Саве „алатија“ користинаја те сикава е јаверен?

1. Ки која смисла о објавителија тане сар мајсторија?

¹ О мајсторија користинена различна алатија. Несаве алатија некогаш ваљани ленге само баши несави посебно бути, ама иси лен основна алатија со користинена лен секогаш. О искусна мајсторија секогаш иси лен пеа о основна алатија хем џанена сар те користинен лен. И Библија охрабринела е христијанен те ден пестар са ки служба сар ‚јекх мануш кова со керела бути хем нане состар те лаџал‘ (2. Тим. 2:15). Кова тано амаро најважно „алати“? И Библија. Ој тани амаро главно „алати“ со користинаја ле ‚те кера ученикија‘ (Мат. 28:19, 20). Адалеске ваљани те трудина амен шукар хем ‚правилно те користина о лафи е чачипаскоро‘. Ама аменде иси амен јавера да „алатија“ или литература со ваљани те сикљова шукар те користина ла те шај те сикава е манушен башо чачипе (Изр. 22:29).

2. Кола тане амаре основна пубикацие те сикава е манушен?

² Амаре основна „алатија“: Освен и Библија, кола јавера „алатија“ ваљани те користина? Прво „алати“ со користинаја те сикава е манушен башо чачипе тари Библија тано о лил Што навистина учи Библијата? Кеда завршинаја е интересентеа акава лил, тегани леа проучинаја о лил Зачувај ја Божјата љубов те шај те сикава ле сар те икерел ко пло џивдипе о начелија тари Библија. Адалеске, ваљани шукар те џана сар те користина акала дуј лила. Исто аѓаар, шај те користина сар „алатија“ несаве брошуре да. И брошура Шукар вест таро Девел! тани јекх таро основна публикацие те сикава е манушен тари Библија. Ако иси ко амаро подрачје мануша со на читинена шукар или со керена лафи ки чхиб ки која со хари иси амен пубикацие или палем нане амен нијекх, тегани шај те користина о брошуре Шун е Девле хем Шун е Девле хем џивдин вечно. И брошура Кој керела е Јеховаскири волја авдиве? поможинела аменге те сикава е интересентен те џанен побутер баши амари организација. Те шај те кера ученикија бут ка поможинен амен несаве видеоклипија, сар со и тане Соске те сикљове тари Библија?, Со керела пе ки е Јеховаскере сведоконгири дворана? хем Дали е Девле иси ле анав? Адалеске, ваљани те сикљова шукар те користина лен.

3. Сар ка поможинен аменге о статие со ка овен понадари ки Амари служба башо Царство?

³ Ки Амари служба башо Царство понадари ка овен статие со ка поможинен амен те џана пошукар те користина акала основна публикацие со иси амен сар „алатија“. Адалеа со ка трудина амен шукар те користина акала публикацие ка шуна о совет: „Пазин шукар сар џивдинеа хем сар сикавеа. Икер ту ко адала буќа, соске кериндор адава ка спасине хем тут хем адален со шунена ту“ (1. Тим. 4:16).