Ка ове ли ревно сар о Јехова хем сар о Исус ко периоди кеда ка овел и Спомен-свеченост?

1. Соске е Јеховаскере сведокија трудинена пе те џан побутер ки служба ко периоди кеда тани и Спомен-свеченост?

¹ О Јехова тано ревно те керел пи намера. Ко Исаија 9:7 тане спомниме несаве благословија со ка анел лен е Девлескоро Царство хем адатхе вакерела: „Адава ка керел ле и ревност е Јеховаскири кова тано упро са о војске“. Исто аѓаар, џикоте е Девлескоро чхаво сине ки Пхув, ов да сине бут ревно башо чачутно обожавање (Јован 2:13-17; 4:34). Секова берш, ко периоди кеда тани и Спомен-свеченост, бут објавителија ко цело сумнал трудинена пе те овен ревна сар о Јехова хем сар о Исус аѓаар со побутер ка џан ки служба. Ка ове ли ту да сар ленде?

2. Со ка поттикнинел амен и ревност те кера ки акција со ка почминел таро 7 март?

² Акција баши Спомен-свеченост: Акава берш и акција те делинен пе о покане башо Спомен ка почминел недела 7 март. Планирин сар шај те ове ревно ки служба ко адава периоди. О собранија ка овен бут радосна џикоте трудинена пе те завршинен со побутер таро ленгоро подрачје. Посебно трудин ту те канине адален со проучинеа ленцар и Библија, околен со посетинеа лен, те колеген тари бути, те фамилија хем амален тари школа, аѓаар со ка де лен и покана или ка сикаве ленге амари интернет-страница jw.org.

3. Сар шај те бајрара амари служба ко март хем април?

³ Помошно пионери: И ревност, исто аѓаар, ка поттикнинел амен побутер те џа ки служба. Бут џене, март хем април, ка шај те овен помошна пионерија адалеа со ка шај те џан ки служба 30 саатија. Ки Фамилијарно рат или ки лично студија молинен тумен хем размислинен сар шај тумен да те керен адава (Изр. 15:22). Ти ревност кеда ка овел и акција шај ка поттикнинел е јаверен да те овен ревна. Ако кереа промене ко то плани те џа побутер ки служба, тегани ка ове ревно сар о Исус (Мар. 6:31-34).

4. Саве берекетија ка овен амен ако сием ревна сар о Јехова хем сар о Исус?

⁴ Адава со ка ова ревна сар о Јехова хем сар о Исус ко периоди кеда ка овел и Спомен-свеченост ка анел аменге баре берекетија. Буте манушенге ко подрачје ка овел сведочимо. Ка ова бахтале адалеа со служинаја е Јеховаске хем со поможинаја е јаверенге (Дела 20:35). А со и најважно, ка кера адава со родела амендар амаро ревно Девел хем лескоро Чхаво.