Кеда о апостол Павле проповединѓа ленге о шукар хабери башо Царство, ола спремно прифатинѓе ле. Внимателно истражинѓе о Списија те шај те дикхен дали тано точно адава со шунѓе хем пало адава постапинѓе ко склад адалеа со сиклиле (Дела 17:11, 12).
Ту да шај те кере о исто. Ако родеа најангле е Девлескоро Царство хем лескири праведност, ка ове заштитимо панда акана, а ки иднина ка живине ко мир хем сигурност.