Несаве важна буќа башо конгрес

Програма: О сотрин диве и програма ка почминел ко 9:20 о саати. О удара ка овен пхравде ко 8:00 о саати. Кеда ка мукхел пе и музика, сарине ваљани те беша ко амаре тхана те шај те почминел и програма ко јекх достоинствено начин. Петок хем сабота и програма ка завршинел негде коро 17:00 о саати, а недела негде коро 16:00 о саати.

‚Фалин е Јехова гиљаја‘: Е Девлескоро народо панда ко пурано време фалинела сине е Јехова гиленцар. И музика авдиве да тани јекх важно бути те шај те фалина е Јехова (Пс. 28:7). И програма хем сабајле хем палоручко почминела музикаја. Акаја музика на мукхела пе само баши шукар атмосфера, него ој тани керди те сикавел амен башо Јехова хем лаја те фалина ле. Адалеске, кеда о претседавачи е програмакоро ка вакерел кај ка почминел и музика, тегани ваљани сарине те беша ко амаре тхана хем те шуна и музика, а на те кера аменге лафи. Аѓаар ка сикава кај ценинаја адава со трудинѓе пе о пхраља хем о пхења те башален ко оркестар. Дуј пути ко берш ола патуњена ко пло трошако хем џана ко Патерсон (Њујорк), коте со сниминена бут шужи музика те шај амен те уживина ки лате. Кеда ка шуна шукар и музика пало адава сарине ваљани те гиљава о теократска гиља коленцар ка фалина е Јехова.

Тхана бешибаске: Секова сабајле кеда ка овен пхравде о удара тари конгресно сала, молинаја тумен ма гуринен тумен те кхувен андре те шај те астарен туменге пошукар тхана. Ваљани те мислина е јаверенге хем ако ваљани те ова спремна те мукха ленге амаре омилена тхана. Адава ка сикавел кај сиам чачутне христијања хем ка поттикнинел е јаверен те славинен е Девле (Јован 13:34, 35; 1. Кор. 13:5; 1. Пет. 2:12). Тхана шај те астара само околенге со возинена пе ко исто врда аменцар, со џивдинена аменцар ко исто кхер или амаре гостонѓе хем околенге со проучинаја ленцар и Библија. Ма мукхен ништо ко столице коте со нане те бешел никој. Аѓаар о јавера ка џанен кола тхана тане слободна бешибаске. Е попхуренге хем е насваленге иси посебна тхана бешибаске. Нане бут асавке тхана, адалеске е насваленцар или е попхуренцар шај те бешен само јекх или дуј џене со поможинена лен.

Скромно урајбе: Ко конгрес ваљани те ова уравде скромно хем пристојно, а на ко стили сар со уравена пе о мануша ко акава сумнал (1. Тим. 2:9). Ваљани те на урава амен непристојно хем лежерно чак кеда пријавинаја амен или џаја аменге таро хотели или таро студентски дом, хем исто аѓаар ко слободно време англедер хем пали програма. Тегани нане те лаџа те пхирава амаре конгресна значке хем те кера лафи башо шукар хабери кеда ка овел амен прилика. Адава со примерно ка урава амен хем шукар ка понашина амен ко конгрес, ка поттикнинел буте искрена манушен те манген те шунен о чачипе хем ка радуња е Јехова (Соф. 3:17).

Кеда користинаја електронска уредија: Џикоте трањела и програма ка овел шукар те ачхава о гласо таро мобилна телефонија или јавера електронска уредија те на сметина е јаверенге. Ако користинеа апарати сликибаске, камера или таблет, тегани пазин ма те сметине е јаверенге те нашти те дикхен. Исто аѓаар, ка овел шукар џикоте трањела и програма ма те пишина СМС или имејл пораке ако нане амен потреба.

Пауза башо ручко: Молинаја тумен, ако шај анен туменге нешто хајбаске, тегани нане те овел потреба те џан негде јавертхе те кинен хајбаске. Шај те анен туменге тикни торба со икерела шудро хем те чхивен ла тели столица. Ко конгрес нане дозволимо те анен пе баре фрижидерија башо излет или стаклена буќа.

