Сар шај најшукар те користине о време ки служба
Ко 2014 берш, е Јеховаскере сведокија ки служба накхле 1.945.487.604 саатија. Акава сикавела кај амен сиам одлучна те ачхова зафатиме ки служба башо Јехова! (Пс. 110:3; 1. Кор. 15:58). Адалеске со „ачхило хари време“, шај ли те користина о време џикоте сиам ки служба те сведочина побутер манушенге? (1. Кор. 7:29).
Те шај најшукар те користина о време кеда сиам ки служба, ваљани те ова флексибилна. На пример, кеда сиан ки служба, ако бут пути накхавеа јекх или побутер саатија бизо те сведочине некаске, шај ли те сменине нешто те аракхе побутер манушен те шај те кере ленцар лафи? О околностија тане различна таро тхан ко тхан. Ама, о предлогија со ка дикха лен акана шај те поможинен ту пошукар те користине о време кеда сиан ки служба, а на те трошине ле бизи цел (1. Кор. 9:26).
Сведочибе таро кхер ко кхер: Бершенцар, о објавителија иси лен навика те џан сабајле ки служба таро кхер ко кхер. Ама, адалеске со бут мануша тане ки бути, шај ли те трудине ту те џа ки служба таро кхер ко кхер палоручко или акшамеске, кеда о мануша тане кхере хем одморинена пе? Кеда џаја дивескоро ки служба, поуспешно ка ове ако сведочинеа ки улица или ко деловно подрачје.
Сведочибе ко прометна тхана: О штандија хем о количке баши литература ваљани те терѓон ко е собраниескоро подрачје коте со накхена бут мануша. (Дикх ки Амари служба башо Царство таро јули 2013 берш, 5 стр.) Ако ко адава тхан на накхена бут мануша сар поангле, тегани о Одбор е собраниескоро шај ка одлучинел о штандија или о количке те чхивен пе ко тхана коте со накхена побутер мануша.
Повторна посете хем библиска студие: Ко време кеда нашти те аракхе е манушен таро кхер ко кхер, шај ли те планирине те џа ко повторна посете хем ко библиска студие? А сабота ако аракхеа побутер манушен сабајле ки служба таро кхер ко кхер, тегани шај ли те џа ко библиска студие палоручко или акшамеске? Те шај пошукар те користине о време ки служба, шај ли те планирине те кере повторна посете ко интересентија со бешена ко исто подрачје?
Иако пишинаја са о време со накхаваја ле ки служба, бут побахтале сиам кеда сведочинаја побутер манушенге. Ако дикхеа кај ки јекх гранка тари служба ко одредено време таро диве нашти аракхеа е манушен, тегани пробин јавер. Молин ту е Јеховаске, о „Господари е жетвакоро“, те водинел тут те шај најшукар те користине о време ки служба! (Мат. 9:38).