Прилогија: Шај те сикава кај ценинаја о конгрес кеда мукхаја доброволна прилогија ко кутие со и тане чхивде ки конгресно сала.

Иљачија: Ако леа иљачија со лена пе само ки рецепта, молинаја ту ле доволно туја те шај те овел ту ко конгрес, соске адари нашти те добине асавке иљачија. Окола со користинена инсулинска шприција хем сувја на смењена те фрден лен ко корпе башо ѓубре со и чхивде ки конгресно сала или адари коте со совена, асавке буќа ваљани те фрден пе директно ко контејнери.

Безбедност: Молинаја тумен, пазинен те на перен или те на лизган хем аѓаар те поврединен тумен. Секова берш ко конгрес иси некој со поврединела пе, посебно кеда уравена уче штикле. Најшукар биринен кундре со ка овен скромна хем удобна те шај безбедно те пхирен ленцар ко басамакија хем ко тхана коте со иси решетке.

Мануша со слабо шунена: И програма ка шај те шунел пе ки ФМ радиофреквенција ки конгресно сала. Башо адава ваљани те овел тумен тикно ФМ радио слушалкенцар ко батерие.

Количке чхавенге хем столице со кхедена пе: Молинаја тумен шунен о упатствија таро Конгресно одбор со и денде башо количке е чхавенгере хем башо столице со кхедена пе. О родителија шај те чхивен о седиштија е чхавенгере со чхивена пе ко врдија узи песте ки столица.

Парфемија: Побутер конгресија икерена пе ко пханле тхана. Адалеске ка овел шукар те на користина бут јака парфемија хем дезодорансија со шај те сметинен адаленге со иси лен проблемија дишибаја или јавера слична проблемија (1. Кор. 10:24).

Формулари Те молиме, посети го ова лице (S-43): Акава формулари ваљани те пхерел пе кеда неформално сведочинѓам некаске џикоте трајнела сине о конгрес хем ов сикавѓа интерес. О пхерде формуларија шај те ден пе ко Оддел баши литература или те дел пе е секретареске таро тумаро собрание.

Ресторантија: Шај те фалина е Јеховаскоро анав кеда понашинаја амен шукар ко ресторанти. Исто аѓаар ваљани те ова уравде пристојно сар јекх христијани. Ден бакшиши е келнереске ако адава тано нормално ко тумаро тхан.

Хотелија хем студенска домија:

1. Молинаја тумен, резервиринен собе кобор со ваљани туменге, хем ко собе нека совен мануша добором кобор со и дозволимо.

2. Ма откажинен и резервација, освен ако ули несави итно ситуација. Тегани адава керен ле кобор со шај порано, те шај о јавера со родена соба те овен сместиме (Мат. 5:37).

3. Ма готвинен ко собе ако нане дозволимо.

4. Ко хотелија или студентска домија коте со бизо лове дела пе сабалуко, кафа или јавера буќа, ваљани умерено те користина адала услуге.

5. Секогаш кеда ка кера лафи адаленцар со керена бути ко хотели или ко студентско доми ваљани те сикава шукар особине. Ола грижинена пе башо бут гостија, адалеске ценинена кеда амен сиам ленцар љубезна, стрплива хем разумна.

6. О родителија ваљани те пазинен пумаре чхавен џикоте тане ко хотели или ко студенско доми.

7. Ако икљола несаво проблеми баши соба ко хотели, вакерен е пхраленге таро Оддел раќарибаске кеда ка авен ко конгрес.

Доброволно служба: Сарине со мангена те поможинен, ваљани те пријавинен пе ко Оддел баши доброволно служба ко конгрес. Шај те поможинен чхаве да потикне таро 16 берш, ама ленцар ваљани те керел бути јекх таро родителија или јекх јавер возрасно мануш.